Joosuwa Gbɔŋku 23

Joosuwa sòon̄ u-bɔjoolkaati

1 Ti-Dindaan nìn yāntì Isirayeel yab ká diŋuŋfil abin kupaau bi-nannanliibi bin māntìi tú-bee cee. Ŋyunti gbantee Joosuwa nìn púĺ ki kpántì utikpil. 2 Joosuwa nìn yíiń Isirayeel yab kɔkɔ nì bi-tindaŋkpilib nì bi-yidambi nì bi-bɔsoonliibi nì bi-gbaŋŋmaliibi kɔkɔ ki kpáfì. U nìn bí-bi yii: «Kɔŋkɔnnee m púĺ tikpil. 3 Nimbi ni-ba ká, ni-puee, tin kɔkɔ ti-Dindaan ni-Nimbɔtiu ŋá atimbun nee kɔkɔee. Di sá yii ti-Dindaan ni-Nimbɔtiu u-ba di jáń ki tīī-ni. 4 Ní kpèè, m tɔ́ kasi ki dū atimbun ŋin timmu m jáń ki fōōyee ki yākatì ki tīī-ni ki nóó nì ni-naakɔti. M tí dū atimbun ŋin timmu taa láá jáń ki fōō kí yòon̄ Jɔɔdan buŋŋu ŋwìiń nyalaŋki pú ki tin cáá sāā Meediiteeranee tiŋkuu ŋwìiń jeetilaŋki púee ki yākatì ki tīī-ni. 5 Ti-Dindaan ni-Nimbɔtiu u-ba di làá jà-bi kí wàatī-ni, kí yàntī bí sāǹ kí fá bi-timmu, ní ní fōō bi-timmu kí nīn kíǹ ki yì, kii úǹ ti-Dindaan ni-Nimbɔtiu u-ba nín nìn pōoǹ-ni puee. 6 An puee nimbi kámaan dipɔbil tiŋan, kí pɔ́ɔǹ kí nīn nóó tin tin kɔkɔ ŋmàn̄ ki kā Mooyiisi Marab gbɔŋkunee. Ní nīn pée nóó-tì deedee, kí taa kpòotī kí cù ŋgiil púɔɔɔ, kí taa kpòotī kí cù ŋgan pú. 7 Ní taa dū ni-ba kí ŋmàlim̀ atimbun ŋin kíǹ ki dáá gbíntìi kóò ni-kansikin nee nib poon. Ní taa pée pútí bi-waaŋi yiŋŋi, kí taa yíiń ŋi-yiŋŋi kí pùtī, kí taa gbàan̄ ŋi-nimbiin kí jāam̀-ŋi. 8 Ti-Dindaan ni-Nimbɔtiu baba ní ni máaǹ kí dū ni-ba kí nákáǹ, kii ni nín pée ŋá pu ki dāa sāā díǹ pu nee. 9 Ti-Dindaan jìn̄ atimbun ŋin sá akpaan ki pɔ̄ɔ̄yee nib ni-nimbiin, ní báà unil kaa ŋúń ki yúl̀ ni-nimbiin ki dāa sāā díǹ pu nee. 10 Ni-kansikin unibaanti nìn ŋūǹ kí jà binib kutuku ubɔ, kun puee ti-Dindaan ni-Nimbɔtiu di nìn jáà ki tìì-ni, kii u nín nìn pōoǹ-ni puee. 11 An puee ní nīn nyíǹ ni-ba kí nīn néeń ti-Dindaan ni-Nimbɔtiu. 12 Ama ni yaa fātì ni-boon ki tīī-u ní ki yaa dū ni-ba ki nákáǹ atimbun ŋin kíǹ ki dáá bí ni-kansikin nee nib, ki cāab̀ tɔb ní ki còom̄ ki póotí tɔb puee, 13 ní nīn nyí tiŋan yii ti-Dindaan ni-Nimbɔtiu kaa làá ti jà atimbun gbanti kí wàatī-ni. Ŋi làá dāá kpántí kii kutaliŋŋu àá kpaalaa ní kí tīī-ni, ní kí dāá kpántí mbambaan ŋun bi làá nīn cáa gbáà-nee, ní kí kpántí ikuŋkum ki sàatī ni-nimbiliŋ. An dāa pée kúntée, ni làá dāá wāŋkì kitimmɔntii kin ti-Dindaan ni-Nimbɔtiu dūu tīī-ni nee pu ní. 14 Ní kpèè, díǹ pu nee man cá laakin unifoo kamaa cée dee. Nimbi ni-ba ń béé nì ni-pɔbil kɔkɔ nì ni-naŋki kɔkɔ yii tiŋan tin kɔkɔ ní ti-Dindaan ni-Nimbɔtiu nìn pōoǹ-nee, u ŋá ti-kɔkɔ pái ki tīī-ni, báà tiba kaa kíǹ waa ŋá. 15 Ama kii ni nín ká tiŋan tin kɔkɔ ti-Dindaan ni-Nimbɔtiu pōoǹ-nee, míǹ mbaantiim ní mbusu un u làá dūú tɔ̄ ni-puee mun làá bàń-ni. U làá dāá kúntí-ni kitimmɔntii kin úǹ ti-Dindaan ni-Nimbɔtiu u-ba dūu tīī-ni nee pu. 16 Ni yaa yīntiǹ dipoondi din u pōoǹee, ki yaa cūtì ki bíi tòotī awaa ki gbàantí ŋi-nimbiin ki jáaḿ-ŋee, ti-Dindaan ŋuul làá jēetí ni-pu. An kaa làá sūŋkì ní ní kpú kí céetí kitimmɔntii kin u tīī-ni nee poon.»