Joosuwa Gbɔŋku 20

Joosuwa lēē ntimu mun poon bi sáń ki kóòyee

1 Ti-Dindaan sòon̄ nì Joosuwa ki bí-u yii: 2 «Tùkù Isirayeel yab yii bí lēē ntimu mun ubɔ yaa kaa nyí ki kūū unil ú sāǹ kí kɔ́ee^a. M nìn dī Mooyiisi pu ki sòon̄ nì ntimu gbanti bɔti. 3 Unil yaa kaa nyí ki kūū u-juti, ní an kaa sá mun yii u-ba nì u-làtamee, unikpɔlee ń sāǹ kí kɔ́ ntimu gbanti kiban kí ŋmátí un u kūūyee nabiki kin máaǹ kí kpɔ̀-u kí tɔ̀ ipɔntoonee ŋaan. 4 Unikpɔlee ń sāǹ kí cù ntimu gbanti kiba poon, kí sīĺ kitiŋ punyɔkɔpu kí dū tibɔti nín jítì puee kí kàaǹ kí tùkù niin tindaŋkpilib. Bitindaŋkpilibee ń fōō unikpɔlee bi-tiŋki gbanti poon, kí nyàab̀ ŋkɔŋkoon kí tīī-u u nì bi ń nīn kóò. 5 Un bi kūūyee nabiki kin máaǹ kí kpɔ̀ unikpɔlee kí tɔ̀ ipɔntoonee yaa jìn̄ u-boonee, bí taa dū unikpɔlee kí ŋá u-ŋaan. Di sá yii unikpɔlee kaa là ní ki kūū-u, kaa tí sá mun yii u ná-u. 6 Unikpɔlee ń gbíntí kí nīn bí kitiŋ gbantin kí dāá sāā ŋyunti ŋun ní u làá dāá yūĺ samaa kɔkɔ nimbiin bí sòoǹ u-bɔtee. Ú nīn bí niin kí cáá sāā ŋyunti ŋun ní usaraaŋakpil un bi lēē ŋyunti gbantee yaa láa kpíìyee. Míǹ boonee, unikpɔlee ŋūǹ kí fàtīí gítí u-dumpu, kitiŋ kin poon u sáǹ ki kátèe.»

7 Di sá ní bi nìn lēē Kadeesi tiŋki kin bí Galiilee tiŋkin Neefitalii jool puee, nì Siikeem tiŋki kin bí Eefiraayiim jool puee, nì Kiiriyati-Ariba tiŋki kin bi gíti yíì yii Eebrɔn tiŋki kì bí Juuda jool puee. 8 Jɔɔdan buŋgbandi lapu pu yal Jeeriikoo tiŋki ŋwìiń nyalaŋki púee, bi nìn lēē Beeseer tiŋki kin bí kuteeunee Rubeen yab tiŋki kin tèen̄ee poon, ki nìn lēē Ramooti tiŋki kin bí Galaadi tiŋkinee Gaadi yab timmu poon, ní ki lēē Goolan tiŋki kin bí Baasan tiŋkinee Manasee yab timmu poon. 9 Ntimu mun bi nìn lēē ki yóoǹ Isirayeel yab kɔkɔ nì binicambi bin kóò bi-kansikinee, un yaa kaa nyí ki kūū u-jutee ń sāǹ kí kɔ́ee dee. Mimmee unikpɔlee ŋūǹ kí ŋmátí un u kūūyee nabiki kin máaǹ kí kpɔ̀-u kí tɔ̀ ipɔntoonee ŋaan, kí nīn cí ŋyunti ŋun ní u làá dāá yūĺ samaa nimbiin bí sòoǹ u-bɔtee.