Samiyeel Liliiti 21

Gabawɔn yab nì Sayuul dicaŋkun yab bɔti

1 Daafiidi yuntiŋuee, ŋkùm miba nìn nyáń ki sāā abin ata. Ní Daafiidi bālifì ti-Dindaan, ní u kíí-u yii: «Saayuul nì u-dicaŋkun yab pu ní ŋkùmee nyáń, kun puee bi nìn ŋá ikpiti ki kūū Gabawɔn yab.»

2 Ní ubɔti yíiń Gabawɔn yab ki sòon̄ nì bi. Gabawɔn yab kaa nìn sá Isirayeel yab, ama bi sá Amɔɔr yab bin Isirayeel yab nìn kūū ki kíǹee ní. Isirayeel yab nìn pūtì ki pōoǹ-bi yii baa làá kpɔ̀-bi^a. Dineendi din Sayuul nìn cáá Isirayeel nì Juuda yab puee nìn yāntì u nyàab̄ kí kpɔ̀ kí céetí-bi. 3 Daafiidi bālifì-bi yii: «Ni là ḿ ŋá ba kí tīī-ni ní? Ḿ ŋá mana kí ŋāŋkì tikpitil tin Saayuul ŋá-nee, án nín làá ŋá pu ní mèè kí bìin̄ ti-Dindaan nibul puee ní?» 4 Ní Gabawɔn yab kíí-u yii: «Ti nì Sayuul nì u-dicaŋku kansikin bɔtee, an kaa sá animbil àá sindaariya àá Isirayeel yab ubɔ kúm di làá ŋāŋkì-tì.» Ní Daafiidi fātìi bí-bi yii: «Lìmaan kun ni baasii lèe, m làá ŋá kí tīī-ni.» 5 Niinee ní bi bí ubɔti yii: «Saayuul nìn là kí kúntí-ti. U nìn bɔ́ntì kí kpɔ̀ kí céetí-ti báà ubɔ ń taa kíń Isirayeel tiŋki kɔkɔn. 6 Bí cúú u-dicaŋku poon binib biluli kí tīī-ti ní tí cáá-bi kí cɔ̀b̄ ti-Dindaan nimbiin, Giibeeya tiŋkin. Niin ní Sayuul un ti-Dindaan nìn lēēyee nìn kóò.» Ní ubɔti kíí-bi yii: «M làá cáań an nibee kí tīī-ni.»

7 Ama ubɔti nìn fīī Joonatan jipɔɔn Meefiibooseeti, Sayuul naantiiu. Daafiidi nìn pūtì ti-Dindaan ki pōoǹ u nì Joonatan bɔɔtiiku pu^b. 8 Ama u nìn nyàabìń Arimooni nì Meefiibooseeti, Aya bisal Riispa jipɔmbi bili bin u nìn màl̄ Sayuulee, nì Saayuul bisal Miikaal jipɔmbi biŋmoo bin u nìn màl̄ Barsilayii jipɔɔn Adriyeel un sá Meeyooba tiŋkinee. 9 U nìn dū-bi ki tīī Gabawɔn yab, ní bíǹ cáá-bi ki cɔ̀b̄ dijool pu ti-Dindaan nimbiin. Binib bilulee nìn kpíì dicilpu. Ŋwimpeepeekaa ŋun bi bōoǹ ki bíi cēē ɔɔjee ní bi nìn kūū-bi.

10 Aya bisal Riispa nìn dū kpɔsata un u nìn lōōyee ki dāntì ditaŋkpakpaandi pu, ní ki kā niin kí yòon̄ ŋyunti ŋun bi kíĺ ki bíi cēē ɔɔjee kí cáá sāā ŋyunti ŋun utaa kpákatìńee. Ŋwiimpuee, u nìn jì inoon ń taa jī bi-nanti, ní kunyeeuee, u jì ipeel. 11 Ní bi cūtìi tùkū ubɔti Aya bisal Riispa, Sayuul nimpuwaaki nín ŋá puee. 12 Niinee Daafiidi yāntì bi yōoǹní Sayuul nì u-jipɔɔn Joonatan kpabiŋ Yaabeesi yab cee Galaadi tiŋkin. Di sá yii Fiiliistii yab nín nìn jáń ki pɔ́ɔkiǹ Saayuul Giilboowa tiŋkinee, bi nìn cáá Saayuul nì Joonatan ki lúntì Beeti-Seeyan paaŋŋu pu, ní Yaabeesi yab cūtìi sākatìń bi-wunti. 13 Daafiidi nìn yōoǹní Saayuul nì Joonatan kpabiŋ niin ki cáańee ki dūu kpáfì nì bin bi nìn cɔ̀b̄ee yaŋ pu. 14 Ní bi cáá bi-kpabiŋ nì Saayuul nì Joonatan yaŋ ki bíl̀ Saayuul baa Kiisi kaakulin, Seera timbiliikin, Beenjameen tiŋkin.

Bi ŋá kii ubɔti nín tīī mara bí ŋá puee ki dóòyee ní Unimbɔti súń kitiŋ gbanti saai.

Isirayeel nì Fiiliistii yab kɔndi

(Kpèè 1 Kroo 20.4-8)

15 Kujaau kubɔ gíti nyáń Fiiliistii yab nì Isirayeel yab kansikin. Daafiidi nì u-janjaliibi nìn sīntì kí já nì Fiiliistii yab. Bi bí dikɔ̀ndi poonee ní Daafiidi gīī. 16 Niinee ní Iseebi-Beenoobi un sá Arafa naakookunee bíi pùlifī ki lì yii u làá kpɔ̀ Daafiidi. U nìn gbìn̄ kijipɔŋ ki ŋúb́ kikpaŋ. Kikpaŋee nyɔkɔpu nìn sá tasa kúti ní ki nyìm̀ kii kiiloobi bita nì ipaa. 17 Ama Abisayi un na bi yíì Seeruyee dɔ́miń ki jòoń ubɔti ní ki kūū ufiiliistiija. Niinee Daafiidi janjaliibi pūtì ki bí Daafiidi yii: «Aa ti làá pée nóó-ti tí cù dikɔ̀ndi, án nín làá ŋá pu ní Isirayeel walifiŋu ń taa kpúee.»

18 An yúntì boonee ní dikɔ̀ndi diba nyáń Fiiliistii yab nì Isirayeel yab kansikin Goobi tiŋkin. Niin ní Sibeekayii un sá Usa tiŋkinee kūū Saafi un sá Arafa dicaŋkunee. 19 Dikɔ̀ndi diba tí pōō Isirayeel yab nì Fiiliistii yab kansikin, Goobi tiŋkin. Min bí nee, Yaarii jipɔɔn Eelanan un sá Beetileem tiŋkinee kūū Gooliyaati ugaatija. U-kpaŋki dɔŋu nìn gbìfì kii tikúti tin bisataluliibi cōontí ki lù satabee ní. 20 Dikɔ̀ndi diba mun nìn tí nyáń Isirayeel yab nì Fiiliistii yab kansikin Gaati tiŋkin. Kujawɔkɔu kubɔ nìn bí ki sá Arafa dicaŋkun. Ku nìn cáá ŋŋambiyaamu muluu ŋŋal kamaa pu nì ntaŋambiyaamu muluu ditaal kamaa pu, mu-kɔkɔ nìn kpáfì mmuŋku nì munaa. 21 U nìn kpēē ki sɔ́kɔ́ Isirayeel yab. Ní Daafiidi maan Sama jipɔɔn Yiinatan kūū-u.

22 Daafiidi nì u-janjaliibi nìn kūū Fiiliistii janjaliibi binaa gbanti. Bi nìn sá Arafa dicaŋkun, Gaati tiŋkin.