Joosuwa Gbɔŋku 3

Isirayeel yab dūtì Jɔɔdan buŋŋu

1 Kutaa wúntì kutaafaau pɔ̀lpɔlee ní Joosuwa yíkì Siitiim kaaŋun, u nì Isirayeel yab kɔkɔ, ní bi cōom̀ ki tin bàn̄ Jɔɔdan buŋgbandi. Bi bàn̄ niinee ní ki gbíntì ki kāl̀ kí cīití ŋwiin ŋun bi làá dùtī mbunee. 2 Iwiin ita boonee ní Isirayeel yab tindaŋkpilib yìin̄ ki māntì dinaapaal kɔkɔ poon, 3 ki báakì ki tùkū binib yii: «Ni yaa láa pée ká Leefii naantiibi bisaraaŋaliibi^a yōoǹ ti-Dindaan ni-Nimbɔtiu Poondi dakaau ki būkuǹee, ní dāá nyā dinaapaalin kí páań bi-boon. 4 Mimmee ni làá béé nsan ŋun ní ni máaǹ kí nóóyee, kun puee naa láá pée cōom̀ nsan nee pu ki ká. Ama ní yàntī mpaan ń nīn dɔ̄ ni nì Dipoondi dakaau kansikin kí bà kii ditaŋkpal diba, kí taa nín̄ pìl̄-u tikpil.»

5 Ní Joosuwa tùkū samaa yii: «Ní bɔ́ntímaan ni-ba kí nīn bí circir, kun puee fool ti-Dindaan làá fu ŋá maamaaci tuuŋŋi ni-kansikin.» 6 Míǹ boonee ní Joosuwa bí bisaraaŋaliibi yii: «Yòom̄maan Dipoondi dakaau kí lìntī samaa nyɔkɔpu!» Ní bi yōoǹ Dipoondi dakaau ki līntì samaa nyɔkɔpu.

7 Ní ti-Dindaan tùkū Joosuwa yii: «Díǹ wiiŋŋu nee ní m làá kíĺ kí yàntī á nyā diyindi Isirayeel yab kɔkɔ nimbiin ní bí béé yii m làá nīn bí a-cee kii m nín nìn bí Mooyiisi cee puee. 8 Tùkù bisaraaŋaliibi bin tú Dipoondi dakaauee yii bi yaa cōom̀ ki bàn̄ Jɔɔdan buŋŋuee, bí kɔ́ poon kí yūĺ nnyimin.» 9 Niinee ní Joosuwa bí Isirayeel yab yii: «Ní sútiḿmaan doo kí dāá pīlifì tibɔti tin ti-Dindaan ni-Nimbɔtiu cáá ki làá sòoǹee!» 10 Bi kóoǹní ki kpáfèe ní Joosuwa bí-bi yii: «Tin bí nee di làá yàntī ní béé yii Unimbɔti un bí dimaŋfalinee bí ni-kansikin ní ki làá lafun jà Kanaan yab nì Eeti yab nì Eefi yab nì Peeriisi yab nì Giirgaasi yab nì Amɔɔr yab nì Jeebusi yab kí wàatī-ni. 11 Kpèèmaan, duulinya kɔkɔ Dindaan Poondi dakaau làá lìntī ni-nyɔkɔpu kí kɔ́ Jɔɔdan buŋŋun ní nee. 12 Kɔŋkɔnnee, ní lēēmaan Isirayeel naakɔti poon binib saalaa nì bili, kunaakoou kamaa unil ubɔ ubɔ. 13 Bisaraaŋaliibi bin bùkū ti-Dindaan, duulinya kɔkɔ Dindaan Poondi dakaauee dāa pée lì yii bi dù bi-tafati kí gbēē Jɔɔdan nyimee, nnyim min pùubìń yilpu puee làá gbèen̄ kaa làá ti pùub̀, ní kí kóoǹ kí ŋá dinyiŋgundi.»

14 Ní Isirayeel yab nyáń bi-tantibin kí dùtī Jɔɔdan buŋŋu, ní bisaraaŋaliibi bùkū Dipoondi dakaau ki līī samaa nyɔkɔpu. 15 An nìn sá ŋyunti ŋun bi cēē tikpaajinee ní. Dibindi poonee, ŋyunti gbanti ní Jɔɔdan buŋŋu gbéè kí páań. Bisaraaŋaliibi bin bùkū Dipoondi dakaauee nín bàn̄ Jɔɔdan buŋgbandi ki tin pée dùŋfī bi-taaŋi kí gbēē nnyimee, 16 nnyim min pùubìń yilpu puee síl̀ kaa ti bíi pùubìń, ní ki kóoǹ ki ŋá dinyiŋgundi, doooo kitiŋ kin bi yíì yii Adam kì pìlīǹ Saartan tiŋkee. Ní nnyim min pùub̀ taapu pu ki sìntī Arabaa teeku mɔɔl din bi gíti yíì yii Ŋyaam mɔɔlee watil púee, míǹ púntìi pùub̄ ki búntì. Ní samaa dūtì Jɔɔdan buŋŋu, Jeeriikoo tiŋki nyɔkɔpu. 17 Bisaraaŋaliibi bin bùkū ti-Dindaan Poondi dakaauee pée sí Jɔɔdan buŋŋu kansikin ŋkulimmi, ní Isirayeel yab kɔkɔ dāa dūtì Jɔɔdan buŋŋu ŋkulimmi ki dóò.