Bibɔsoonliibi Gbɔŋku 2

Ti-Dindaan wòon̄ u-nibul

1 Ti-Dindaan tuuŋŋu nyáń Giilgaal tiŋkin ki jɔ́m̀ Bookiim tiŋkin ki bí Isirayeel yab yii: «M nyántìń-ni Eejipiti tiŋkin ní ki cáá-ni ki kɔ́ǹ kitiŋ kin m nìn pūtì ki pōoǹ yii m làá tīī ni-baabee. M nìn lī yii: <M kpá kí kpìtī mpèé ŋun m bóob́ nì nee. 2 Ni mun nì binib bin kóò kitiŋ nee ń taa ŋá mpèé. Ní gbá kí kpìtī bi-saraafaŋyi kɔkɔ.> Ama ní nimbi kaa pílifì m-nyɔkɔ. Ba bɔti ní ni ŋá mimmee^a! 3 Míǹ pu ní ma mun bí yii: <Maa làá jà binib bin kóò kitiŋ nee puee kí wàatī-ni. Binib gbanti làá nīn sá-ni kpaalaa, ní bi-waaŋi ń nīn sá-ni kutaliŋŋu.» 4 Ŋyunti ŋun ti-Dindaan tuuŋŋu sòon̄ nì Isirayeel yab tibɔti neeyee, ní bi-kɔkɔ kíĺ ki bíi gà dituweel ki sūǹ lɔ̀lɔ. 5 An pu ní bi pú mpaan gbanti diyindi yii Bookiim, taapu di sá yii <Bin sūǹee>, ní bi ŋá saraabi niin ki tīī ti-Dindaan.

Joosuwa kúm

6 Niinee ní Joosuwa pú Isirayeel yab kinyɔkɔ bí nīn kùǹ, ní báà ŋma búntì ditinjandi din bi yākatì ki tīī-u difakalee ki cūtìi kāl̀^b. 7 Isirayeel nibul nìn jáaḿ ti-Dindaan baba ní ŋyunti ŋun Joosuwa nìn dáá bí dimaŋfalinee. Joosuwa kúm boonee, bi nìn gbíntìi jáaḿ-u ŋyunti ŋun bitikpilib bin nìn bí ki ká atuŋkpaan ŋin kɔkɔ ti-Dindaan nìn ŋáaǹ ki tīī Isirayeel yabee nìn dáá bí dimaŋfalinee. 8 Ti-Dindaan tɔntɔnliu Joosuwa, Nuuni jipɔɔn nìn cáá abin dilaataal nì abin saalaa ní ki nín kpíì. 9 Bi nìn síb́-u u-tinjandi din bi nìn tīī-u difakalee pu, Tiiminati-Eereesi tiŋkin, Eefiraayiim jool pu ki gítí Gaasi jool ŋgan pú. 10 Boonee ní Joosuwa yuntiŋu yab gbanti dāa kpíì ki dóò. Binipɔmbi nìn yíkì ki téeǹ bi-yil, ama bíǹ kaa nìn nyí ti-Dindaanaaa, kaa nìn nyí atuŋkpaan ŋin ní u nìn ŋáaǹ ki tīī Isirayeel yabee.

Isirayeel yab fātì bi-boon ki tīī ti-Dindaan

11 Isirayeel yab nìn ŋá min kaa kítì ti-Dindaan ceeyee, ní ki nìn bí ki tòotī diwaal Baal. 12 Bi nìn fātì bi-boon ki tīī ti-Dindaan, bi-baabi Nimbɔtiu un nìn nyántìń-bi Eejipiti tiŋkinee, ní ki nóó inimbɔti in binib bin kansikin bi nìn kóòyee jáaḿee. 13 Bi nìn fātì bi-boon ki tīī ti-Dindaan ní ki bí ki tòotī Baal nì Asitaartee. 14 Ti-Dindaan nìn gíí Isirayeel yab pu diŋuul. U nìn dū-bi ki líiǹ digaŋgandambi bi jàkā-bi ní ki dū-bi ki ŋá bi-nannanliibi bin māntìi tú-bee ŋaan. Baa nìn gíti ŋūǹ kí yūĺ bi-nannanliibi nimbiin kí jáǹ-bi. 15 Ŋyunti kamaa bi yaa nìn gíti nyáń ki cūtì kujaauee, ti-Dindaan nìn dàkà u-pɔŋŋu ní ki yàntī bi jáà ki pɔ́ɔkíǹ-bi, kii úǹ ti-Dindaan u-ba nín nìn pée tùkū-bi ki pūtì yii u làá ŋá puee. An ŋá mimmee ní kunimbaau kɔ́ Isirayeel yab tikpil. 16 Niinee ti-Dindaan u-ba lēē bibɔsoonliibi biba Isirayeel nibul poon ní bíǹ fìil̄ samaa kɔkɔ ki líikí digaŋgandambi bin nìn bí ki jàkà-bee ŋaan. 17 Ama nì míǹ kɔkɔee, Isirayeel yab kaa nìn pílifì bi-bɔsoonliibi gbanti nyɔkɔ gba. Bi nìn bí ki nóó inimbɔticaan iba boon, ki gbàantí i-nimbiin ki jáaḿ-i. An kaa nìn pée súŋkì ní bi dū nsan ŋun bi-baabi bin nìn ŋúb́ ti-Dindaan marabee nìn nóóyee ki fá, kaa ti nóó-ŋu. 18 Ti-Dindaan nín nìn lèekī bibɔsoonliibi ki tìì Isirayeel yabee, úǹ ti-Dindaan u-ba nìn bí ubɔsoonli un kamaa u yaa nìn lēēyee cee, ní ki nìn fìil̄ Isirayeel yab bi-nannanliibi ŋaan ubɔsoonlee maŋfal wiiŋyi kɔkɔ poon. Di sá yii bi-nannanliibi yaa nìn bíi wɔ́b̀-bi ki sàantí-bi ní bi bíi sūǹ ki yáliŋkée, ti-Dindaan nìn sūǹ bi-saai. 19 Ama ubɔsoonlee tin lì yii u kúùyee, ní Isirayeel yab ń fàtīí tí gáatí kí jītíǹ bi-baabi nín nìn gáatí puee gba. Bi nìn nōotí inimbɔticaan, ki gbàantí i-nimbiin ki jáaḿ-i. Baa nìn féeń atuŋkpiti ŋin bi nìn ŋáańeeyaaa, kaa nìn yàntī mpɔɔgbifin ŋun bi nìn cááyee mun.

Ti-Dindaan cɔ́ŋkì u-nibul Isirayeel yab

20 Niinee ní ti-Dindaan gíí diŋuul Isirayeel yab pu ki lī yii: «Ditimbundi nee nib kpītì m-pèéŋu ŋun m nìn bóob́ man nì bi-baabee, kaa pílifì m-nyɔkɔ. 21 An puee ma mun kaa làá ti jà atimbun ŋin nib Joosuwa kaa nìn jìn̄ ní ki nín kpíìyee kí wàatī-bi.» 22 Ti-Dindaan nìn là kí dī atimbun gbanti pu ní kí cɔ̄ŋkì u-nibul Isirayeel yab kí kpèè yii bi làá nīn gbíntìi nóó úǹ ti-Dindaan saŋŋu kii bi-baabi nín nìn nóó pueeyaaa, baa làá nīn nóó. 23 An pu ní ti-Dindaan nìn yāntì atimbun gbanti nib gbíntìi bí Kanaan tiŋkin, kaa nìn jìn̄-bi malaayaaa, kaa nìn dū-bi ki ŋá Joosuwa ŋaan mun.