Bibɔsoonliibi Gbɔŋku 20

Bi dáaĺ Beenjameen naakookun yab tafal

1 Isirayeel yab kɔkɔ nìn kóoǹ ki kpáfì dicilpu kii unibaantee ní ti-Dindaan nimbiin Miisipa tiŋkin, kí yòon̄ Daani tiŋki ŋgan pú ki tin cáá sāā Beerseeba tiŋki ŋgiil pú, ki kpáaǹ Galaadi tiŋki ŋwìiń nyalaŋki kɔkɔ^a. 2 Isirayeel nibul kɔkɔ kpilib nì Isirayeel naakɔti kɔkɔ yab nìn bí Unimbɔti nibul kpafil gbantin. Bijanjaliibi bin nìn còom̄ ataa ki ŋūǹ ki jáà kujaau nì ntàataajimu tiŋanee nìn sá binib kutukub alaataa anaa. 3 Beenjameen naakookun yab nìn gbìl̄ yii Isirayeel naakɔti tin kíǹee yab kɔkɔ jɔ́m̀ ki kpáfì Miisipa tiŋkin.

Dikpafil gbanti laŋki ní Isirayeel yab nìn bālifì yii: «Māafìmaan-ti digaŋgam gbantee nín baasii jítì puee!» 4 Ní uleefiija un nimpuu bi nìn kūūyee fōō dinyɔɔbundi ki bí yii: «Man nì m-bɔɔn di nìn pāatì Giibeeya, Beenjameen tiŋkin kí dòon̄ kutaa ń wúntí tí nìkī ti-saŋŋu. 5 Giibeeya yab nìn dɔ́miń kí ŋá-mi digaŋgam. Kunyeeuee bi nìn māntìi tú dicindi din poon m nìn kɔ́ee kí bàà kpɔ̀-mi, ní ki dōoǹ nì m-bɔɔn áli u tin kpíì. 6 Ní m yōoǹ m-bɔɔn dinikpilee ki càkā ki dūu yākatì ki tīī Isirayeel naakɔti kɔkɔ, kun puee binib gbanti ŋá dijɔkɔntundi nì icoo bɔti Isirayeel tiŋkin. 7 An puee, Isirayeel yab, ni-kɔkɔ nín kpáfì doo nee, ní sòoǹ kí kpèè ni nín làá ŋá puee.» 8 Niinee ní Isirayeel yab kɔkɔ yíkì kii unibaantee ki bí yii: «Ti-kansikin báà ubɔ kaa làá fàtīí gítí u-tantiun, ubɔ kpá ki làá fàtīí gítí u-dumpu. 9 Kɔŋkɔnnee, ti nín làá ŋá Giibeeya tiŋki puee sèé. Ti làá tɔ̄ kasi ní kí cù kí já nì kì. 10 Isirayeel naakooku kamaanee, binib dilaataal poonee ti làá lēē binib saalaa ní, binib kutuku ubɔ poonee tí lēē binib dilaataal ní binib kutukub saalaa poonee, tí lēē binib kutuku ubɔ. An nib gbantee di làá túń tijin tin bijanjaliibi làá tin nín̄ jīǹee, ní bijanjaliibi ń cù kí dáaĺ Giibeeya, Beenjameen tiŋki nib tafal bi nín ŋá icoo bɔti tin Isirayeel tiŋkinee pu!»

11 Isirayeel janjaliibi kɔkɔ nìn kíí kí kpāfì kii unibaantee kí cù kí já nì Giibeeya yab. 12 Ní Isirayeel naakɔti tin kíǹee yab lēē binib ki tú Beenjameen naakooku kɔkɔn bí bàlifì ku-nib yii: «Ba kpitii bulifi ní bi ŋá ni-kansikin mimmee? 13 Kɔŋkɔnnee, ní nyāntí binib bin kaa bí tiban ki bí Giibeeya tiŋkinee gbanti kí tīī-ti tí kpɔ̀-bi ní kí nyāntí ikpiti gbanti Isirayeel tiŋkin!»

Ama Beenjameen naakookun yab kaa nìn pílifì bi-nabiyaamu Isirayeel yab bin kíǹee nyɔkɔ. 14 Beenjameen naakookun yab gbanti nìn yíkìń bi-timmu kɔkɔn ní ki kóoǹní ki kpáfì Giibeeya tiŋkin kí já nì Isirayeel yab bin kíǹee. 15 Ŋwiin gbantee Beenjameen naakookun yab janjaliibi bin nìn nyánní bi-timmu kɔkɔn ki dɔ́miń bi lēē-bi bí já kujaauee nìn sá binib kutukub mmuŋku nì biluu ní, ní kí nín kūtì Giibeeya tiŋki yab janjaliibi bimɔmmɔntiibi alaataa aluli. 16 Dijanjakitil gbanti kɔkɔnee, bin nìn sá bijanjaliibi bimɔmmɔntiibi ki sá bigàmbee nìn nyáń binib alaataa aluli ní. Bíǹ kansikin báà ŋma nìn ŋūǹ kí dū kujaataafuŋ kí tɔ̄ ditaŋkpal an lēē unil yikpilku kubɔbɔ ja kí taa lántí. 17 Isirayeel yab mun nìn nyánní. Bi nìn lēē bi-kansikin bin làá já kujaauee. Bi yaa kaa kàan̄ ki kpáaǹ Beenjameen naakookun yabee, bíǹ nìn nyáń binib kutukub alaataa anaa ní, ní bi-kɔkɔ nìn sá bijanjaliibi bin nìn ŋūǹ ki jáà nì ntàataajimu tiŋan tiŋanee.

18 Isirayeel yab nìn jɔ́m̀ Beeteel tiŋkin ní ki cūtìi bālifì ti-Dindaan yii: «Ti-kansikin kunaakoou kulɔkɔ nib di làá péé kí cùú jáǹ Beenjameen naakookun yab?» Ní ti-Dindaan kíí yii: «An sá Juuda naakookun yab di làá péé kí cù^b!» 19 Kutaa wúntì kutaafaau pɔ̀lpɔlee ní Isirayeel yab yíkì ki cūtìi ŋātì bi-janjanaapaal Giibeeya tiŋki caŋin. 20 Bi nyáń kí jáǹ Beenjameen naakookun yabee, ki bōoǹ dikɔmbool pu bi-nimbiin túĺ Giibeeya tiŋki. 21 Ŋwiin gbantee, Beenjameen naakookun yab nìn nyánní Giibeeya tiŋkin ní ki kūū Isirayeel yab binib kutukub mmuŋku nì bili. 22 Ama ní Isirayeel yab nìn tīī tɔb kunyannyaau ki fātìi gítì ki bōoǹ dikɔmbool pu laakin bi nìn pée bōoǹ ŋwimpeekaa dal ki jáń kujaauee. 23 Isirayeel yab nìn jɔ́m̀ ki súń ti-Dindaan nimbiin áli kujoou dāa jóotì. Bi nìn bālifì ti-Dindaan yii: «Tí fàtīí gítí kí cùú já nì ti-nabiyaamu Beenjameen naakookun yabaaa?» Ní ti-Dindaan kíí yii: «Iiin, ní fàtīí gítímaan kí cùú já nì bi!» 24 Ŋwinliliiti dalee, Isirayeel yab nìn tí cūtì ki jáń nì Beenjameen naakookun yab. 25 Ŋwinliliiti gbantee, Beenjameen naakookun yab nìn tí nyánní Giibeeya tiŋkin ki kūū Isirayeel yab bijanjaliibi bin nìn ŋūǹ ki jáà nì ntàataajimu tiŋan tiŋanee binib kutukub saalku nì bita. 26 Niinee ní Isirayeel yab kɔkɔ jɔ́m̀ Beeteel tiŋkin. Bi nìn kāl̀ kitiŋ ti-Dindaan nimbiin niin ki súń ní ki bóob́ kinyɔkɔ áli kujoou dāa jóotì. Bi nìn ŋá bisaraawɔkaabi nì mpèé saraabi ti-Dindaan nimbiin. 27 Isirayeel yab nìn bālifì ti-Dindaan min bi máaǹ kí ŋée, kun puee ŋyunti gbantee Unimbɔti poondi dakaau nìn bí Beeteel tiŋkin niin ní. 28 An yuntiŋuee Piinaasi, Eeliyeeseer jipɔɔn, Aarɔn naantiiu di nìn sá usaraaŋakpil. Isirayeel yab nìn bālifì ti-Dindaan yii: «Tí fàtīí gítí kí jáǹ ti-nabiyaamu Beenjameen naakookun yabaaa, tí taa ti cù ní?» Ní ti-Dindaan kíí yii: «Ní fàtīí gítímaan kí já nì bi, kun puee fool ní m làá fu dū-bi kí ŋá ni-ŋaan!»

29 Isirayeel yab nìn lēē bi-janjaliibi biba ki nákáǹ nákáǹ Giibeeya tiŋki ki māntìi tú. 30 Ŋwintataati dalee, Isirayeel yab nìn tí cūtì kí já nì Beenjameen naakookun yab. Bi nìn bōoǹ dikɔmbool pu bi-nimbiin túĺ Giibeeya tiŋki kii bi nín nìn pée tí ŋá pu mili min jítèe. 31 Beenjameen naakookun yab nìn tí nyánní kí já nì Isirayeel yab ní bíǹ nìn ŋmātiǹ-bi bi páaǹ bi-boon ki kɔ́ ndan ki yāntì bi-tiŋki. Bi nìn tí kíĺ ki bíi kù Isirayeel yab janjaliibi kii bi nín nìn kpààa ŋáań puee. Bi nìn kūū Isirayeel yab janjaliibi tisatin kii binib mmuŋku nì saalaa nyɔkɔm, Beeteel saŋŋu nì Giibeeya saŋŋu pu. 32 Beenjameen naakookun yab nìn bí ki dàkafī bi-neen yii: «Kpèè, ti tí jáń ki pɔ́ɔkiǹ-bi kii ti nín kpààa pée jáà ki pɔ́ɔkíǹ-bi puee dee!» Ama ní Isirayeel yab bíǹ nìn sòon̄ ki síiǹ yii: «Tí sām̀maan kí yàntī bí páanní ti-boon, tí dáaĺ-bi kí cùnnì ndan an nīn dátiǹ kitiŋ!» 33 Isirayeel janjaliibi bin kíǹee kɔkɔ nìn bōoǹ dikɔmbool pu Baal-Tamaar tiŋkin, ní bin bi nìn yāntì bi bál̀ ki māntìi tú kitiŋee nyáń laakin bi nìn bál̀ bál̀ee ki túĺ Geeba tiŋki. 34 Isirayeel yab janjaliibi bimɔmmɔntiibi binib kutukub saalaa di nìn kpáfì Giibeeya tiŋki nyɔkɔpu ki bíi jáà ŋwiin gbanti. Kujaau nìn yíkìi dūu pɔ́ɔkì tikpil, ama Beenjameen naakookun yab kaa nìn nyí yii nnaabu dòoń-bi. 35 Unimbɔti nìn yāntì Isirayeel yab jáń ki pɔ́ɔkiǹ Beenjameen naakookun yab. Ŋwiin gbantee Isirayeel yab nìn kūū bi-janjaliibi bin nìn ŋūǹ ki jáà nì ntàataajimu tiŋanee, binib kutukub mmuŋku nì biŋmoo nì binib dilaataal. 36 Niin ní Beenjameen naakookun yab béè yii bi jáń ki pɔ́ɔkiǹ-bi.

Isirayeel yab nìn máká bi-janjaliibi bin nìn náká ki māntìi tú Giibeeya tiŋkee pu. An pu ní bi nìn sáǹ ki pú Beenjameen naakookun yab mpaan. 37 Isirayeel yab bin nìn náká nákée nìn yíkì ki sáǹ malaa malaa ki kɔ́ Giibeeya tiŋkin ní ki dū ntàataajimu ki kūū binib bin nìn bí ki-poonee kɔkɔ. 38 Too, Isirayeel yab bin nìn nákáǹ ki māntìi tú Giibeeya tiŋkee nì bin kíǹee nìn sòon̄ ki gbìlīǹ tɔb yii bi yaa ŋúń ki kɔ́ee, bi làá yàntī ŋŋminyiim ń yīkì kí jɔ̄m̀ kutaa pu kitiŋ gbanti yilpu, án nīn sá kudaaŋŋu bin kíǹee ń béé. 39 Isirayeel yab nìn sáǹ ki kpáaǹ Beenjameen naakookun yab ki nyántì ndandati bi bíi jáà. Beenjameen naakookun yab nìn tí kíĺ ki bíi kù Isirayeel yab. Bi nìn kūū kii binib mmuŋku nì saalaa, ní ki nìn bí ki dàkafī bi-neen yii: «Tilafuŋman, ti tí jáń ki pɔ́ɔkiǹ-bi kii ti nín nìn pée tí jáń ki pɔ́ɔkiǹ-bi mpeepeekaam puee ní!» 40 Ama ŋŋminyiim min bi nìn yóoǹ yii án nīn sá-bi kudaaŋŋuee nìn kíĺ ki bíi nyēē kitiŋ poon ki jɔ́ḿ kutaa pu. Beenjameen naakookun yab fātìi kpēē bi-boonee, Giibeeya tiŋki fōō ŋŋmi ŋŋminyiim yíkí ki-poon jòooo ki jɔ́ḿ kutaa. 41 Isirayeel janjaliibi nín ká mimmee ní ki fātìi lábitì Beenjameen naakookun yab pu. Beenjameen naakookun yab nín nìn ká nnaabu ŋun jéetì bi-puee, bi-pɔbiliŋ nìn bíil̀ tikpil. 42 An puee ní bi nìn fātìi lábitì ki sáǹ ki kátì Isirayeel yab nimbiin, ki dūu túĺ kuteeu watil pú. Ama Isirayeel yab janjaliibi bin nìn bí dipaal puee nìn kā bi-pu, ní bin nìn nyánní kitiŋinee nìn túŋkiń-bi ki kùń-bi ki dòoń. 43 Míǹ ní Isirayeel yab nìn māntìi tú Beenjameen naakookun yab, ki nìn jìn̄-bi kaa pée pú-bi mpaan, ní ki nìn pɔ̄fì-bi míǹ áli ki tin cáa sāā Giibeeya tiŋki nyɔkɔpu ŋwìiń nyalaŋki pú. 44 Beenjameen naakookun yab janjaliibi binib kutukub saalku nì bita di nìn kpíì ŋwiin gbanti, bi-kɔkɔ bibaatandambi ŋma. 45 Bin nìn kíǹee nìn fātìi lábitì ki sáǹ ki túĺ kuteeun laakin bi yíì yii Riimɔn Taŋkpalee watil pú. Isirayeel yab nìn gíti kūū bi-kansikin binib kutukub biŋmoo nsanni. Bi nìn jìn̄ bin kíǹee ki tin bàn̄ Giidoom tiŋkin ní ki nìn gíti kūū binib kutukub bili ki kútì. 46 Beenjameen naakookun yab janjaliibi bin Isirayeel yab nìn kūū ŋwiin gbantee nìn kpáfì bijanjaliibi kutukub mmuŋku nì biŋmoo, bi-kɔkɔ bibaatandambi ŋma. 47 Beenjameen naakookun yab binib alaataa aluu di nìn ŋúń ki fātìi lábitì ki sáǹ ki túĺ kuteeun ki cūtìi kɔ́ laakin bi yíì yii Riimɔn Taŋkpalee. Bi nìn gbíntì ki kāl̀ niin ki tin sāā iŋmal inaa. 48 Isirayeel yab nìn fātìi gítì ki dū ntàataajimu ki kūū Beenjameen naakookun yab bin kaa nìn ŋúń ki sáǹ ki ŋmátèe kɔkɔ, kí yòon̄ binib bin kóò ntimunee kí cáá sāā tiwaŋkuti nì bin kɔkɔ bi yaa nìn pée kée. Kí kūtèe, bi nìn sēetì ntimu mun kɔkɔ poon bi nìn pée jítèe ŋŋmi ní.