Samiyeel Peepeekaa 1

Samiyeel

gbɔmpeepeekaaku

Aana bí circir kɔŋkooŋŋun Siiloo paaŋŋu pu

1 Uninja ubɔ nìn bí bi yíì-u yii Eelkana. U nìn kóò Raama Suufi tiŋkin, Eefiraayiim jooŋŋin. U nìn sá Eefiraayiim naakookun ní. Bi nìn yíì u-baa yii Jeeroowaam ní ki yíì u-naanjab yii Suufi nì Toowu nì Eeliiwuu. 2 U nìn cáá binimpoobi bili: bi yíì ubɔ yii Aana ní ki yíì un kíǹee yii Peeniina. Peeniina nìn cáá mbiyaamu, ama Aana úǹ kaa nìn cáá.

3 Dibindi kamaayee, Eelkana nìn yíkí Raama kí cù Siiloo kí jāam̀ ti-Dindaan Unimbɔti Mpɔŋkɔdaan, kí ŋá saraabi kí tīī-u. Eelii nìn cáá jipɔmbi bili, Oofinii nì Fineeyaasi. Bi nìn bí niin ki sá ti-Dindaan saraaŋaliibi. 4 Eelkana yaa nìn ŋá saraayee, u nín nìn ŋáań puee di sá u nìn lèekī u-nimpuu Peeniina yati kí tīī-u, ní kí lēē u-jipɔmbi nì u-bisalib yati kí tīī-bi. 5 Ama u nìn tìì Aana dijandi din ŋān̄ tikpilee, di sá yii u nìn néeń-u tikpil, nì min kamaa ti-Dindaan kaa nìn pú-u mmaalee. 6 U-yɔnti Peeniina nìn pée nyàab̀-u tibɔti kí kɔ́ǹ-u diŋuul, kun puee Unimbɔti kaa nìn pú-u mmaal. 7 Abintil kɔkɔee, míǹ ní an nìn bí. Aana yaa nìn pée cūtì ti-Dindaan circir kɔŋkooŋŋunee, Peeniina nìn pée nyàab̀-u tibɔti ní.

Bi tí cūtì dibindi dibee ní Aana bíi sūǹ kaa là tijin. 8 Ní u-cal bālifì-u yii: «Aana, ba ŋá-si ní a sūǹ kaa là tijin ní? Ba yì-tì ní a bí kunimbaaun míǹ? Mimmee maa jítiǹ jipɔmbi saalaa pu a-ceeee?»

9 Bi jíń ki nyùn̄ míǹ ki dóò Siiloo tiŋkinee, ní Aana yíkì ki cūtìi bíi mèé. Usaraaŋakpil Eelii nìn kā u-jal pu circir kɔŋkooŋŋu nyɔkɔpu. 10 Aana nìn bí kunimbaakpaaŋŋun. U nìn bíi mèé ti-Dindaan ki sūǹ lòoloo. 11 U nìn pōoǹ ti-Dindaan yii: «Ti-Dindaan Mpɔŋkɔdaan, kpèè man a-tɔntɔnliu falaau. Téetí m-pu, taa súntí m-pu. A yaa tīī-mi kibininjabikee, m làá dū-kì kí sú sii ti-Dindaan ní. Ki-maŋfal wiiŋyi kɔkɔ poonee, bɔlfi kpá kí gbēē ki-yikpiti^a.» 12 Aana nìn mēē ti-Dindaan ki yúntì tikpil. Eelii nìn kā ki kpèé u-nyɔkɔ nín tábití puee. 13 Aana kaa nìn sòoǹ anyɔɔbun nyēē. U-nyunculiŋ di nìn pée tábití, di sá yii u nìn mèé u-pɔbilin ní. Eelii nìn dākafì yii u gbí ndaam ní. 14 Eelii nìn bí-u yii: «Kí cáá sāā ŋyunti ŋulɔŋu ní a-daam nee làá cèetī-si ní? Kpáaǹ a-danyɔgbibɔtee kí nyā doo!» - 15 Niinee ní Aana kíí-u yii: «Aayee m-dindaan, m sá unimpu un pɔbil bíil̀ee ní. Maa nyùn̄ ndaam min pɔ̀fèeyaaa, kaa tí nyùn̄ min pɔ̄ɔ̄yee mun. M dɔ́miń ki fūtì m-gìńdi ki bíl̀ ti-Dindaan nimbiin ní. 16 Taa dū man a-tɔntɔnliu kí yíiń kunimpufaŋu. Kunimbaau nì takaasi di gíti lákatì m-pu, an pu ní m mēē ki yúntì míǹ.» 17 Niinee ní Eelii kíí-u yii: «Nín̄ cá nì ŋgbansɔŋfi, Isirayeel Nimbɔtiu ń tīī-si tin a mēē-uee.» - 18 Ní Aana kíí-u yii: «Ḿ pée ká diyimɔɔl a-cee di sá.» U lī mimmee ní ki kíĺ u-saŋŋu. U bàn̄ee ní ki jíń tijin ní u-nimbiin cúu kpántì.

19 Ku wúntì kutaafaau pɔ̀lpɔlee ní Eelkana nì u-dicaŋku péé ki cūtì ki gbāaǹ ti-Dindaan nimbiin ki jáam̀-u, ní ki nín fàtī bi-dumpu Raama tiŋkin.

Samiyeel màaltam nì u-biyati

Eelkana nì u-nimpuu Aana kpáfì ní ti-Dindaan fōō u-wimmeem. 20 Aana cáá dipool ní ki màl̄ kibininjabiki. U nìn pú-kì diyindi yii Samiyeel, di sá u lī yii: «M mēē-kì ti-Dindaan cee ní.»

21 Míǹ boonee Eelkana nì u-dicaŋku kɔkɔ gítì Siiloo kí cùú ŋá dibindi kamaa saraau, nì ipoon in u nìn pōoǹee saraau. 22 Ama min bí nee, Aana kaa nìn táá u-cal ki cūtì. U nìn tùkū-u yii: «M làá cīití m yaa gíí kibiki dibiilee ní ḿ cáá-kì kí cùnnì Siiloo kí tīī ti-Dindaan, ní kí nīn kíǹ ki bí niin jaanjaan.» 23 Ní u-cal Eelkana kíí-u yii: «An ŋān̄, ŋá min a ká yii an ŋān̄ee. Kàl̄ doo kí cīití ŋyunti ŋun a yaa láa gíí-kì dibiilee. Tin bée di sá ti-Dindaan nín pōoǹ puee, ú ŋá míǹ.» Ní Aana kāl̀ Raama ki lōō u-biki áli ki dāa gíí-kì dibiil.

24 Ŋyunti ŋun Aana gíí kibikee dibiilee, ní u yōoǹ-kì ki cūnnì Siiloo ti-Dindaan circir Kɔŋkooŋŋun, nì min kamaa kì dáá sá kiwaayee. U nìn kpáaǹ abin ata najau nì ŋyim kuloou nì ndaam ntúun. 25 Eelkana nì Aana nìn dū unajee ki ŋá saraa, ní ki yōoǹ kibikee ki cūnnì Eelii cee. 26 Aana nìn bí Eelii yii: «Ukpil m gbāam̀-si, ibaamɔn ní m làá sòoǹ, man di sá unimpu un nìn dɔ́miń dalba doo ki yú a-caŋin ki mèé ti-Dindaanee. 27 Kibiki nee ní m nìn mèé ki nyàab̀ee. Ti-Dindaan tīī-mi kun m nìn mèé ki nyàab̀ee. 28 Ma mun dū-kì ki sú ti-Dindaan. Ki-maŋfal wiiŋyi kɔkɔ poonee, kì làá nīn pée sá ti-Dindaan yɔu ní.» Ní Eelkana nì u-dicaŋku gbāaǹ ti-Dindaan nimbiin niin ki jáam̀-u.