Joosuwa Gbɔŋku i

Kugbɔŋu kun sòoǹ

Joosuwa

puee

Tibɔkilkaal

Mooyiisi nín kpíìyee, Joosuwa di fōō u-yil ki līntì Isirayeel yab nyɔkɔpu. Bi nìn jáń ki fōō Kanaan tiŋki ki yākatì ki kāl̀. An bɔti pu ní kugbɔŋu nee sòoǹ. Kugbɔŋu gbanti yākatì ajaŋkpaan ata ní.

- Isirayeel yab jáń ki fōō Kanaan tiŋki (Ayil 1–12).

- Isirayeel yab yākatì Kanaan tiŋki (Ayil 13–21).

- Joosuwa maŋfal wiiŋyi kúntitam (Ayil 22–24).

Unimbɔti nín tīī u-nibul Isirayeel yab kitiŋ bí nīn kóòyee, u ŋá tin u nìn pōoǹ bi-naanjab njamin ní ki dāa nīkitì ki pōoǹ Mooyiisee dee. Ti yaa kpēē Unimbɔti nì Isirayeel yab kansikin bɔtee, Isirayeel yab nín ŋúń ki jáń ki fōō Kanaan tiŋki puee náań nì bi nín nìn nyáń Eejipiti tiŋkin puee ní. Kii Unimbɔti nibul nín nìn nyáń Eejipiti tiŋkin ní úǹ u-ba pée bí bi-caŋin ki tíkí-bi bi jáà ki pɔ́ɔkíǹ bi-nannanliibi ŋyunti kamaa puee, míǹ mbaantiim ní an tí sá min bi nee mun.

Bi nín yākatì Kanaan tiŋki laakin bi fōōyee nì laakin baa láá fōōyee ki tīī Isirayeel naakɔti kɔkɔee di baasii dàkā ki cántì Unimbɔti nín néeń u-nibul Isirayeel yab tikpil puee. U yāntì bi-kansikin báà ŋma ká kitiŋ kí nīn kóò. An di yì-tì ní ti kāntí ntimu yiŋŋi tikpil kugbɔŋu nee bɔyiliŋ aba poon (Ayil 13, 15 nì 16).

Isirayeel yab nín jáń ki fōō Kanaan tiŋki ki dūu yākatì puee bɔti dàkà-ti yii Unimbɔti ŋá tin u pōoǹ Isirayeel yabee ki tīī-bi. Míǹ puee Isirayeel yab mun máaǹ kí dū bi-ba kí tīī Unimbɔti mmɔm. Isirayeel yab nín làá kàl̄ binicambi bin kaa nyí Unimbɔtee kansikinee sá-bi kii kutaliŋŋuee ní ki làá yàntī bí yìntīǹ ti-Dindaan. An pu ní Joosuwa yāntì Isirayeel yab fātìi pōoǹ ti-Dindaan mpɔm yii bi làá nīn tɔ́ u-poondi ŋyunti ŋun ní samaa kɔkɔ nìn kpáfì Siikeem tiŋkinee. Tibɔti gbanti di kúntì kugbɔŋu nee (Ayil 24). Isirayeel samaau nìn kíí kí nīn jáaḿ Unimbɔti. Too, kɔŋkɔnnee ní Isirayeel yab nì bi-tiŋki bɔti làá nín kíĺ. An kíǹ bí kíĺ kí nīn jáà dee ki mɔ́tí kitiŋ kin bi jáń ki fōō kì kpántì bi-yakee pu. Kí kūtèe, Isirayeel yab máaǹ kí nīn téetí yii bi lēē kí nīn jáaḿ bi-naanjab Nimbɔtiu baba kii bi nín pōoǹ-u yii bi làá nīn ŋáań puee.