Bibɔsoonliibi Gbɔŋku i

Bibɔsoonliibi

gbɔŋku

Tibɔkilkaal

Tibɔti tin bi ŋmàn̄ Bibɔsoonliibi gbɔŋku poonee sòoǹ fìkil fikil nín nìn bí kí yòon̄ ŋyunti ŋun ní Isirayeel yab nìn bāań ki kāl̀ Kanaan tiŋkinee kí tin cáá sāā ŋyunti ŋun ní bi kíĺ ki kàantí bibɔtiibee. Kun pu ní bi pú kugbɔŋu nee diyindi yii Bibɔsoonliibi gbɔŋkuee di sá yii ku-jandi kansikin yal sòoǹ atuŋkpaan ŋin ní «bibɔsoonliibi» biba nìn ŋáaǹee, àá an nib gbanti maŋfal poon bɔti. Binib bin bi yíì «bibɔsoonliibi» kugbɔŋu nee poonee sá binib bin pɔŋŋu nyánní Unimbɔti ceeyee, ama ní mpɔn gbanti kaa gbèentí ibɔsoon baba poon. Binib gbanti tundi di nìn sá bí kpòotī samaa, àá kí fīī kunaakoou kubɔ àá tinaakɔti tiba nib ŋyunti ŋun bi yaa ká digìńdee.

Bibɔsoonliibi gbɔŋku yākatì ajan ata ní.

Dijampeepeekaal sòoǹ tibɔti tin jítì jítì ŋyunti ŋun ní Isirayeel yab nìn bāań ki kāl̀ Kanaan tiŋkinee, kí tin cáá sāā Joosuwa kúm (1.1–2.10).

Dijanliliitiil dàkà min ní Unimbɔti lèekī binib ki tūǹ-bi bi cá ki fòol̄ u-nibul ki líikí puee (2.11–16.31).

Dijantataatiil máafí tibɔti tili tiba tin nìn jítì ní ki dàkà fìkil fikil un nìn bí Isirayeel yab naakɔti kansikin kí wàatī ní bí nín kíĺ kí nīn bíi kàantí bibɔtiibee (abɔyil 17–21).

Bibɔsoonliibi gbɔŋku poonee, tin yaa nìn bāań Isirayeel yabee nìn nyánní tin nìn bí dinibul gbanti nì Unimbɔti kansikinee ní. Ŋyunti ŋun bi yaa nìn fātì bi-boon ki tīī Unimbɔtee, u nìn yàntī binib bin kóò ki pìl̄-bee àá binicambi sàantí-bi. Ama ŋyunti ŋun ní bi yaa nìn fātìi gítìń Unimbɔti cee ki yíiń-u ú dāá jòoń-bee, Unimbɔti nìn fòol̄-bi ki líikí. Nì míǹ kɔkɔee, ŋyunti kamaayee an bí Isirayeel yab kii bí nīn jáaḿ Kanaan tiŋki waaŋee, àá kí nīn dìŋfī Unimbɔti pu ki nyàab̀ tin ní bíǹ bi-ba lèe (abɔyil 17–18), àá bí súntí tin ní Unimbɔti là bí nīn ŋáańee pu ní (abɔyil 19–21). Bi nín nìn ŋáań mimmee, an yaa kaa sá Unimbɔti nìn jòoń-bee, bi bàà nìn jéetì nnaabukpaan poon. Kugbɔŋu nee jantataatiil di baasii dàkà Unimbɔti yaa bàà nìn fātì u-boon ki tīī Isirayeel naakɔti yab, bi nín bàà làá nīn bí puee. Dijantataatiil gbanti dàkà yii, Unimbɔti nibul ceeyee, tin nìn páb́ee di sá yii bí béé ukpil un taapu bi nìn là kí nīn bée. Mimmee báà ŋma nìn ŋūǹ kí nīn gbíntìi pée bí «u nín là pueeee»?