Samiyeel Liliiti 4

Isi-Booseeti kúm

1 Saayuul jipɔɔn Isi-Booseeti nín gbìl̄ yii Abineer kpíì Eebrɔn tiŋkinee, ní u-pɔbil bíil̀ ní tifaandi kɔ́ Isirayeel yab kɔkɔ.

2 Saayuul jipɔɔn Isi-Booseeti nìn cáá bijanjakpilib bili bi kpòotī ajanjakiti. Bi nìn yíì ubɔ yii Baana ní ki yíì un kíǹee yii Reekaab. Bi nìn sá Beerooti tiŋkin, ní bi nìn yíì bi-baa yii Riimɔn, u sá Beenjameen naakookun. - Beerooti nìn sá Beenjameen naakookun yab timmu kiba ní. 3 Beerooti yab nìn sáǹ ki cūtìi kɔ́ Giitayiim tiŋkin, ní ki gbíntì niin ki kāl̀ ki dāa sāā díǹ. 4 Di sá Saayuul jipɔɔn Joonatan nìn cáá jipɔɔn ubɔ u-taaŋi wɔ̀b̄. U nìn cáá abin aŋmoo ŋyunti ŋun binib nìn nyánní Jisirayeel tiŋkin ki dɔ́miń ki lī yii Saayuul nì Joonatan kpíìyee. Un nìn lòó-uee nìn kpáaǹ-u kí sāǹ. U nín bíi nyàab̀ malaa puee ní kibiki nyáń ki lítì ní ki kpántì udeen. Bi nìn yíì-u yii Meefiibooseeti ní.

5 Riimɔn un sá Beerooti tiŋkinee jipɔmbi Reekaab nì Baana nìn nín cá Isi-booseeti dumpu kuwiŋkuluu. Úǹ nìn dɔ̄ u-diikun ki ŋùŋfī. 6 Bi nìn tú bilee ki kpáaǹ ki kɔ́ u-diiku poon ní ki sāā u-pool ki kūū-u. Bi ŋá míǹ ki dóòyee ní ki nyáń ki kátì. 7 Bi nìn kɔ́ u-dumpu ŋyunti ŋun ní úǹ nìn dɔ̄ u-dooŋu pu u-didooŋkaakun ki gèeǹee. Bi nìn kūū-u ki lēē u-yil ki dūu dī Jɔɔdan tantakal saŋŋu ki cōom̀ kunyamɔŋu. 8 Bi yōoǹ Isi-Booseeti yil ki cáa tīī Daafiidi Eebrɔn tiŋkin ní ki bí-u yii: «Kpèè, Saayuul un nìn sá a-nannanliu ki nìn nyàab̀ kí kpɔ̀-see jipɔɔn Isi-Booseeti yil sɔ̀. Ti-Dindaan kūū Saayuul nì u-maaliŋun yab ki tɔ̀n̄ a-pɔntooŋyi díǹ.» 9 Ní Daafiidi kíí Riimɔn un sá Beerooti tiŋkinee jipɔmbi Rakaab nì u-nabiki Baana yii: «Ti-Dindaan un nyántì-mi animbinaaman kɔkɔ poonee bí dimaŋfalin! 10 Unil un nìn dɔ́miń ki tùkū-mi yii Saayuul kpíìyee nìn dākafì yii u nìn cáań-mi dinyɔɔbummɔɔndi ní. Ama m nìn yāntì bi cúú-u ki kūū-u Siikilaagi tiŋkin ki pàn̄ u-nyɔɔbummɔɔndi paati. 11 Kin ataa aŋa pu ní maa làá pà binikpitib bin sāā ki kūū maanyiiba un dɔ̄ u-dooŋu pu u-diikunee. M làá dáaĺ ni-tafal nnikpaakoon gbanti pu ní kí kúntí-ni kitiŋ pu.»

12 Niinee ní Daafiidi pú u-naacimpɔmbi kinyɔkɔ yii bí kpɔ̀-bi. Bi nìn kūū-bi ní boonee ki gūutì bi-ŋalii nì bi-taaŋi ki dūu lúntì Eebrɔn nyimbɔbil caŋin. Bi nìn yōoǹ Isi-Booseeti yil ki cáa síb́ Abineer kaakulin, Eebrɔn tiŋkin.