Ruuti Gbɔŋku 3

Ruuti cūtì Boowaasi naapaal pu

1 Dalbee ní Ruuti beel Nawoomii bí-u yii: «M-bisal, m ká yii m máaǹ kí tūtuǹ-si á ká ŋkakaamɔnti kucadiin kí kàl̄ a-pɔbil ń nīn sɔ̀m̀. 2 Kéè a téetí Boowaasi un kíí ki yāntì sii nì u-tɔntɔnliibi binimpoobi kpáfì u-saakun ki túń ditundi, ti nì u pēēyeeyaa! Too, kunyeeu nee ní uninja gbanti làá càatī ɔɔji un bi cáń-uee u-naapaal pu. 3 An puee á fàl̀ kí bɔ́ntí a-ba, kí dū a-wampeeŋkaati timɔntiil kí pèen̄, kí yàaǹ a-ba pu talaalu ní kí sìntī u-naapaal din pu u cēē u-jinti ki bīil̀ee. Ama á taa yàntī ú béé a-pu kí tin sāā ŋyunti ŋun ní u yaa jíń ki nyùn̄ ki dóòyee. 4 U yaa dōoǹee á dáań tiŋan kí béé laakin u dɔ̄ee. U yaa gèen̄ee á ŋá soooo kí cùú wákatí sata kí bìitī u-taaŋi pu ní kí dòon̄ kí kɔ́ĺ-u u-taaŋi taapu niin. Úǹ u-ba làá tùkù-si a nín làá ŋá puee.» 5 Ní Ruuti kíí u-beel yii: «M làá ŋá tin tin kɔkɔ a bí yii ḿ ŋée!»

6 Ní Ruuti nín sìntī Boowaasi naapaal pu ki bàn̄ ki ŋá min min u-beel kpáafì-u yii ú ŋée deedeedee. 7 Boowaasi jíń ki nyùn̄ an mɔ́ɔkiǹ-u tiŋanee ní u cūtìi dōoǹ tijikaal tin u kóoǹ ki kpúkuǹee caŋin. U dōoǹee ní Ruuti ŋá soooo ki cūtìi cúú sata ki wákatì ní ki dōoǹ u-taaŋi taapu. 8 Kunyataasiiuee ní an ŋá Boowaasi nyàaa ní u yùkū ki fīntì. U kpēēyee unimpu di dɔ̄ u-taaŋi taapuee. 9 Ní u bālifì yii: «An sá sii ŋma?» Ní Ruuti kíí-u yii: «An sá man a-tɔntɔnliu Ruuti. M dɔ́miń kí kɔ́-si ní. Kíí kí fōō-mi kí nīn ŋúb́. Di sá yii a sá m-cal nabiyaamu mun cáá nsan kí fōō-mi kí ŋúb́ee kansikin ubɔ ní.» 10 Niinee ní Boowaasi fātìi bí-u yii: «Ti-Dindaan ń bìin̄ a-boon, m-bisal! Min a bíi ŋáań nee dàkà dineendi din a cáá a-cal dicaŋku puee ki jítiǹ min a nìn ŋá mpeepeekaamee. Di sá yii aa dū a-landɔkɔŋu ki tɔ́ binaacimpɔmbi bin cáá tigaajatee àá bin kaa cááyee pu. 11 An puee, m-bisal, taa fàŋkì báà tiba! Tin kamaa a yaa pée bālifì-mee, m làá ŋá kí tīī-si. Ti-tiŋki pu doo nee nib kɔkɔ nyí yii a sá unimpu un cáá difaŋgiil, ki cáá dipɔbilee ní. 12 Tiŋman ní m lafun sá a-niliu ki bàà cáá nsan kí fōō-si kí ŋúb́, ama kinabiki kiba bí u nì a-cal gíti pēē kiŋkiŋ ki jítiǹ mama. 13 Gbíntí doo kí dòon̄ kunyeeu nee, fool kutaafaauee m làá fu sòoǹ nì u kí kpèè. U yaa fu kíí kí fōō-saaa, an ŋān̄ ú fōō-si. Ama u yaa fu yíì yii waa làá fōō-see, nì Unimbɔti un bí dimaŋfalinee yindi pu, man làá fōō-si! An puee, gbíntí doo kí dòon̄ kutaa ń púntíí wúntí!»

14 Míǹ ní Ruuti gbíntì ki dōoǹ Boowaasi taaŋi taapu niin ní kutaa dāa wúntì. Ama ní u yíkì kutaafaau pɔ̀lpɔl, ŋyunti ŋun an dáá bɔ̀ǹ binib kaa ŋūǹ kí béé-uee. Di sá yii Boowaasi nìn lī u-neen yii: «An kaa máaǹ binib ń béé yii unimpu nee dɔ́miń m-naapaal pu doo nee!» 15 Ní Boowaasi bí Ruuti yii: «Lēē a-bɔkutipaaŋkaal kí cúú kpátí kí bíĺ yéè!» Ní Ruuti cúú u-bɔkutipaaŋkaal ki lēē ní ki kpátì ki bíl̀. Ní Boowaasi màkā ɔɔji biliŋ asambiŋmantikaa aluu pu ki sītì-u, ki yōoǹ ki túǹ-u ní u nín cá kitiŋin^a. 16 Ruuti fātìi bàn̄ u-beel ceeyee ní úǹ bālifì-u yii: «An jítì mana, m-bisal?»

Ní Ruuti dū tin tin kɔkɔ uninjee ŋá ki tīī-uee ki máafì u-beel. 17 U máafì ki dóòyee ní ki bí yii: «Úǹ di tīī-mi ɔɔji biliŋ asambiŋmantikaa aluu nee ki bí-mi yii: <Án kaa máaǹ yii á fàtīí gítí a-beel cee nì iŋaŋkulim.>»

18 Niinee ní Nawoomii bí-u yii: «M-bisal, kàl̄ soooo kí kpèè tibɔti nee nín làá kúntí puee. Uninja gbanti yaa kaa kpēē tibɔti nee nín sá puee díǹ wiiŋŋu nee, u-pɔbil kaa làá sɔ̀ŋkì!»