Samiyeel Liliiti 12

Naatan wòon̄ Daafiidi u-kpitii pu

1 Unimbɔti nìn tú u-bɔnaatiliu Naatan Daafiidi cee. U bàn̄ ki ká-uee ní ki bí-u yii: «Binib bili nìn bí kitiŋ kiban, ubɔ nìn sá ugaaja ní un kíǹee sá usoodaan. 2 Ugaajee nìn cáá ipii nì iŋoobu nì inaa tikpil. 3 Usoodaanee úǹ kaa nìn pée cáá báà tiba, asee kipisalii kiba ní u nìn dá. U nìn kpīintí-kì ní ki nì u-biyaamu wīintí mbaantiim. Tijin tin u nìn jīǹee nì nnyim min u nìn nyùee ní u tìì-kì. Kipisaliiyee nìn dɔ̀ ki kɔ́l̀-u, ní kì bí kii u-bisalee. 4 Dalbee unicaan ubɔ kɔ́ ugaajee. Ama ugaajee kaa là kí cúú u-piii àá u-ŋoobui àá u-naai kansikin ubɔ kí ŋá u-nicaaŋwu tijin. Ama ní ki cúú usoodaan pisaliiki ki kūū ki ŋá u-nicaaŋwu tijin.»

5 Ní Daafiidi fōō ugaajee pu diŋuul ŋkpitim pu, ní ki bí Naatan yii: «M pūtì ti-Dindaan un bí nee yii unil un ŋá mimmee máaǹ bí kpɔ̀-u. 6 U nín ŋá pu kaa súń u-juti saayee, ú pà mpisalimu munaa kí téeǹ kipisaliiyee pu.» 7 Ní Naatan bí Daafiidi yii: «Unil un ŋá mimmee, sii dee! Kpèè ti-Dindaan Isirayeel yab Nimbɔtiu nín lī puee sèé: <Man di lēē-si á nīn sá Isirayeel yab bɔtiu. Man di fīī-si ki nyántì Saayuul ŋaan. 8 M dū a-kpiliu Saayuul dicaŋku ki tīī-si, ki dū u-nimpoobi ki ŋá a-ŋaan. M dū-si ki kāaǹ á jī dibeel Isirayeel yab nì Juuda yab pu. An yaa bàà pátì, m bàà ŋūǹ kí kūtì-si tin jítiǹ mimmee. 9 Ba pu ní a kpēē man a-Dindaan fám ki ŋá min kaa fáatiǹ-mee? A kūū uyitiija Urii. A yāntì Amɔn yab kūū-u, ní sii fōō u-nimpuu ki cáá. 10 An puee kí yòon̄ kɔŋkɔnnee kí nīn cée, nnikpaakoon pée kpá kí lóó a-dicaŋkun, di sá yii a kpēē-mi fám ki fōō uyitiija Urii nimpuu ki cáá. 11 Man ni-Dindaan nín lī puee sɔ̀. M làá yàntī mbusu ń jēetí a-pu, ní mbusu gbantee làá nyānní sii a-ba dicaŋkun ní. A-nimbilaaliyin ní m làá fōō a-nimpoobi kí tīī a-yab ubɔ ní ú dòon̄ nì bi ŋwiimpu^a. 12 Di sá yii sii ŋá dibalin ní, ama man làá nyāntí tin a ŋée Isirayeel yab kɔkɔ nimbilaaliyin ŋwiimpu ní.»

13 Ní Daafiidi bí Naatan yii: «M yīntiǹ ti-Dindaan.» Ní Naatan kíí Daafiidi yii: «Ti-Dindaan mun dū a-kpitii ki pú-si. Aa làá kpú. 14 Ama tibɔti nee poonee, a kpēē ti-Dindaan fám. An puee kibininjabiki kin bi màl̄-si nee làá kpú.» 15 Niinee ní Naatan nín kùǹ.

Batiseeba biki kúm

Ti-Dindaan yāntì iween iba dɔ́miń ki cúú Urii nimpuu Batiseeba biki kin u màl̄ Daafiidee. 16 Daafiidi nìn mēē Unimbɔti kibiki gbanti pu. U nìn bōob̀ kinyɔkɔ, ní u yaa nìn kɔ́ u-diikunee, u dɔ̀ kitiŋ fám ní. 17 U-kàliŋkpilib bin bí u-cindinee dɔ́miń u-cee ki gbāam̀-u ú yīkì kitiŋ ní u yíì, ní kaa là kí jī tijin bi-cee. 18 An dāa tú kinyɔŋee, kibikee kpíì. Daafiidi tɔntɔnliibi nìn fàŋkí kí tùkù-u yii kibiki kpíì. Bi nìn bíi lì yii: «Ŋyunti ŋun kibikee dáá bée, ti nìn sòon̄ nì u waa pílifiǹ-ti. Kɔŋkɔnnee ti làá ŋá mana kí tùkù-u yii kì kpíì. U ŋūǹ kí ŋá u-ba tin kaa ŋān̄ee!» 19 Daafiidi gbìl̄ bi nín bí ki mùkufī bi-ŋmaniŋmee, ní u béè yii kibikee kaa ti bí. Ní u bālifì-bi yii: «Kibikee kpíì níii?» Ní bi kíí-u yii: «Iiin, kì kpíì.» 20 Niinee Daafiidi yíkì kitiŋ, ki cūtìi fùl̄ ki yāaǹ u-wunti pu talaalu ní ki kpántì tiwampeeŋkaal. Míǹ boonee ní u nín cá circir kɔŋkooŋŋun ki gbāaǹ ki jáam̀ ti-Dindaan.

U fātìi bāańee ní ki yāntì bi ŋá-u tijin u jíń. 21 U-tɔntɔnliibi bālifì-u yii: «Ti-baa, tin a bíi ŋáań nee là kí lì yii ba dee? Di sá ŋyunti ŋun kibiki dáá bée, a nìn bōob̀ kinyɔkɔ ní ki sūǹ. Kɔŋkɔnnee kì nín kpíìyee ní a yíkìi kāl̀ ki bíi jīǹ tijin.» 22 Ní Daafiidi kíí-bi yii: «Ŋyunti ŋun kibiki dáá bée, m nìn bōob̀ kinyɔkɔ ki sūǹ, di sá m nìn dàkafī yii an yaa yíì ti-Dindaan làá sɔ̄ m-saai kí cáaǹ-kì. 23 Ama kɔŋkɔnnee kì kpíì, ba pu ní m nín gíti bōob̀ kinyɔkɔ? M ŋūǹ kí gíiǹní-kì dimaŋfalinaaa? Man di làá dāá cù ki-cee, kíǹ kaa ti ŋūǹ kí gítiń m-cee.»

Bi màl̄ Saloomɔn

24 Daafiidi ŋméeǹ u-nimpuu Batiseeba. Boonee ní u nì u kpáfì ní u cáá dipool ki màl̄ kibininjabiki ní ki pú-kì diyindi yii Saloomɔn. Ti-Dindaan nìn néeń-kì. 25 U nìn dī u-bɔnaatiliu Naatan pu ní ki tùkū Daafiidi míǹ. Ní Naatan pú-kì diyindi yii Yeediidiya, an taapu di sá yii: «Un ti-Dindaan néeńee.»

Daafiidi jáń ki fōō Raaba tiŋki

(1 Kroo 20.1-3)

26 Ŋyunti gbantee ujanjakpil Joowaab nìn cūtìi jáń nì Amɔn yab tiŋki Raaba ki fōō laakin ubɔti kóòyee. 27 Joowaab nìn tú binib bí tùkù Daafiidi yii: «M bíi jáà nì Raaba tiŋkin yab, ki fōō bi-tiŋki laakin bi bíl̀ nnyimee. 28 An puee kpāfì bijanjaliibi bin kíǹee, sii a-ba ń dāan̄ kí já kí fōō-kì. Maa là kí já kí fōō-kì m-ba kí fōō diyindi.» 29 Ní Daafiidi kpáfì bijanjaliibi bin kíǹee ní bi dɔ́miń ki jáń nì Raaba ki fōō-kì. 30 Bi nìn cíkitì Amɔn yab bɔtiu beefuuliiki u-yil pu ki dūu cíkiǹ Daafiidi. Kibeefuuliiyee nyiŋfiŋu nìn sá kiiloobi mmuŋku nì saalaa nyɔkɔm, ní ataŋkpamɔnti náká ki-pu. Kí kūtèe, Daafiidi nìn jáń ki fōō tiwan tikpil, ní ki kóoǹ ki kpīnnì. 31 Daafiidi nìn cúú kitiŋ gbanti nib kuyuŋu bi tūǹ atuun ŋin pɔ̄ɔ̄yee. Biba nìn sèekì ki kpítí ataŋkpee, ní biba gà isufi, ní biba mun māā brikisib. Míǹ ní u nìn ŋá Amɔn yab bin bí ntimu mun kɔkɔ kíǹee poon. U ŋá míǹ ki dóòyee ní u nì u-janjaliibi nín gítí Jeerusaleem.