Samiyeel Peepeekaa 30

Amaleeki yab nāaǹ Siikilaagi tiŋki

1 Winta dalee, Daafiidi nì u-naacimbi fātìi bàn̄ Siikilaagi tiŋkin. Amaleeki yab nìn dɔ́miń ki jáń nì Juuda tiŋki ŋgiil pú yab nì Siikilaagi yab. Bi nìn nāaǹ Siikilaagi tiŋki ki tūū-kì ŋŋmi. 2 Bi cútì binimpoobi nì bin kɔkɔ nìn kóò ki-poonee, ama baa nìn kūū báà ubɔ. Bi nìn yōoǹ bi-kɔkɔ ki kíĺ bi-saŋŋu ki búntì. 3 Daafiidi nì u-yab bāańee ki ká yii bi-tiŋki wùn̄ ŋŋmi, ní bi cúú bi-nimpoobi nì bi-jipɔmbi nì bi-bisalib ki kpáàa búntì. 4 Niinee Daafiidi nì u-naacimbi kíĺ ki bíi gà dituweel mpɔn, ki súń áli kaa ti gíti cáá mpɔn gba kí sɔ̄. 5 Bi nìn cúú Daafiidi nimpoobi liitil mun, Akiinoowam un sá Jisirayeelee nì Nabaal nimpuu Abiigayiil un sá Kaarmeelee. 6 Tibɔtee nìn kɔ́ǹ Daafiidi kunimbaau tikpil, di sá yii u-naacimbi nìn bíi sòoǹ yii bi làá yāŋkì-u ataŋkpee kí kpɔ̀. Báà ŋma nyɔkɔ nìn túŋkì bi nín bíi dàkafī bi-jipɔmbi nì bi-nimpoobi pu puee. Ama Daafiidi nìn fātìi ká kunyannyaau ti-Dindaan u-Nimbɔtiu pu.

7 Niinee Daafiidi bí usaraaŋakpil Abiyataar, Ayiimeeleeki jipɔɔn yii: «M gbāam̀-si, cáań-mi eefoodi.» Ní Abiyataar yōoǹ ki cáań-u. 8 Ní Daafiidi bālifì ti-Dindaan yii: «M yaa jìn̄ dinikitil nee boon, m làá tin cúú-dàaa?» Ní ti-Dindaan kíí-u yii: «Yīkìi jà bi-boon, a làá cúú-bi ní kí fōō a-yab bi-ŋaan.»

9 Ní Daafiidi yōoǹ u-naacimbi binib alaataa aluu ki nín jì. Bi bàn̄ Beesoor buŋŋuee ní biba gbíntì niin. 10 Binib kulaafaau nìn gīī ki gbíntì Beesoor buŋgbandi kaa ŋúń ki dūtì ní Daafiidi nì binib alaataa anaa nìkī ki nín jì bi-boon. 11 Bi bí ki jì binibee boonee ní ki ká ueejipitija ubɔ kusaaun ní bi cáań-u Daafiidi cee, ní ki tīī-u kpɔnɔ u ŋmɔ́, ki tīī-u nnyim u nyùn̄. 12 Bi nìn tīī-u fiigi kalaau nì fiinyi biliŋ akulim asaka ali. U jíń ki dóòyee ní ki fātìi ká mpɔn, di sá waa nìn jíń tiba kaa nyùn̄ tiba áli iwiin ita ŋwiimpu nì kunyeeu. 13 Boonee ní Daafiidi bālifì-u yii: «Ŋma di yì-si, ní a nyánní la?» Ní u kíí-u yii: «M sá ueejipitija ní, Amaleeki yab ubɔ yumbuu ní m sá. M-kpiliu dū-mi ki fá díǹ nee iwiin ita sɔ̀, kun puee m búŋkì. 14 Timbi di cūtì ki jáń nì Keereeti yab nì Juuda yab nì Kaaleeb yab bin kóò ŋgiil púee. Timbi di tí tūū Siikilaagi tiŋki ŋŋmi.» 15 Ní Daafiidi bí-u yii: «A làá cùnnì-mi binib gbanti ceeee?» Ní u bí-u yii: «Pùtī Unimbɔti yii aa làá kpɔ̀-mi, àá aa làá gíiǹ-mi kí ŋúbiǹ m-kpiliu, mimmee m làá cùnnì-si dinikitil gbanti cee.»

Daafiidi jáń ki pɔ́ɔkiǹ Amaleeki yab

16 Ní kijapaayee cáá Daafiidi ki cūnnì. Bi bàn̄ee Amaleeki yab yàl̄ ki gbí kitiŋ kɔkɔn ki cáá tin bi jáń ki kūliŋkìń Fiiliistii nì Juuda yab timmunee ki jīǹ ki nyù ki jīǹ jiŋaal. 17 Ní Daafiidi kíĺ kutaafaau pɔ̀lpɔl ki jàkā-bi butɔbu áli kutaa wúntì ki dāa sāā kujoou. Báà ubɔ kaa nìn ŋmátì, see binaacimpɔmbi alaataa anaa di ŋúń ki kāl̀ igutaamu pu ki sáǹ ki ŋmátì. 18 Daafiidi nìn fīī binib bin kɔkɔ Amaleeki yab nìn cúúyee ki kpáaǹ tiwan tin bi nìn yōoǹee. Cilinjee u nìn fīī u-nimpoobi liitil. 19 Binib bin kɔkɔ bi nìn cúúyee, ŋwaamu nì bikpaambi, bi-jipɔmbi nì bi-bisalib nì tin kɔkɔ bi nìn yōoǹee, báà tiba nì tiba kaa nìn fɔ́tì. Daafiidi nìn fōō kɔkɔ ki gíiǹní. 20 U nìn fōoń ipii nì iŋoobu nì inaa, ní bin nìn péetiń-iee lì yii: «Kpèèmaan Daafiidi nín jáń ki fōoń tiwan tiŋyee.»

21 Boonee ní Daafiidi fātìi gítì binib kulaafaau bin nìn gīī kaa nìn ŋúń ki nóó-u ki gbíntì Beesoor buŋgbandee cee. Bi nìn nyáń ki túŋkì Daafiidi nì u-yab, ní Daafiidi jáam̀-bi. 22 Ŋyunti gbantee, Daafiidi janjaliibi kansikin binikpitib nì bin kaa bí tibanee bí yii: «Kii bi nín kaa nóó-ti ti cūtì kujaauee, baa làá ká tin ti fōoń kujaaunee báà tiba. Asee bi-nimpoobi nì bi-biyaamu ní ti làá dūú tīī-bi ní bí nīn cá.» 23 Ama ní Daafiidi bí yii: «M-nabiyaamu, taa dūmaan tiwan tin ti-Dindaan dūu tīī-tee kí ŋá míǹ. Úǹ di wúń ti-pu, ní ki dū dinikitil din dɔ́miń ki jáń nì tee ki ŋá ti-ŋaan. 24 Ubɔ kaa làá pīlifì tin ni sòoǹee.

Báà ŋma làá pée fōō u-jandi ní.

Bin kāl̀ ki cíitì awaŋgulee

nì bin cūtì kujaauee,

bi-kɔkɔ làá yàkatī án nīn ŋmà ní.>»

25 Ki yōoǹ yaadal wiiŋŋu ní Daafiidi dū tibɔti gbanti ki kpántì mara nì dikoobil ki tīī Isirayeel yab. An bí míǹ ki dāa sāā díǹ.

26 Bi fātìi bāań Siikilaagee ní Daafiidi lēē tin bi jáń ki fōońee poon tiba ki cáa tīī Juuda yab kpilib u-bɔɔbi ní ki bí-bi yii: «Kpèèmaan ni-wampɔkaati sèé, ti fōoń-tì ti-Dindaan nannanliibi cee ní.» 27 U tú bi cáa tīī Beeteel kpilib nì Ramooti yab bin bí Neegeeb tiŋkee nì Yatiir yab, 28 nì Arooweer yab nì Sifimooti yab nì Eekiteemoowa yab, 29 nì Rakal yab nì Yeerameel yab nì Keeni timmu yab, 30 nì Ɔrima yab nì Boor-Akan yab nì Ataaki yab, 31 nì Eebrɔn yab nì ntimu mun poon u nì u-naacimbi nìn cōom̀ ki jítèe yab.