Bibɔsoonliibi Gbɔŋku 19

Beenjameen naakookun yab ŋá digaŋgam Giibeeya

1 Ŋyunti gbantee bibɔtiibi kaa nìn dá láá bí Isirayeel tiŋkin. Leefii naakookun niliu ubɔ nìn kóòń Eefiraayiim jooŋŋi timmu mun bínní poon poon púee kiban. U nìn cáá ubɔnti ubɔ sá Beetileem, Juuda tiŋkin. 2 U-bɔɔn gbanti nìn nyáń u-boon ní ki nìn yíkì-u ki nín kùǹ u-baa dumpu Beetileem, Juuda tiŋkin. U nìn kāl̀ niin ki bàn̄ kii iŋmal inaa nyɔkɔm. 3 U-cal nìn jìn̄ u-boon ki cūtì kí sɔ̀ŋkì u-pɔbil kí fàtīí gíiǹní-u u-cee. U nìn kpáaǹ u-tɔntɔnliu nì mmamu muli. U-bɔɔnee nìn cáá-u ki kɔ́ǹ u-baa dumpu. U-baa nín nìn ká u-cooyee, an nìn mɔ́ɔkiǹ-u tikpil ní u fōō-u nì dipɔɔpindi. 4 U nìn cúú u-coo ki kāaǹ u-dumpu iwiin ita kɔkɔ. Iwiin ita gbantee, u nì u-tɔntɔnliu nìn jīǹ, ki nyù ní ki dɔ̀ niin. 5 Ŋwinnanaati dal bi fīntì kutaafaau pɔ̀lpɔlee, uleefiijee bíi bɔ́ntí bí yīkèe, ní unimpu baa bí-u yii: «Kāl̀ kí jī tijin kí tíkiń a-fam kí wàatī ní nín búntáa!» 6 Ní u kíí ki kāl̀ ní bi-liitil jíń ki nyùn̄. Ní unimpu baa bí-u yii: «Gbíntí kí dòon̄ doo kunyeeu nee kí gíti ŋùŋfì fiiiyaa!» 7 Uleefiijee nín bàà nìn yíkì kí nīn cée, ní u-coo kā u-pu yii ú gbíntí kí dòon̄, ní u dāa kíí ki lafun gbíntì niin ki dōoǹ kunyeeu gbanti. 8 Ŋwiŋŋmooŋmooti dal, u tí yíkì malaa ki bɔ́ntì kí bàà nín̄ cée, ní unimpu baa tí bí-u yii: «M gbāam̀-si, kàl̄ kí jī tijin, kí cīití ŋwìiń yaa sɔ̄ŋkèe á nīn cá!» Ní bi-liitil tí kāl̀ ki jíń tijin. 9 Uninjee nì u-bɔɔn nì u-tɔntɔnliu tí bɔ́ntì kí yīkèe, ní u-coo tí bí-u yii: «Kpèè ŋwìiń jéetì ní nee, kunyeeu bíi móotí! An puee ní pūtìi gbíntí kí dòon̄ á gíti ŋùŋfì fiii. Fool kutaafaauee, ní fu yīkì malaa kí nīn kùǹ a-dumpu.»

10 Ama uninjee nìn yíì kpataaa, kaa ti kíí kí dòon̄ niin kunyeeu gbanti. U nìn yíkì ki cōom̀ ki tin bàn̄ Jeebusi tiŋki kin bi gíti yíì yii Jeerusaleem tiŋkee. U nìn kpáaǹ u-mammu liitil mun u nìn túǹ awaŋgulee nì u-bɔɔn. 11 Ŋyunti ŋun bi bàn̄ Jeebusi tiŋki caŋinee, ŋwìiń ŋman nìn pée jéetì ki dóò, ní utɔntɔnlee bí u-kpiliu yii: «Ukpil, yàntī tí pàatī kí kɔ́ Jeebusi yab tiŋki nee poon kí dòon̄ kunyeeu nee!» 12 Ní u-kpiliu kíí-u yii: «Taa làá yūĺ binicambi tiŋki kin poon Isirayeel niliu báà ubɔ kaa bí nee. Ti làá nìkī kí bà Giibeeya tiŋkin ní.» 13 U nìn kútì ki lī yii: «Tí pɔ́ɔm̀maan kí nìkī kí bà Giibeeya tiŋkin àá Raama tiŋkin. Ti tin ŋūǹ kí dòon̄ ntimu gbanti liitil kiban.» 14 Bi nìn lafun nìkī ki tin bàn̄ Giibeeya, Beenjameen tiŋkinee ŋwìiń nìn bíi jēetí. 15 Bi nìn pāatì Giibeeya tiŋkin niin kí dòon̄ kunyeeu gbanti. Bi nìn kɔ́ kitiŋin ní ki cūtìi kāl̀ kitiŋ punyɔkɔpu^a, ama báà unil kaa nìn fōō-bi bí kɔ́ kí dòon̄ u-dumpu.

16 Bi dāa kpēēyee ujaŋkpil ubɔ di nyánní kusaau ki kùnnée. Ujaŋkpil gbanti nìn sá Eefiraayiim jooŋŋi timmu kiban ní, ama ní ki nìn kóò Giibeeya tiŋkin, Beenjameen naakookun yab kansikin. 17 Ujaŋkpil yáatì u-yil ki ká usaŋkinlee kā kitiŋ punyɔkɔpuee, ní u bālifì-u yii: «A nyánní la ní ki cá la?» 18 Ní u kíí ujaŋkpilee yii: «Ti nyánní Beetileem, Juuda tiŋkin ní ki cá Eefiraayiim jooŋŋi timmu mun bínní poon poon púee kiban. Niin ní m sá ní ki cūtì Beetileem, Juuda tiŋkin ki bàà fàtīi kùǹ dee, ní báà ubɔ kaa fōō-mi ḿ dòon̄ u-dumpu. 19 Ama timool nì tifaal bí tí kpíiǹ ti-mammu. Kpɔnɔ nì ndamam mun bí man nì m-nimpuu nì m-tɔntɔnliu un bíi cēentí-tee ń jī. Tiba nì tiba kaa lóò-ti.» 20 Ní ujaŋkpilee bí-u yii: «Ŋgbansɔŋfi ń nīn bí a-cee! Man cáá tikɔkɔ ki làá ŋmā kí fōō-ni, ama ní taa pée gbíntí kí dòon̄ kitiŋ punyɔkɔpu doo.» 21 Ujaŋkpilee nìn cáá-bi ki kɔ́ǹ u-dumpu ki tīī bi-mammu timool mu ŋmɔ́. Bíǹ bi-ba nìn ká nnyim ki fíntì bi-taaŋi ní ki nìn jíń ki nyùn̄.

22 Ŋyunti ŋun bi nìn bí ki jīǹee ní kitiŋ gbanti nib bin kaa bí tibanee biba dɔ́miń ki māntìi tú dicindi, ki gāā kipunyɔkɔ mpɔn mpɔn ní ki téeń ki bí ujaŋkpilee yii: «Nyāntiń uninja un kɔ́ a-dumpuee doo timbi ń dòon̄ nì u^b!» 23 Ní kudiidaan nyáń ki bí-bi yii: «Aayee, m-nabiyaamu m pée gbāam̀-ni ní, ní taa ŋá tikpitil gbanti. Uninja nee nín gíti dáá kɔ́ man nee, ní taa ŋá-u icoo bɔti gbanti! 24 Kpèèmaan, man bisal un kaa nyí uninjee bí ní kí kūtì unicaanee nimpuu. M làá nyāntí-bi kí tīī-ni ní dòon̄ nì bi, ní kí ŋá-bi min ni yaa lèe. Ama ní taa ŋá uninja nee pu icoo bɔti min ni là kí ŋá nee!» 25 Ama binibee nìn yíì kaa pílifiǹ-u. Niinee ní uleefiijee nyántì u-bɔɔnee mmɔŋki ki tīī-bi. Bi nìn dōoǹ nì u, ki nìn sāaǹ-u míǹ ní kutaa dāa dūu wúntì. An nìn bíi cá kutaawuntuŋuee ní bi gíiǹ-u ki líì.

26 Kutaa nìn tóob́ kí wúntí ní unimpuee fātìi bāań ujaŋkpil un cee u-cal nìn bée dumpu, ní ki lítì dicindi punyɔkɔki nyɔkɔpu. U nìn dōoǹ niin ní kutaa púntìi wúntì. 27 Kutaafaau pɔ̀lpɔl u-cal yíkì ki cūtìi pīitì dicindi punyɔkɔki ki nyáń bí bàà nìkī u-saŋŋuee, u kpēēyee u-bɔɔnee di dɔ̄ee, u-ŋalii nyīī kipunyɔkɔ. 28 Ní u bí-u yii: «Yīkì tí nīn cá!» Ní an ŋmí kpíii. Niinee ní u bɔ́ ki mɔ̀kɔ̄-u ki dūu páaǹ u-maŋki pu ki cáa nín kùǹ. 29 U bàn̄ u-dumpuee ní ki yōoǹ kitàataajiki ki cúú u-bɔɔnee wunti ki càkā anaŋkún saalaa nì ali, ní ki dūu tú bi cáa yākatì Isirayeel naakɔti saalaa nì tilee dinaŋkúndi diba diba. 30 Uleefiijee nìn tùkū binib bin u nìn túee yii bi yaa bàn̄ Isirayeel yab ceeyee bí lì yii: «Doooo Isirayeel yab nín nyánní Eejipiti tiŋkin ki dāa sāā díǹ nee, ni gíti dáá ká tibɔti nee juti jítì dalbaaa? Ní dàkafìmaan tibɔti gbanti pu, kí kpāfì kí sòoǹ kí kpèè ni nín làá ŋāŋkì-tì puee!» Unil un kamaa yaa nìn ká mimmee ní ú lì yii: «Kí pée yòon̄ doooo ŋyunti ŋun Isirayeel yab nyánní Eejipiti tiŋkin ki dāa sāā díǹ nee, tibɔti tin bí nee juti kaa láá pée jítì ŋwindal ti-nimbil ká!»