Samiyeel
gbɔnliliitiiku
Daafiidi gbìl̄ Saayuul nì Joonatan kúm pu
1
1 Saayuul kúm boonee, Daafiidi nìn cūtìi jáń ki pɔ́ɔkiǹ Amaleeki yab. U nìn gítìń ki kāl̀ Siikilaagi tiŋkin iwiin ili. 2 Ŋwintataati dalee, u bí yii ú kpèèyee, unaacimpɔɔn ubɔ di nyánní Saayuul janjanaapaal pu ki páaǹnée. U-wampeeŋkaati nìn cátì ní ntam pùkū u-yil. U bāań Daafiidi ceeyee ní ki tātìi gbāaǹ u-nimbiin dicincibil u-yil tūū kitiŋ.3 Daafiidi nìn bālifì-u yii: «A nyánní la?» Ní u kíí-u yii: «M nyánní Isirayeel yab janjanaapaal pu ní ki sáǹní.» 4 Daafiidi bí-u yii: «Tùkù-mi tin jítì niinee.» Ní u bí-u yii: «Isirayeel yab sáǹ kujaaun ní bi kūū bi-kansikin binib tikpil. Áli gba bi kūū Saayuul nì u-jipɔɔn Joonatan.» 5 Ní Daafiidi bālifì unaacimpɔɔnee yii: «A ŋá mana ní ki béè yii Saayuul nì u-jipɔɔn Joonatan kpíì?» 6 Ní unaacimpɔɔnee bí-u yii: «M pée bí Giilboowaa jool pu yìkíl̄ yikil ní. M bí yii ḿ kpèèyee, Saayuul di ŋúb́ u-kpaŋki ki nyìitēe. Janjatɔrɔkub nì bitanjakaliibi nìn kā u-pu kàti kati. 7 U fātèe ki ká-mi, ní ki yíiń-mi, ní m kíí-u yii: <Ti-baa, m sèé.> 8 Ní u bālifì-mi yii: <Sii di sá ŋma ní?> Ní m kíí-u yii: <M sá uamaleekija níb.> 9 Niinee ní u bí-mi yii: <M gbàam̄-si, dāá kpɔ̀-mi, di sá yii m-nimbiliŋ bɔ̀ntī, nì min kamaa m dáá gbíntìi fòotēe.> 10 Niinee, m sútì ki pìl̄-u ní ki kūū-u, kun puee m nyí yii u yaa lítì, waa làá pée ŋmátí. Míǹ boonee ní m cíkitì u-beefuuliiki ní ki fúutì dibɔmbil din u fúuńee ki cáań doo kí tīī-si.»
11 Niinee Daafiidi dáaĺ tiwan tin u pēēyee ki cátì, ní u-naacimbi kɔkɔ mun dáaĺ ki cátì bi-yati. 12 Bi nìn kāl̀ Saayuul nì u-jipɔɔn Joonatan nì Isirayeel yab bin kɔkɔ sá ti-Dindaan nibul bi kūū kujaaunee kpool. Bi nìn súń ki bóob́ kinyɔkɔ ki cáa sāā kujoou. 13 Daafiidi gíti bí unaacimpɔɔn un cáań tibɔti ki tùkū-uee yii: «A bí yii a sá la naaa?» Ní u bí-u yii: «Amaleeki yab bin kóò ni-puee ubɔ jipɔɔn ní m sá.» 14 Ní Daafiidi bí-u yii: «Ba pu ní aa fāŋkì ki kūū ubɔti un ti-Dindaan lēēyee?» 15 Niinee ní Daafiidi yíiń u-naacimpɔmbi ubɔ ní ki bí-u yii: «Dāá kpɔ̀ kijapaai nee.» Ní u dɔ́miń ki kūū-u. 16 Ní Daafiidi bí-u yii: «A-kpuulool làá báatí a-yil pu ní, di sá sii a-ba nyɔkɔ di sòon̄ ki kūū a-bɔti ki lī yii: <Man di kūū ubɔti un Unimbɔti lēēyee.>»
Ŋkpiisilan ŋun Daafiidi gāā Saayuul nì Joonatan puee
17 Daafiidi gāā ŋkpiisilan nee Saayuul nì u-jipɔɔn Joonatan pu. 18 U nìn tīī mara yii bí dū-ŋu kí dàkà Juuda yab. An sá Butɔbu kpiisilaŋŋu ŋun bi ŋmàn̄ ki ŋá deedeedambi gbɔŋkuneec ní.
19 Isirayeel, a-janjamɔntiibi kpíì a-gbantammu pu!
Ba pu ní a-baatandambi kpíì ní?
20 Taa gbìitīmaan-tì Gaati tiŋkin,
taa mūlifìmaan-tì Asikeelɔn daŋŋi pud.
An yaa kaa sá míǹ, Fiiliistii yab nimpoobi làá nīn fàal̀,
bin kaa gíí akpancan nee sapɔmbi làá nīn bí dipɔɔpindin.
21 Giilboowa jooŋŋie,
dimalindi ń taa ti tɔ̄ ni-pu,
utaa ń taa ti nì ni-pu,
bí taa ti ká tisati tin lòoǹee ni-pu.
Di sá yii niin ní bi kɔ́ǹ bibaatandambi gbampɔɔŋi icoo.
An kaa sá ŋkpam ní bi cáa nùkù Saayuul gbampɔɔl.
22 Kí yàntī fatiku ń nyā kí pùub̀ee,
kí jáǹ binannanliibi bin pɔ̄ɔ̄yee,
Joonatan tɔbu kaa nìn gítí bu-boon,
míǹ ní Saayuul mun tàataajiki kaa nìn nyēē kí gítiń fám.
23 Saayuul nì Joonatan nìn néeń tɔb tiŋan,
ki kpáaǹ bi-kúm poon baa yākatì tɔbin.
Bi nìn yáb̀ ki jítiǹ ikaabu,
ní ki nìn cáá dibaatandi ki jítiǹ gbikintib.
24 Isirayeel sapɔmbi, sɔ̄maan Saayuul pu.
Úǹ di nìn pēentí-ni abɔkutinyaan,
ní ki nìn cáá sindaariya wanti ki nyɔ̀kɔntí-ni.
25 Bibaatandambi kpíìń dikɔ̀ndin,
Joonatan kpíì ki dɔ̄ ŋgbantamu pu.
26 M-nabiki Joonatan, m wíì a-pu,
maa mɔ̄ a-pu.
A néeń-mi ki jítiǹ unimpu nín néeń u-cal puee.
27 Bibaatandambi kpíìń dikɔ̀ndin,
tijanjawan kaa ti bí tiban.