Bibɔsoonliibi Gbɔŋku 3

1 Atimbun ŋin nib ti-Dindaan nìn yāntì bi gbíntìi bí Kanaan tiŋkin, ú dī bi-pu kí cɔ̄ŋkì Isirayeel yab bin kaa nìn ká bi-baabi nín nìn jáń nì Kanaan yab puee sèé. 2 U nìn baasii là yii binipɔmbi bin kaa nìn pée jáń kujaau ki kée ń bīfì bi nín jáà kujaau puee ní. 3 An nibee di nìn sá Fiiliistii yab bɔtiibi biŋmooyee, nì Kanaan yab nì Siidɔn yab nì Eefi yab bin kɔkɔ nìn kóò Leebanɔn jool pu, kí yòon̄ Baal-Eermɔn jool kí tin cáá sāā Leeboo-Amaati tiŋkee. 4 Ti-Dindaan nìn lēē binib gbanti kí dī bi-pu kí cɔ̄ŋkì Isirayeel yab kí kpèè yii bi làá nīn nóó marab bin úǹ ti-Dindaan nìn dī Mooyiisi pu ki tīī bi-baabeeyaaa, baa làá nīn nóó-bi. 5 Míǹ ní Isirayeel yab nìn kɔ́ Kanaan yab nì Eeti yab nì Amɔɔr yab nì Peeriisi yab nì Eefi yab nì Jeebusi yab kansikin. 6 Bi nìn cáá binib gbanti bisalib, ki nìn dū bi-bisalib ki tīī binibee jipɔmbi ticati, ní ki nìn bí ki jáaḿ bi-nimbɔtii.

BIBƆSOONLIIBI BƆTI

Ootiniyeel

7 Isirayeel yab nìn ŋá min kaa kítì ti-Dindaan ceeyee, di sá yii bi nìn dū ti-Dindaan bi-Nimbɔtiu saŋŋu ki fá ní ki nìn kíǹ ki bí ki tòotī Baal nì Aseera. 8 Ti-Dindaan nìn gíí Isirayeel yab pu diŋuul ní ki dū-bi ki ŋá Kusan-Riseeyatayiim, Aram-Naarayiim bɔtiu ŋaan. Isirayeel yab nìn kāl̀ Kusan-Riseeyatayiim taapu abin anii ní. 9 Isirayeel yab nìn kúuǹ ki yíiń ti-Dindaan, ní ti-Dindaan lēē bi-kansikin Ootiniyeel, Kaleeb naal Keenaasi jipɔɔn ní úǹ fīī-bi. 10 Ti-Dindaan Fam nìn gbí Ootiniyeel ní u kpántì Isirayeel yab bɔsoonliu. U nìn cūtìi jáń nì Kusan-Riseeyatayiim, Aram bɔtiu ní ti-Dindaan dū Kusan-Riseeyatayiim ki ŋá u-ŋaan, ní u jáń ki pɔ́ɔkiǹ-u. 11 Niinee ní Isirayeel tiŋki sɔ̄ŋkì ki tin sāā abin imuŋku ili. Míǹ boonee ní Keenaasi jipɔɔn Ootiniyeel kpíì.

Eewuudi

12 Isirayeel yab nìn fātìi kíĺ ki bíi ŋáań min kaa kítì ti-Dindaan ceeyee. Bi nín nìn bíi ŋáań min kaa kítì ti-Dindaan ceeyee puee ní u yāntì Moowaab bɔtiu Eeglɔn pɔ́ɔkiǹ-bi. 13 Ubɔti Eeglɔn nìn dū Amɔn yab nì Amaleeki yab ki kútì u-ba pu ní bi cūtìi jáń ki pɔ́ɔkiǹ Isirayeel yab, ní ki cúú Jeeriikoo, Ibafi tiŋki ki fōō bi-cee. 14 Isirayeel yab nìn kāl̀ ubɔti Eeglɔn taapu abin saalku nì ata ní. 15 Isirayeel yab nìn kúuǹ ki yíiń ti-Dindaan, ní ti-Dindaan nìn lēē bi-kansikin Geera jipɔɔn Eewuudi ú fīī-bi. U nìn sá Beenjameen naakookun ní, ki nìn sá ugan.

Úǹ ní Isirayeel yab nìn lēē ki tú ú cáá lampoo kí cùnnì kí tīī Moowaab bɔtiu Eeglɔn. 16 Eewuudi nìn yāntì bi mɔ́ɔ́-u kitàataajiki kiba, kì jītí ajanliitil pu ní ki-fɔkɔŋŋu sá kii dimeetajandi nyɔkɔm. U nìn dū kitàataajikee ki gbìn̄ tiwan tin u pēēyee poon, ní an pá u-ŋaŋgiitapandi pu. 17 Boonee ní u cáá lampooyee ki cūnnì ki tīī Eeglɔn, Moowaab bɔtiu. Eeglɔn gbanti nìn baasii gbìfì ní. 18 Eewuudi nín dū lampoo ki tīī ubɔtee ní u fātìi nín gítí ki cūtìi céeǹ binib bin nìn túǹ lampoo gbantee ki nyántì nsanni. 19 Ama úǹ u-ba nín bàn̄ laakin bi yíì yii Awaa Paaŋŋu, Giilgaal tiŋki caŋinee ní ki fātìi nín gítí ki cūtìi tùkū ubɔti Eeglɔn yii: «Ti-baa ubɔti, m cáá tibɔti tiba kí tùkù-si ubɔ ń taa gbìl̄!» Ní ubɔti bí bin kɔkɔ nìn yú ki kɔ́ĺ-uee yii bí nyā kí wàatī-u ní bi nyáń^a. 20 Ubɔti nìn kā u-diiku kun nìn tɔ́kɔ́ yilpu ki sɔ̀m̀ fílfil bi bɔ́ntì ki yóoǹ úǹ babee poon ní Eewuudi sútìi pìl̄-u ki bí-u yii: «Tibɔti tin m cáá kí tùkù-see sá Unimbɔti bɔti ní.» Ní ubɔti yíkì u-beejal pu ki yáatìi yúl̀. 21 Niinee ní Eewuudi tāntì u-ŋaŋgan ki cúú kitàataajiki kin nìn pá u-ŋaŋgiitapandi puee ki dáaĺ ki nēetì ní ki dūu sāā ki cóoǹ ubɔti pool pu. 22 Kitàataajiki nìn múĺ ubɔti poolin ki kpáaǹ dijigbandi ní ŋkpam nìn dūu bīiǹ dijigbandi pu, kun puee Eewuudi kaa nìn dáaĺ kitàataajiki ki fɔ́fìń ubɔti pool poon. 23 U nìn làá nyēe ní ki dáaĺ kudii kun tɔ́kɔ́ yilpuee punyɔmmu ki pīiǹ ki kpàl̄ ubɔti pu ní ki dī boon pú ki nyáń.

24 Eewuudi nìn nín nyēē ubɔti tɔntɔnliibi dāa dɔ́mińee ní ki ká yii kudii kun tɔ́kɔ́ yilpuee punyɔmmu pīī ki kpàl̄. Niinee ní bi lī yii: «An yaa yíì u máaǹ ki kɔ́ ataa pu u-diiku kun sɔ̀m̀ee poon ní.» 25 Bi nìn cíitì ki tin gīī, waa bíi pìitī kudii kun tɔ́kɔ́ yilpuee punyɔmmu. Bi dāa yōoǹ saafii ki cúú kudii ki pīitì ki kpēēyee, bi-kpiliu di dɔ̄ kitiŋ ki kpíìyee. 26 Ŋyunti ŋun ní bi nìn kā ki tàantí mimmee, Eewuudi úǹ nìn sáǹ ki kɔ́ ndan. U nìn jítì laakin bi yíì yii Awaa Paaŋŋuee pu, ki nìn bí ki sáń ki cá Seeyira tiŋki watil pú kí ŋmátí. 27 U nìn sáǹ ki bàn̄ Eefiraayiim jooŋŋi puee ní ki búń ŋyin ní Isirayeel ninjab kɔkɔ nyánní ki kpáfì. U nìn līntì bi-nyɔkɔpu ní bi-kɔkɔ páaǹ u-boon ki nín sìntī dijool taapu. 28 U nìn bí-bi yii: «Páaḿmaan m-boon, kun puee ti-Dindaan dū ni-nannanliibi Moowaab yab ki ŋá ni-ŋaan!» Bi nìn lafun páaǹ u-boon ki sīntì ki cūtìi gāā ki kíntì Jɔɔdan buŋŋu laakin ní binib còom̄ ki dùtī Moowaab tiŋki jaaŋŋu púee, kaa nìn yāntì báà uniseen dūtì. 29 Ŋyunti gbantee, Isirayeel yab nìn kūū Moowaab yab bininjab bin nìn sá tijawɔkɔl ki sá bibaatandambee kii binib kutukub saalaa nyɔkɔm. Bi-kansikin báà uniseen kaa nìn sáǹ ki ŋmátì. 30 Kí yòon̄ ŋwiin gbanti ní Isirayeel yab nyīī Moowaab yab ki gùl̄ bi-taapu, ní Isirayeel tiŋki sɔ̄ŋkì ki tin sāā abin imuŋku inaa.

Samgaar

31 Eewuudi boonee, Anaati jipɔɔn Samgaar di nìn páaǹ. U nìn dū ndɔ ŋun nyɔkɔpu cáá mpiin bi cáa sàatī inaa kiŋkinti i tūǹ atuunee ki kūū Fiiliistii yab binib alaataa aluu ní. Min ní Samgaar nìn ŋá ki fīī Isirayeel yabee dee.