Bibɔsoonliibi Gbɔŋku 1

Bibɔsoonliibi

gbɔŋku

Isirayeel yab kāl̀ Kanaan tiŋkin

1 Joosuwa kúm boonee ní Isirayeel yab bālifì ti-Dindaan yii: «Ti-kansikin bilab di làá péé kí jɔ̄m̀ kí cùú jáǹ Kanaan yab ní?» 2 Ní ti-Dindaan kíí yii: «Juuda naakookun yab di làá jɔ̄m̀. Bíǹ ŋaan ní m dū kitiŋ gbanti ki ŋá.» 3 Niinee ní Juuda naakookun yab bí bi-nabiyaamu Simeeyɔn naakookun yab yii: «Ní dāá céem̀maan-ti tí jɔ̄m̀ timbi tinjandi pu kí cùú jáǹ Kanaan yab, ní boonee ti mun ń dāá céeǹ-ni ni-tinjandi pu tí cùú já.» Niinee ní Simeeyɔn naakookun yab kútì Juuda naakookun yab pu ki búntì. 4 Juuda naakookun yab nìn jɔ́m̀ ki jáń nì Kanaan yab nì Peeriisi yab ní ti-Dindaan dū-bi ki ŋá Juuda naakookun yab ŋaan. Bi nìn kūū binib kutukub saalaa Beeseeki tiŋkin. 5 Beeseeki tiŋkin niin ní bi ká ubɔti Adoonii-Beeseeki ki jáń ki pɔ́ɔkiǹ-u. Bi nìn jáń ki pɔ́ɔkiǹ Kanaan yab nì Peeriisi yab. 6 Ubɔti Adoonii-Beeseeki nìn sáǹ ki kátì ní bi jìn̄ ki cúú-u ki gūutì u-ŋambijaliŋ nì u-taŋambijaliŋ. 7 Niin ní ubɔti Adoonii-Beeseeki bí yii: «Njaminee man yaa nìn kā ki jīǹ tijinee, bibɔtiibi imuŋku ita nì saalaa bin ŋambijaliŋ nì bi-taŋambijaliŋ bi gūutèe nìn dɔ̄ m-teebiliu taapu ní ki tòó igbasigbasi in lítée ki ŋmóò. Ikpiti in m nìn ŋá binibee, íǹ ní Unimbɔti cáa bíi tēentí-mi nee!» Bi nìn cáá-u ki cūnnì Jeerusaleem tiŋkin ní u tin kpíì niin.

8 Juuda naakookun yab nìn jáń ki pɔ́ɔkiǹ Jeerusaleem yab ki fōō bi-tiŋki, ki dū ntàataajimu ki kūū binib kɔkɔ ní ki sēē Jeerusaleem tiŋki ŋŋmi. 9 Míǹ boonee ní Juuda naakookun yab nín sìntī ki cūtìi jáń nì Kanaan yab bin nìn kóò ajoon pu timmuee, nì bin nìn kóò Neegeeb^a timmuee nì bin kóò Seefeelaa^b paal timmuee. 10 Míǹ boonee ní Juuda naakookun yab nìkī ki cūtìi jáń nì Kanaan yab bin nìn kóò Eebrɔn tiŋkinee. Dooooyee bi nìn yíì Eebrɔn tiŋki yii Kiiriyati-Ariba ní. Niin ní Isirayeel yab jáń ki pɔ́ɔkiǹ Seesayi nì Ayiiman nì Talimayi naantiibi. 11 Juuda naakookun yab yíkì niinee ní ki cūtìi jáń nì Deebiir tiŋki yab. Deebiir tiŋki gbanti ní bi nìn yíì dooooyee yii Kiiriyati-Seefeer. 12 Ní Kaleeb bí yii: «Un di yaa ŋúń ki jáń ki pɔ́ɔkiǹ Kiiriyati-Seefeer yab ki fōō kitiŋ gbantee, m làá dū m-bisal Akisa kí tīī udaan ú cáá.» 13 Kaleeb naal Keenaasi jipɔɔn Ootiniyeel di ŋúń ki jáń ki fōō kitiŋ gbanti, ní Kaleeb dū u-bisal Akisa ki tīī-u u cáá. 14 Akisa bàn̄ u-cal Ootiniyeel ceeyee ní ki sāal̀-u ú bàlifì u-baa Kaleeb ú tīī-u tikpaatan. Akisa u-ba kpákatì kimaŋ puee ní Kaleeb bālifì-u yii: «A là ba ní?» 15 Ní u kíí u-baa yii: «M là kí mèè-si tiba ní. Di sá yii tikpaatan tin a tīī-mee sá kuteeu ní, an puee á tīī-mi inyimbul mun!» Ní Kaleeb dū inyimbul in bí yilpu puee nì in bí taapu puee ki tīī-u.

16 Mooyiisi coo un nìn sá Keeni maaliŋunee naantiibi yíkì Ibafi tiŋki ki nóó Juuda naakookun yab ní bi-kɔ nín jɔ́ḿ Juuda teeku dijandi din bí Araadi tiŋki ŋgiil púee. Bi bàn̄ ní ki kāl̀ dinibul din nìn kóò niinee yab kansikin.

17 Juuda nì u-maan Simeeyɔn naakɔtin yab nìkī ki cūtìi jáń ki pɔ́ɔkiǹ Kanaan yab bin nìn kóò Seefaati tiŋkinee. Bi nìn kúntì kitiŋ gbanti kɔkɔ ní ki pú-kì diyindi yii Ɔrima, taapu di sá yii <adigbun>. 18 Juuda naakookun yab nìkī ki fōō Gaasaa nì Asikeelɔn nì Eekrɔn^c timmu nì ntimu mun māntìi tú-muee. 19 Ti-Dindaan nìn bí Juuda naakookun yab cee ki tútuǹ-bi ní bi ŋúń ki jáń ki fōō ntimu mun bí ajoon puee kɔkɔ. Ama baa nìn ŋúń ki jìn̄ binib bin nìn kóò laakin tèen̄ee timmuee, kun puee binib gbanti bíǹ nìn cáá janjatɔrɔkub bin bi nìn dū tikúti ki mɔ́ɔ́yee ní. 20 Bi nìn dū Eebrɔn tiŋki ki tīī Kaleeb ki nóó nì Mooyiisi nín nìn lī puee, ní Kaleeb jáń ki fōō kitiŋee Anaaki jipɔmbi taatil bin nìn kóò kitiŋ gbantee ŋaan. 21 Beenjameen naakookun yab kaa nìn ŋúń ki jáń ki fōō Jeerusaleem tiŋki Jeebusi yab ŋaan. An pu ní Jeebusi yab pée gbíntìi kóò Jeerusaleem tiŋkin, bi nì Beenjameen naakookun yab, ki dāa sāā díǹ.

22 Jooseefi jipɔmbi Eefiraayiim nì Manasee naakɔtin yab mun nìn yíkì ki jɔ́m̀ ki cūtìi jáń nì Beeteel tiŋki yab. Ti-Dindaan nìn bí bi-cee ki tútuǹ-bi^d. 23 Bi nìn lēē bi-nib biba ki tú bi cūtìi cɔ́ŋkì ki kpēē Beeteel tiŋki nín bí puee. Bi nìn dá láá yíì Beeteel tiŋki yii Luusi ní. 24 Bicɔŋkiliibee nìn tú uninja ubɔ nyánní kitiŋin ní bi bí-u yii: «Dàkà-ti laakin bi dìŋfī kí kɔ́ kitiŋinee, ti làá dāá ŋá-si tiŋan kí téeǹ!» 25 Uninjee nìn dàkā-bi bi nín làá dī pu kí kɔ́ kitiŋinee, ní bi kɔ́ ki dū ntàataajimu ki kūū binib bin nìn kóò kitiŋ gbantee kɔkɔ. Ama bi nìn yāntì uninjee nì u-nabiyaamu búntì kaa ŋá-bi báà tiba. 26 Ní kijapaayee nín cá Eeti yab tiŋkin ki bàn̄ ki náań kitiŋ niin ní ki pú-kì diyindi yii Luusi. Diyindi gbanti ní bi pée gbíntìi yíì an tiŋkee ki dāa sāā díǹ.

27 Manasee naakookun yab kaa nìn ŋúń ki jáń ki fōō Beeti-Seeyan nì Taanaki nì Dɔɔr nì Yibileeyam nì Meegiidoo timmu nì mu-timbilimmu nib ŋaan. An pu ní Kanaan yab nìn pée gbíntìi kóò ntimu gbanti. 28 Ama boonee, Isirayeel yab nín dāa fōō mpɔnee ní bi dū Kanaan yab ki ŋá bi-taapu, ki yāntì bi kíǹ ki tūǹ atuun ŋin pɔ̄ɔ̄yee ki tìì-bi. Nì míǹ kɔkɔee, Isirayeel yab kaa nìn ŋúń ki jáń ki fōō ntimu gbanti Kanaan yab ŋaan.

29 Eefiraayiim naakookun yab kaa nìn ŋúń ki jáń ki fōō Geeseer tiŋki Kanaan yab ŋaan. An pu ní Kanaan yab nìn pée gbíntìi kóò Geeseer tiŋki, Eefiraayiim yab kansikin.

30 Sabulɔn naakookun yab kaa nìn ŋúń ki jáń ki fōō Kiitirɔn tiŋki nì Naalɔɔl tiŋki Kanaan yab ŋaan. An pu ní Kanaan yab gbanti nìn pée gbíntìi kóò Sabulɔn yab kansikin. Ama ní Sabulɔn yab dū-bi ki ŋá bi-taapu, ki yāntì bi tūǹ atuun ŋin pɔ̄ɔ̄yee ki tìì-bi.

31 Aseer naakookun yab kaa nìn ŋúń ki jáń ki fōō Akoo nì Siidɔn nì Alaafi nì Eelba nì Afiiki nì Reewoob timmu Kanaan yab ŋaan. 32 Aseer naakookun yab nìn kóò Kanaan yab bin nìn bí ntimu gbantinee kansikin ní, kun puee baa nìn fōō ntimu gbanti Kanaan yab ŋaan.

33 Neefitalii naakookun yab kaa nìn ŋúń ki jáń ki fōō Beeti-Seemeesi nì Beeti-Anaati timmu Kanaan yab ŋaan. Bi nìn kóò Kanaan yab bin nìn bí ntimu gbantinee kansikin ní. Ama ní ki nìn dū Beeti-Seemeesi yab nì Beeti-Anaati yab ki ŋá bi-taapu, ki yāntì bi tūǹ atuun ŋin pɔ̄ɔ̄yee ki tìì-bi.

34 Amɔɔr yab nìn jìn̄ Daani naakookun yab ki tɔ́ ajoon pu ní, kaa pée pú-bi mpaan bi sīntìń mpɔfin. 35 Amɔɔr yab gbanti nìn gbíntì ki kóò Aari-Eereesi nì Ayalɔn nì Saalbiim timmu. Ama Eefiraayiim nì Manasee naakɔtin yab dāa fōō mpɔnee ní ki dū-bi ki ŋá bi-taapu, ki yāntì bi kíǹ ki tūǹ atuun ŋin pɔ̄ɔ̄yee ki tìì-bi. 36 Amɔɔr yab tiŋki kpaanyɔkɔ nìn kífí Akrabiim gbantandi ní, kí yòon̄ laakin bi yíì yii Seerayee kí nīn cáa jɔ́ḿ yilpu pú.