Joosuwa Gbɔŋku 2

Joosuwa tú bicɔŋkiliibi bili Jeeriikoo tiŋkin

1 Isirayeel yab dáá bí Siitiim tiŋkin ní Nuuni jipɔɔn Joosuwa lēē binib bili ki tú dibalin ki bí-bi yii: «Ní cùmaan kí yìiǹ kí cɔ̄ŋkì kí béé Jeeriikoo tiŋki kɔkɔ.» Binibee bàn̄ee ní ki kɔ́ kinimpulaakpaai kiba dumpu ki dōoǹ. Bi yíì kinimpulaakpaai gbanti yii Rakaab^a. 2 Ní binib cūtìi nyá Jeeriikoo bɔtiu kuŋaŋŋaau yii: «Kpèè, Isirayeel yab biba kɔ́nní ti-tiŋki pu doo kunyeeu nee kí yìiǹ kí cɔ̄ŋkì kí béé kitiŋ!» 3 Ní Jeeriikoo bɔtiu tú bi tùkū Rakaab yii: «Nyāntiń binib bin dɔ́miń ki kɔ́ a-dumpuee kí tīī-ti, kun puee bi dɔ́miń kí cɔ̄ŋkì kí béé kitiŋ nee filiŋfeetii kɔkɔ ní.» 4 Rakaab nìn cáá bininjabee liitil ki bál̀ ní ki kíí bin ubɔti túnnée yii: «Tiŋman, bininjabee lafun dɔ́miń m-cee, ama maa nyí laakin bi nyánnée. 5 An nín bɔ̄ntì bi làá pìin̄ kitiŋ punyɔkɔkee ní binib gbanti nyáń^b, maa nyí laakin bi búntèe. Ní jàmaan bi-boon malaa, ni làá cúú-bi nsanni!»

6 Ibaamɔnee Rakaab nìn cáá bininjabee ki jɔ́ntiǹ u-diiku yilpu laakin bi bɔ̀b̄ee, ki dū-bi ki bál̀ tiŋmiil kpaŋkpaatii in u fùkū ki díntì kudii yilpuee taapu. 7 Ní ubɔti naacimbee kùl̄ ki páaǹ bininjab bilee boon, ki túĺ Jɔɔdan buŋŋu watil pú laakin kaa nyóò binib còom̄ ki dùtēe. Bi nyáń ki búntèe ní bi dū kitiŋ punyɔkɔki ki pīiǹ. 8 Kí wàatī Rakaab nicambi bin u bál̀ee ń dòon̄ee, ní u nín jɔ́ḿ bi-cee kudii yilpu. 9 U bàn̄ee ní ki bí-bi yii: «M nyí yii ti-Dindaan dū kitiŋ nee ki ŋá ni-ŋaan. Ni yāntì dinyoondi kɔ́-ti an kaa cáá bí lì. Ni-puee, tifaandi kɔ́ kitiŋ nee nib kɔkɔ bi nyùn̄ ŋkpatim. 10 Di sá yii ti gbìl̄ ti-Dindaan nín yāntì Tikati mɔɔl nyim fóotì ni-nimbiin ni dūtì ŋyunti ŋun ni nìn nyáń Eejipiti tiŋkinee. Ti gíti gbìl̄ tin ní ni ŋá Amɔɔr yab bɔtiibi liitil Siiwɔn nì Ɔɔgi bin bí Jɔɔdan buŋŋu lapu puee, nì ni nín nāaǹ bibɔtiibi gbanti liitil nì bi-wanti pílpil puee^c. 11 Ti nín gbìl̄ mimmee, tifaandi kɔ́-ti ní ti nyùn̄ ŋkpatim ní báà unil kaa ti cáá dipɔbil kí ŋmā kí yūĺ ni-nimbiin kí jáǹ-ni. Tiŋman pu, ti-Dindaan ni-Nimbɔtiu di sá Unimbɔti un bí yilpu fɔ́ŋŋŋee ní ki sá Unimbɔti kitiŋ pu taapu doo mun. 12 Kɔŋkɔnnee ní pùtī ti-Dindaan yii m nín ŋá-ni tiniti tin nee, ni mun làá ŋá m-baa dicaŋkun yab tiniti kí téeǹ, ní kí tīī-mi kudaaŋŋu yii ni làá lafun ŋá míǹ. 13 Ní yàntī m-baa nì m-na nì m-niijab nì m-mambi nì m-naalib nì bi-dicaŋŋi nib kɔkɔ ń nīn bí dimaŋfalin. Ní taa yàntī bí kpɔ̀-ti». 14 Ní bininjabee kíí-u yii: «Ti kíí kí kpú nimbi yil pu, sii dee taa pée yàntī ti-bɔti nee ń nyā ti nì si kansikin ubɔ ń gbìl̄-tì! Ti-Dindaan yaa láa yāntì kitiŋ nee kɔ́ ti-ŋaanee, ti làá dāá ŋá-si tiniti kí dàkà-si ti-baamɔŋyi.»

15 Niinee Rakaab dū ŋŋmii ki tɔ́ tɔkɔla boon pú ní bininjabee dī ki kpákatì taapu, kitiŋ boon. Di sá yii kitiŋ gundi pu ní bi nìn máń kudii kun Rakaab kóòyee ki tɔ́kɔǹ. 16 Bi làá nīn nyēēyee ní Rakaab kpáafì-bi yii: «Ní túĺmaan dijool watil pú bin bíi jì kí cúú-nee ń taa ká-ni. Ní gbíntí dijool pu niin kí báĺ iwiin ita kí nīn cí binib gbanti ń fàtīí gítiń, boonee ní nín nìkī ni-saŋŋu kí nīn cá.» 17 Ní bininjab bilee bí-u yii: «Timbi làá ŋúb́ dipoondi din a yāntì ti pūtì ki pōoǹ-see. 18 Ama kpèè, ŋwiin ŋun a yaa láa ká ti kɔ́nní kitiŋinee, á dāá dū gulfaman ŋmiiŋu nee kí kúĺ kí lúntí tɔkɔla un a yāntì ti dī ki nyáń nee. Ŋyunti gbantee, á dāá kóoǹ a-baa nì a-na nì a-nabiyaamu nì a-baa dicaŋkun yab kɔkɔ kí kpāfì dicilpu a-dumpu. 19 Un kamaa yaa láa pée nyáń mmɔŋkee, udaan di dāa yì úǹ u-ba kpuulool, an kaa dāa sá timbi bɔti. Ama bi yaa láa pée gbēē unil un kamaa bí a-dumpuee, timbi di dāa yì udaan kpuulool. 20 Ama a yaa dū ti-bɔti nee ki máafì binibee, taa làá ti ŋúb́ dipoondi din a yāntì ti pūtì ki pōoǹ-see». 21 Ní Rakaab kíí-bi yii: «Ni nín lī puee, án ŋá míǹ!» U lī mimmee ní ki pú-bi nsan bi nín cá, ní u nyàab̄ gulfaman ŋmiiŋu ki dūu kúĺ ki lúntì tɔkɔla pu. 22 Ní bininjab bilee nín cá dijool pu ki cūtìi bál̀ niin iwiin ita. Ubɔti naacimbi bin bíi jì kí cúú-bee nyàab̄-bi didandi pu ki gīī kaa ká-bee, ní ki fātìi nín gítí. 23 Niinee ní bininjabee liitil kpákatì dijool, ki dūtì Jɔɔdan buŋŋu ki cūtì Nuuni jipɔɔn Joosuwa cee ní ki dū bi nín bàn̄ tin jítèe kɔkɔ ki máafì-u. 24 Bi bí Joosuwa yii: «Tiŋman pu, ti-Dindaan lafun dū kitiŋee kɔkɔ ki ŋá ti-ŋaan ní. Di sá yii timbi puee, tifaandi kɔ́ ki-nib kɔkɔ ní bi nyùn̄ ŋkpatim!»