Ruuti Gbɔŋku i

Kugbɔŋu kun sòoǹ

Ruuti

puee

Tibɔkilkaal

Ruuti bɔti tin bi ŋmàn̄ kugbɔŋu nee poonee jítì ŋyunti ŋun Bibɔsoonliibi nìn dá láá kpòotī Isirayeel yabee ní. Ŋyunti gbantee baa nìn dá láá kàantí bibɔtiibi Isirayeel tiŋkin, ama Unimbɔti di nìn lèekī bibaatandambi ní bí já kí fīī u-nib bi-nannanliibi ŋaan. Bíǹ ní bi nìn yíì yii bibɔsoonliibi.

Kun pu bi dū tibɔti nee ki ŋmàn̄ ki ŋá kugbɔŋunee di sá kí dàkà yii unimpu un bi yíì Ruuti waa sá Isirayeelee dɔ́miń ki kɔ́ Unimbɔti nibul poon. An puee, bi nín máafì tibɔti gbantee, tin bi baasii lēē ki dàkēe di sá Ruuti, kimoowaabibiki nín dū u-maŋfal kɔkɔ ki sú u-cal dicaŋku nì Isirayeel Nimbɔtiu puee. Tibɔti nee māafitam poonee, ti kāntí tipaal tin ní Unimbɔti pàn̄ Ruuti u nín dū u-maŋfal kɔkɔ ki sú puee. Di sá yii u yāntì falaa un poon ní Ruuti nì u-beel Nawoomii nìn bée dūu kpántì digbíl nì nnaam. Bi nín fātìi dū tibɔti tin nìn jítì doooo cannaaku ki máafì kii díǹ ní tì jítèe, dàkà unil nín máaǹ kí nīn yú deedee nì u-juti puee, nì dimákal din u máaǹ kí nīn cáá Unimbɔti puee.

Kugbɔŋu nee poonee, tin baasii páb́ee di sá kibininjabiki kin Ruuti màl̄ee bɔti, kun puee kibiki gbanti di dāa kpántì ubɔti Daafiidi naanja. Mimmee ubɔti Daafiidi naan Ruuti un nìn sá kimoowaabibikee mun sákaǹ Yeesu maaliŋu nyeeŋu poon dee (Maat 1.5).