Samiyeel Peepeekaa 2

Aana gāā nlan ki jáam̀ ti-Dindaan

1 Niinee Aana mēē Unimbɔti yii:

«Ti-Dindaan puee, m-pɔbil píil̀.

Ti-Dindaan puee, m còom̄ m-yil gáań,

m ŋūǹ kí lā m-nannanliibi.

M bí ki fàal̀ dijajil din ti-Dindaan tīī-mee pu.

2 Ubɔ kpá ki bí circir ki bàn̄ ti-Dindaan.

Ti-Nimbɔtiu boonee, ubɔ kaa ti bí.

Ti-Nimbɔtiu baba di sá kutaŋkpanaakoou.

3 Ní taa nín̄ sòoǹ ki bùsī dibayoondi nyɔɔbuŋŋi.

Timɔn nyɔɔbuŋŋi ń taa nín̄ nyēē ni-nyɔmmun.

Di sá yii ti-Dindaan sá Unimbɔti un nyí tikɔkɔee ní,

úǹ di ŋmàntī ki nyí báà ŋma tuuŋŋi nín sá puee.

4 Bibaatandambi tɔfii kɔ́fì,

ama ŋwɔsɔfimu ká mpɔn.

5 Bin nìn jīǹ ki díkèe bíi nyàab̀ atuun

kí tɔ̄ kí ká kí jī.

Ama bin ŋkùm nìn cááyee kā ki ŋùŋfī.

Uŋmaŋŋmanti màl̄ mbiyaamu mululi,

ama un nìn màl̄ mbiyaamu

tikpilee maaliŋu gúń.

6 Ti-Dindaan di yàntī unil kúù,

úǹ di tí tìì unil dimaŋfal.

U yàntī unil ń sìntī ditaŋkpiilin,

ki tí yàntī ú jɔ̄mìń.

7 Ti-Dindaan di kɔ̄ntí unil disoolin,

úǹ di tí tìì-u tigaajati.

Úǹ di sìntī unil taapu,

úǹ di tí yòontí-u yilpu.

8 U yòontí unandaan ntampukumin,

ki nyāntí ufalaadaan titampummoolin,

kí cáá-bi kí kàan̄ bɔtiijab kansikin jilma paaŋŋu pu.

Ti-Dindaan di yì kitiŋ kɔkɔ,

úǹ di dū-kì ki tɔ́kɔǹ u-jaantalkub pu.

9 U wúǹ bin yú nì u deedeeyee pu,

ama binikpitib làá kpú dibɔmbɔndin.

Kun puee an kaa sá unil pɔŋŋu pu

ní u jáà ki jīǹ.

10 Ti-Dindaan làá yàntī utaa ń nyānní yilpu

kí tɔ̄ kí yàaǹ u-nannanliibi.

Ti-Dindaan làá dāá sòoǹ kitiŋ kɔkɔ bɔti.

U làá dāá tīī u-bɔtiu mpɔn,

kí dāá yòon̄ ubɔti un u lēēyee yilpu^a.»

11 Míǹ boonee ní Eelkana nín gítí u-dumpu Raama. Ama Samiyeel úǹ nìn gbíntì Siiloo, usaraaŋakpil Eelii cee, kí nīn tūǹ ti-Dindaan tundi.

Eelii jipɔmbi bɔti

12 Eelii jipɔmbi kaa nìn bí tiban, ní kaa nìn nyí ti-Dindaan. 13 Bisaraaŋaliibi gbanti nín nìn ŋáań puee sèé. Ubɔ yaa nìn ŋá saraayee, usaraaŋal tɔntɔnliu nìn dòoń ŋyunti ŋun ní bi càkā tinan ki tɔ́kɔǹee, ki ŋúb́ kijiii kin cáá anyin atee. 14 U nìn dù kijiiyee kí sāā tinan tin kā disambitɔkɔŋkaalin àá dikumboolin àá sirban àá daanseeyee kí lēeń tinan tin an yaa pée sāāyee kí cáań usaraaŋal. Míǹ ní Eelii jipɔmbi nìn ŋáań Isirayeel yab bin kɔkɔ nìn cá Siiloo Circir Kɔŋkooŋŋunee.

15 Tin bi nìn ŋáań an gíti lákatèe di sá baa láá dū tiwaŋkuti kpam ki wùn̄ ŋŋmi ki tīī ti-Dindaan ní usaraaŋal tɔntɔnliu ń bàń kí bí yii: «Tīī-mi tinan ḿ cáá ŋɔ̄fì kí tīī usaraaŋal. Waa làá kíí kí fōō a-cee tinantɔkɔŋkaal, see tikaal baba.» 16 Bi yaa bí-u yii: «Yàntī tí dū ŋkpam kí wà ŋŋmi kí tīī ti-Dindaan kí wàatī á nín lēē tin a yaa lèe», ní utɔntɔnlee ń bí yii: «Kpataaa, an pée sá á tīī-mi kɔŋkɔnnee ní, an yaa kaa sá míǹ, m làá lēē-tì mpɔn ní.» 17 Eelii jipɔmbee nìn ŋáań ikpitikpaan ti-Dindaan nimbiin, kun puee baa nìn tɔ́ saraabi bin bi nìn ŋáań ki tìì ti-Dindaanee.

18 Samiyeel úǹ nìn pēē gulfa un bí fálfalee bɔkutipaaŋkaaki, ki bí ti-Dindaan nimbiin ki tūǹ u-tundi.

Samiyeel dicaŋku bɔti

19 Dibindi kamaayee, Samiyeel na nìn ŋál̀-u dibɔkutil ní. U nìn cáǹ-dì ki tìì-u ŋyunti ŋun ní u nì u-cal yaa nìn cá Siiloo kí ŋá dibindi kamaa saraauee. 20 Eelii nìn mèé ki bìintí Eelkana nì u-nimpuu pu. U nìn mèé yii: «Ti-Dindaan ń yàntī a-nimpuu nee ń gíti màal̀-si mbiyaamu kí téeǹ kin a dūu sú ti-Dindaanee.» Míǹ boonee ní bí fàtīí nín kùǹ bi-dumpu. 21 Ti-Dindaan nìn bīiǹ Aana boon ní u gíti màl̄ mbininjabiyaamu muta nì nnimpubiyaamu muli.

An yaa kíǹ Samiyeelee, u nìn bí ti-Dindaan tundin ní ki wīintí.

Eelii wòon̄ u-jipɔmbi

22 Usaraaŋakpil Eelii nìn púĺ tikpil. U nìn gbìl̄ u-jipɔmbi nín bí ki ŋáań Isirayeel yab puee. U nìn gíti gbìl̄ yii bi mɔ̀nnì binimpoobi bin dòoń ki tūǹ Circir Kɔŋkooŋŋu punyɔkɔpu atuunee. 23 U nìn bí-bi yii: «M gbìl̄ samaa kɔkɔ sòoǹ ni-pu min kaa ŋān̄ee, ba pu ní ni ŋáań míǹ? 24 M-biyaamu, fámaan mbimbim gbanti! Tin m gbìl̀ ti-Dindaan nikitil sòoǹ ni-puee kaa ŋān̄ báà fiii. 25 Unil ubɔ yaa yīntiǹ u-jutee, Unimbɔti di pɔ̀, ama unil yaa yīntiǹ ti-Dindaanee, ŋma di làá pɔ̀?» Ama baa pée dū tin bi-baa sòon̄ nì bee ki túń ditundi. Di sá yii ti-Dindaan nìn lēē kí kpɔ̀-bi ní.

26 Samiyeel nìn wīintí ní ki nìn mɔ̀tīi fáatiǹ ti-Dindaan nì binib.

Eelii nì u-jipɔmbi tafadaaldi

27 Unimbɔti bɔnaatiliu ubɔ dɔ́miń ki ká Eelii ní ki bí-u yii: «Ti-Dindaan nín lī puee sèé: <Ŋyunti ŋun a-naanjab nìn bí kuyuŋun Faaroo ŋaan Eejipiti tiŋkinee, m nìn lēē m-ba ki dàkā-bi. 28 A-naanja Aarɔn ní m nìn lēē Isirayeel naakɔti kɔkɔ kansikin ú kpántí m-saraaŋakpiliu, kí nīn ŋáań saraabi m-saraafaŋŋu pu, kí nīn tùutī talaalutuukaa, kí nīn lēentí eefoodi m-nimbiin. M nìn lēē saraabi bin Isirayeel yab kɔkɔ cāabìń ki tìì-mee dijandi ki tīī u nì u-naantiibi^b. 29 Ba pu ní ni kpèé tiwaŋkuti saraabi nì saraabi bin kíǹ m tīī mara yii bí nīn ŋáań m-kɔŋkooŋŋunee fám míǹ? Ba pu ní a tīī a-jipɔmbi jilma ki jítiǹ man? Di sá yii m-nibul Isirayeel yab nín cāabìń-mi tin kɔkɔ ki ŋáań saraayee, ni lēē dijandi din ŋān̄ee ki jíń ki gbīfiǹ. 30 An pu ní man ni-Dindaan Isirayeel Nimbɔtiu lī yii: <M nìn pōoǹ yii a-dicaŋkun yab nì a-baa dicaŋkun yab làá nīn pée sá m-saraaŋaliibi ní kí nīn cá jaanjaan. Ama kɔŋkɔnnee, man ni-Dindaan sòon̄ yii an kaa ti sá míǹ. Di sá yii bin tìì-mi jilmee, m tìì-bi jilma ní, bin kpèé-mi fámee, ma mun kpèé-bi fám ní. 31 Ŋwiin ŋubɔ dòoń m làá dāá kúntí kun sá sii nì a-baa dicaŋku pɔŋŋuee, ní taa ti ŋmā kí ká ujaŋkpil ni-cindin. 32 Ŋyunti kamaayee, a làá nīn bí kunimbaaun ní. Án làá bútí Isirayeel yab tikɔkɔ poon, ama a-dicaŋkun binicikitikaabi kaa làá nīn gíti bí. 33 Nì míǹ kɔkɔee, m làá yàntī a-dicaŋkun yɔu ubɔ ń nīn gbíntìi bí ki tūǹ ditundi m-saraafaŋŋu pu. An dāa sá kí yàntī án nīn wù-si pɔ̀lpɔl kí kɔ́ kí dóó-si ní. Ama a-dicaŋkun yab bin kɔkɔ kíǹee làá dāá kpú.

34 «Tin làá bàń a-jipɔmbi Oofinii nì Fineeyaasi puee di làá nīn sá-si kudaaŋŋu, bi-liitil làá kpú ŋwimbaanti ní. 35 Boonee, m làá dāá lēē usaraaŋal un bí deedeeyee. U làá dāá ŋá tin m-pɔbil fáatèe nì m nín là puee. Úǹ di làá dāá ŋá tin fáatì m-pɔbilee. M làá dāá yàntī u-naantiibi ń nīn sá bisaraaŋaliibi kí nīn cá jaanjaan, ní kí nīn bí ki kɔ́ĺ ubɔti un m làá dāá lēēyee. 36 Un làá dāá kíń a-dicaŋkun kí nīn bí dimaŋfalinee làá dāá cù kí gbàan̄ usaraaŋal nimbiin ki nyàab̀ animbil jitɔn àá kikpɔnɔkatii. U làá dāá tùkù-u yii: <M gbàam̄-si, pée fōō-mi kí ŋá disaraaŋal tundi diba poon ḿ ŋmā kí nīn kāntí tiba poon fiii ki jīǹ.>»