Diteetil Gbɔŋku 34

Mooyiisi kúm

1 Niinee Mooyiisi dūu dī Moowaab tantakal ki dàb̄ Neeboo jool ki tin jɔ́m̀ Piisga jool yilpu. Piisga jool gbanti nìn bí Jeeriikoo tiŋki nyɔkɔpu ní. Niin ní ti-Dindaan nìn dàkā-u kitiŋ kɔkɔ, ki yōoǹ Galaadi ki tin cáa sāā Daani tiŋki, 2 ki kpáaǹ Neefitalii tiŋki kɔkɔ nì Eefiraayiim nì Manasee tiŋki nì Juuda tiŋki kɔkɔ ki tin cáa sāā tiŋku ŋwìiń jeetilaŋki pú, 3 nì Neegeeb tiŋki nì Jɔɔdan tantakal ki yōoǹ Jeeriikoo ibafi tiŋki, ki tin cáa sāā Soowaar. 4 Niinee ní ti-Dindaan tùkū-u yii: «Kpèè, kitiŋ kin m nìn pōoǹ yii m làá tīī Abraam nì Isaaki nì Jaakɔbee dee. M nìn tùkū-bi yii: <M làá dāá dū-kì kí tīī ni-naantiibi ní^a.> M yāntì a wál̀ kitiŋ gbanti nì a-nimbiliŋ, ama aa làá nín kɔ́ ki-ni ní.»

5 Míǹ boonee ní ti-Dindaan tɔntɔnliu Mooyiisi kpíì Moowaab tiŋkin niin kii ti-Dindaan nín nìn lī puee. 6 Ní ti-Dindaan síb́-u Moowaab tiŋkin ditantakalin, Beeti-Peewɔɔr tiŋki nyɔkɔpu. Ama báà ubɔ kaa nyí u-kaakul laŋki ki dāa sāā díǹ. 7 Mooyiisi nìn cáá abin dilaataal nì mmuŋku ní ki kpíì. U nìn dáá pée gbíntìi wāĺ tiŋan ní, u-nimbiliŋ kaa pēefì, ní ki nìn gbíntìi dáá cáá u-pɔŋŋu mun.

8 Isirayeel yab nìn súń Mooyiisi kpool iwiin mmuŋku nì saalaa ní Moowaab tantakalin. Míǹ boon ní Mooyiisi kpool kúntì. 9 Ti-Dindaan nìn gbéeǹ Nuuni jipɔɔn Joosuwa Ŋfam min tīī-u dinyilee, di sá yii Mooyiisi nìn dū u-ŋalii ki páaǹ u-pu ki mēē^b. An puee Isirayeel yab nìn pílifiǹ-u ní ki nìn ŋáań kii ti-Dindaan nín nìn kpáafì Mooyiisi yii bí ŋá puee.

10 Baa ti ká Isirayeel tiŋkin Unimbɔti bɔnaatiliu ubɔ bí kii Mooyiisee. Mooyiisi nìn yūlifí ti-Dindaan nimbiin ní bi sòoǹ nì tɔb^c. 11 Ti-Dindaan nìn tú-u Eejipiti tiŋkin u cūtìi ŋá maamaacikpaambi Faaroo nì u-kàliŋkpilib nì u-nib kɔkɔ nimbiin. 12 Mooyiisi nìn dàkā mpɔŋkpaan nì maamaaci tuuŋŋi Isirayeel yab kɔkɔ nimbiin.