Samiyeel Liliiti 20

Seeba yíkìi bíi jáà nì Daafiidi

1 Unifan ubɔ nìn bí niin bi yíì-u Seeba. U nìn sá Beenjameen naakookun ní bi yíì u-baa Biikirii. Kijapaayee nìn búń ŋyin ki lī yii:

«Tiba kaa bí ti nì Daafiidi kansikin!

Mpèé ŋubɔ kaa bí ti nì Jeesee jipɔɔn nee kansikin!

Isirayeel yab, báà ŋma ń nīn gítí u-dumpu^a.»

2 Niinee Isirayeel yab yíkìi dū Daafiidi ki fá ní ki kíǹ ki nóó Seeba. Ama Juuda yab nìn gbíntì ki bí Daafiidi cee. Bi nìn céeǹní-u doooo Jɔɔdan áli Jeerusaleem.

3 Daafiidi bàn̄ ki kɔ́ u-beecindin Jeerusaleem. U nìn yíiń u-nimpuwaamu saalaa mun u nìn dūu kāaǹ bí nīn kpèé dibeecindee ki cáá-mu ki kɔ́ǹ kudii kubɔn bi cí-bi. U nìn tìì-bi tin kɔkɔ pée máaǹee, ama waa nìn gíti dɔ̀ bi-cee. Bi nìn pīī míǹ ní ki dāa sāā bi-kúm dal. Bi nìn bí kii bikpiipoobee, ama ní bi-cal kaa kpíì.

Joowaab sāā ki kūū Amasaa

4 Ubɔti bí Amasaa yii: «Á kpāfì Juuda janjaliibi kɔkɔ. M tīī-si iwiin ita a nì bi ń dāan̄ m-cee doo.» 5 Amasaa búntì kí ŋá kii ubɔti nín bí yii ú ŋá puee, ama ní ki jítì iwiin in ubɔti yóoǹ-uee pu. 6 Ní ubɔti bí Abisayi yii: «Kɔŋkɔnnee, Biikirii jipɔɔn Seeba làá kɔ́ǹ-ti digìńdi kí jītíǹ Abisaloom. Yòon̄ bijanjaliibi bin cí-mee kí jà Seeba boon, ú taa sāǹ kí kɔ́ ntimu mun poon bi máń digundi ki māntìi túee kí ŋmátí.»

7 Ní Joowaab janjaliibi nì Keereeti yab nì Peeleeti yab, nì bibaatandambi kɔkɔ nyáń ki páaǹ Abisayi boon kí jà Biikirii jipɔɔn Seeba boon. 8 Bi bàn̄ ki yú ditaŋkpakpaandi din bí Gabawɔn caŋinee, ní Amasaa bāań bi-cee. Joowaab nìn yú ki pēē u-janjawanti ki gbìn̄ gbaja kitàataajiki fúuń kijitooun ki lúń. Ŋyunti ŋun Joowaab bíi sútíi pìl̀-uee ní u-tàataajiki nyáń ki lítì. 9 Ní Joowaab jáam̀ Amasaa yii: «M-nabiki, a pɔ̄ɔ̄ tiŋanaaa?» Ní u dū u-ŋaŋgiil ki cúú Amasaa nyimpul ki kpàl̄-u. 10 Amasaa kaa nìn gíiǹ u-landɔkɔŋu kitàataajiki kin nìn kā Joowaab ŋaŋganee pu. Joowaab nìn dū kitàataajikee ki sāā Amasaa pool ní ina nyáń ki dɔ̄ kitiŋ ní u kpíì. Waa nìn gíti kútì-u nliliitiim.

Joowaab yāntì bi kūū Seeba

Míǹ boonee ní Joowaab nì u-nabiki Abisayi nìkī ki bíi jì Biikirii jipɔɔn Seeba boon. 11 Joowaab janjaliu ubɔ nìn kā ki kɔ́ĺ utaŋkpiil Amasaa ki lì yii: «Un kamaa bí Joowaab nì Daafiidi jandee ń páań Joowaab boon.» 12 Amasaa nìn dōoǹ ki bíntì u-fatikuu poon nsan kansikin. Ujanjalee nìn ká yii binib dòoń ki yūlifí niin. Niinee ní u fùn̄ dinikpilee ki cáa bíl̀ kusaau kubɔn, ní ki dū sata ki bīiǹ di-pu. 13 U nín ŋá mimmee ní binib kíǹ ki dòoń ki jītí kaa ti yūlifí, ki nóó Joowaab ki jì Biikirii jipɔɔn Seeba boon.

14 Joowaab nìn yìin̄ Isirayeel naakɔti timmu kɔkɔn ki tin bàn̄ Abeel-Beeti-Maaka. Beerii yab kɔkɔ nìn kpáfì ki nóó-u. 15 Joowaab nì u-janjaliibi nìn māntìi tú Abeel-Beeti-maaka tiŋki kin poon Seeba nìn bée. Bi nìn fāā ntam ki kpúkuǹ ki tin sāā digundi, ní bijanjaliibi kíĺ ki bíi gbì ki tíkití digundee nyeel dí lítí.

16 Unimpu ubɔ nìn bí kitiŋ gbanti poon ki cáá iciin ní ki téeń yii: «Pīlifìmaan, pīlifìmaan. Tùkùmaan Joowaab yii ú sútiń kí pìlīń-mi ḿ sòoǹ nì u tiba.» 17 Ní Joowaab sútìi pìl̄-u ní u bālifì-u yii: «Sii di sá Joowaabaaa?» Ní Joowaab kíí-u yii: «Iiin, an sá man.» Ní unimpuee bí-u yii: «Á pīlifì tibɔti tin man a-tɔntɔnliu làá sòoǹ nì see.» Ní Joowaab bí-u yii: «M pílifí.»

18 Ní u bí yii: «Bi lì dilìmbil diba yii: <Bàlifì isaŋki Abeel-Beeti-Maaka yab cee, a-bɔti kɔkɔ làá ŋāŋkì.> 19 Ti sá ŋgbansɔŋfi nib ní ki yú deedee Isirayeel tiŋkin. Ní sii dɔ́miń kí kúntí kitiŋ kin sá Isirayeel tiŋkpaammu kansikin kibee! Ba pu ní a nyàab̀ kí kúntí tiwan tin ti-Dindaan yèe?» 20 Ní Joowaab bí yii: «Kpataaa, maa pée cáá nlandɔkɔ kí nàan̄ àá kí kúntí tiba nì tiba! 21 Kaa sá kitiŋ ní m là kí kúntí, ama unil ubɔ ní m nyàab̀. U sá Eefiraayiim jooŋŋi pu timmu kiban, bi yíì-u Seeba, Biikirii jipɔɔn. U yíkì ki bíi jáà nì ubɔti Daafiidi. Ní nyāntímaan úǹ baba kí tīī-mi ní ḿ yàntī ni-tiŋki.» Ní unimpuee bí yii: «An ŋān̄, ti làá tìl̄ u-yil kí dūú lúkuń-si digundi boon.»

22 Unimpuee nín gítí u-yab cee ki tīī-bi isaŋkimɔnti. Ní bi tīl̀ Seeba yil ki dūu lúkuń Joowaab. Ní u búń ŋyin ní bi yāntì kitiŋee, ní báà ŋma nín kùǹ u-dumpu. Joowaab úǹ nìn nín gítí Jeerusaleem ubɔti cee.

Daafiidi kàliŋkpilib

23 Joowaab di nìn sá Isirayeel yab janjaliibi kɔkɔ kpiliu. Yooyadaa jipɔɔn Beenaya di nìn sá Keereeti nì Peeleeti yab kpiliu. 24 Adooram di nìn kpòotī ayumbutuun ŋin ŋin pɔ̄ɔ̄yee, Joosafaati jipɔɔn Ayiiluudi di nìn sá ubɔti soobaabuu. 25 Seeba di nìn sá ugbaŋŋmal. Saadooki nì Abiyataar di nìn sá bisaraaŋakpilib. 26 Daafiidi nìn gíti cáá usaraaŋal ubɔ, bi nìn yíì-u Iira, u sá Yayiir dicaŋkun.