Samiyeel Liliiti 5

Daafiidi kpántì Isirayeel yab kɔkɔ bɔtiu

(Kpèè 1 Kroo 11.1-3)

1 Isirayeel yab naakɔti kɔkɔ dɔ́miń Eebrɔn tiŋkin ki ká Daafiidi ki bí-u yii: «Ti baasii pēē dinabiil ní^a. 2 Iyunti in jítèe, min Saayuul nìn sá ti-bɔtiuee, sii di nìn līī Isirayeel yab janjaliibi nyɔkɔpu ki cáǹ-bi kujaau. Ní ti-Dindaan nìn pōoǹ-si yii: <Sii di làá dāá kpàà Isirayeel yab man nibul kí nīn sá bi-bɔtiu.>» 3 Isirayeel yab kpilib kɔkɔ nìn dɔ́miń Eebrɔn tiŋkin Daafiidi cee. Niin ní u nì bi ŋá mpèé ti-Dindaan nimbiin, ní bi bātì ŋkpam ki sītì u-yil pu ú nīn sá Isirayeel yab bɔtiu. 4 Daafiidi nìn cáá abin mmuŋku nì saalaa ní ki jíń dibeel. U nìn kāl̀ dibeel abin imuŋku ili ní. 5 U nìn kāl̀ Eebrɔn tiŋkin ki jíń Juuda yab pu dibeel abin aluli nì dijandi, ní ki kāl̀ Jeerusaleem ki jíń dibeel Isirayeel yab nì Juuda yab kɔkɔ pu abin mmuŋku nì saalaa nì abin ata^b.

Daafiidi jáń ki fōō Jeerusaleem tiŋki

(Kpèè 1 Kroo 11.4-9, 14.1-2)

6 Ubɔti Daafiidi nì u-yab bóob́ kí já nì Jeebusi yab bin kóò Jeerusaleem tiŋkinee. Binib gbanti nìn bí Daafiidi yii: «Aa làá kɔ́nní kitiŋ nee poon! Bijɔfub nì bideembi saaleen di làá jà-si kí gíiǹ.» Bi nìn là kí lì yii Daafiidi kaa làá ŋmā kí kɔ́^c. 7 Daafiidi jáń ki fōō Siiyɔn, kitiŋ pɔŋŋu pɔ̀ti pu laakin bi máń diguŋkpaandi ki túee. Kí yòon̄ ŋyunti gbantee ní bi kíǹ ki yíì niin yii Daafiidi Tiŋki.

8 Daafiidi nìn lī ŋwiin gbanti yii: «Un yaa là kí já kí pɔ̄ɔkiǹ Jeebusi yabee, udaan ń dī kubùŋu kun bi cátì kitiŋee pu kí kɔ́ kí nyā bi-pu. An yaa kíǹ bijɔfub nì bideembee, maa là bi-bɔti.» Niin ní dilìmbil nee nyáń yii: «Bijɔfub nì bideembi kaa kóò kunimbɔtidiin.»

9 Daafiidi cūtìi kāl̀ kitiŋ pɔ̀ti pu laakin bi máń diguŋkpaandi ki túee ní ki pú niin diyindi yii <Daafiidi Tiŋki>. Boonee, u nìn fātìi máń ki māntìi tú kí yòon̄ Miiloo kí nīn cá poon pú^d. 10 Daafiidi nìn mɔ̀tīi kāntí mpɔn ki cá, ní ti-Dindaan Unimbɔti Mpɔŋkɔdaan nìn bí u-cee.

11 Tiir yab bɔtiu Iram nìn túnní binib Daafiidi cee. Bi nìn cáań-u busubu bun bi yíì seediree dɔi nì kapintab nì bitaŋkpakpitiliibi bí mā-u dibeecindi. 12 Niinee, Daafiidi nìn béè yii ti-Dindaan u-ba di kāaǹ-u Isirayeel tiŋki pu dibeel, ní Isirayeel u-nibul puee, u bíi yòontí u-beel yilpu.

Daafiidi jipɔmbi bin u màl̄ Jeerusaleemee

(Kpèè 1 Kroo 3.5-9, 14.3-7)

13 Daafiidi nín nìn yíkì Eebrɔn ki cūtìi kíǹ ki bí Jeerusaleemee, u nìn gíti cáá binimpoobi tikpil ki kútì, binimpukpilib nì nnimpuwaamu, ní bi nìn màl̄-u mbininjabiyaamu nì nnimpubiyaamu. 14 Nninjabiyaamu mun u màl̄ Jeerusaleemee yiŋŋi sèé: Samuwa nì Soobaab nì Naatan nì Saloomɔn, 15 nì Yiibaar nì Eelsuwa nì Neefeegi nì Yaafiya nì 16 Eelsama nì Eeliyadaa nì Eeliifeeleeti.

Daafiidi jáń ki pɔ́ɔkiǹ Fiiliistii yab

(1 Kroo 14.8-16)

17 Fiiliistii yab nín nìn gbìl̄ yii bi bātì ŋkpam ki sītì Daafiidi yil pu ki kāaǹ-u dibeelee, ní bi-kɔkɔ nín cá kí nyàab̀-u kí cúú-u. Daafiidi gbìl̄ an bɔtee ní ki nín sìntī kibalilaŋin. 18 Fiiliistii yab bàn̄ee ní ki yàl̄ ki gbí Reefayiim tantakalin. 19 Ní Daafiidi bālifì ti-Dindaan yii: «Ḿ cùú já nì Fiiliistii yabaaa? A làá dū-bi kí ŋá m-ŋaanaaa?» Ní ti-Dindaan kíí Daafiidi yii: «Cùú já nì bi, m làá dū-bi kí ŋá a-ŋaan.»

20 Niinee Daafiidi nín cá áli Baal Peerasiim ki jáń ki pɔ́ɔkiǹ-bi niin. Ní ki bí yii: «Kii nnyim nín cífí nnyimbilkaam gundi dibùndi puee, míǹ ní m-Dindaan cátì nsan m-nimbiin m-nannanliibi kansikin!» An pu ní bi pú niin diyindi yii Baal-Peerasiim. Taapu di sá yii: «Un cífí dibùndee Kpiliu.» 21 Fiiliistii yab nìn sáǹ ki fá bi-waaŋi niin, ní Daafiidi nì u-naacimbi dɔ́miń ki yōoǹ.

22 Fiiliistii yab fātìi tí gítìń ki yàl̄ ki gbí Reefayiim kí já nì Daafiidi. 23 Ní Daafiidi bālifì ti-Dindaan ní úǹ kíí-u yii: «Á taa bíití bi-nimbiin pú kí já nì bi! Màntī bi-boon pú, ní kí dāá nyā bi-pu isufi taapu. 24 A yaa láa gbìl̄ bi-tagbiŋŋi pu isufee yilpuee, á yáb́ malaa. Ti-Dindaan di līntì a-nyɔkɔpu kí já nì Fiiliistii yab janjakitil.» 25 Ní Daafiidi ŋá kii ti-Dindaan nín bí ú ŋá puee, ní ki jáń ki pɔ́ɔkiǹ-bi, ki jìn̄-bi kí yòon̄ Geeba ki tin cáa sāā Geeseer kpaanyɔkɔ.