Ruuti Gbɔŋku 2

Ruuti cūtì ki lúlifì tijin Boowaasi saakun

1 Nawoomii nìn cáá kpeeja ubɔ u nìn sá unikpaan ní ki cáá tigaajati tikpilku. U nìn sá Eeliimeeleeki naakookun ní bi nìn yíì-u yii Boowaasi. 2 Dalbee ní Ruuti kimoowaabibikee bí u-beel Nawoomii yii: «M bàà là kí cù tisatin kí kpèè ulaŋŋaŋfiti ubɔ yaa táá sɔ̄ m-saai kí kíí ḿ nīn pá u-boon kí lūlifì tijin udaan kpaabun.» Ní Nawoomii kíí-u yii: «A ŋūǹ kí nīn cá, m-bisal^a.» 3 Niinee ní Ruuti nín cá ki bàn̄ ki kɔ́ bukpaa bubɔ poon ní ki páaǹ bijincaliibi boon ki bíi lúlifí. Unimbɔti bɔtee, Boowaasi un nì Eeliimeeleeki pēē kunaakoouee di yì bukpaa gbanti. 4 An kútì fiiiyee ní Boowaasi nyánní Beetileem kitiŋin ki bāań, ní ki jáam̀ bijincaliibi yii: «Ti-Dindaan ń nīn bí ni-cee!» Ní bi kíí-u yii: «Ti-Dindaan ń bìin̄ a-boon^b!» 5 Ní Boowaasi bālifì u-tɔntɔnliu un kpèé bijincaliibee yii: «Kin unimpusapɔɔn nee úǹ sá ŋma?» 6 Ní utɔntɔnli un kpèé bijincaliibee kíí-u yii: «An sá kimoowaabibiki kin nóoń Nawoomii ki nyánní Moowaab satinee. 7 U dɔ́miń ní ki mēē nsan ki lī yii: <M bàà là kí páań bijincaliibi boon kí nīn lúlifí tijin tin kīntí bi-boonee.> Doooo kutaafaau u nín pée bāań ki yú puee ní u yú nee. Waa ŋman pée kɔ́ ki kāl̀ kibiŋ taapu kí ŋùŋfì gba!» 8 Niinee ní Boowaasi bí Ruuti yii: «Pīlifì m-bisal! Á taa lì yii a làá gíti cù kusaau kubɔn kí lūlifì tijin, kí taa pée sútí kí cù laaba gba. Á gbíntí m-saakun doo kí dū a-ba kí nákáǹ m-sapɔmbi. 9 Nín̄ pée kpèé bijincaliibi nín cēē ki cá puee ní kí nīn pá bisapɔmbi boon ki lúlifí. M kpáafì m-naacimpɔmbi yii bí yàntī á nīn lúlifí, bí taa páb́-si! Nnyinnyoo yaa cáá-see, á cù kí jōō nnyim min bitɔntɔnliibi lúń ki sītì aboonnee kí nyɔ̀.» 10 Niinee ní Ruuti gbāaǹ Boowaasi nimbiin ki tīntì u-yil taapu taapu ní ki bālifì-u yii: «Mana ní a kíí ki dàkā man un sá kinicambiki nee kulaŋŋaŋfitiiu ki ŋá-mi tiŋan míǹ na?» 11 Ní Boowaasi kíí-u yii: «Bi pée máafì-mi tiŋan tin kɔkɔ a ŋá ki tīī a-beel doooo a-cal nín lántì dimaŋfalee. M gbìl̄ a nín kíí ki fá a-baa nì a-na ki yíkìń kitiŋ kin pu bi màl̄-see, ki nóoń a-beel ki nín dòoń u-tiŋki kin ní saa láá pée nyí ki ká ŋwindalee poonee. 12 Ti-Dindaan di làá pà-si tiŋan tin a ŋée paati! Ti-Dindaan Isirayeel Nimbɔtiu un a sáǹní ki dɔ́miń ki kɔ́ nee ń téeǹ-si tiŋan tin kɔkɔ a ŋá ki tīī a-beelee!» 13 Niinee ní Ruuti fātìi bí-u yii: «Ukpil, a ŋá-mi tiŋan tikpilku. Á nīn pée ŋúb́-mi míǹ, á taa dū-mi kí fá! Di sá yii a sòon̄ nì man a-tɔntɔnliu an kɔ́-mi, ki tīī-mi kunyannyaau, ki sɔ̄ŋkì m-pɔbil. Ama maa kpáàa bàn̄ a-tɔntɔnliibi binimpoobi kansikin báà ubɔ gba!»

14 Ŋyunti ŋmāntì bi làá jī tijinee ní Boowaasi bí Ruuti yii: «Dāan̄ kí kàl̄ tí jī tijin. Dāá gíí kpɔnɔ kí sēē tikun kí ŋmɔ́.» Niinee ní Ruuti cūtìi kāl̀ ki kɔ́ĺ bijincaliibi ní Boowaasi lēē ɔɔji fiŋyi in bi púĺee ki tīī-u. Ruuti fōō ki ŋmēem̀ ki ŋmɔ́ ki díkí ní an kíǹ, ní u dūu kpáafì. 15 Ruuti jíń tijin ki dóòyee ní ki yíkìi nìkī ki bíi lúlifí. Ní Boowaasi tīī u-naacimbi mara ki lī-bi yii: «Ní yàntī ú nīn lúlifí ki kpáaǹ ni nín cēē ɔɔji ki bīil̀ ipɔ̀n pu kí dāá nín kóoǹee kansikin, ní taa pée lì-u tiba an bīil̀ u-pɔbil. 16 Ní nīn lèekī ifin in ni cēē ki bīil̀ kí dāá nín kóoǹee iba gba ki bīil̀-u ú nīn yòontí, ní taa wòoǹ-u.» 17 Míǹ ní Ruuti gbíntì Boowaasi saakun ki lúlifì ní ŋwìiń dāa dūu jéetì. U nìn gbáń ɔɔji un u lúlifèe kɔkɔ ki cāatì ki ŋmāntì, ní ki ká kii asambil saalku nyɔkɔm^c.

18 U yōoǹ ki túǹ ki cáa nín kùǹ mmɔŋki ní ki bàn̄ ki dūu dàkā u-beel Nawoomii, ní ki dū tijin tin u jíń ki kíǹee mun ki tīī-u. 19 Ní u-beel bālifì-u yii: «La ní a lúlifìń mimmee? La ní a cūtìi túń ditundi díǹ ní? Unimbɔti ń bìin̄ udaan un súń a-saayee boon!»

Ní Ruuti tùkū u-beel unil un cee u cūtì ki túń ditundi yaadal gbantee ki lī yii: «Uninja un cee m túń ditundi díǹ neeyee yindi di sá Boowaasi.» 20 Niinee ní Nawoomii bí u-coopu yii: «Ti-Dindaan un dàkà timbi binifoobi ki kpáaǹ bitaŋkpiibi u-ŋanti kaa gbèentée ń bìin̄ unil gbanti boon!» U lī mimmee ní ki kútì yii: «Uninja gbanti sá ti-niliu ubɔ ní. U sá ti-dicaŋku poon bin bin cáá nsan kí fōō-ti kí ŋúb́ee kansikin ubɔ ní.» 21 Ní Ruuti kimoowaabibiki fātìi kūbitì ki bí yii: «U gíti lī-mi yii: <Á dū a-ba kí nákáǹ m-tɔntɔnliibi binimpoobi kí taa pée sútí ki wàatī-bi kí tin sāā ŋyunti ŋun bi làá cā m-kpaajinti kɔkɔ kí dóóyee.>» 22 Niinee ní Nawoomii bí u-coopu Ruuti yii: «Tiŋman ní, m-bisal! Pée dū a-ba kí nákáǹ u-tɔntɔnliibi binimpoobi kí taa cù unifantanti ubɔ saakun bi dāa ŋáań-si ntoom.»

23 Ní Ruuti gbíntì Boowaasi tɔntɔnliibi binimpoobi cee ki lúlifì tijin ní bi dāa cáń ɔɔji nì bilee^d ki dóò. U nìn pée gbíntìi kóò u-beel Nawoomii cee ní.