Samiyeel Liliiti 3

1 Saayuul yab nì Daafiidi yab jaaku nìn yúntì tikpil. Daafiidi nìn mɔ̀tīi kāntí mpɔn ki cá, ama ní Saayuul yab bíǹ mɔ̀tīi pèefī ki cá.

Daafiidi jipɔmbi bin u màl̄ Eebrɔn tiŋkinee

(Kpèè 1 Kroo 3.1-4)

2 Daafiidi nín màl̄ mbininjabiyaamu mun Eebrɔn tiŋkinee sɔ̀. U-jipɔŋkpiliu di sá Aminɔn, ní bi yíì u-na yii Ayiinoowaam, u sá Jisirayeel tiŋkin. 3 U-jipɔnliliitiu di sá Kiileeyab, ní bi yíì u-na yii Abiigayiil, Naabaal un sá Kaarmeel tiŋkin ki kpíìyee nimpuu. U-jipɔntataatiu di sá Abisaloom, ní bi yíì u-na yii Maaka, Geesuur bɔtiu Talimayi bisal. 4 U-jipɔɔn unanaati di sá Adooniyawuu, ní bi yíì u-na yii Agiiti, ní u-jipɔɔn uŋmooŋmooti sá Seefatiya, ní bi yíì u-na yii Abitaal. 5 U-jipɔɔn ululuuti di sá Yitireeyam, ní bi yíì u-na yii Eegila, Daafiidi nimpuu ubɔ mun. Daafiidi jipɔmbi bin u nìn màl̄ Eebrɔn tiŋkinee dee.

Kujaau kɔ́ Abineer nì Isi-Booseeti kansikin

6 Ŋyunti ŋun Saayuul yab nì Daafiidi yab nìn bí ki jáàyee, Abineer úǹ nìn mɔ̀tīi kāntí mpɔn Saayuul yab kansikin. 7 Saayuul nìn cáá ubɔnti ubɔ bi yíì-u yii Riispa ní ki yíì u-baa yii Aaya. Ní Isi-Booseeti bí Abineer yii: «Ba pu ní a dōoǹ nì m-baa bɔɔn ní?» 8 An bɔtee nìn yāntì Abineer fōō diŋuul ŋkpitim pu, ní ki bí Isi-Booseeti yii: «M sá kibɔkɔ ki pá Juuda yab boonaaa? Doooo nee, maa pée nyáń a-baa cindin yab nì u-nabiyaamu nì u-bɔɔbi boon. M mɔ̀n̄ a-pu á taa kɔ́ Daafiidi ŋaan, ní díǹ nee, a bí ki wòoǹ-mi unimpu nee puɔɔ! 9 Unimbɔti ń dáaĺ m-tafal ŋkpitim pu, m yaa kaa ŋá min ti-Dindaan pōoǹ yii u làá ŋá kí tīī Daafiidee! 10 Di sá yii ti-Dindaan pūtì yii u làá fōō Saayuul dicaŋkun yab ŋaan dibeel. U làá wàan̄ Daafiidi beel Isirayeel nì Juuda timmu pu, kí yòon̄ Daani ŋgan pú kí cáá sāā Beerseeba ŋgiil pú.» 11 Isi-Booseeti kaa nìn ŋúń ki gātì Abineer báà dinyɔɔbundi, kun puee u nìn fàŋkí-u.

Abineer gítì Daafiidi jandi pú

12 Ní Abineer tú binib Daafiidi cee bí tùkù-u yii: «Ŋma di yì kitiŋ nee ní? Ŋá mpèé nì man, ní ḿ tūtuǹ-si á kóoǹ Isirayeel yab kɔkɔ kí páań a-boon.» 13 Ní Daafiidi kíí-u yii: «M làá ŋá mpèé nì si, ama kí wàatī á dāan̄ kí ká-mee, á péé péé kí dū m-nimpuu Miikaal, Saayuul bisal kí tīiń-mi^a.» Niinee a ŋūǹ kí dāan̄ kí ká-mi. 14 Ní Daafiidi tú binib Saayuul jipɔɔn Isi-Booseeti cee bí tùkù-u yii: «Dū m-nimpuu Miikaal kí tīiń-mi, di sá yii m dū Fiiliistii yab kuncooti dilaataal ní ki pàn̄ u-pu kucootiiu.» 15 Niinee Isi-Booseeti fōoń-u u-cal uliliiti, Layiisi jipɔɔn Paltiyeel cee. 16 Ní u-cal céeǹ-u ki pá u-boon ki sūǹ ki tin bàn̄ Bawuriim. Niinee Abineer bí-u yii ú nīn gítí u-dumpu ní u nín gítí.

17 Abineer kíĺ ki bíi sòoǹ nì Isirayeel tindaŋkpilib yii: «An yúntì ni nín bíi nyàab̀ yii Daafiidi ń nīn sá ni-bɔtiuee. 18 Toooo, ŋyunti bāań ní ŋá tiba. Di sá yii ti-Dindaan sòon̄ Daafiidi pu yii: <M-tɔntɔnliu Daafiidi pu ní m làá dī kí fīī Isirayeel m-nibul kí nyāntí Fiiliistii yab nì bi-nannanliibi bin kɔ kíǹee ŋaan.>»

19 Abineer nìn sòon̄ nì Beenjameen naakookun yab mun. Boonee ní u nín cá Eebrɔn ki tùkū Daafiidi u nì Isirayeel yab nì Beenjameen naakookun yab kɔkɔ nín sòon̄ ki gbìlīǹ tɔb ki yóoǹ miŋyee. 20 Bininjab mmuŋku di nìn céeǹ Abineer ní bi dūu bàn̄ Daafiidi cee Eebrɔn tiŋkin. Daafiidi nìn ŋá tican ki fōō-bi. 21 Ní Abineer bí-u yii: «M làá cùú kóoǹ Isirayeel yab kɔkɔ kí páań sii ti-baa ubɔti boon. Bi làá ŋá mpèé nì si, ní á jī dibeel an kɔkɔ pu kii a nín là puee.» U sòon̄ míǹ ki dóòyee ní Daafiidi pú-u nsan ú nīn kùǹ, ní u nín kùǹ nì ŋgbansɔŋfi.

Joowaab kūū Abineer

22 Míǹ boonee Joowaab nì Daafiidi janjaliibi dūu bāań. Bi nìn cūtì kujaau ki jáń ki fōoń tigaajawan tikpil. Ŋyunti gbantee, Abineer kaa nìn gíti bí Daafiidi cee Eebrɔn, di sá yii Daafiidi nìn yāntì u fātìi nín kùǹ nì ŋgbansɔŋfi. 23 Joowaab nì u-janjaliibi kɔkɔ nín nyánní kujaau ki bāańee, ní bi tùkū-u yii: «Neer jipɔɔn Abineer dɔ́miń ki ká ubɔti ní u yāntì u nín kùǹ nì ŋgbansɔŋfi.» 24 Ní Joowaab nín cá ubɔti cee ki bí-u yii: «Ba pu ní a ŋá mimmee? Abineer dɔ́miń a-cee ní a yāntì u fātìi nín kùǹ nì ŋgbansɔŋfaaa? 25 Kéè sii a-ba nyí Neer jipɔɔn Abineer gbantaa! U dɔ́miń ki kíil̀-si, kí béé a-filiŋfeetii kɔkɔ ní.»

26 Joowaab nyáń ubɔti ceeyee ní ki tú binib bí jà Abineer boon. Bi nìn jìn̄ ki cúú-u Siira nyimbɔbil caŋin ní ki fātìi gíiǹní-u Daafiidi kaa nyí. 27 Abineer fātìi gítìń Eebrɔn tiŋkinee, ní Joowaab cáá-u ki kākatì ŋkpaanceeti kitiŋ punyɔkɔ poon pú kii u là kí lɔ̄kɔfì-u tibee. Niin ní u sāā u-pool kitàataajiki ki kūū-u ki tɔ̀n̄ u-nabiki Asayeel kúm pɔntooŋyi.

28 Boonee Daafiidi nín dāa gbìl̄ tin jítèe ní u fáá mbiil yii: «Ti-Dindaan nyí yii man nì m-beel kaa kútì Neer jipɔɔn Abineer kúm bɔti poon. 29 Abineer kúm kpuulool ń lítí Joowaab nì u-dicaŋku yil pu. U-dicaŋku poonee, bin wunti làá nīn yàkà, àá bin dinyaŋgbandi làá cúúyee, àá bin làá nīn sá bideembi ki ŋúb́ ŋkpandɔ ki nyìitēe, àá bin bi làá dū kitàataajiki kí kpɔ̀ee, àá bin ŋkùm làá cúúyee ń taa lóó.» 30 Joowaab nì u-nabiki Abisayi nìn sāā ki kūū Abineer, kun puee u nìn kūū bi-nabiki Asayeel kujaaun Gabawɔn tiŋkin.

31 Daafiidi nìn tùkū Joowaab nì bijanjaliibi bin kɔkɔ bí u-ceeyee yii: «Cátímaan tiwan tin ni pēēyee, kí dū kutukub kí gbìn̄ kí dàkà yii ni bí kunimbaaun kí sɔ̄ Abineer kpool.» Ubɔti Daafiidi nìn còom̄ ki pá utaŋkpiil boon ní. 32 Eebrɔn ní bi síb́ Abineer. Ubɔti nìn súń ki yíkintì Abineer kaakul pu, ní samaa kɔkɔ bíi sūǹ. 33 Ní ubɔti gāā Abineer kúm pu ŋkpiisilan nee yii:

Abineer, ba pu ní a kpíì

kii ugbaan nín kúù puee?

34 Baa nìn bóob́ a-ŋalii,

kaa bá a-taaŋi abaa.

Ama ní bi kūū-si

kii unil un kɔ́ binikpɔliibi ŋaanee.

Ní samaa kɔkɔ mɔ̄tìi bíi sūǹ u-pu. 35 Ŋyunti ŋun ní ŋwìiń dáá bée ní samaa dɔ́miń ki páb́ Daafiidi yii ú jī tijin fiii. Ní Daafiidi pūtì ki lī yii: «Ŋwìiń yaa kaa jéetì ní m yaa ŋmɔ́ kpɔnɔ àá m jíń tibee, Unimbɔti ń dáaĺ m-tafal ŋkpitim pu.»

36 Samaa kɔkɔ nìn dáań ki ká míǹ ní an nìn ŋān̄ bi-cee. Tin kɔkɔ ubɔti nìn ŋáańee nìn ŋān̄ samaa cee ní. 37 Juuda nì Isirayeel yab kɔkɔ nìn béè yaadal wiiŋŋu yii ubɔti kaa nìn nyí Neer jipɔɔn Abineer kúm poon tiba. 38 Ní Daafiidi gíti bí u-naacimbi yii: «Naa nyí yii dibɔtibil, unikpaan di kpíì díǹ wiiŋŋu Isirayeel tiŋkinaaa? 39 Nì min kamaa bi sītì m-yil pu ŋkpam m kpántì ubɔtee, maa ŋūǹ kí dàkà mpɔn kii binib bin na bi yíì yii Seeruya nee nín ŋá puee. Ti-Dindaan ń téeǹ utɔŋfiti u-toom paati nín sá puee.»