Joosuwa Gbɔŋku 24

Isirayeel yab lēē kí nīn nóó ti-Dindaan

1 Joosuwa kpáfì Isirayeel naakɔti kɔkɔ Siikeem tiŋkin, ní ki yíiń Isirayeel yab tindaŋkpilib nì bi-yidambi nì bi-bɔsoonliibi nì bi-gbaŋŋmaliibi ní bi-kɔkɔ dɔ́miń ki kpáfì ti-Dindaan nimbiin. 2 Niinee ní Joosuwa bí Isirayeel yab kɔkɔ yii: «Ti-Dindaan Isirayeel Nimbɔtiu nín lī puee sèé: <Cannaakuee ni-naanjab Abraam nì Naakɔɔr baa Teera nìn kóòń Eefiraati mɔɔgbandi lapu jaaŋŋu pú ní, ní ki nìn tòotī awaa. 3 Kitiŋ kin bí Eefiraati mɔɔgbandi lapu jaaŋŋu gbanti púee ní m nìn yōoǹní ni-naanja Abraam, ki nìn cáá-u ki yìin̄ ki māntì Kanaan^a tiŋki kɔkɔ, ki nìn yāntì u-maaliŋu būtì tiŋan, ní ki nìn tīī-u Isaaki. 4 M nìn tīī Isaaki mun Jaakɔb nì Eesayuu. M nìn dū Seeyiir jool ki tīī Eesayuu ú nīn yì, ama ní Jaakɔb nì u-jipɔmbi nìn sīntì Eejipiti tiŋkin. 5 Boonee, m nìn lēē Mooyiisi nì Aarɔn ki tú, ki nìn yāntì ditafadaaldi bàn̄ Eejipiti yab tiŋan bi-wunti píĺ nì bi-ba, ní m dāa nín nyántìń-ni niin^b. 6 M nín nìn nyántì ni-naanjab Eejipiti tiŋkin bi bāań Tikati mɔɔl caŋinee, Eejipiti yab nìn jìn̄ bi-boon ki tin bāań niin, bi nì bi-janjatɔrɔkub nì bi-tanjakaliibi. 7 Ni-naanjab nìn kúuǹ ki yíiń man ni-Dindaan ḿ jòoń-bi, ní m nìn dū dibɔmbɔndi^c ki pītì ni nì Eejipiti yab kansikin ní ki nìn yāntì dimɔɔl nyim fātìi gítì ki bīiǹ bi-pu. Nimbi ni-ba nìn ká m nín nìn ŋá Eejipiti yab puee. Míǹ boonee, ni nìn kāl̀ kuteeun ki yúntì tikpil. 8 M nìn cáá-ni ki cūnnì Amɔɔr yab bin nìn kóòń Jɔɔdan buŋgbandi lapu puee tiŋki pu. Binib gbanti nìn jáń nì ni. M nìn dū-bi ki ŋá ni-ŋaan ni ŋúń ki jáń ki fōō bi-tiŋki, ní m kúntì bi-kɔkɔ ni-nimbiin. 9 Siipɔɔr jipɔɔn Balaaki, Moowaab yab bɔtiu mun nìn yíkì kí jáǹ-ni ní ki nìn tú bi yíiń Beewɔɔr jipɔɔn Balaam ú dāan̄ kí tɔ̄-ni mbusu. 10 Ama maa nìn kíí ki pílifiǹ Balaam. See u nín nìn líbitì ki bīiǹ ni-puee, ní m nìn fīī-ni ki nyántì Balaaki ŋaan^d. 11 Ni nìn dūtì Jɔɔdan buŋŋu ki bāań Jeeriikoo tiŋkin ní Jeeriikoo yab nìn jáń nì ni. Amɔɔr yab nì Peeriisi yab nì Kanaan yab nì Eeti yab nì Giirgaasi yab nì Eefi yab nì Jeebusi yab mun nìn jáń nì ni. Ama m nìn dū bi-kɔkɔ ki ŋá ni-ŋaan^e. 12 M nìn dū abaakati ní ki līntì ni-nyɔkɔpu ní ŋi sáǹ ki jìn̄ Amɔɔr yab bɔtiibi bilee. An kaa nìn sá ni-tàataajimmu nì ni-tɔfii ní ni nìn dūu jìn̄-bi. 13 M nìn tīī-ni tikpaatan faalaa, ní naa nìn gīī digìńdi báà diba ti-pu. M nìn tīī-ni ntimu ni kāl̀, ama ní kaa máń-mu. M nìn tīī-ni fiinyi nì ɔliifi sufii in naa nìn cóoǹee, ama ní ki bí ki ŋmóò i-biliŋ.>»

14 Ní Joosuwa kútì yii: «An puee, kɔŋkɔnnee ní fàŋkìmaan ti-Dindaan, kí nīn jáaḿ-u nì ni-pɔbil kɔkɔ nì ibaamɔn poon. Ní dū awaa ŋin ni-naanjab nìn tòotī Eefiraati mɔɔgbandi lapu jaaŋŋu pú nì Eejipiti tiŋkinee kí fá, kí nīn kíǹ ki jáaḿ ti-Dindaan baba. 15 Ama an yaa kaa fáatì-ni yii ní nīn jáaḿ ti-Dindaanee, ní lēē díǹ nee un ni làá nīn jáaḿee. Ni yaa là awaa ŋin ni-naanjab nìn tòotī ŋyunti ŋun bi nìn bíń Eefiraati mɔɔgbandi lapu jaaŋŋu púeeyaaa, ni yaa tí là Amɔɔr yab bin tiŋki ni kóò nee waaŋaaa, ní lēē. An yaa kíǹ kii man nì m-dicaŋkuee, timbi làá nīn jáaḿ ti-Dindaan ní!»

16 Ní samaa kíí Joosuwa yii: «Unimbɔti ń cáá cùnnì ndan! Timbi kpá kí fàtī ti-boon kí tīī ti-Dindaan kí cùú nīn tòotī awaa aba fám! 17 Di sá yii ti-Dindaan ti-Nimbɔtiu di nìn nyántìń ti nì ti-naanjab kuyuŋun Eejipiti tiŋkin, ní ki nìn ŋáaǹ atuŋkpaan ti-nimbiin ti kántì. Úǹ di bīiǹ ti-boon nsan ŋun ti nìn cōom̀ee poon nì anibul ŋin kɔkɔ pu ti nìn jítì jítèe. 18 Ti-Dindaan di nìn jìn̄ Amɔɔr yab nì anibul ŋin nìn kóò kitiŋ nee puee kɔkɔ ki wāatì-ti. An puee ti mun lēē yii ti-Dindaan ní ti làá nīn jáaḿ, kun puee úǹ di sá ti-Nimbɔtiu.»

19 Ní Joosuwa bí samaa yii: «Naa làá ŋmā kí nīn jáaḿ ti-Dindaan, kun puee u sá Unimbɔti un bí circiree ní, ki sá Unimbɔti un cáá ipoompoonee^f. Waa làá dū ni-yìntitam nì ni-kpitii kí pɔ̄-ni. 20 Ni yaa fātì ni-boon ki tīī ti-Dindaan ki kíǹ ki bí ki tòotī awaayee, u làá bíkití ni-pu ní kí ŋá-ni tin kaa ŋān̄ee. Tiŋan tin u ŋá-nee boonee, u làá nàan̄-ni ní pílpil!» 21 Ní samaa kíí Joosuwa yii: «Kpataaa, ti-Dindaan ní ti làá nīn jáaḿ!» 22 Niinee ní Joosuwa bí-bi yii: «Nimbi ni-ba sá ni-seeradambi yii ni lēē kí nīn jáaḿ ti-Dindaan!» Ní bi kíí-u yii: «Iiin, ti sá ti-seeradambi.» 23 Ní Joosuwa bí-bi yii: «An yaa sée, kɔŋkɔnnee ní dū awaa ŋin kɔkɔ bí ni-ceeyee kí fá, ní kí dū ni-ba kí nákáǹ ti-Dindaan Isirayeel Nimbɔtiu nì ni-pɔbil kɔkɔ!» 24 Ní samaa kíí Joosuwa yii: «Ti-Dindaan ti-Nimbɔtiu ní timbi làá nīn pée jáaḿ, ní kí nīn tɔ́-u.»

25 Ŋwiin gbanti ní Joosuwa yāntì u nì samaa pūtì ki pōoǹ, ní u síiǹ Siikeem tiŋkin niin abɔkpaa nì akoobil ŋin ní bi máaǹ kí nīn nóóyee. 26 Ní Joosuwa dū an bɔtee kɔkɔ ki ŋmàn̄ ki ŋá Unimbɔti Marau gbɔŋku poon. U dóòyee ní ki dū ditaŋkpakpaandi diba ki cóoǹ niin, busubu bun bi yíì yii teereebinti bu yú mpaan ŋun pu bi jáaḿ ti-Dindaanee taapu. 27 U cóoǹ ki dóòyee ní ki bí samaa kɔkɔ yii: «Ní kpèèmaan! Ditaŋkpal nee di làá dāá nīn sá-ti seeradaan, kun puee di gbìl̄ anyɔɔbun ŋin kɔkɔ ní ti-Dindaan sòon̄ nì tee. Dì làá nīn sá ni-seeradaaŋwu án nín làá ŋá pu ní taa fàtī ni-boon ki tīī ni-Nimbɔtiuee.» 28 Niinee ní Joosuwa pú samaa nsan yii báà ŋma ń nīn kùǹ, ní báà ŋma nín gítí u-tiŋki pu.

Joosuwa kúm nì u-síbitam

29 Tibɔti nee kɔkɔ jítì boonee ní Nuuni jipɔɔn Joosuwa, ti-Dindaan tɔntɔnliu kpíì. U nìn cáá abin dilaataal nì saalaa ní. 30 Bi nìn síb́-u kitiŋ kin bi nìn tīī-u u kíǹ ki yèe poon ní, an dàkà yii Tiiminati-Seera tiŋki kin bí Eefiraayiim jooŋŋi pu, ki gítí Gaasi jool ŋgan púee. 31 Isirayeel yab nìn jáaḿ ti-Dindaan ŋyunti ŋun ní Joosuwa nìn dáá bí dimaŋfalinee nì u-kúm boon bikpilib bin nìn dáá gbíntìi bí dimaŋfalin, ki nìn ká atuŋkpaan ŋin kɔkɔ ti-Dindaan nìn ŋáaǹ ki tīī Isirayeel yabee.

32 Isirayeel yab nìn cáá Jooseefi kpabiŋ ŋin bi nìn kpáaǹní Eejipiti tiŋkinee ki síb́ Siikeem tiŋkin, ntampaan ŋun Jaakɔb nìn dá Siikeem baa Amɔɔr naantiibi cee ki pàn̄-u animbil jitɔmbi dilaataalee pu^g. Ntampaan gbanti mun nìn kútì Jooseefi naantiibi tinjandi poon.

33 Aarɔn jipɔɔn Eeleeyasaar mun dāa kpíì, ní bi cáá-u ki síb́ u-jipɔɔn Piinaasi gbantaŋki kin bi nìn tīī-u Eefiraayiim jooŋŋinee pu.