Diteetil Gbɔŋku 33

Mooyiisi mēē ki bīiǹ Isirayeel naakɔti pu

1 Kí wàatī Unimbɔti niliu Mooyiisi ń kpúee, u nìn mēē ki bīiǹ Isirayeel yab pu.

2 U nìn lī yii:

«Ti-Dindaan nyánní Siinaayi jool pu,

u nyáń ki páaǹní Seeyiir jool watil pú,

ní ki ŋmíntì u-samaau pu doooo Paaran jool pu.

U bāań Meeriiba Kadeesi.

Niin ní u nìn ŋúbiń marab bin jìl̀ee u-ŋaan kí tīī-bi.

3 Tiŋman ti-Dindaan, a néeń Isirayeel naakɔti.

Bin kɔkɔ bí circiree bí a-ŋaan.

Bi gbāā a-taaŋi taapu kí fōō a-nyɔɔbundi.

4 Marab bin ní Mooyiisi tīī-tee,

Jaakɔb naantiibi gaajawanti dee.

5 Ŋyunti ŋun samaa kpilib nìn kpáfì

ki kpáaǹ Isirayeel naakɔti kɔkɔee,

ti-Dindaan di nìn sá Yeesurun^a bɔtiu.»

6 Ní Mooyiisi kútì ki lī yii:

«Rubeen naakooku ń nīn bí dimaŋfalin kí taa kpú,

u-nib bin pátèe mun ń nīn bí dimaŋfalin.»

7 U sòon̄ Juuda naakooku pu yii:

«Ti-Dindaan, pīlifì Juuda neen,

kí cáań-u u-yab cee bí ŋá ubaanti.

Ú mɔ̄tì u-ba pu nì tininjati.

Tūtuǹ-u ú jáǹ u-nannanliibi.»

8 U sòon̄ Leefii naakooku pu yii:

«Ti-Dindaan, a dū a-Tumiimuu nì a-Uriimuu

ki tīī unil un fáatiǹ-see ní.

A nìn cɔ́ŋkì-u Maasa,

sii nì u nìn kpáká Meeriiba nyim laŋki^b.

9 U dàkā a-pu dineendi ki jítiǹ u-baa nì u-na pu,

ki jítiǹ u-nabiyaamu nì u-biyaamu pu.

Di sá bi nìn ŋúb́ a-nyɔɔbundi,

ní ki nìn ŋúb́ a-poondi^c.

10 Bíǹ di dàkà Jaakɔb yab a-koobiliŋ,

ki dàkà Isirayeel yab a-marab.

Bíǹ di tùutī talaalub ki tìì-si,

ki ŋáań saraawɔkaa a-saraafaŋŋu pu.

11 Ti-Dindaan, mɔ̀tīí kūtì-bi mpɔn,

yàntī bi-ŋaan tuuŋŋi ń fáatiǹ-si.

Fáá kí tàtī bin yíkì kí jáǹ-bee cammu,

bin ná-bee ń taa ti ŋmā kí yīkì.»

12 U sòon̄ Beenjameen naakooku pu yii:

«Ti-Dindaan bineeŋkaaki,

ú nīn bí ŋgbansɔŋfin u-Nimbɔtiu cee.

di sá úǹ di wúń u-pu baabadal,

ní ki kóò u-gbantammu kansikin.»

13 Mooyiisi sòon̄ Jooseefi naakooku pu yii:

«Ti-Dindaan ń bìin̄ u-tiŋki pu,

kí tīī-kì dimalindi din nyēeń yilpuee,

nì nnyim min nyēeń kitiŋ taapuee,

14 kí tí tīī-kì tikpaajin timɔntiil tin ŋwìiń yàntī an nyēēyee,

nì asubimɔnti ŋin lòoǹ uŋmal kamaayee.

15 Tijimmɔntiil ń lòoǹ ki-jooŋŋi ŋin bí doooo jaanjaanee pu,

asubimɔnti ń lòoǹ ki-gbantammu mun bí doooo cannaakuee pu.

16 Tigaajati tin gbí kitiŋ nee puee

nì ti-Dindaan un nìn nyántì u-ba kisugbooi poon ki dàkēe

biindi ń dāan̄ kí nīn bí Jooseefi pu,

úǹ un sá kii ubɔti u-nabiyaamu kansikinee^d.

17 U sá unaja un sá dibiseemalee, ki cáá tinyool.

U-yiŋyi bí kii upɔɔnaa yiŋyee,

íǹ ní u làá nīn cáa gbáà atimbun nib

kí cáá sāā kitiŋ kúntilaŋki.

Míǹ ní Eefiraayiim naantiibi cutimaanyee bí,

míǹ ní Manasee naantiibi kutukub kutukubee bí.»

18 Mooyiisi sòon̄ Sabulɔn nì Isakaar naakɔti pu yii:

«Sabulɔn, án nīn mɔ̄ǹ-si a-saŋkindi poon.

Isakaar, án nīn mɔ̄ǹ si mun a-tantib poon!

19 Ni làá dāá yíiń anibul dijool pu,

kí dāá ŋá saraabi kii bi nín síiǹ mara puee.

Di sá yii ni-gaajati làá dāá nyānní dimɔɔl pu,

ní tiwammɔntiil tin bál̀ee ń dāá nyānní dibulin.»

20 U sòon̄ Gaadi naakooku pu yii:

«Nyɔ̄ŋkìmaan ti-Dindaan un wàantí Gaadi tiŋkee!

Gaadi dɔ̄ kii gbikintee ní.

U yaa cúú kuwaŋkuluuee, u tɔ̀ntī-ku ní,

kí yòon̄ ataa kí cáá sāā diyil.

21 U lēē kitimmɔntii ki gāā u-bindi,

u dū dijandi din sá ubɔti yalee kí síiǹ u-ba.

U dɔ́miń ki kútì samaa kpilib pu ki ŋá kii ti-Dindaan nín là puee,

ní ki sòoǹ ti-Dindaan bɔkpaaŋi ŋin u nìn tīī Isirayeel yabee pu^e.»

22 Mooyiisi sòon̄ Daani naakooku pu yii:

«Daani sá kii digbikintipɔmbil

din wúliń doooo Baasan tiŋkinee ní^f.»

23 U sòon̄ Neefitalii naakooku pu yii:

«Ti-Dindaan gbéeǹ Neefitalii

u-ŋanti nì u-biindi.

Úǹ di làá nīn yì kitiŋ kí yòon̄ ŋwìiń jeetilaŋki kí cáá cùnnì ŋgiil pú.»

24 U sòon̄ Aseer naakooku pu yii:

«Jaakɔb biyaamu kansikinee,

Aseer ń nīn sá un boon ti-Dindaan bīiǹ tikpilee,

u-nabiyaamu ń nīn néeń u-bɔti

ní u-taaŋi ń nīn dēē ɔliifi kpamin.

25 U-kampiiŋi ń dāá nīn sá tikúti nì tasa kúti,

ú dāá nīn cáá mpɔn kí cáá sāā u-kúm dal!»

26 Ní Mooyiisi nìkī ki lī yii:

«Yeesurun Nimbɔtiu kaa cáá juti.

Úǹ di sá ukpaan ki kāń atagban pu ki jàkàń

ki pùntī kutaa kí dāá jòoń-si.

27 Unimbɔti un bí jaanjaanee di sá a-taŋkpanaakooku.

U dàkà u-pɔŋŋu taapu doo baabadal.

Úǹ di jìn̄ a-nannanliibi a-nyɔkɔpu,

ní ki bí-si yii á kpɔ̀ kí céetí-bi!

28 «Isirayeel yab bí ŋgbansɔŋfin,

Jaakɔb naantiibi bí dibatɔlin.

Bi tàkā bilee nì ndapɔm tiŋkin,

kitiŋ kin pu dimalindi nyēeń yilpu ki tòóyee.

29 «A bí mmɔnneeee Isirayeel!

Ŋma di bí kii sii dinibul din ní ti-Dindaan fīīyee?

Ti-Dindaan di sá a-gbampɔɔl, ki sá un tútúǹ-see.

U sá kitàataajiki kin tìì-si dijajilee.

A-nannanliibi làá dāá gbàan̄ a-nimbiin

ní á dāá tāā bi-waapaaŋyi pùb.»