Bibɔsoonliibi Gbɔŋku 4

Deeboora nì Baraaki

1 Eewuudi kúm boonee Isirayeel yab nìn fātìi kíĺ ki bíi ŋáań min kaa kítì ti-Dindaan ceeyee. 2 Ti-Dindaan nìn dū-bi ki ŋá ukaanaambɔti Jabiini un nìn kāl̀ Asɔɔr tiŋkin ki jíń dibeelee ŋaan. U-janjakitil kpiliu di nìn sá Siiseela, ama Siiseela úǹ nìn kóòń Arooseeti-Gooyiim tiŋkin ní. 3 Isirayeel yab nìn kúuǹ ki yíiń ti-Dindaan, kun puee Siiseela nìn cáá tikúti janjatɔrɔkub^a alaataa awa, ní ki nìn múkú Isirayeel yab tikpilku áli abin mmuŋku kɔkɔ.

4 An yuntiŋuee, Lapiidɔti nimpuu Deeboora un nìn sá Unimbɔti bɔnaatiliuee di nìn sá Isirayeel bɔsoonliu. 5 U nìn kóò Eefiraayiim jooŋŋi pu ní, Raama nì Beeteel timmu kansikin, laakin bi yíì yii Deeboora Babu taapuee, ní binib nìn cá u-cee u ŋáŋkí bi-bɔti. 6 U nìn tú bi yíiń Abinoowaam jipɔɔn Baraaki, Keedeesi tiŋki kin bí Neefitalii tinjandinee. U bāańee ní Deeboora bí-u yii: «Kpèè, ti-Dindaan Isirayeel Nimbɔtiu u-ba di tīī-si mara nee yii: <Yīkì kí cùú lēē bijanjaliibi kii binib kutukub saalaa Neefitalii nì Sabulɔn naakɔti poon ní cùú kpāfì Tabɔɔr jool pu. 7 M làá dáaĺ ubɔti Jabiini janjakpiliu Siiseela kí cáań a-cee Kiisɔn buŋŋu caŋin, kí dū-u kí ŋá a-ŋaan, u nì u-janjatɔrɔkub nì u-janjaliibi kɔkɔ.>» 8 Ní Baraaki bí-u yii: «A yaa làá céeǹ-mi tí cù, m làá cù. Ama a yaa kaa làá céeǹ-mee, ma mun kaa làá cù.» 9 Ní Deeboora bí-u yii: «An yaa sée m làá céeǹ-si tí cù. Ama á nīn nyí yii kujaau kun a cá kí já nee nyooti kaa làá tin nín̄ sá a-yati. Di sá yii unimpu ŋaan ní ti-Dindaan làá tin dū Siiseela kí ŋá.»

Niinee ní Deeboora yíkì ki céeǹ Baraaki ní bi búntì Keedeesi tiŋkin. 10 Baraaki nìn yíiń Sabulɔn nì Neefitalii naakɔtin yab ki kpáfì Keedeesi tiŋkin. Binib kutukub saalaa di nìn páaǹ u-boon ki jɔ́m̀. Deeboora mun nìn nóó-u ki jɔ́m̀. 11 Eebeer un nìn sá Keeni maaliŋunee nìn dáaĺ u-ba ki nyántì Keeni yab, Mooyiisi coo Oobaab naantiibi kansikin. U nìn cūtìi cóoǹ u-tantiu seeni subu bun bí Sanayiim tiŋki ki pìlīǹ Keedeesi tiŋkee taapu.

12 Bi nìn cūtìi tùkū Siiseela yii Abinoowaam jipɔɔn Baraaki nín jɔ́ḿ Tabɔɔr jool pu. 13 Niinee ní Siiseela kóoǹ u-janjatɔrɔkub bin sá tikútee alaataa awee nì binib bin nìn bí u-cee Arooseeti-Gooyiim tiŋkinee kɔkɔ ki kpáfì, ní bi nín cá Kiisɔn buŋŋun. 14 Ní Deeboora bí Baraaki yii: «Yīkì kí nīn cá, di sá yii díǹ wiiŋŋu ní ti-Dindaan dū Siiseela ki ŋá a-ŋaan. Ti-Dindaan u-ba di līī a-nyɔkɔpu.» Ní bijanjaliibi kutukub saalaayee páaǹ Baraaki boon bi nín sìntī Tabɔɔr jool taapu. 15 Ti-Dindaan nìn yāntì fìkil fikil kɔ́ Siiseela nì u-janjatɔrɔkub nì u-janjaliibi kɔkɔ Baraaki nimbiin, ní bi dū ntàataajimu ki kūū-bi. Ní Siiseela nyáń u-janjatɔrɔkuun ki sáǹ ataa pu ki kátì. 16 Baraaki nì u-naacimbi nìn kùl̄ ki páaǹ janjatɔrɔkub nì bijanjaliibi boon, ki jìn̄-bi ki tin bàn̄ Arooseeti-Gooyiim tiŋkin. Bi nìn dū ntàataajimu ki kūū Siseela janjaliibi kɔkɔ múb, báà uniseen kaa kíǹ.

17 Nì mimmee Siiseela úǹ nìn bíi sáń ataa pu ki cá Eebeer un sá Keeni maaliŋunee nimpuu Jaayeel tantiu watil pú, di sá yii Asɔɔr bɔtiu Jabiini nì Keeni naantiiu Eebeer dicaŋku kansikin nìn mɔ̄. 18 Jaayeel nín wál̀ Siiseela páaǹnée, ní u nyáń ki túŋkì-u nsanni ki bí-u yii: «Dāá kɔ́ doo nee, m-dindaan, dāan̄ kí kɔ́ m-dumpu. Taa fàŋkì báà tiba!» Ní Siiseela nín kóò Jaayeel dumpu. U nìn kɔ́ ki bál̀ Jaayeel tantiun ní úǹ dū satakpaan ki bīiǹ u-pu. 19 Ní Siiseela bí-u yii: «Pɔ̄-mi nnyim ḿ nyɔ̀, nnyinnyoo cáá-mi.» Ní Jaayeel cúú kuloou kun poon u ŋáań nnaabiimee ki pīitì, ki bātì nnaabiim ki tīī Siiseela nyùn̄ ní u gíiǹ satakpaanee ki bīiǹ u-pu. 20 Ní Siiseela gíti bí-u yii: «Á nīn yú tanti punyɔkɔpu, ubɔ yaa dɔ́miń ki bālifì-si yii: <Unil ubɔ bí doooo?> á kíí yii: <Aayee!>»

21 Siiseela nìn gīī tikpil ní ki nìn dɔ̄ ki gèeǹ fɔ̀rrr. Niinee ní Eebeer nimpuu Jaayeel dáaĺ ki cóotì tanti kpakpaal diba, ki yōoǹ dikújal ní ki ŋá soooo ki kɔ́ Siiseela cee. U nìn dū dikpakpaal ki kpēē ki bíitiǹ Siiseela taŋkpanjil ki kpáá ní an kɔ́ ki cāatì ki tin cóoǹ kitiŋ. Ní Siiseela kpíì dicilpu niin. 22 Ŋyunti gbantee Baraaki mun nìn bíi yìiǹ ki nyàab̀ Siiseela dee! Ní Jaayeel nyáń ki túŋkì-u nsanni ní ki bí-u yii: «Dāan̄ ḿ dàkà-si unil un a nyàab̀ee.» Ní Baraaki nóó-u ki kɔ́ u-dumpu ki kpēēyee, Siiseela di dɔ̄ ki kpíìyee, dikpakpaal sāā ki bá u-taŋkpanjil.

23 Ŋwiin gbantee, Unimbɔti nìn nyīī Kanaan bɔtiu Jabiini ki gùl̄ Isirayeel yab taapu. 24 Niinee ní Isirayeel yab mɔ̄tìi múkú Kanaan bɔtiu Jabiini tiŋan pu, ní ki dāa ŋúń ki kūū-u.