Ruuti Gbɔŋku 1

Kugbɔŋu kun sòoǹ

Ruuti

puee

Nnaabu ŋun kɔ́ Eeliimeeleeki dicaŋkuee

1 Ŋyunti ŋun bibɔsoonliibi nìn dáá kpòotī Isirayeel tiŋkee, ŋkùm miba nìn nyáń kitiŋ pu. Ní uninja ubɔ nìn yíkì Beetileem^a, Juuda tiŋkin ki kpáaǹ u-nimpuu nì u-jipɔmbi liitil ki cūtìi kāl̀ Moowaab tiŋkin. 2 Bi nìn yíì uninjee yii Eeliimeeleeki^b, ki yíì u-nimpuu yii Nawoomii^c ní ki yíì u-jipɔmbee ubɔ yii Maalɔn^d ní ki yíì un kíǹee yii Kiiliyɔn^e. Bi nìn sá Eefiraata maaliŋun nib ní ki kóò Beetileem, Juuda tiŋkin. Bi nìn bàn̄ Moowaab yab satinee ní ki gbíntì niin ki kāl̀. 3 Bi bí niin ní Eeliimeeleeki kpíì ki fá u-nimpuu Nawoomii nì u-jipɔmbi liitil. 4 Ní u-jipɔmbee cáá bimoowaabisapɔmbi. Bi nìn yíì ubɔ yii Ɔripa ní ki yíì un kíǹee yii Ruuti. Bi nìn kāl̀ Moowaab satin niin an bàn̄ kii abin saalaa nyɔkɔm. 5 Boonee ní Maalɔn nì Kiiliyɔn liitil mun dāa kpíì, ní Nawoomii kíǹ u-baba, u-biyaamu liitil kaa ti báaa, u-cal mun kaa ti bí.

Ruuti nóó Nawoomii bi nín gítí Beetileem tiŋkin

6 Nawoomii bí Moowaab satin niin ní ki gbìl̄ yii ti-Dindaan dàkā u-nibul kulaŋŋaŋfitiiu ki tīī-bi tikpaajin. Di sá ní Nawoomii bɔ́ntì kí fàtīí yīkì Moowaab tiŋki, u nì u-coopoobi liitil. 7 An puee ní u yíkì Moowaab tiŋki laakin u nìn kóòyee ki kpáaǹ u-coopoobi. Bi nìn kāl̀ nsan pu kí nīn gítí Juuda tiŋkin. 8 Bi nyáń nsannee ní Nawoomii bí u-coopoobi liitilee yii: «M-bisalib, nín̄ gítímaan! Báà ŋma ń nīn cá u-na cee^f. Ti-Dindaan ń ŋá-ni tiŋan kii ni mun nín ŋá man nì ni-calib bin kaa ti bí ti-cee nee tiŋan puee. 9 Ti-Dindaan ń yàntī ní fàtīí ká ticamɔntiil, ni-kansikin báà ŋma ń ká diŋuŋfil kucadiin.» Nawoomii lī mimmee ní ki kpàl̄ u-coopoobi liitil ki kāaǹ-bi. Ama ní u-coopoobi kíĺ ki bíi sūǹ mpɔn, 10 ní ki bí-u yii: «Kpáb! Timbi làá nóó-si ní kí cù a-yab cee.» 11 Ní Nawoomii bí-bi yii: «Nín̄ gítímaan, m-bisalib! Ba pu ní ní nīn gbíntìi nóó-mi? M nín bí pu nee, m gíti ŋūǹ kí màal̀ mbininjabiyaamu mú cáá-naaa^g? 12 Nín̄ gítímaan, m-bisalib, nín̄ cámaan! Di sá yii man púĺ ki jítì dicamɔndi pu. Laakin m bí nee, maa ti ŋūǹ kí fàtīí mɔ̄ǹ uninja. Báà m yaa bàà pée dākafì ki lī yii: <M dáá gbíntìi cáá dimákal yii, man nì uninja yaa kpáfì kunyeeu nee, m làá màal̀ mbininjabiyaamu>, 13 ní ki yaa lafun ŋá míǹ, ni làá kíí kí kàl̄ kí cīití-mu mú dāá wíiǹaaa? Ni làá nīn kā ki cí-mu míǹ mú wíiǹ kí dāá cáá-ni, kaa làá nyàab̀ bininjab kí mɔ̄ǹaaa? Aayee, m-bisalib! Man falaau gíti lákatì tikpil nì nimbi yɔu, kun puee ti-Dindaan u-ba di gbáń-mi.»

14 Niinee ní bi fātìi tí kíĺ ki bíi sūǹ mpɔn. Ní Ɔripa kpàl̄ u-beel Nawoomii ki kāaǹ-u ki nín gítí u-yab cee, ama ní Ruuti úǹ yíì ní ki dū u-ba ki yá ki nákáǹ u-beel. 15 Ní Nawoomii bí-u yii: «Kpèè, a-yɔnti úǹ nín gítí u-yab nì u-nimbɔtii cee. Sii mun páań u-boon ní nīn gítí!» 16 Ní Ruuti kíí-u yii: «Taa páb́-mi yii ḿ nīn cá kí dū-si kí fá. Laakin a làá cùee, niin ní ma mun làá cù. Laakin a làá kɔ́ee, niin ní ma mun làá kɔ́. A-nibul làá nīn sá m-nibul, ní a-Nimbɔtiu ń nīn sá m-Nimbɔtiu. 17 Laakin a làá kpúee, niin ní ma mun làá kpú ní bí síb́-mi niin. Ŋkúm baba di làá yàkatī man nì sii kansikin. An yaa kaa ŋá míǹ, ti-Dindaan ń dáaĺ m-tafal kí gíti dáaĺ m-tafal.»

18 Nawoomii nín ká yii Ruuti dáá pée gbíntìi cɔ́ yii u làá nīn nóó-u ki cée, ní u ŋmíl̀ kaa ti gātì-u báà tiba.

19 Ní Ruuti nì Nawoomii liitil nóó ki tin kɔ́ Beetileem tiŋkin. Bi nín bàn̄ ki kɔ́ Beetileem tiŋkin bi ká-bee ní an ŋá binib kɔkɔ yèeee, ní binimpoobi kíǹ ki bàlifī tɔb yii: «Mimmee Nawoomii lafun sɔ̀ɔɔ?» 20 Ní Nawoomii bí-bi yii: «Ní taa ti yíiń-mi yii Nawoomii! Ní nīn kíǹ ki yíì-mi yii Maara^h, kun puee Unimbɔti Mpɔŋkɔdaan yāntì m-nyɔkɔ túŋkì! 21 Di sá yii nì digbíl ní m nìn búntì, ama ní ti-Dindaan fātìi gíiǹní-mi nì iŋaŋkulim. Ní taa ti yíiń-mi yii Nawoomii, kun puee ti-Dindaan Mpɔŋkɔdaan sòon̄ ki kūū m-bɔti ní ki yāntì m kpántì unandaan.»

22 Min ní Nawoomii nìn yíkìń Moowaab satin ki fātìi bāań u-tiŋki puee dee, u nì u-coopu Ruuti kimoowaabibiki. Bi nìn bāań Beetileem tiŋkin ŋyunti ŋun bi nìn bí ki cēē ɔɔji jintee níⁱ.