Bibɔsoonliibi Gbɔŋku 18

Daani naakookun yab bíi nyàab̀ kitimpɔŋ kí kàl̄

1 Ŋyunti gbantee bibɔtiibi kaa nìn dá láá bí Isirayeel tiŋkin. An yuntiŋuee Daani naakookun yab nìn bí ki nyàab̀ kitiŋ kin bi làá kàl̄ee dee, kun puee kí cáá sāā ŋyunti gbantee, baa nìn cáá ditinjandi Isirayeel naakɔti tin kíǹee kansikin^a. 2 Daani naakookun yab nìn lēē bi-maaliŋu poon bibaatandambi biŋmoo ki tú, bí yīkì Sooreeya nì Eesitawool timmun kí yìiǹ kí cɔ̄ŋkì kí béé kitiŋ tiŋan. Binib biŋmoo gbanti nìn yìin̄ ki bàn̄ Eefiraayiim jooŋŋi timmunee, kunyeeu mɔ́ ní bi kɔ́ Miika dumpu. 3 Bi nìn bí Miika dumpu niin ní ki gbìl̄ unaacimpɔɔn un sá Leefii naakookunee neen, ní ki béè dinicil din u sée. Bi nìn cūtì u-cee ki bālifì-u yii: «Ŋma di cáań-si doo nee ní? Ba tundi ní a bí doo ki tūǹ? Ba di ŋúb́-si ní a kā doo nee?» 4 Ní u kíí-bi yii: «An sá Miika di fōō-mi ditundi. U yāntì m sá u-saraaŋaliu ní u pà-mi.» 5 Ní bi fātìi bí-u yii: «Bàlifì Unimbɔti kí kpèè yii nsan ŋun ti bíi còom̄ nee làá nīn sá nsammɔntaaa, ŋuaa làá nīn sá.» 6 Ní usaraaŋalee kíí-bi yii: «Ní taa pée fàŋkìmaan báà tiba! Ti-Dindaan làá céeǹ-ni nsan ŋun ni bíi còom̄ nee poon!»

7 Ní binib biŋmooyee nìkī bi-saŋŋu, ki cōom̀ ki tin bàn̄ Layiisi tiŋkin. Bi bàn̄ kitiŋ gbantinee ní ki ká yii binib bin nìn kóò niinee nì ubɔ kaa nìn cáá tɔb kujaau. Bi kā nì ŋgbansɔŋfi nì dipɔɔsɔŋkil kii Siidɔn yab nín nìn bí puee. Ubɔ kaa nìn bí ki páb́-baaa, ditimbundi diba mun nib kaa nìn bí ki cáá mpɔn bi-pu. Layiisi yab nìn kóò ki dátiǹ Siidɔn yab, ní kaa nìn bí báà ubɔ taapu. 8 Niinee ní binib biŋmooyee fātìi nín gítí bi-dumpu Sooreeya nì Eesitawool timmun, ní bi-nabiyaamu tin bālifì-bi yii: «Ni kánní yii ba?» 9 Ní bi kíí bi-nabiyaamu yii: «Yīkìmaan tí cù kí táká Layiisi tiŋki yab! Timbi nín cūtèe, ti dáań ki ká yii kitiŋ gbanti ŋān̄ tikpilku. Ní taa nín̄ kāmaan ki jòon̄ iŋal, ní yīkì tí cùú já kí fōō kitiŋ gbanti! 10 Ni yaa bàn̄ niinee, ni làá ká yii binib bin kóò kitiŋ gbantee kā nì ŋgbansɔŋfi ní kaa dàkafī yii tiba ŋūǹ kí ŋá-bi. Bi-tiŋkee wāā tiŋan ní tikɔkɔ nì tikɔkɔ bí ki-poon. Ti nyí yii Unimbɔti làá dū kitiŋ gbanti kí tīī-ni!»

11 Niinee ní Daani naakookun yab binib alaataa aluu bóob́ dikɔ̀ndi ní ki yíkì Sooreeya nì Eesitawool timmun ki nín cá. 12 Bi yíkì mimmee ní ki jɔ́m̀ ki cūtìi ŋātì dijanjanaapaal Kiiriyati-Yeeyariim tiŋki kin sá Juuda naakookun timmu kibee poon. An pu ní bi pú mpaan gbanti diyindi yii Maanee-Daani ki dāa sāā díǹ pu nee^b. Mpaan gbanti bí Kiiriyati-Yeeyariim tiŋkin, ŋwìiń jeetilaŋki pú. 13 Bi yíkì niinee ní ki pūntì Eefiraayiim jooŋŋi, ki cōom̀ ki bàn̄ Miika dumpu. 14 Niinee ní binib biŋmoo bin bi nìn lēē bi yìin̄ ki cɔ́ŋkì ki béè Layiisi tiŋkee fōō dinyɔɔbundi ki bí yii: «Ni nyí yii diwaal diba, nì kudicaŋu waaŋi, nì diwaal din bi mɔ́ɔ́ ki dūntì tikúti ki nyūntèe bí adican nee kubɔ poonaaa? Too, kɔŋkɔnnee ní dàkafìmaan kí kpèè ni nín làá ŋá puee!» 15 Binib biŋmooyee lī mimmee ní ki dūu túĺ Miika cindi, laakin ní unaacimpɔɔn un sá Leefii naakookunee nìn kóòyee, ki bàn̄ ki kɔ́ ní ki jáam̀-u ki bālifì u-gbampɔŋŋu pu. 16 Ŋyunti ŋun binib biŋmooyee nìn bí dicindinee, Daani naakookun yab binib alaataa aluu bin kíǹee bíǹ nìn gbíntì ki yú kipunyɔkɔpu ki ŋúb́ bi-janjawanti. 17 Ní binib biŋmooyee nín jɔ́ḿ yilpu cindin ki cūtìi kɔ́ kudiin ki yōoǹní diwaalee, nì kudicaŋu waaŋi, nì diwaal din bi dūntì tikúti ki nyūntèe. Ŋyunti gbantee usaraaŋal nìn bí kipunyɔkɔpu, u nì Daani naakookun yab binib alaataa aluu bin kíǹee, bíǹ yú ki ŋúb́ bi-janjawanti. 18 Bin nìn kɔ́ kudiinee nín nìn yōoǹní diwaalee, nì kudicaŋu waaŋi, nì diwaal din bi dūntì tikúti ki nyūntèe ki nyántìńee, ní usaraaŋalee bālifì-bi yii: «Ba ní ni ŋáańee?» 19 Ní bi kíí-u yii: «Ŋmīĺ niin! Taa ti pée wàan̄ a-nyɔkɔ kí lì báà tiba! Dāan̄ kí nóó-ti kí nīn sá usaraaŋal ki tīī-ti. Dàkafì kí kpèè yii á nīn sá usaraaŋal ki tīī unibaanti dicaŋku nì á nīn sá usaraaŋal ki tīī Isirayeel naakooku kumɔŋu kɔkɔee, la di ŋān̄?» 20 Tibɔti gbanti nìn mɔ́ɔkiǹ usaraaŋalee tikpil, di sá ní u nìn fōō diwaalee, nì kudicaŋu waaŋi, nì diwaal din bi dūntì tikúti ki nyūntèe ki nóó-bi bi nín cá.

21 Míǹ ní Daani naakookun yab nìn nìkī bi-saŋŋu, ki nìn dū mbiyaamu nì tiwaŋkuti nì awaŋgul ki līntì bi-nyɔkɔpu. 22 Daani naakookun yab nìn cōom̀ ki kɔ́ ndan kaa ti pìlīǹ Miika dumpu ní Miika nì u-kɔŋkɔnnaatɔb kóoǹ ki kpáfì ki bóob́ butɔbu ní ki yíkìi kùl̄ ki páaǹ bi-boon. 23 Daani naakookun yab nín gbìl̄ Miika nì u-kɔŋkɔnnaatɔb pánní bi-boon ki tátí ki yíì-bee ní bi fātì ki bālifì Miika yii: «Ba cáá-si ní? Ba yì-tì ní a kóoǹní dinikitil nee ki páaǹní a-boon mimmee?» 24 Ní Miika kíí-bi yii: «Ni yōoǹ awaa ŋin m yāntì bi mɔ́ɔ́-mee, ki yōoǹ ki kpáaǹ m-saraaŋaliu, báà tiba nì tiba kaa ti kíǹ-mi ní ni gíti bàlifī-mi yii ba di cáá-maaa?» 25 Ní Daani naakookun yab fātìi kpātì u-pu ki bí-u yii: «A yaa pée nyí nnyiimee, á ŋmīĺ a-nyɔkɔ laakin a yú nee, kí taa ti sòoǹ kí páb́ timbi! Yaa sá fám, a làá yàntī ti-kansikin biba ń dū bi-ŋuul kí nyìntī a-pu, kí kpɔ̀ kí céetí sii nì a-dicaŋku yab kɔkɔ.» 26 Daani naakookun yab kpātì Miika pu mimmee ní ki nìkī bi-saŋŋu. Miika nín ká yii bi cáá mpɔn ki jítiǹ-uee, ní u fātìi nín kùǹ u-dumpu.

Daani naakookun yab kāl̀ Layiisi tiŋkin

27 Daani naakookun yab nìn yōoǹ tiwan tin Miika nìn yāntì bi mɔ́ɔ́-uee. Bi nìn kpáaǹ usaraaŋal un u nìn fōō ditundee ki cáa búntì. Bi nìn cūtìi táká Laayiisi tiŋki kin nib kā nì ŋgbansɔŋfi kaa nìn fàŋkí yii tiba bí ki làá ŋá-bee. Bi nìn pɔ̄fì-bi ki sēē bi-tiŋki ŋŋmi kì wùn̄ kɔkɔ. 28 Layiisi tiŋki nìn bí Beeti-Reewɔɔfi tantakalin ní, ki nìn dátiǹ Siidɔn tiŋki ní kaa nìn bí kitiŋ báà kiba taapu. An puee báà unil kaa nìn dɔ́miń ki fīī-kì. Daani naakookun yab nìn fātìi máń kitiŋ gbanti ki kāl̀ niin. 29 Bi nìn kpántì kitiŋee diyindi, ki nìn kíǹ ki yíì-kì yii Daani, kii bi nín nìn yíì bi-naanja, Jaakɔb jipɔɔn puee. Njaminee, ki-yindi di nìn dáá láá sá Layiisi. 30 Daani naakookun yab nìn dū Miika waalee ki yóoǹ bi-tiŋki gbantin. Geersɔm jipɔɔn Joonatan, Mooyiisi naantiiu di nìn sá Daani naakookun yab saraaŋaliu. Joonatan boonee, u-naantiibi di nìn tɔ́kɔǹ ki nìn sá Daani naakookun yab saraaŋaliibi míǹ ki tin cáa sāā ŋyunti ŋun ní bi dāa cúú Isirayeel yab ki cūnnì kuyuŋuee. 31 Bi nìn dū Miika waal din u nìn yāntì bi mɔ́ɔ́-uee ki síiǹ bi-ba bi-tiŋkin. Di nìn gbíntìi niin ní ŋyunti ŋun kɔkɔ Unimbɔti diiku nìn dáá bí Siiloo tiŋkinee^c.