Bibɔsoonliibi Gbɔŋku 21

Bi fātìi náań Beenjameen naakooku

1 Isirayeel yab nín nìn kpáfì Miisipa tiŋkinee, bi nìn pūtì yii: «Ti-kansikin báà ubɔ ń taa dū u-bisal kí tīī Beenjameen naakookun yab ubɔ ticati.» 2 Isirayeel nibul nìn cūtì Beeteel^a circir paaŋŋu ki kāl̀ kitiŋ ti-Dindaan nimbiin ki súń ki yáliŋkì tikpil tikpil áli kujoou dāa dūu jóotì. 3 Bi nìn bí ki lì yii: «Ti-Dindaan Isirayeel Nimbɔtiu, ba pu ní díǹ pu nee Isirayeel naakɔti kansikin kubɔ ń kúntí míǹ?» 4 Kutaa nìn wúntì kutaafaau pɔ̀lpɔlee, Isirayeel yab nìn máń nsaraafan mpaan gbanti pu ní ki ŋá bisaraawɔkaabi nì mpèé saraabi. 5 Bi nìn bālifì yii: «Isirayeel naakɔti kɔkɔ poonee, kunaakoou kulɔkɔ yab di kaa nìn dɔ́miń dikpafil din ti kpáfì ti-Dindaan nimbiin Miisipa tiŋkinee?» Kun pu bi nìn bālifì mimmee di sá yii bi-kɔkɔ nìn pée pūtì ki pōoǹ yii an sá bí kpɔ̀ unil un kamaa yaa yíì kaa dɔ́miń an kpafil gbantee ní. 6 Kí kūtì muee, Beenjameen naakookun yab nìn kɔ́ bi-nabiyaamu Isirayeel naakɔti tin kíǹee yab isaa. Bi nìn bí ki lì yii: «Díǹ pu nee Isirayeel naakɔti kansikin kubɔ di bíi wáŋkí nee. 7 Ti làá ŋá mana ní kí ká binimpoobi kí tīī Beenjameen naakookun yab bininjab bin ŋúń ki sáǹ ki ŋmátì kaa kpíìyee? Kun puee ti gíti dáá pūtì ti-Dindaan u-ba nimbiin ki lī yii taa làá dū ti-bisalib kí tīī-bi ticati.»

8 Bi nín bālifì yii Isirayeel naakooku kubɔ yaa bí ku-yab kaa dɔ́miń dikpafil ti-Dindaan nimbiin Miisipa tiŋkinee, bi nìn dáań ki ká yii báà uniseen kaa nìn nyánní Yabeesi, Galaadi tiŋkin ki dɔ́miń dikpafil gbanti. 9 Bi nín nìn kàan̄ Isirayeel nibul din nìn kóoǹní ki kpáfèe kɔkɔee, bi nìn ká yii binib bin kóò Yabeesi, Galaadi tiŋkinee báà ubɔbɔ ja kaa nìn bí. 10 Samaa nìn kpáfì ki lēē bijanjaliibi binib kutukub saalaa nì bili ki tú niin ki bí-bi yii: «Ní cùmaan Yabeesi, Galaadi tiŋkin kí dū ntàataajimu kí kpɔ̀ ki-nib, kí kpáaǹ binimpoobi nì mbiyaamu kɔkɔ! 11 Ni nín làá tin ŋá puee di sá ní tin kpɔ̀ kí kúntí bininjab kɔkɔ nì binimpoobi bin kɔkɔ pée nyí uninja ki kée.» 12 Bi nìn kánní bisapɔmbi bin kaa nyí uninja ki kée binib alaataa anaa Yabeesi, Galaadi tiŋkin ní ki yōoǹní-bi ki cáań Siiloo naapaal pu, Kanaan tiŋkin^b.

13 Samaa kɔkɔ nìn lēē binib ki tú Beenjameen naakookun yab bin nìn bí laakin bi yíì yii Riimɔn Taŋkpalee cee. Bi nìn cūtìi tùkū-bi yii kujaau kúntì ŋgbansɔŋfi dōoǹ. 14 Niinee ní Beenjameen naakookun yab nìn fātìi gítì ki kāl̀ bi-timmu pu, ní Isirayeel naakɔti tin kíǹee yab dū Yabeesi, Galaadi tiŋki nimpoobi bin baa nìn kūūyee ki tīī-bi bi cáá cáá. Ama binimpoobi kaa nìn bàn̄ bi-kɔkɔ ń ká ubɔ ubɔ kí cáá.

15 Unimbɔti nín nìn yāntì Beenjameen naakookun yab paaŋŋu dōoǹ fám Isirayeel naakɔti kɔkɔ kansikinee, bi-bɔti nìn kɔ́ tinaakɔti tin kíǹee yab isaa tikpil. 16 An puee ní samaa kɔkɔ kpilib kāl̀ ki sòon̄ ki bí yii: «Too, Beenjameen naakooku poon binimpoobi nín kúntì kɔkɔ pu nee, ti làá ŋá mana ní kí ká binimpoobi kí tīī bininjab bin kíǹee dee? 17 An máaǹ yii Beenjameen naakookun yab bin kíǹee ń fàtīí màal̀ kí bùtī ní bi-naakooku ń taa wāŋkì Isirayeel naakɔti kɔkɔ poon. 18 Ni pée nyí yii timbi kaa làá ŋmā kí dū ti-bisalib kí tīī-bi bí cáá, kun puee ti nìn pūtì yii un kamaa di yaa pée dū u-bisal ki tīī Beenjameen naakookun yab ubɔ ticatee, ti làá tɔ̄ udaan mbusu ní.»

19 Ŋyunti gbanti ní bi nìn téetì yii dibindi kamaayee bi jīǹ ti-Dindaan jiŋaaliu Siiloo tiŋkin. Kitiŋ gbanti nìn bí Beeteel tiŋki ŋgan pú, nsan ŋun yíkí Beeteel tiŋkin ki cá Siikeem tiŋkinee ŋwìiń nyalaŋki pú, ní ki bí Leeboona tiŋki ŋgiil pú. 20 Niinee ní bi sáŋkì Beenjameen naakookun yab ki bí-bi yii: «Ní cù kí nákań nákaḿmaan fiinyi sufii boon kí nīn cí! 21 Ni yaa láa ká Siiloo tiŋki sapɔmbi nóoń tɔb ki nyánní kí kpāfì kí gāā ilan kí ŋɔ̄ diŋoolee, ní dāá nyānní ní ni-kansikin báà ŋma ń dāá cúú Siiloo sapɔmbee ubɔ ubɔ. Báà ŋma ń dāá cáá u-yɔu kí nīn kùǹ u-dumpu Beenjameen naakooku timmun kí dū-u kí kpántí u-nimpuu. 22 Bisapɔmbee baabi àá bi-niijab yaa dɔ́miń ki nyáfì-ni ti-ceeyee, timbi làá lì-bi yii: <Ní gbìl̄maan kí tīī nì Beenjameen naakookun yab, kun puee timbi kaa ŋúń ki fōō binimpoobi bin nyɔkɔm làá bà bi-kɔkɔ ń ká kí cááyee Yabeesi jaaku poon ki tīī-bi. Ní nimbi ni-ba nín kaa dū ni-bisalib ki tīī-bi bi cááyee, naa yīntì mara.>» 23 Beenjameen naakookun yab nìn lafun ŋá bi nín nìn sáŋkì-bi yii bí ŋá puee. Bi nìn lēē binimpoobi bin nyɔkɔm làá tin bà bi-kɔkɔ ń ká ubɔ ubɔ kí cááyee Siiloo sapɔmbi bin nìn nyáń ki ŋɔ́ń ní bi cúú-bee kansikin ki cáa búntì. Bi nìn nín gítí bi-tinjandi pu ní, ki cūtì ki fātìi náań bi-timmu ki kāl̀. 24 Niinee ní Isirayeel yab bin kíǹee yíkì dikpafil laŋki ki nóó nì bi-naakɔti nì bi-dicaŋŋi ní bi-kɔkɔ nín gítí bi-tinjaŋŋin.

25 Ŋyunti gbantee bibɔtiibi kaa nìn dá láá bí Isirayeel tiŋkin. Báà ŋma nìn ŋáań min u lèe ní.