Samiyeel Peepeekaa 31

Saayuul kúm

1 Fiiliistii yab nìn jáń nì Isirayeel yab Giilboowa jool pu. Isirayeel yab nìn sáǹ ní Fiiliistii yab kūū-bi tikpil. 2 Fiiliistii yab nìn jɔ́m̀ ki kāl̀ Saayuul nì u-jipɔmbi pu kàtì kati. Bi nìn kūū ubɔti jipɔmbi Joonatan nì Abinadaab nì Malkisuwa. 3 Niinee dikɔ̀ndi kóoǹ ki nyīŋfì Saayuul pu. Bipintɔliibi nín dāa ká-uee ní u-pɔbil bíil̀ ní u-wunti kíǹ ki gbáà kpàkpakpa. 4 Ní Saayuul bí un ŋúb́ u-janjawantee yii: «Fúutí a-tàataajiki ki sāā kí kpɔ̀-mi. Maa là yii Fiiliistii yab bin kaa gíí akpancan nee ń kpɔ̀-mi kí nīn cáa bèel̄-mi.» Ama ní un ŋúb́ u-janjawantee fāŋkì ní ki yíì. Niinee ní Saayuul yōoǹ úǹ u-ba tàataajiki ki cóoǹ ki lítì ki-pu. 5 Un ŋúb́ u-janjawantee ká yii u-kpiliu kpíìyee, ní u mun dū u-tàataajiki ki cóoǹ ki lítì ki-pu ki kpíì. 6 An nín dī min ní Saayuul nì u-jipɔmbi taatil nì un ŋúb́ u-janjawantee kpíì ŋwimbaantee dee.

7 Isirayeel yab bin kóò ditantakal lapu pu gbandee nì bin kóò Jɔɔdan buŋŋu lapu pu gbantee nín gbìl̄ yii Saayuul nì u-jipɔmbi taatil kpíì ní Isirayeel yab sáǹee, ní bi yíkìi sáǹ ki fá bi-timmu, ní Fiiliistii yab dɔ́miń ki kāl̀.

8 Ku wúntì Fiiliistii yab dɔ́miń kí fūkul̀ bin bi kūūyee wantee ní ki ká yii Saayuul nì u-jipɔmbi taatil kpíì ki dɔ̄ Giilboowa jool pu. 9 Bi nìn lēē u-yil, ki pēetì u-janjawanti, ní ki tú ki yìiǹ Fiiliistii yab timmu kɔkɔn nì awaadiinni nì aniwulin ki tùkù báà ŋma bi-jajil pu. 10 Boonee ní bi cáá u-janjawanti ki yóoǹ diwaal din bi yíì Asitaarteeyee diikun, ní ki dū dinikpilee ki bóob́ ki nákáǹ Beeti-Seeyan gundi.

11 Bin kóò Yabeesi Galaadi tiŋkinee gbìl̄ Fiiliistii yab nín ŋá Saayuul puee. 12 Ní bininjab bin cáá dibaatandee yíkì ki cōom̀ kunyamɔŋu ki tin bàn̄ Beeti-Seeyan gundi ki yōoǹní anikpil, Saayuul nì u-jipɔmbi. Bi cáá-bi ki bāań Yabeesee ní ki dū-bi ki wùn̄ ŋŋmi. 13 Boonee ní bi kóoǹ bi-kpabiŋ ki dūu síb́ busubu bun bi yíì tamariisee taapu Yabeesi tiŋkin, ní ki bóob́ kinyɔkɔ iwiin iluli.