Joosuwa Gbɔŋku 22

Tinaakɔti tin bí ŋwìiń nyalaŋki púee

1 Niinee ní Joosuwa yíiń Rubeen naakookun yab nì Gaadi naakookun yab nì Manasee naakookun yab dijandi din bíń Jɔɔdan buŋgbandi ŋwìiń nyalaŋki púee ki kpáfì. 2 U nìn bí-bi yii: «Ni ŋá tin kɔkɔ ti-Dindaan tɔntɔnliu Mooyiisi nìn tīī-ni mara yii ní ŋée, ki ŋá tin ma mun yóoǹ-ni yii ní ŋée kɔkɔ. 3 Naa dū ni-nabiyaamu ki fá abin kupaau ŋin jítì nee ki dāa dūu sāā díǹ. Ni nóó ti-Dindaan ni-Nimbɔtiu nín yóoǹ-ni mara puee deedee. 4 Kɔŋkɔnnee, ti-Dindaan ni-Nimbɔtiu tīī ni-nabiyaamu diŋuŋfil din u nìn pōoǹ-bee. Ni ŋūǹ kí kpì ni-dumpui, kitiŋ kin ti-Dindaan tɔntɔnliu Mooyiisi nìn tīī-ni Jɔɔdan buŋŋu ŋwìiń nyalaŋki pú jaaŋŋuee. 5 Ama ní nīn ŋúb́ marab bin ti-Dindaan tɔntɔnliu Mooyiisi tīī-nee tiŋan. Ní nīn néeń ti-Dindaan ni-Nimbɔtiu, kí nīn còom̄ u-saŋyi poon, kí nīn tɔ́ u-marab, kí dū ni-ba kí nákáǹ-u ní kí nīn nóó-u nì ni-pɔbil kɔkɔ nì ni-naŋki kɔkɔ».

6 Niinee ní Joosuwa mēē ki bīiǹ bi-pu ní ki pú-bi nsan bi fātìi nín kùǹ bi-dumpu. 7 Mooyiisi nìn tīī Manasee naakooku dijandi diba yab ditinjandi Baasan tiŋkin, ní Joosuwa tīī kunaakoou gbanti jandi din kíǹee yab ditinjandi bi-nabiyaamu kansikin, Jɔɔdan buŋgbandi ŋwìiń jeetilaŋki pú. Joosuwa nìn pú-bi nsan yii bí nīn kùǹ bi-dumpu ní ki mēē ki bīiǹ bi-pu. 8 U nìn bí-bi yii: «Nín̄ kùm̀maan ni-dumpui kí kpáaǹ tigaajawan nì tiwaŋkuti nì animbil nì sindaariya nì tasa kúti nì tikúmɔntiil nì tiwampeeŋkaal tikpil tikpil. Ni nì ni-nabiyaamu ń tin yàkatī ni-nannanliibi wanti tin ni jáń ki fōō bi-ceeyee.»

Nsaraafan ŋun bi máń Jɔɔdan buŋŋu caŋinee

9 Rubeen nì Gaadi naakɔti nì Manasee naakooku dijandi dibee yab nìn nín kùǹ bi-dumpui. Bi nìn yíkì Isirayeel yab bin kíǹee cee, Siiloo tiŋki kin bí Kanaan tiŋki poonee ki nín fàtī Galaadi tiŋkin. Mooyiisi di nìn dū kitiŋ gbanti ki tīī-bi bí nīn yì, ki nóó nì ti-Dindaan nín nìn tīī mara puee. 10 Rubeen nì Gaadi naakɔtin yab nì Manasee naakooku dijandi dibee yab nìn bàn̄ kitiŋ kin dɔ̄ Jɔɔdan buŋŋu caŋin Kanaan tiŋki jaaŋŋu púee, ní ki máń nsaraafan ŋkpaan ŋubɔ ki yóoǹ Jɔɔdan buŋŋu caŋin niin. 11 Ní bi dɔ́miń ki tùkū Isirayeel yab bin kíǹee yii: «Kpèèmaan, Rubeen nì Gaadi naakɔtin yab, nì Manasee naakooku dijandi dibee yab máń nsaraafan Kanaan tiŋkin, Jɔɔdan buŋŋu caŋin, timbi jandi pú».

12 Isirayeel yab gbìl̄ mimmee, ní samaa kɔkɔ kóoǹ ki kpáfì Siiloo tiŋkin, ki bóob́ dikɔ̀ndi kí cùú jáǹ-bi kujaau. 13 Isirayeel yab nìn lēē usaraaŋakpil Eeleeyasaar jipɔɔn Piinaasi ki tú Rubeen nì Gaadi naakɔtin yab nì Manasee naakooku dijandi dibee yab cee Galaadi tiŋkin. 14 Bi nìn lēē bikpilib saalaa ki kútì u-pu. Kunaakoou kamaa ukpil ubɔ, ní ukpil kamaa sá u-dicaŋku poon uyidaan, ki nóó nì Isirayeel yab nín nìn pēē pēē mmaal puee. 15 Bi nín cá Rubeen nì Gaadi naakɔtin yab, nì Manasee naakooku dijandi dibee yab cee Galaadi tiŋkin. Bi bàn̄ee ní ki sòon̄ nì bi yii: 16 «Ti-Dindaan samaau kɔkɔ nyɔkɔpu ní ti sòoǹ nì ni nee. Ba yintikpaandi ní ni yīntiǹ Isirayeel Nimbɔtiu mimmee? Ba ŋá ní ni nyáń ti-Dindaan boon díǹ ki máń ni-ba nsaraafan ki bíi jáà nì u míǹ? 17 Mimmee ikpiti in ti nìn ŋá Peewɔɔr tiŋkinee kaa ŋmāntàaa? Díǹ pu nee taa láá pàn̄ ikpiti gbanti pɔndi ki dóò, báà nì min kɔkɔ i-puee, ti-Dindaan dáaĺ u-samaau tafal ŋkpitim puee^a! 18 Ní díǹ nee, nimbi bíi fàtī ni-boon ki tìì ti-Dindaanaaa? Díǹ nee, ni yaa bíi jáǹ ti-Dindaanee, fool boonee u-ŋuul làá dāá jēetí Isirayeel samaau kɔkɔ pu ní. 19 Ni yaa ká yii kitiŋ kin bi tīī-nee kaa bí circiree, ní póotiń ti-Dindaan tiŋki pu doo, laakin u-circir kɔŋkooŋŋu bée, kí dāan̄ ti nì ni ń nīn bí ki-pu. Ama ní taa jáǹ ti-Dindaan, kí taa jáǹ ti mun, kí mā ni-ba nsaraafan ŋubɔ kí kūtì ti-Dindaan ti-Nimbɔtiu saraafaŋŋu pu! 20 Seera jipɔɔn Akan nín nìn yīntiǹ ti-Dindaan ki yùn̄ tiwan tin kpántì u-wantee tibee, ti-Dindaan ŋuul kaa nìn jéetì Isirayeel samaau kɔkɔ pu níii^b? U-baba di kaa nìn kpíì u-kpitii pu!»

21 Niinee ní Rubeen nì Gaadi naakɔtin yab nì Manasee naakooku dijandi dibee yab kíí Isirayeel yab nín pēē pēē mmaal puee kpilibee yii: 22 «Ti-Dindaan di sá Unimbɔtikpaan! Tiŋman, ti-Dindaan di sá Unimbɔtikpaan ní ki nyí kun pu ti ŋá mimmee, ní ki là yii Isirayeel yab mun ń béé. An yaa sá yii ti nín ŋá puee, ti bíi jáà nì ti-Dindaan àá ti yīntiǹ-uee, ú taa yàntī tí nīn gíti bí! 23 Ti yaa máń nsaraafan yii tí fàtī ti-boon kí tīī ti-Dindaan, kí ŋá saraawɔkaa àá tijimpin saraau àá mpèé saraauee, ti-Dindaan u-ba ń bàlifì-ti^c! 24 Ama an kaa sá míǹ! Ibaamɔn puee, tibɔti tin ŋūǹ ki làá jītí fool boonee pu ní ti fāŋkì ki ŋá míǹ. Di sá yii fool boonee, ni-naantiibi dāa ŋūǹ kí bàlifì ti-yab yii: <Ba di gíti bí ni nì ti-Dindaan Isirayeel Nimbɔtiu kansikin? 25 Ti-Dindaan yóoǹ kikpaanyɔkɔ ti nì nimbi Rubeen nì Gaadi naantiibi kansikin, an di sá Jɔɔdan buŋŋu. An puee báà tiba kaa ti bí ni nì ti-Dindaan kansikin!> Niinee ní ni-naantiibi ń dāá yàntī timbi yab ń gbèen̄ kí taa ti nín̄ jáaḿ ti-Dindaan. 26 An pu ní ti sòon̄ ki yóoǹ yii tí mā nsaraafan ŋubɔ kí yóoń ti-ba, án taa nín̄ sá yii ti làá nīn cáa ŋáań saraawɔkaa àá bisaraafantantiibi biba. 27 Ama án nīn sá kudaaŋŋu kun làá nīn dɔ̄ timbi nì nimbi kansikin, nì timbi nì nimbi naantiibi bin bí ki dòońee kansikin yii ti nìn jáaḿ ti-Dindaan ki ŋáań bisaraawɔkaabi nì bisaraafantantiibi nì mpèé saraabi ki tìì-u. Mimmee ni-naantiibi kaa dāa ŋūǹ kí tùkù ti-yab yii tiba kaa bí bi nì ti-Dindaan kansikin. 28 Ní ti dākafì yii fool boon bi yaa láa bíi sòoǹ timbi nì ti-naantiibi mimmee, ti làá dāá kíí yii: <Kpèèmaan, ti-Dindaan saraafaŋŋu nín bí puee deedee sèé. Ti-naanjab di nìn máń-ŋu. An kaa sá yii bi nìn máń-ŋu kí nīn ŋáań bisaraawɔkaabi àá bisaraafantantiibi ŋu-pu, ama ŋú nīn sá kudaaŋŋu ki dàkà mpèé ŋun bí timbi nì nimbi kansikinee!> 29 Timbi kaa pée dākafì ŋwindal yii ti làá jáǹ ti-Dindaan kí fàtī ti-boon kí tīī-u díǹ kí mā nsaraafan kí nīn ŋáań bisaraawɔkaabi nì tijimpin saraabi nì saraabi bin kíǹee. Taa làá ŋá saraabi nsaraafan ŋubɔ pu fám kí kūtì ti-Dindaan ti-Nimbɔtiu saraafaŋŋu ŋun yú u-circir kɔŋkooŋŋu nyɔkɔpuee pu!»

30 Usaraaŋal Piinaasi nì Isirayeel yab nín pēē pēē mmaal puee kpilib bin nìn céeǹ-uee nín pílifì Rubeen nì Gaadi nì Manasee yab sòon̄ tibɔti tin ki dāa kátèe, ní bi-pɔbil sɔ̄ŋkì. 31 Ní Usaraaŋakpil Eeleeyasaar jipɔɔn Piinaasi tùkū Rubeen nì Gaadi nì Manasee yab yii: «Kɔŋkɔnnee ti béè yii ti-Dindaan bí ti-kansikin, kun puee ni nín ŋá puee kaa sá yii ni jáń nì u. Mimmee ni fīī Isirayeel yab ti-Dindaan ŋaan ki líì dee.»

32 Ní usaraaŋakpil Eeleeyasaar jipɔɔn Piinaasi nì bikpilibee yíkì Rubeen nì Gaadi nì Manasee yab cee Galaadi tiŋkin ki fātìi nín gítiń Kanaan tiŋkin Isirayeel yab cee, ní ki cáań an nín jítìń pu lapuee ki máafì-bi. 33 An bɔtee mɔ́ɔkiǹ Isirayeel yab ní bi jáam̀ Unimbɔti, ní kaa ti sòon̄ yii bi làá cù kí jáǹ Rubeen nì Gaadi yab kí nàan̄ kitiŋ kin bi kóòyee. 34 Rubeen nì Gaadi yab nìn téeń ki lī yii: «Nsaraafan nee sá kudaaŋŋu ki dàkà yii ti-Dindaan baba di sá Unimbɔti!»

Niinee ní bi pú nsaraafanee diyindi yii <Kudaaŋŋu>.