Joosuwa Gbɔŋku 1

Kugbɔŋu kun sòoǹ

Joosuwa

puee

Joosuwa fōō ti-Dindaan tɔntɔnliu Mooyiisi yil

1 Ti-Dindaan tɔntɔnliu Mooyiisi kúm boonee, ní ti-Dindaan tùkū Nuuni jipɔɔn Joosuwa un nìn bí Mooyiisi cee ki tútúǹ-uee yii: 2 «M-tɔntɔnliu Mooyiisi kpíì dee. Kɔŋkɔnnee, yīkì sii nì samaa nee kɔkɔ ní dùtī Jɔɔdan buŋŋu ŋun bí nee kí kɔ́ kitiŋ kin m làá dūu tīī Isirayeel yabee. 3 M làá dū laakin kamaa ní ni-taaŋi yaa tāāyee kí tīī-ni kii m nín nìn tùkū Mooyiisi yii m làá ŋá puee. 4 Ni-tiŋki di làá nīn sá kí yòon̄ kuteeu ŋgiil pú kí cáá sāā Leebanɔn jooŋŋi, kí yòon̄ kí nīn cá dimɔɔkpaandi ŋgan pú, an dàkà yii Eefiraati mɔɔl, ní kí yòon̄ Eeti yab tiŋki kɔkɔ ŋwìiń nyalaŋki pú kí tin cáá sāā Meediiteeranee tiŋkuu ŋwìiń jeetilaŋki pú. 5 A-maŋfal wiiŋyi kɔkɔ kí tin cáá sāā a-kúmee, ubɔ kpá kí já kí pɔ̄ɔkiǹ-si. M nín nìn bí Mooyiisi cee puee, míǹ ní m làá nīn bí si mun cee. Maa làá yàntī-si, kaa làá fá-si mun. 6 Pɔ́ɔǹ a-ba kí ká dipɔbil, kun puee sii di làá dū kitiŋ kin m pōoǹ dinibul nee naanjab yii m làá tīī bi-naantiibee kí tīī-bi^a. 7 Sii dee ká dipɔbil kí taa fàŋkì báà tiba, kí nīn pée nóó Mara un m-tɔntɔnliu Mooyiisi yóoǹ-see deedee, kí taa yìntīǹ an marau gbanti báà fiii. A yaa ŋá mimmee tin kɔkɔ ní a làá ŋée làá nīn còom̄ tiŋan ní ki tīī-si. 8 Á yàntī kugbɔŋu kun poon bi ŋmàn̄ Mara ki ŋée ń nīn bí ki kɔ́ĺ-si. Á nīn pée kàaǹ-ku ŋwiimpu nì kunyeeu, án nín làá ŋá pu á ŋmā kí nīn ŋáań tikɔkɔ ki nóó nì tibɔti tin bi ŋmàn̄ ku-poonee. A yaa ŋáań mimmee ní a làá ŋmā kí bɔ́ntí a-sàmbiyaamu ní án bútí-si á ŋmā kí ŋá tin kɔkɔ a là kí ŋée. 9 Maa kpáafì-si yii á ká dipɔbil kí taa fàŋkì báà tibaaa? Taa yàntī tifaandi ń cúú-si, kí taa yàntī a-wunti ń yɔ̀tī, kun puee man a-Dindaan a-Nimbɔtiu làá nīn bí a-cee laakin kamaa ní a làá cùee!»

Joosuwa bɔ́ntì kí dùtī Jɔɔdan buŋŋu

10 Niinee ní Joosuwa tīī Isirayeel yab tindaŋkpilib mara nee yii: 11 «Ní yìim̀maan dinaapaal kɔkɔ pu kí bāakì tibɔti nee kí tùkù samaa kɔkɔ. Ní lì yii: <Ní bɔ́ntímaan tijin kí yóoń, kun puee kí yòon̄ díǹ kí tin sāā iwiin itee, ni làá dùtī Jɔɔdan buŋŋu ŋun dɔ̄ nee kí cùú já kí fōō kitiŋ kin ti-Dindaan ni-Nimbɔtiu tīī-ni, kí nīn sá ni-yakee.>» 12 Boonee ní Joosuwa sòon̄ nì Rubeen naakookun yab, nì Gaadi naakookun yab, nì Manasee naakooku dijandi diba yab ki bí-bi yii: 13 «Ní téetímaan mara un ti-Dindaan tɔntɔnliu Mooyiisi nìn tīī-nee. U nìn lī yii: <Ti-Dindaan ni-Nimbɔtiu tīī-ni diŋuŋfil ní kitiŋ kin u tīī-ni nee poon.> 14 An puee, yàntīmaan ni-nimpoobi nì ni-biyaamu nì ni-waŋkuti ń gbíntí kitiŋ kin Mooyiisi tīī-ni Jɔɔdan buŋgbandi din bí doo pú nee. Nimbi bibaatandambi kɔkɔ ń bóob́ dikɔ̀ndi kí lìntī ni-nabiyaamu nyɔkɔpu kí cùú tūtuǹ-bi 15 bí já kí tin cáá sāā ŋyunti ŋun ní ni-Nimbɔtiu làá dāá tīī-bi diŋuŋfil kii u nín tīī ni mun diŋuŋfil puee, ní bi mun ń ŋmā kí fōō kitiŋ kin ti-Dindaan ni-Nimbɔtiu tīī-bee. Míǹ boonee ní ní gítiń kí dāá kàl̄ ni-tiŋki kin ti-Dindaan tɔntɔnliu Mooyiisi tīī-ni Jɔɔdan buŋgbandi din bí doo pú nee, an dàkà yii dibuŋgbándi din bí ŋwìiń nyalaŋki pú nee^b.»

16 Ní bi bí Joosuwa yii: «Ti kíí ki làá ŋá tin kɔkɔ a yaa bí yii tí ŋée. Laakin ní a yaa pée tú-tee, ti làá cù. 17 Kii ti nín nìn pée pílifiǹ Mooyiisi tikɔkɔ poon puee, míǹ mbaantiim ní ti làá nīn tí pílifíǹ sii mun. Ti-Dindaan a-Nimbɔtiu ń nīn bí a-cee kii u nín nìn bí Mooyiisi cee puee. 18 Unil un kamaa yaa ŋèen̄ nì a-marab, ki yíì kaa pílifì a-nyɔkɔ kí ŋá a nín lī puee, bí kpɔ̀ udaan! Siiyee, pɔ́ɔǹ a-ba kí ká dipɔbil!»