Bibɔsoonliibi Gbɔŋku 17

Miika nì mpaan ŋun pu u jáaḿ Unimbɔtee bɔti

1 Uninja ubɔ di nìn bí, ki nìn kóò Eefiraayiim jooŋŋi pu ní bi nìn yíì-u yii Miika. 2 Dalbee ní u bí u-na yii: «Tikúti nimbiliŋ ŋin bi nìn yùn̄-si jitɔmbi kutuku ubɔ nì dilaataal, ní a sòon̄ ki tɔ́ udaan un yùn̄-see mbusu mama m-ba gbìl̄ee, an nimbiliŋ gbanti bí man cee. An sá man di nìn yōoǹ-ŋi!» Ní u-na bí-u yii: «Ti-Dindaan ń bìin̄ a-boon, m-jipɔɔn!» 3 Miika nìn gíiǹ tikúti nimbiliŋ jitɔmbi kutuku nì dilaataalee ki tīī u-na, ní u-na bí-u yii: «Mama m-ba lēē kí dū animbil gbanti kí sú ti-Dindaan sii m-jipɔɔn pu. M làá dū-ŋi kí tīī bí mɔ́ɔ́ diwaal kí dùntī tikúti kí nyùntī-dì. Kɔŋkɔnnee m gíiǹ animbil gbanti ki tīī-si.» 4 An pu ní Miika nín fātìi gíiǹ animbilee ki tīī u-nee, u-na nìn lēē ŋi-poon jitɔmbi kulaafaau ki dūu tīī ucaa u mɔ́ɔ́ diwaal ki dūntì tikúti ki nyūntì-dì ní bi cáa yóoǹ Miika dumpu.

5 Too, Miika gbanti nìn cáá mpaan ŋun pu u jáaḿ inimbɔtee u-cindin. U nìn yāntì bi fātìi mɔ́ɔ́-u diwaal diba, ki kpítì-u awaa ŋin làá nīn cí u-cindee mun ní u dūu kútì, ní ki lēē u-jipɔɔn ubɔ ki kāaǹ ú nīn sá u-saraaŋaliu. 6 Ŋyunti gbantee bibɔtiibi kaa nìn dá láá bí Isirayeel tiŋkin. Báà ŋma nìn ŋáań min u lèe ní.

7 An yuntiŋuee, unaacimpɔɔn ubɔ nìn bí, ki nìn sá Leefii naakookun ní ki nìn kālìń Beetileem, Juuda tiŋkin kunicaŋu. 8 Unaacimpɔɔnee nìn yíkì Beetileem, Juuda tiŋkinee, ní ki nìn bíi yìiǹ ki nyàab̀ laaba kí gíti kàl̄ kunicaŋu. U nìn bíi yìiǹ ki tin kɔ́ Eefiraayiim jooŋŋi timmunee, ní ki tin nyáń Miika dicaŋku pu. 9 Ní Miika bālifì-u yii: «La ní a nyánní ní?» Ní u kíí Miika yii: «Man sá Leefii naakookun ní ki nyánní Beetileem, Juuda tiŋkin. M bíi yìiǹ ki nyàab̀ laaba kí kàl̄ kunicaŋu ní.» 10 Niinee ní Miika bí-u yii: «Yaa sée gbíntí m-cee doo kí nīn sá m-baa nì m-saraaŋaliu. M làá nīn tìì-si animbil jitɔmbi saalaa dibindi poon, kí nīn tìì-si tiwampeeŋkaal nì tijikaal.» Leefii naakookun naacimpɔɔŋwuee nìn kíí ki gbíntì niin. 11 U nìn kíí ki kāl̀ Miika dicaŋkun ní Miika dū-u ki ŋá kii úǹ u-ba jipɔɔn ubɔee. 12 Miika nìn dū usaraaŋal tundi ki ŋúbiǹ Leefii naakookun naacimpɔɔŋwuee. U nìn kíǹ ki kóò Miika dumpu ní. 13 Niinee ní Miika lī yii: «Min bí nee, m nín ká Leefii naakookun niliu ú nīn sá m-saraaŋaliu nee, m lafun béè yii ti-Dindaan làá dàkà-mi u-ŋanti dee!»