Samiyeel Peepeekaa 3

1 Kinaacimpɔmbiki Samiyeel nìn bí Eelii cee ki tūǹ ti-Dindaan tundi.

Unimbɔti dū Samiyeel ki kpántì u-bɔnaatiliu

Ŋyunti gbantee, Unimbɔti kaa nìn sòoǹ nì binib múlmul, ní dileedakal kaa nìn gbōō.

2 Kunyeeu kubɔee, Eelii nìn dɔ̄ laakin u pée dɔ̀ee. U-nimbiliŋ nìn pēefì ní waa ti wāĺ tiŋan. 3 Samiyeel mun nìn dɔ̄ ti-Dindaan Diikun, laakin Unimbɔti dakaau yúee. Unimbɔti fitilau kaa nìn dáá kpíì. 4 Ti-Dindaan nìn yíiń Samiyeel, ní u kíí yii: «M sèé». 5 Ní u sáǹ ki nín cá Eelii cee ki bí-u yii: «A nín yíiń-mee, m sèé.» Ní Eelii bí-u yii: «Maa yíiń-si, nín̄ gítí kí cùú dòon̄.» Ní Samiyeel nín gítí ki cūtìi dōoǹ.

6 Ní ti-Dindaan fātìi yíiń Samiyeel nliliitiim. Ní Samiyeel yíkì ki nín gítí Eelii cee, ki bí-u yii: «A nín yíiń-mee, m sèé.» Ní Eelii bí-u yii: «Maa yíiń-si m-biki, nín̄ gítí kí cùú dòon̄.» 7 Samiyeel kaa nìn dáá nyí ti-Dindaan, di sá waa nìn dáá pée sòon̄ nì u ki ká.

8 Ní ti-Dindaan gíti yíiń Samiyeel ntataatiim ní Samiyeel yíkì ki nín cá Eelii cee ki bí-u yii: «A nín yíiń-mee, m sèé!» Niinee Eelii nín béè yii an sá ti-Dindaan di bíi yíì kibiki. 9 Ní Eelii bí Samiyeel yii: «Nín̄ gítí kí cùú dòon̄, u yaa ti yíiń-see, á lì yii: <Nín̄ sòoǹ, ti-Dindaan, man a-tɔntɔnliu pílifí!>» Ní Samiyeel nín gítí ki cūtìi dōoǹ laakin u pée dɔ̀ee.

10 Ti-Dindaan nìn dɔ́miń ki lēē u-bítam ki dàkā. Kii u nín bàà pée bíi yíì-u puee, u nìn tí yíiń-u yii: «Samiyeel! Samiyeel!» Ní Samiyeel kíí-u yii: «Nín̄ sòoǹ, man a-tɔntɔnliu pílifí.» 11 Niinee ní ti-Dindaan bí Samiyeel yii: «M làá ŋá tiba Isirayeel tiŋkin, ní án làá kɔ́ǹ un kamaa yaa gbìl̄-tèe dinyoondi. 12 Ŋwiin gbantee, m làá dū mbusub bin kɔkɔ m sòon̄ kí tɔ̄ Eelii nì u-dicaŋku puee kí tɔ̄ bi-pu, báà ubɔbɔ kaa làá gbíntí. 13 M tùkū Eelii ki síiǹ, m sòon̄ ki kūū u-dicaŋkun yab bɔti kí nīn pée cá, kun puee u nyí u-jipɔmbi nín bí ki kpèé man Unimbɔti fámee ní u ŋmí kaa dáaĺ bi-tafal. 14 An pu ní m pūtì yii báà Eelii dicaŋkun yab yaa yāntì ki ŋá tiwaŋkuti saraabi àá saraabi bin kíǹee min min, án kpá kí pítí bi-kpitii.»

15 Samiyeel gbíntìi dɔ̄ míǹ ní kutaa wúntì, ní u yíkìi pīitì ti-Dindaan diiku punyɔmmu. Samiyeel nìn fàŋkí kí tùkù Eelii tin u kée. 16 Ní Eelii yíiń Samiyeel ní ki bí-u yii: «Samiyeel, m-jipɔɔn!» Ní u kíí-u yii: «M sèé!» 17 Ní u bālifì-u yii: «Ti-Dindaan tùkū-si yii ba ní? Á taa báĺ-mi báà tiba! A yaa bál̀-mi kubɔbambaantiiu, Unimbɔti ń dáaĺ a-tafal ŋkpitim pu.» 18 Niinee ní Samiyeel kàan̄ tibɔti kɔkɔ ki tùkū-u kaa bál̀-u báà tiba. Ní Eelii bí yii: «Úǹ di sá ti-Dindaan, ú ŋá min u ká yii an ŋān̄ee.»

19 Samiyeel nìn wíiǹ. Ti-Dindaan nìn bí u-cee, ní kaa nìn yāntì tin u sòon̄ee tiba gbíntì fám kaa túń ditundi. 20 An yāntì Isirayeel yab kɔkɔ, kí yòon̄ Daani tiŋki kí cáá sāā Beerseeba tiŋkee, báà ŋma béè yii ibaamɔn Samiyeel baasii sá ti-Dindaan bɔnaatiliu^a. 21 Ti-Dindaan nìn gbíntìi nìkì ki nyāntí u-ba Siiloo ki dàkà. Di sá yii Siiloo niin ní u nìn nyāntí u-ba ki dàkà Samiyeel ní ki tìì-u u-nyɔɔbundi,