Samiyeel Liliiti 13

Aminɔn nì Taamaar bɔti

1 Míǹ boonee tin jítèe sèé. Daafiidi jipɔɔn Abisaloom nìn cáá niisal ubɔ bi yíì-u Taamaar. U nìn cáá kunyaaŋŋu tikpil. Usapɔɔnee nìn kɔ́ Daafiidi jipɔɔn Aminɔn tikpil. 2 Aminɔn niisal Taamaar nín nìn kɔ́-u puee nìn yāntì an dūu ŋá-u iween. U-niisalee nín kaa nìn nyí uninjee puee, an nìn pɔ̄ɔ̄ ú ŋmā kí sútí kí pìl̄-u. 3 Aminɔn nìn cáá bɔɔ ubɔ bi yíì-u Yoonadaab. U nìn sá Daafiidi maan Simeeya jipɔɔn ní. Kijapaayee nìn wálifì tikpil. 4 U nìn bālifì Aminɔn yii: «Sii sá ubɔti jipɔɔn ní, ba pu ní kutaafaau kamaa a pée kā kunandaŋu míǹ? Tiba yaa bí tùkù-maa!» Ní Aminɔn kíí-u yii: «An sá m-naal Abisaloom niisal Taamaar di kɔ́-mi tikpil.» 5 Niinee ní Yoonadaab bí-u yii: «Dòon̄ a-dooŋu pu kí ŋá kii a būǹee. A-baa yaa dɔ́miń kí màntì a-puee ní á bí-u yii: <Yàntī m-niisal Taamaar ń dāan̄ kí ŋá-mi tijin. Ú nīn kā m-nimbiin ki ŋáań tijin m wāĺ-u. U yaa dóòyee, úǹ u-ba ń cáań kí tīī-mi ḿ jī.>»

6 Niinee Aminɔn dōoǹ ki ŋá kii u būǹee. Ubɔti dɔ́miń kí màntì u-puee ní Aminɔn bí-u yii: «Yàntī m-niisal Taamaar ń dāan̄ kí kàl̄ m-nimbiin kí tɔ̄-mi kalaabi bili pu yéè kí tīī-mi ḿ ŋmɔ́.» 7 Ní Daafiidi tú ubɔ Taamaar dumpu ú tùkù-u yii: «Cù a-niija Aminɔn cee kí ŋá-u tijin.» 8 Ní Taamaar nín cá u-niija Aminɔn cee, ki bàn̄ ki ká-u u dɔ̄ ndoo pu. Ní u kāl̀ u-nimbiin niin ki búuń ŋyim ki tɔ́-u kalaabi. 9 U wūutì kalaayee ní ki cáa yóoǹ u-nimbiin ú ŋmɔ́, ní u yíì. Ní Aminɔn bí yii: «Nyāntímaan binib kɔkɔ doo». Ní bin kɔkɔ nìn bí u-ceeyee nyáń. 10 Ní u bí Taamaar yii: «Cáań-mi kalaabee m-diikun, kí lēē kí tīī-mi ḿ ŋmɔ́.»

Ní Taamaar yōoǹ kalaabi bin u tɔ́ee ki cáa kɔ́ǹ u-niija Aminɔn diikun. 11 Ŋyunti ŋun u lēē kalaa ki tīī-u ú ŋmɔ́ee ní u cúú-u ki bí yii: «M-niisal, yàntī ḿ dòon̄ nì si.» 12 Ní Taamaar fáá mbiil yii: «M-niija, taa bīil̀-mi. Baa ŋáań míǹ Isirayeel yab tiŋkin. A taa ŋá icoo bɔti gbanti. 13 A yaa ŋá mimmee, la ní m làá cáá m-cooi gbanti kí báĺ? A làá kpántí kpayiliku Isirayeel tiŋkin. Míǹ puee, sòoǹ nì ubɔti, waa làá yíí yii á taa cáá-mi.» 14 Aminɔn kaa pée là kí pīlifiǹ-u. U cúú-u mpɔn ní ki dōoǹ nì u.

15 Míǹ boonee, Aminɔn nìn kíǹ ki ná Taamaar. Kináŋ kin u nìn kíǹ ki cáá u-puee nìn pɔ̄ɔ̄ ki jítiǹ dineendi din u nìn bí yii u néeń-uee. Ní Aminɔn bí-u yii: «Yīkìí nyā doo!» 16 Ní Taamaar kíí-u yii: «A yaa jìn̄-mee kpitii làá nyàŋkiǹ in a dáá ŋá nee.» Ama ní Aminɔn kaa ti pée là kí pīlifiǹ-u. 17 Ní u yíiń u-tɔntɔnliu ki bí yii: «Jà usapɔɔn nee kí nyāntí doo kí dū kudii kí pìin̄ kí kpàl̄.» 18 Ní utɔntɔnlee jìn̄ Taamaar ki nyántì ki dū kudii ki pīiǹ ki kpàl̄.

Taamaar nìn pēē dibɔkutifɔkɔl dimɔntiil diba, di sá yii bɔtiisalib bin kaa nìn nyí uninjee nín nìn pèentí puee dee. 19 Ní Taamaar dū ŋfantam ki pùkū u-yil, ki dáaĺ ki cátì dibɔkutimɔntiil din u pēēyee, ní ki dū u-ŋalii ki túǹ u-yil pu ki còom̄ ki cá ki gbáà ibiil. 20 Ní u-niija Abisaloom bālifì-u yii: «A-niija Aminɔn bíil̀-si níii? Taa ti lì tiba, m-niisal, a-niija dee. Taa dūú páb́ a-ba.» Kí yòon̄ ŋyunti gbantee, Taamaar nìn kíǹ ki bí u-niija Abisaloom cee icoo poon. 21 Ubɔti Daafiidi nìn gbìl̄ tin jítèe kɔkɔ ní ki fōō diŋuul ŋkpitim pu. Ama waa nìn wòon̄ Aminɔn, di sá yii úǹ di nìn sá u-jipɔŋkpiliu ní u nìn néeń-u tikpil. 22 Ama Abisaloom kaa nìn gíti sòoǹ nì Aminɔn. U nìn kíǹ ki ná-u, kun puee u nìn bíil̀ u-niisal Taamaar.

Abisaloom yāntì bi kūū Aminɔn ní ki sáǹ

23 Tíǹ jítì abin ali boonee, bi bíi cēē Abisaloom piii kuti Baal-Asɔɔr, Eefiraayiim tiŋki caŋin. Abisaloom nìn yíiń ubɔti jipɔmbi kɔkɔ bí jī bi nín bíi cēē u-piii kutee jiŋaaliu. 24 Abisaloom cūtìi ká u-baa Daafiidi ki bí-u yii: «Ti-baa, bi bíi cēē man a-tɔntɔnliu piii kuti. M gbāam̀-si, si nì a-kàliŋkpilib ń céeǹ man a-tɔntɔnliu tí cùú jī jiŋaal gbanti.» 25 Ní ubɔti kíí-u yii: «Aayee m-jipɔɔn, ti-kɔkɔ kaa máaǹ kí cù, án làá nīn sá-si digìŋ́kpaandi ní.» Ní Abisaloom pée gbíntìi cɔ́ yii bí cù, ní ubɔti yíì, ama ní ki mēē ki bīiǹ u-pu. 26 Ní Abisaloom bí yii: «Mimmee sii yaa kaa làá cùee, pɔ̄ nsan m-maan Aminɔn ń céeǹ-ti.» Ní ubɔti kíí-u yii: «Ba pu ní ú céeǹ-si?» 27 Ní Abisaloom gbíntìi cɔ́. Ubɔti dāa gīīyee ní ki yāntì Aminɔn nì u-jipɔmbi bin kíǹee cūtì.

Ní Abisaloom bɔ́ntì tijin mbɔtiyaamin. 28 Abisaloom tīī u-tɔntɔnliibi mara nee yii: «Ní nīn cɔ́ŋkí Aminɔn. U yaa láa nyùn̄ ndaam ki bál̀ an nyāatì-u ní m yaa láa bí-ni yii: <Kpɔ̀maan Aminɔŋyee!> Ní kpɔ̀-u! Ní taa fàŋkì tiba, man di tīī-ni mara yii ní kpɔ̀-u. Kámaan dipɔbil kí dàkàmaan tininjati.» 29 Ní Abisaloom tɔntɔnliibi kūū Aminɔn kii u nín bí yii bí ŋá puee. Niinee ubɔti jipɔmbi bin kíǹee yíkìi yōoǹ bi-mambooŋyi ki sáǹ ki kátì.

30 Bi dáá bí nsanni ki sáń ki cá ní Daafiidi gbìl̄ yii: «Abisaloom kūū ubɔti jipɔmbi kɔkɔ pílpil báà ubɔ kaa kíǹ.» 31 Niinee ubɔti cúú tiwan tin u pēēyee ki cátì ní ki dōoǹ kitiŋ. Ní u-kàliŋkpilib mun cátì bi-wanti tin bi pēēyee ki yú ki gɔ́ń-u. 32 Niinee ní Daafiidi maan Simeeya jipɔɔn Yoonadaab bí yii: «Ti-baa ubɔti, a taa dàkafì yii bi kūū a-jipɔmbi kɔkɔ. Aminɔn baba ní bi kūū. Doooo ŋyunti ŋun Aminɔn bíil̀ u-niisalee ní Abisaloom nìn lī ki yóoǹ yii u làá kpɔ̀-u. 33 An puee, á taa dàkafì yii bi kūū a-jipɔmbi kɔkɔ, Aminɔn baba ní bi kūū. 34 Abisaloom úǹ sáǹ.»

Un nìn sí sintilee kpēē ndanee ki ká dinikitikpaandi diba tàkāń Ooroonayiim dandi ki kpàkaǹ dijool ki dòoń. 35 Ní Yoonadaab bí ubɔti yii: «Ti-baa, kpèè a-jipɔmbi di dòońee! M nín bàà pée tùkū-si puee, míǹ ní ti wāĺ nee.» 36 U sòon̄ kaa láá ŋmíl̀ ní ubɔti jipɔmbi dūu bāań. Bi nìn kíĺ nsiim, ní ubɔti nì u-kàliŋkpilib mun bíi sūǹ lɔ̀lɔlɔ.

37 Abisaloom nín sáǹee, u nìn cūtìi kɔ́ Amiiyuur jipɔɔn Talimayi, Geesuur bɔtiu pu. Ŋyunti gbanti kɔkɔee, Daafiidi pée gbíntìi kā u-jipɔɔn kpool. 38 Abisaloom un nìn sáǹ ki cūtìi bí Geesuur tiŋkinee nìn ŋá niin abin ata ní. 39 Ubɔti Daafiidi nìn bíi súntí Aminɔn kúm pu fiii fiii, ní diŋuul din u nìn gíí Abisaloom puee mun sɔ̄ŋkì.