Joosuwa Gbɔŋku 21

Leefii naakookun yab timmu

(Kpèè 1 Kroo 6.39-66)

1 Boonee ní Leefii naakookun yab dicaŋŋi kpilib cūtì ki ká usaraaŋakpil Eeleeyasaar nì Nuuni jipɔɔn Joosuwa nì Isirayeel naakɔti tin kíǹee yab dicaŋŋi kpilib 2 Siiloo, Kanaan tiŋkin. Bi nìn bí-bi yii: «Ti-Dindaan nìn dī Mooyiisi pu ki tùkū-ni yii ní tīī-ti ntimu tí nīn kóò, ní kí tīī-ti ntimu gbanti kpaanceetii tí nīn kpàá ti-waŋkuti.» 3 Di sá ní Isirayeel yab nìn lēē bi-timmu mun bi tīī-bi bí yàkatēe mubɔ, ki kpáaǹ mu-kpaanceetii kɔkɔ ki dūu tīī Leefii naakookun yab, kii ti-Dindaan nín nìn tùkū-bi yii bí ŋá puee.

4 Bi nín nìn tɔ́ kasee, Leefii naakookun yab bin sá Keeyaati maaliŋunee di nìn péé ki fōō bi-timmu. Keeyaati yab gbanti kansikinee, bin nìn sá usaraaŋakpil Aarɔn maaliŋunee ní bi nìn tɔ́ kasi ki lēē ntimu saalaa nì muta ki tīī. Ntimu gbantee, bi nìn lēē-mu Juuda nì Simeeyɔn nì Beenjameen naakɔti yab timmu poon ní. 5 Bi nìn tɔ́ kasi ní ki lēē ntimu saalaa ki tīī Keeyaati naantiibi bin kíǹee. Bi nìn lēē ntimu gbanti Eefiraayiim nì Daani naakɔti nì Manasee naakooku dijandi diba yab timmu poon ní. 6 Bi nìn tí tɔ́ kasi ki lēē ntimu saalaa nì muta ki tīī Geersɔn naantiibi, Isakaar nì Aseer nì Neefitalii naakɔti nì Manasee naakookun yab dijandi din bí Baasan tiŋkinee yab timmu poon ní. 7 Bi nìn tɔ́ kasi ki lēē ntimu saalaa nì muli ki tīī Meerarii naantiibi. Bi nìn lēē ntimu gbanti Rubeen nì Gaadi nì Sabulɔn naakɔtin yab timmu poon ní. 8 Isirayeel yab nìn tɔ́ kasi ní ki lēē ntimu gbanti nì mu-kpaanceetii kɔkɔ ki tīī Leefii yab, kii ti-Dindaan nín nìn dī Mooyiisi pu ki tīī-bi mara puee.

9 Juuda nì Simeeyɔn naakɔtin yab timmu mun bi nìn lēē ki tīī Leefii naakookun yabee sɔ̀. 10 Aarɔn naantiibi Leefii naakookun yab bin sá Keeyaati maaliŋunee di làá nīn yì ntimu gbanti, di sá yii bíǹ ní bi nìn péé ki tɔ́ kasi ki lēē ntimu ki tīī. 11 Bi nìn tīī-bi Kiiriyati-Ariba tiŋki kin bi gíti yíì yii Eebrɔn tiŋki kì bí Juuda jool puee, nì ki-kpaanceetii. Arba di nìn sá Anaaki baa. 12 Ama ní ki dū kitiŋ gbanti sati nì ki-timbilimmu ki tīī Yeefunee jipɔɔn Kaleeb ú nīn kíǹ ki yì. 13 Usaraaŋakpil Aarɔn naantiibi ní bi nìn tīī Eebrɔn tiŋki kin sá ntimu mun unil yaa kaa nyí ki kūū u-juti ú sāǹ kí kɔ́ee kansikin kibee, nì ki-kpaanceetii, nì Liibina tiŋki nì ki-kpaanceetii, 14 nì Yatiir tiŋki nì ki-kpaanceetii, nì Eesiteemoowa tiŋki nì ki-kpaanceetii, 15 nì Oolɔn tiŋki nì ki-kpaanceetii, nì Deebiir tiŋki nì ki-kpaanceetii, 16 nì Aayin tiŋki nì ki-kpaanceetii, nì Yuuta tiŋki nì ki-kpaanceetii, nì Beeti-Seemeesi tiŋki nì ki-kpaanceetii. Ntimu mun bi nìn lēē Juuda nì Simeeyɔn naakɔti liitil yab timmu poonee dee. Mu nìn nyáń ntimu muwa ní. 17 Beenjameen naakookun yab timmu mun bi nìn lēēyee di sá Gabawɔn tiŋki nì ki-kpaanceetii, nì Geeba tiŋki nì ki-kpaanceetii, 18 nì Anatooti tiŋki nì ki-kpaanceetii, nì Almɔn tiŋki nì ki-kpaanceetii. Múǹ nìn nyáń ntimu munaa ní. 19 Ntimu mun bi nìn tīī Aarɔn naantiibi bisaraaŋaliibee nìn kpáfì ntimu saalaa nì muta ní, mu nì mu-kpaanceetii.

20 Leefii naakookun yab poon Keeyaati naantiibi bin kíǹee, bi nìn gíti tɔ́ kasi ní ki lēē Eefiraayiim naakookun yab timmu mubɔ ki tīī bíǹ. 21 Bi nìn tīī-bi Siikeem tiŋki kin nìn bí Eefiraayiim jool pu, ki sá ntimu mun unil yaa kaa nyí ki kūū u-juti ú sāǹ kí kɔ́ee kansikin kibee nì ki-kpaanceetii, nì Geeseer tiŋki nì ki-kpaanceetii, 22 nì Kiifisayiim tiŋki nì ki-kpaanceetii. Mu nìn nyáń ntimu munaa ní. 23 Daani naakookun yab timmu poonee, bi nìn tīī-bi Eelteekee tiŋki nì ki-kpaanceetii, nì Giibeetɔn tiŋki nì ki-kpaanceetii, 24 nì Ayalɔn tiŋki nì ki-kpaanceetii, nì Gaati-Riimɔn tiŋki nì ki-kpaanceetii. Mu nìn nyáń ntimu munaa ní. 25 Manasee naakookun yab dijandi diba timmu poonee, bi nìn tīī-bi Taanaki tiŋki nì ki-kpaanceetii, nì Yibileeyam tiŋki nì ki-kpaanceetii. Mu nìn nyáń ntimu muli ní. 26 Ntimu mun bi nìn lēē ki tīī Keeyaati naantiibi bin kíǹee nìn kpáfì ntimu saalaa ní, ki kpáaǹ mu-kpaanceetii. 27 Leefii naakookun yab poon bin sá Geersɔn naantiibee, Manasee naakooku dijandi din kíǹee timmu mubɔ ní bi nìn tīī bíǹ. Ntimu gbanti di sá Goolan tiŋki kin nìn bí Baasan tiŋkin ki sá ntimu mun unil yaa kaa nyí ki kūū u-juti ú sāǹ kí kɔ́ee kansikin kibee nì ki-kpaanceetii, nì Beesteera tiŋki nì ki-kpaanceetii. Mu nìn nyáń ntimu muli ní. 28 Isakaar naakookun yab timmu poonee, bi nìn tīī-bi Kiisiyɔn tiŋki nì ki-kpaanceetii, nì Deebeerati tiŋki nì ki-kpaanceetii, 29 nì Yaarmuti tiŋki nì ki-kpaanceetii, nì Eeni-Ganiim tiŋki nì ki-kpaanceetii. Mu nìn nyáń ntimu munaa ní. 30 Aseer naakookun yab timmu poonee, bi nìn tīī-bi Miiseeyaal tiŋki nì ki-kpaanceetii, nì Abidɔn tiŋki nì ki-kpaanceetii, 31 nì Eelkaati tiŋki nì ki-kpaanceetii, nì Reewoob tiŋki nì ki-kpaanceetii. Mu nìn nyáń ntimu munaa ní. 32 Neefitalii naakookun yab timmu poonee, bi nìn tīī-bi Keedeesi tiŋki kin nìn bí Galiilee tiŋkin ki sá ntimu mun unil yaa kaa nyí ki kūū u-juti ú sāǹ kí kɔ́ee kansikin kibee, nì ki-kpaanceetii, nì Amɔti-Dɔɔr tiŋki nì ki-kpaanceetii, nì Kaartan tiŋki nì ki-kpaanceetii. Mu nìn nyáń ntimu muta ní. 33 Ntimu mun bi nìn tīī Geersɔn naantiibee dee. Mu nìn kpáfì ntimu saalaa nì muta ní, mu nì mu-kpaanceetii.

34 Leefii naakookun yab poon bin nìn sá Meerarii naantiibee, Sabulɔn naakookun yab timmu mubɔ ní bi nìn tīī bíǹ. Ntimu gbanti di sá Yɔkineeyam tiŋki nì ki-kpaanceetii, nì Kaarta tiŋki nì ki-kpaanceetii, 35 nì Diimina tiŋki nì ki-kpaanceetii, nì Naalal tiŋki nì ki-kpaanceetii. Mu nìn nyáń ntimu munaa ní. 36 Rubeen naakookun yab timmu poonee, bi nìn tīī-bi Beeseer tiŋki nì ki-kpaanceetii, nì Yaakisa tiŋki nì ki-kpaanceetii, 37 nì Keedeemooti tiŋki nì ki-kpaanceetii, nì Meefaati tiŋki nì ki-kpaanceetii. Mu nìn nyáń ntimu munaa ní. 38 Gaadi naakookun yab timmu poonee, bi nìn tīī-bi Ramooti tiŋki kin nìn bí Galaadi tiŋkin ki sá ntimu mun unil yaa kaa nyí ki kūū u-juti ú sāǹ kí kɔ́ee kansikin kibee nì ki-kpaanceetii, nì Maanayiim tiŋki nì ki-kpaanceetii, 39 nì Eesbɔn tiŋki nì ki-kpaanceetii, nì Yaseer tiŋki nì ki-kpaanceetii. Mu nìn nyáń ntimu munaa ní. 40 Leefii naakookun yab poon bin nìn sá Meerarii naantiibee nín nìn fōō ntimu mun kɔkɔee nìn kpáfì ntimu saalaa nì muli ní.

41 Leefii naakookun yab timmu mun nìn bí Isirayeel yab bin kíǹee timmu poonee kɔkɔ nìn kpáfì ntimu imuŋku ili nì munii ní, mu nì ki-kpaanceetii. 42 Bi nìn tīī ntimu gbanti kɔkɔ nì mu-kpaanceetii ní.

43 Ti-Dindaan nìn lafun tīī Isirayeel yab kitiŋ kin u nìn pūtì ki pōoǹ kí tīī bi-naanjabee kɔkɔ. Ní Isirayeel yab fōō kitiŋ gbanti ki kíǹ ki yì ní ki kāl̀ ki-poon. 44 Ti-Dindaan nìn yāntì bi ká diŋuŋfil ajan kɔkɔ pu, kii u nín nìn pōoǹ bi-naanjab puee. Bi-nannanliibi báà ubɔ kaa nìn ŋúń ki jáń ki pɔ́ɔkiǹ-bi, kun puee ti-Dindaan nìn dū bi-nannanliibi kɔkɔ ki ŋá bi-ŋaan. 45 Ti-Dindaan nìn ŋá Isirayeel yab tiŋan tin kɔkɔ u nìn pōoǹ yii u làá ŋá kí tīī-bee, báà tiba kaa nìn gbíntì waa ŋá.