Samiyeel Liliiti 22

Daafiidi laŋŋu

(Kpèè Ilan 18)

1 Daafiidi dū anyɔɔbun nee ki gāā nlan ki nyɔ́ŋkì ti-Dindaan ŋyunti ŋun u nyántì-u u-nannanliibi kɔkɔ, cilinjee Saayuul ŋaanee.

2 U lī yii:

Ti-Dindaan di sá man taŋkpanaakooku,

úǹ di sá man guŋkpaandi lɔkɔl nì man fiiliu.

3 U sá man Nimbɔtiu ní ki sá ntaŋkpalɔkɔ ŋun poon m sáń ki kóòyee.

Úǹ di sá man gbampɔɔl ní ki sá man jajil pɔŋŋu,

ti-Dindaan di sá man balilaŋki.

Úǹ ní m sáń ki kóò

ní u fìil̄-mi tipɔmbɔti dambi ŋaan.

4 Tí nyɔ̄ŋkì ti-Dindaan!

M kúuǹ ki yíiń ti-Dindaan

ní u yāntì m jáń ki pɔ́ɔkiǹ m-nannanliibi.

5 Ŋkúm kusakai nìn fìn̄-mi,

dinàandi nyiŋgbeeŋŋu nìn yōoǹ-mi ki dóò.

6 Ditaŋkpiilin laaŋku nìn māntìi tú-mi,

ní ŋkúm talinti píĺ ki dɔ̄ m-nimbiin.

7 M kúuǹ ki yíiń ti-Dindaan m-nimbinaamandi poon.

M fáá mbiil m-Nimbɔtiu ń jòoń-mi.

U gbìl̄ m-neen pu doooo u-diikun

ní m-kuŋkuuntii kɔ́ u-tafalin.

8 Niinee ní kitiŋ fōō dijinjikil ki cīŋkì,

ní ajoon nyeel cīŋkì.

Di sá yii Unimbɔti gíí diŋuul.

9 Ŋŋminyiim nìn nyēē u-maŋfataabuŋyin,

ní aŋmilimbil ŋin nàantée nì amɔsiŋkoon nyēē u-nyɔkɔn.

10 Ní u cúú kutagbɔŋu ki cátì ní ki kpákatìń,

ní ditagbandi din bɔ̀ǹee bí u-taaŋi taapu.

11 U kāl̀ tiwannáaŋkaal tin cáá ifeenee pu ki ŋàan̄,

ní ki dū kubuŋu ki kpántì ifeen ki kíǹ ki dàn̄.

12 Dibɔmbɔndi ní u dūu bīiǹ u-ba pu

ní atagban ŋin gbìfì nnyim gbí ŋi-poonee māntìi tú-u.

13 Ŋwalifi nìn bí u-nimbiin,

ní atagban jītí ki sá ataanyiŋkumbil nì amɔsiŋkoon.

14 Ti-Dindaan sòon̄ní doooo yilpu kii ntaateenteenee,

Yilpu Fɔ́ŋŋŋ Nimbɔtiu yāntì bi gbìl̄ u-nyɔkɔ pu.

15 U tɔ́ u-piiŋyi ní u-nannanliibi yàl̄,

ní u dū itaaŋmɔŋmɔ ki ŋmíntì bi-pu ní bi sáǹ ki kátì.

16 Ti-Dindaan tāā ki bíikì u-nannanliibi pu,

ní ki fōō bi-pu diŋuul,

an pu ní tiŋku poon nyim fóotì,

ní kitiŋ nyeel cúu bīitì ki dɔ̄.

17 Ní ti-Dindaan kāl̀ doooo yilpu ki tāntì u-ŋal

ki cúú-mi ki nyántì inyiŋfi taapu.

18 U fōō-mi m-nannanliu un pɔ̄ɔ̄yee ŋaan,

m-pulincɔntiibi bin pɔ̄ɔǹ-mee ŋaan.

19 M-nimbinaamandi dal ní bi dɔ́miń ki jáń nì mi,

ama ti-Dindaan dɔ́miń ki tíkiǹ-mi.

20 U nyántì-mi digìńdin ki tīī-mi dibatɔl.

U fīī-mi, kun puee u néeń-mi.

21 Ti-Dindaan di pàn̄-mi,

kun puee m ŋá tin bí deedeeyee.

U bīiǹ m-pu kun puee tikpitil tiba kaa táká m-ŋal.

22 M nóó ti-Dindaan saŋŋu nì mbaamɔn,

ní kaa fātì m-boon ki tīī m-Nimbɔtiu.

23 M ŋúb́ ti-Dindaan marab kɔkɔ,

kaa fātì m-kpaŋkpamboon ki tīī u-bɔkpaaŋi.

24 Waa ká m-pu tiba kí wòoǹ-mi,

ní m pɔ́ɔǹ m-ba kí taa ŋá ikpiti.

25 An pu ní ti-Dindaan pàn̄-mi,

kun puee m ŋá tin bí deedeeyee,

ní u nyí mun yii m-ŋalii kaa táká ikpiti.

26 Ti-Dindaan, bin nóó-si nì dipɔbil dibee,

a sí nì bi dipɔbil diba mun ní.

Bin bí deedeeyee,

a sí nì bi deedee ní.

27 A ŋáań bin pɔbiliŋ pīiǹee tiŋan,

ama ní ki dàkà bikpitiŋaliibi yii a nyíǹ-bi.

28 Di sá yii a fìil̄ dinibul din sīntiǹ di-ba taapuee,

ama ní ki sìntīǹ bilambidambi taapu.

29 Ti-Dindaan, sii di sá m-fitilau,

sii di ŋmíntí-mi ní m-bɔmbɔndi ń wāŋkì.

30 M ŋūǹ kí já nì dijanjakitil,

kun puee a tútúǹ-mi.

M ŋūǹ kí yùkū kí lákatí agun ŋin bi máń ki tú kitiŋee,

kun puee man Nimbɔtiu bí m-cee.

31 Tin kɔkɔ Unimbɔti ŋáańee ŋān̄,

ní unil ŋūǹ kí nīn máká u-nyɔɔbundi pu.

U sá digbampɔɔl ní ki tīī bin kɔkɔ sáń ki kóò-uee.

32 Ŋma di sá Unimbɔti,

an yaa kaa sá ti-Dindaan?

Ŋma di sá timbi taŋkpanaakooku,

an yaa kaa sá ti-Nimbɔtiu?

33 Úǹ di sá Unimbɔti un tìì-mi mpɔnee,

ní ki cátí nsammɔnti ki tìì-mi m còom̄.

34 U yàntī m-taaŋi yáb̀ m sáń kii ucaŋkpalimee,

ní ki yàntī ḿ jɔ̄m̀ kí tɔ́kɔń ajoon pu tiba ń taa ŋá-mi.

35 Waa bífí-mi bi nín jáà puee ŋmaniŋma,

ama u yàntī ḿ ŋmā kí dáaĺ butɔbu

bun bi dū tasa kúti ki píĺee.

36 Ti-Dindaan, a tìì-mi digbampɔɔl din fìil̄-mee,

ní a-ŋaŋgiil tíkí-mi,

ní a nín tútúǹ-mi puee yāntì m nyáń diyindi.

37 Sii puee m ŋūǹ kí dàatī malaa malaa,

ní maa tà ki pántí.

38 M jì m-nannanliibi ní kí cúú-bi,

m yaa kaa nāaǹ-bi maa fàtī m-boon.

39 Ní ḿ pɔ̀fì pɔ̀fì-bi ní baa ti ŋūǹ kí yīkì,

ní ki kíǹ ki dɔ̄ m-taaŋi taapu fìlfil^a.

40 A tìì-mi mpɔn ḿ já kujaau,

ní ki dù bin yíkíi jáà nì mee ki ŋáań m-taaŋi taapu.

41 A yàntī m-nannanliibi sáń kukunsaŋu,

ní ki nàantí bin ná-mee.

42 Bi kūuntí ki nyàab̀ dijòońdi,

ní ubɔ kpá kí fīī-bi.

Bi kúuǹ ki yíiń ti-Dindaan gba,

ama waa kíí-bi.

43 M jáń ki pɔ́ɔkiǹ-bi ki nàn̄-bi dúsi dusi

kii ŋkpɔŋkpɔm min kubuŋu yòontée,

ki tà-bi ki ŋmàtifī kii nsanni kpatee.

44 A fīī-mi ki nyántì anibul ŋin nib nìn yíkì ki jáà nì mee ŋaan,

ní ki dū-mi ki ŋá atimbun yidaaŋwu.

Anibul ŋin maa nìn nyée kpántì

m-naacimbi ki tūǹ ditundi ki tìì-mi.

45 M tin pée lì yii m wàatī m-nyɔkɔ kí sòoǹee,

binaacimbee tātìi gbāaǹ m-nimbiin ki kíǹ ki tɔ́-mi.

46 Bi-wunti kúù,

ní bi nyēeń bi-balilaŋki tiwun jìkì.

47 Ti-Dindaan bí dimaŋfalin!

Tí nyɔ̄ŋkìmaan m-taŋkpanaakooku!

Tí pàkàmaan Unimbɔti un di sá m-fiiliuee!

48 Unimbɔti tútuǹ-mi m jáń ki pɔ́ɔkiǹ m-nannanliibi,

ní ki dū atimbun ki ŋá m-taaŋi taapu.

49 U fīī-mi ki nyántì m-nannanliibi ŋaan.

Tiŋman u yāntì m jáń ki pɔ́ɔkiǹ bin jáà nì mee,

ní ki fīī-mi ki nyántì tipɔmbɔti dambi ŋaan.

50 An pu ní, m-Dindaan, m làá nyɔ̄ŋkì-si atimbun kansikin,

ní kí gāā ilan kí pàkà a-yindi^b.

51 Unimbɔti tìì u-bɔtiu ajajil ŋin sá akpaanee.

U dàkà ubɔti un úǹ u-ba lēēyee

nì Daafiidi nì u-naantiibi dineeŋkpaandi

kí nīn cáa cá jaanjaan.