Samiyeel Liliiti 2

Daafiidi bí Eebrɔn tiŋkin

1 Tíǹ jítèe ní Daafiidi bālifì ti-Dindaan yii: «M ŋūǹ kí cùú kàl̄ Juuda yab timmu kiba poonaaa?» Ní ti-Dindaan kíí-u yii: «A ŋūǹ kí cù.» Ní Daafiidi gíti bālifì yii: «Kitiŋ kilaka poon ní ḿ cù?» Ní ti-Dindaan kíí-u yii: «Eebrɔn tiŋkin.» 2 Ní Daafiidi yōoǹ u-nimpoobi liitil, Ayiinoowaam un sá Jisirayeel tiŋkinee, nì Naabaal un kpíìyee nimpuu Abiigayiil un sá Kaarmeel tiŋkinee ki nín cá^a. 3 Daafiidi nìn kpáaǹ u-nib bin kɔkɔ nìn bí u-ceeyee nì bi-dicaŋŋi, ní bi cūtìi kāl̀ Eebrɔn tiŋkin. 4 Niinee ní Juuda yab dɔ́miń Eebrɔn ki bātì ŋkpam ki sītì Daafiidi yil pu ki kāaǹ-u dibeel Juuda yab pu.

Bi nìn tùkū Daafiidi yii Yaabeesi tiŋki kin bí Galaadi tiŋkinee yab di síb́ Saayuul. 5 Ní Daafiidi tú binib bi-cee bí cùú jāam̀-bi kí tùkù-bi yii: «Ti-Dindaan ń bìin̄ ni-boon ni nín dàkā ni-dindaan Saayuul dineeŋkpaandi din ki píí-u ki síb́ee pu. 6 Ti-Dindaan mun ń dàkà-ni u-neeŋkpaandi kí ŋá-ni tiŋan. Tin ni ŋá nee puee, ma mun làá ŋá-ni tiŋan. 7 Kɔŋkɔnnee ní pɔ́ɔm̀maan ni-ba kí ká dipɔbil. Ni-kpiliu Saayuul kpíì, ama ní béé yii Juuda yab bātì ŋkpam ki sītì m-yil pu ḿ nīn sá bi-bɔtiu.»

Isirayeel yab kāaǹ Isi-Booseeti dibeel

8 Ŋyunti gbantee, Neer jipɔɔn Abineer, Saayuul janjakpiliu yōoǹ Saayuul jipɔɔn Isi-Booseeti ki cūnnì Maanayiim^b. 9 Niin ní u kāaǹ-u dibeel ú nīn kpòotī Galaadi nì Aseer nì Jisirayeel nì Eefiraayiim nì Beenjameen timmu, an dàkà yii Isirayeel naakɔti tin bí ŋgan púee kɔkɔ. 10 Saayuul jipɔɔn Isi-Booseeti nìn cáá abin imuŋku ili ní ki kpántì Isirayeel yab bɔtiu, ní ki kāl̀ dibeel abin ali. Ama Juuda yab bíǹ nìn yú Daafiidi boon. 11 Úǹ nìn kāl̀ Eebrɔn tiŋkin ki jíń Juuda naakookun yab pu dibeel abin aluli nì iŋmal iluu.

Juuda yab nì Isirayeel yab jaaku

12 Neer jipɔɔn Abineer nì Saayuul jipɔɔn Isi-Booseeti nib nyáń Maanayiim ki búntì Gabawɔn. 13 Joowaab un na bi yíì Seeruyee nì Daafiidi nib mun kíĺ nsan ki nín cá, ní akiti alee cūtìi kpáfì Gabawɔn nyimbɔbil caŋin. Biba nìn bí dinyimbɔbil jandi diba pú ní bin kíǹee mun bí dijandi din kíǹee pú. 14 Ní Abineer bí Joowaab yii: «Ti-naacimpɔmbi ń nyā kí mɔ̀ bili bili ti-nimbiin dooyaa!» Ní Joowaab kíí yii: «Too!». 15 Ní Beenjameen naakookun binaacimpɔmbi saalaa nì bili nyáń ki yúl̀ Saayuul jipɔɔn Isi-Booseeti jandi pú, ní saalaa nì bili nyáń ki yúl̀ Daafiidi jandi pú. 16 Báà ŋma nìn cúú u-juti yil ní ki dū kitàataajiki ki sāā u-takakal, ní bi-kɔkɔ tin lítì dicilpu. Bi nìn pú mpaan gbanti diyindi yii Ataŋkpee Saaku. Ŋu bí Gabawɔn tiŋkin ní.

17 Ŋwiin gbanti mbaantee, kujaau nìn pōō ki píĺ ki pɔ́ɔkì. Daafiidi yab nìn jáń ki pɔ́ɔkiǹ Abineer nì Isirayeel yab. 18 Joowaab nì Abisayeel nì Asayeel bin na nìn sá Seeruyee nìn bí. Asayeel nìn tóotí kii ukɔniiyee ní. 19 Asayeel nìn pá Abineer boon ki jì-u, ki kā u-pu kàtì kati. 20 Ní Abineer fātìi bālifì-u yii: «An sá sii Asayeel níii?» Ní u kíí-u yii: «Iiin, an sá man.» 21 Ní Abineer bí-u yii: «Kpèè ŋgiil pú àá ŋgan pú kí jà kí cúú ujanjal ubɔ kí fōō u-wanti.» Ama ní Asayeel kaa kíí kí gbèen̄, ní ki gbíntìi kā u-pu. 22 Ní Abineer gíti bí-u yii: «Asayeel, páatí m-boon. Ba pu ní a là kí páb́-mi ḿ kpɔ̀-si ní? M yaa ŋá míǹ, mana ní m gíti ŋūǹ kí kpèè a-maan Joowaab nimbiin?» 23 Ama ní u yíì ki gbíntìi dī-u. Niinee ní Abineer dū u-kpaŋki yil^c ki sāā u-pool ní an tin nyáń u-boon, ní u lítì dibɔbil pu niin ki kpíì. Bin kɔkɔ yaa nìn bāań laakin Asayeel nìn kpíì ki dɔ̄ee nìn sàatī kí yūĺ ní.

24 Niinee Joowaab nì Abisayi nìn kùl̄ ki bīiǹ Abineer boon. Ŋwìiń tin lì yii ŋu jēetée, bi bàn̄ Amma gbantaŋki pu. Mpaan gbanti bí Giiya tiŋki, ŋwìiń nyalaŋki pú, Gabawɔn teeku saŋŋu pu. 25 Beenjameen naakookun yab nìn kóoǹ ki kpáfì ki yúl̀ Abineer boon. Bi nìn dūu kpáfì ki ŋá dikitil ki cūtìi yúl̀ kigbantaŋ kiba yilpu. 26 Ní Abineer kúuǹ ki bí Joowaab yii: «Ti làá nīn pée jáà yéè ki cáaa? Aa nyí yii án làá dāá kúntí nì kunimbaauaaa? Kí tin sāā ŋyunti ŋulɔŋu ní a làá tùkù a-yab bí gbèen̄ kí taa ti jà bi-nabiyaamu ní?» 27 Ní Joowaab bí yii: «Nì Unimbɔti un bí nee pu, a yaa kaa bàà lī min a lī nee, m-naacimpɔmbi bàà làá nīn jì bi-nabiyaamu míǹ ní áli kutaa ń wúntí.»

28 Niinee Joowaab búń ŋyin ní u-janjaliibi gbēeǹ kaa ti bíi jì Isirayeel yab janjaliibi ní kujaau gbēeǹ. 29 Abineer nì u-janjaliibi nìn dū kunyamɔŋu ki cōom̀ Jɔɔdan tantakalin. Bi nìn dūtì Jɔɔdan buŋŋu, ki cōom̀ kutaafaau ki tin cáa sāā kuwiŋkuluu ní ki tin bàn̄ Maanayiim. 30 Joowaab nín nìn gbēeǹ kaa ti bíi jì Abineer ki fātìi gítìńee, u nìn kóoǹ u-naacimbi ki kpáfì. Daafiidi janjaliibi ubɔ kpá mmuŋku di nìn fɔ́tì kí kūtì Asayeel pu. 31 Ama Daafiidi yab bíǹ nìn kūū Abineer nì Beenjameen naakookun yab alaataa ata nì binib imuŋku ita ní. 32 Bi nìn yōoǹ Asayeel ki cáa síb́ u-baa kaakulin Beetileem. Míǹ boonee Joowaab nì u-janjaliibi nìn cōom̀ kunyamɔŋu. Bi nìn bāań Eebrɔn tiŋkinee, ŋwiin nyáń.