Diteetil Gbɔŋku 32

1 Kutagbɔŋu, pīlifì m-bɔti,

kitiŋ, pīlifì m-nyɔɔbuŋŋi.

2 M-bɔti tin m dàkèe yàantí kii utaayee,

ní m-nyɔɔbundi tòó kii dimalindee,

kii utaaja nín nì ki sɔ̀ŋkī kumɔsɔŋu puee,

kii putipuuki nín yàantí kumoou pu puee.

3 Di sá m làá nyɔ̄ŋkì ti-Dindaan yindi.

Tí nyɔ̄ŋkìmaan ti-Nimbɔtiu kpaanti.

4 Ti-Dindaan sá kutaŋkpanaakoou.

Inaatuu kpá u-tuuŋŋi poon,

u-saŋyi kɔkɔ tèen̄ ní.

U sá deedee Nimbɔtiu ní, ikpiti kpá u-ni,

ibaamɔn nì deedeedaan ní u sá.

5 Nimbi bin ŋáań ikpiti ki gáatèe,

ni yīntiǹ ti-Dindaan.

Án nīn cáá-ni icoo!

Naa ti sá u-biyaamu!

6 Dinibul din nib sá bigbaambi ki lóò dinyilee,

mimmee tipaal tin ni làá dūú pà ti-Dindaanee deeee?

Úǹ di kaa sá ni-baa ki tīī-ni dimaŋfalaaa?

Úǹ di kaa náań-ni ki dū-ni ki kpántì u-nibulaaa?

7 Téetímaan iyuntikpiki pu,

dàkafìmaan ni-naanjab yuntii pu.

Bàlifìmaan ni-baabi bí tùkù-ni!

Ní bàlifì ni-tikpilib bí māafì-ni!

8 Yilpu fɔ́ŋŋŋ Nimbɔtiu nín nìn tīī atimbun kɔkɔ bi-timmuee,

ŋyunti ŋun u nìn cúú anibul kɔkɔ ki yākatì tɔbinee,

u nìn tīī ditimbundi kamaa di-kpaanyɔkɔ

ki nóó nì Isirayeel yab nyɔkɔm ní.

9 Ama ti-Dindaan nibul di sá u-fakal,

Jaakɔb naantiibi ní u lēē kí nīn yì.

10 Ti-Dindaan nìn ká u-nibul kuteeun,

laakin bi gbìl̀ jiiŋkpaaibi siim ŋmaniŋma puee.

U nìn wúń bi-pu ki dàkà-bi,

u nìn cí-bi kii u-nimbibuliiyee.

11 U nìn ŋá kii ukaalun nín ŋáań pu,

kí yòon̄ u-biyaamu kí jɔ̄m̀ yilpu

kí gíiǹ-mu kí líiń pu

ní kí kpátiń u-feeŋyi kí nīn sìntīń pu

ki cí mun yaa gīīyee ń dāá páań puee ní.

12 Ti-Dindaan baba di nìn kpōotì u-nibul,

unimbɔti ubɔ kaa nìn bí ki kútì u-pu.

13 U nìn kāaǹ-bi ŋgbantamu pu,

ní ki dū tikpaajin ki kpíiǹ-bi.

U lēē tisiil ntaŋkpalɔkɔn ki tīī-bi bi ŋmɔ́,

ní ki nyántì ŋkpam ditaŋkpayaabulin ki tīī-bi bi jíń.

14 U nìn tīī-bi waagaasii nì mpibiim,

ki tīī-bi apibil nì iŋɔjaa nì ipijaa in bí màlmalee,

ki tīī-bi bileemɔnti yim bi jíń,

ní ki tīī-bi fiinyi damam bi nyùn̄.

15 Yeesurun^a jíń ki díkí ki ŋá ŋkpamee,

ní ki kíǹ ki bíi tòó igbeen.

U gbīfiǹ ki ŋá ŋkpam ki ŋá gbàlgbalee,

ní ki dū Unimbɔti un náań-uee ki fá,

ki kíǹ ki kpèé un sá u-taŋkpanaakooku nì u-fiiliuee fám.

16 Isirayeel yab nìn ŋá ntimbiil tuuŋŋi

ki yāntì Unimbɔti gíí diŋuul.

Bi nìn dū bi-waatuuŋŋi

ki gbítì u-ŋuul.

17 Bi nìn ŋáań saraabi ki tìì arasiniibi, kaa sá Unimbɔti^b.

Bi nìn ŋáań ki tìì awaa ŋin baa nìn nyí ki kée,

awaapɔɔn ŋin bi dáá nyántì

bi-baabi kaa nìn nyí ŋi-pu gbee.

18 «Isirayeel, a súntì a-taŋkpanaakooku pu,

a súntì un màl̄-see pu,

kaa ti dū Unimbɔti un tīī-si dimaŋfalee ki yíiń tiba.»

19 Ti-Dindaan ká mimmee ní ki gíí diŋuul,

u-jipɔmbi nì u-bisalib yīntiǹ-u

ní u dū-bi ki fá.

20 Ní ti-Dindaan lī yii: «M làá fàtī m-boon kí tīī-bi,

ní kí kpèè án nín làá dāá kúntíǹ-bi puee.

Kun puee bi sá binib bin gáatèe ní,

binib bin pu baa ŋūǹ kí nīn mákée.

21 Bi yāntì kun kaa sá Unimbɔtee

fōō m-paaŋŋu ki kɔ́ǹ-mi ipoompoon,

ní ki dū bi-waaŋi ŋin kaa bí tibanee ki gbítì m-ŋuul.

Ma mun làá dū dinibul din kaa sá m-yalee

kí kɔ́ǹ-bi ipoompoon,

ní kí yàntī bí fōō diŋuul

binib bin kaa cáá iciinee pu^c.

22 Di sá m-ŋuul bíi fòol̄ lìblib kii ŋŋmee.

Di wùn̄ ki tin bàn̄ ditaŋkpiil taapu,

di wùn̄ ki kpáaǹ kitiŋ nì tin kɔkɔ ki lòon̄ee,

ki làá póotí kí wà ajoon nyeel.

23 M làá tɔ̄-bi agìń tikpil poon,

m làá tɔ̄-bi m-piiŋyi.

24 Ŋkùm yaa láa bàn̄-bi,

ní bìlbil kúm weeŋyi nì iweentintikaa in kùee

yaa láa cúú-bee,

ní ḿ dāá dū ipeecuncuti nì ikoobu in

cáá tiloolee kí tɔ̄ bi-pu.

25 Bi làá dū kitàataajiki kí kpɔ̀ bi-biyaamu adan pu,

ní dipɔɔbiildi ń kɔ́ báà ŋma adiinni.

Tin làá bàń unaacimpɔɔnee di làá bàń usapɔɔn,

tin làá bàń kibipɔŋee di làá bàń utikpil.»

26 «M dākafì kí bàà nà-bi ní dúsi dusi,

ní kí kúntí bi-yindi kitiŋ pu kpataaa.

27 Ama kun m fāŋkèe di sá bi-nannanliibi siibiliŋ.

Bi ŋūǹ kí taa gbìl̄ taapu

ní kí lì yii: <An sá ti-kpabil di tīī-ti dijajil,

an kaa sá bi-Dindaan di ŋá tin bí nee.>

28 «Isirayeel yab sá ditimbundi din landɔkɔi gátèe ní,

baa cáá iciin báà fiii.

29 Bi yaa bàà cáá dinyil fiii,

bi bàà gbìl̀ taapu tiŋan,

kí dàkafì kí béé tin dɔ̄ ki cí-bee.

30 Mana ní unibaanti bàà ŋūǹ kí jà binib kutuku,

ní binib bili ja ń yàntī binib kutukub saalaa ń sāǹ,

an yaa kaa sá yii man bi-Dindaan un sá bi-taŋkpanaakookuee

di dū-bi ki ŋá bi-nannanliibi ŋaan?

31 «Di sá yii bi-nannanliibi nyí tiŋan yii

bi-taŋkpanaakooku kaa bí kii Isirayeel taŋkpanaakookuee.

32 Bi-fiinyi sufii bí kii Soodoom sufiiyee,

bi-kpaaŋŋi bí kii Goomoora kpaaŋŋee.

Bi-fiinyi sufii lòoǹ abil ŋin cáá tiloolee,

abil ŋin di tū kátí katee.

33 Bi-damam sá kii ikoobu lootee ní,

a lì kii ukoowaati lootee.

34 «Kpèèmaan kun man bi-Dindaan

bɔ́ntì dibalin an dɔ̄ ki cí-bee.

35 Man di làá dāá tɔ̀ ipɔntoon,

man di làá dāá pà bi-tuuŋŋi paati.

Bi-nimbinaamandi wiiŋŋu tóobiń,

tin bɔ́ntì ki cí-bee kaa làá tàan̄ ní kí bàń-bi.»

36 Tiŋman, ti-Dindaan làá dāá sòoǹ kí pɔ̀ u-nibul,

ní kí dāá sɔ̄ u-tɔntɔnliibi saai

ŋyunti ŋun u yaa láa ká yii baa ti cáá mpɔn,

ní uyumbu àá un tɔ́ u-bee kaa ti bée.

37 U làá dāá bàlifì yii:

<Bi-waaŋi ŋin nìn sá bi-taŋkpanaakooku

bi sáń ki kóòyee bí la ní?

38 Awaa ŋin nìn ŋmóò bi-saraabi kpam,

ki nyù ndaam min bi féeń-ŋee bí la?

Ŋí yīkì kí dāá fīī-baa!

Ŋí nyàab̀ kibalilaŋ kí tīī-baa!>

39 Míǹ puee ní béémaan díǹ yii,

man baba di sá Unimbɔti,

ubɔ kaa ti bí ki kútì man pu.

Man di ŋūǹ kí lēē unil maŋfal,

man di tí ŋūǹ kí tīī dimaŋfal.

Man di tìì tiweendi,

man di tí cāantí,

ní ubɔ kaa bí ki ŋūǹ kí fīī un kā man ŋaanee.

40 M yōoǹ m-ŋal yilpu

ki lī yii: <M bí dimaŋfalin kí nīn cá jaanjaan!

41 M yaa lōoǹ m-tàataajiki kì jītí pámpam

ki dū-kì ki tākaǹ m-ŋaan kí kíĺ ibɔsoonee,

m làá tɔ̀ m-nannanliibi ipɔntoon,

ní kí pà bin kɔkɔ ná-mee bi-kpitii paati.

42 M-piiŋyi làá dāá nyɔ̀ fatiku kí gbí,

ní m-tàataajiki ń dāá ŋmɔ́ bin fōō tiweendee

nì bin bi cúú kuyuŋuee nanti,

ki kpáaǹ binannanliibi kpilib yiliŋ.>

43 Atimbun, ní pàkàmaan ti-Dindaan nikitil,

di sá yii ti-Dindaan làá tɔ̀ u-tɔntɔnliibi

bin bi kūūyee pɔntooŋyi,

kí dáaĺ u-nannanliibi tafal,

ní kí fíntí u-tiŋki nì u-nikitil kpitii.

44 Mooyiisi nì Nuuni jipɔɔn Joosuwa^d dɔ́miń ki dū nlan nee nyɔɔbuŋŋi ki sòon̄ samaa kɔkɔ tafalin.

45 Ŋyunti ŋun ní Mooyiisi kàan̄ tibɔti gbanti kɔkɔ ki tīī Isirayeel yab ki dóòyee, 46 ní u bí-bi yii: «Ní taa dū tibɔti tin kɔkɔ m kpáafì-ni díǹ nee kí ŋá bugbambu, kí taa dūú gbīiliǹ. Ní dū-tì kí dàkà ni-biyaamu, ní mu mun ń ŋmā kí nīn tɔ́ marab nee nyɔɔbuŋŋi kɔkɔ tiŋan. 47 Di sá yii marab gbanti sá tibɔmɔntiil ní, ní ki sá ni-maŋfal. Ni yaa tɔ́-bee, bi làá yàntī ní kàl̄ kitiŋ kin ni làá dùtī Jɔɔdan buŋŋu kí cùú fōō kí nīn kíǹ ki yì nee poon kí yúntí.»

Unimbɔti sòon̄ Mooyiisi kúm bɔti

48 Ŋwimbaanti gbantee ní ti-Dindaan tùkū Mooyiisi yii: 49 «Cù Abariim jooŋŋi ŋin bí Moowaab tiŋkin, Jeeriikoo tiŋki nyɔkɔpuee kí jɔ̄m̀ Neeboo jool pu kí kpèè Kanaan tiŋki kin m làá dūú tīī Isirayeel yab bí nīn kíǹ ki yèe. 50 Dijool din a làá jɔ̄m̀ee pu ní a làá tin kpú kí cùú ŋàl̄ a-naanjab, kii a-maan Aarɔn nín kpíì Ɔɔr jool pu ki cūtìi ŋàl̄ u-yab puee^e. 51 Di sá yii ŋyunti ŋun ni nìn bàn̄ Meeriiba Kadeesi, Siini teeku puee, ni-liitil kaa nìn ŋá Isirayeel yab nimbiin kii m nín nìn bí yii ní ŋá pu kí ká nnyimee, kaa nìn tí dàkā Isirayeel yab yii m sá circir^f. 52 Míǹ puee ndandati ní a làá sīĺ ní kí wāl̀ kitiŋ kin m làá dūú tīī Isirayeel yabee, ama sii a-ba kpá kí kɔ́ ki-ni^g.»