Samiyeel Liliiti i

Samiyeel

gbɔnliliitiiku

Tibɔkilkaal

Ŋkilkaaminee, Samiyeel gbɔmpeepeekaaku nì kuliliitiiu nee nìn sá kugbɔmbaantiiu ní. Unipeepeekaa un pu bi sòoǹ tikpilee yindi ní bi dūu pú kugbɔŋu nee. Úǹ di sá Unimbɔti bɔnaatiliu Samiyeel. Kugbɔŋu gbanti yākatì mili pu ní kɔŋkɔnnee. Samiyeel gbɔnliliitiiku sòoǹ Daafiidi beel bɔti ní. Daafiidi gbanti di nìn sá ubɔtipeepeekaa nì ubɔtikpaan ki jítiǹ Isirayeel yab bɔtiibi kɔkɔ.

Daafiidi nín nìn gbìl̄ Saayuul nì u-jipɔɔn Joonatan kúm pu ki gāā ikpiisilan iŋyee ní bi dūu kíĺ kugbɔŋu nee. Míǹ boonee, ku gíti sòoǹ Daafiidi nín nìn kpántì ubɔti Juuda naakookun yab pu puee (ayil 1–4). Saayuul jipɔɔn Iseebaal nìn jíń dibeel tinaakɔti tin bí ŋgan púee, ama waa nìn kāl̀ ki yúntì. U-kúm boonee tinaakɔtee nìn cūtìi kútì Daafiidi pu ní ki lēē-u ú nīn sá ubɔti. Kí yòon̄ ŋyunti gbanti ní Daafiidi kāl̀ dibeel tinaakɔti saalaa nì tilee kɔkɔ pu (Ayil 5–20). Ayil 21–24 poonee, ti kāntí Daafiidi beel bɔti tiba tin kaa bí ayil ŋin ti jítèe poonee.

Bi sòon̄ ubɔti Daafiidi pu kaa bál̀ tiba. Samiyeel gbɔnliliitiiku dàkà ubɔti kpaanti nì u-pɔŋŋu, ama ní kaa bál̀-ti u-wɔfii nì tibɔkpitil tin dɔ́miń ki kɔ́ u-dicaŋkun ki cáań dinimbinaamandee. Dijandi nee dàkà-ti yii Daafiidi sá unifutifoo ní. Nì min kamaa u béetí u-yìntitam ki mèé Unimbɔti ń dūú pɔ̄-uee dàkà yii u lafun sá ukpaan tiŋman pu.

Boon kpataaayee, cilinjee ŋyunti ŋun bi nìn wɔ́b́ Isirayeel yabee, Daafiidi di dāa kpántì ubɔti ufiil un Unimbɔti nìn pōoǹ kí tɔ̄ń u-nibul ceeyee ŋabikau ki tīī-bi. Isirayeel yab nìn téetí Unimbɔti poondi din u nìn dūu tùkū u-bɔnaatiliu Naatan ú dūú nàatī Daafiidee yii: a-kpátam boonee, a-naantiibi kansikin ubɔ làá nīn pée sá ubɔti ní (ayil 7). Doo yàntī tí béé kun pu ní Dipoompɔndi poonee, bi yíì iyunti iba Yeesu, ufiil un Unimbɔti túnnée yii «Daafiidi jipɔɔnee» (kpèè Maat 20.29-34, 21.9).