Samiyeel Liliiti 19

Daafiidi yáliŋkì u-jipɔɔn kúm pu

1 Ŋkúmee nìn kɔ́ ubɔti tikpil. U nìn jɔ́m̀ kudii kun tɔ́kɔ́ digundi yilpuee poon ki súń. Ní u còom̄ ki tátí ki lì yii: «M-jipɔɔn Abisaloom! M-jipɔɔn, m-jipɔɔn Abisaloom, m yaa bàà fōō a-yil ki kpíì, an kaa bàà sɔ́ɔɔ? Abisaloom, m-jipɔɔn, m-jipɔɔn!»

2 Ní ubɔ cūtìi tùkū Joowaab yii: «Daafiidi bí ki sūǹ ki yáliŋkí Abisaloom pu.» 3 Ŋwiin gbantee, dijajil nìn dūu kpántì kunimbaau ki tīī bijanjaliibi kɔkɔ. Di sá bi mun nìn gbìl̄ yii ubɔti jipɔɔn kúm nìn kɔ́-u tikpil. 4 Bijanjaliibi nìn nɔ̄ntì ní ki kɔ́ kitiŋin. Bi nìn ŋá kii bijanjaliibi bin cūtì kujaau bi jáń ki pɔ́ɔkiǹ-bi bi fātìi gítìń nì icooyee ní. 5 Ubɔti nìn dū ŋŋaabu ki bīiǹ u-nimbiin ní ki tátí mpɔn yii: «M-jipɔɔn Abisaloom! Abisaloom, m-jipɔɔn, m-jipɔɔn!»

6 Niinee ní Joowaab kɔ́ ubɔti cee kudiin ki bí-u yii: «A bíi kɔ̄ntí a-janjaliibi bin fīī si nì a-jipɔmbi nì a-bisalib nì a-nimpukpilib nì a-nimpuwaamu kɔkɔ ki líí díǹ nee icoo dee. 7 Di sá yii a néeń bin ná-see, ní ki ná bin néeń-see. A dàkā díǹ yii a-janjakpilib nì binib bin kɔkɔ tíkí-see kaa sá tiba a-cee dee. Díǹ nee, m béè yii timbi di yaa bàà kpíì ní Abisaloom bí dimaŋfalin nee, an bàà ŋān̄ a-cee ní. 8 An puee cúú a-ba kí nyā kí tīī a-janjaliibi kunyannyaau nyɔɔbundi. M pūtì ti-Dindaan yii a yaa kaa ŋá míǹ, aa ti làá ká báà uniseen kunyeeu nee a-cee. Doooo a-naacimpɔntin ki dāa sāā díǹ nee, a láá pée ká nnaabu ŋubɔ kii ŋunee juti.» 9 Niinee ní ubɔti yíkì ki cūtìi kāl̀ kipunyɔkɔpu. Ní bi báakì ki tùkū bijanjaliibi kɔkɔ yii ubɔti nyáń ki kā kipunyɔkɔpu, ní bi dɔ́miń ki kpáfì u-cee.

Daafiidi bíi bɔ́ntí kí gítí Jeerusaleem

Abisaloom janjaliibi nìn sáǹ báà ŋma nín kùǹ u-dumpu. 10 Isirayeel naakɔti kɔkɔ poonee, binib nìn sòoǹ sòoǹ yii: «Ubɔti Daafiidi fīī-ti ki nyántì ti-nannanliibi ŋaan, cilinjee Fiiliistii yab ŋaan. Abisaloom puee, ní u yíkìi sáǹ. 11 Abisaloom un ti nìn lēē ki kāaǹ dibeelee kpíì kujaaun. Ti gíti kā ki cí ba kí gíiǹní ubɔti Daafiidi ní?»

12 Ubɔti Daafiidi úǹ nìn tú bí tùkù bisaraaŋaliibi Saadooki nì Abiyataar yii: «Cùú sòoǹ nì Juuda yab kpilib yii: <Ubɔti nyí Isirayeel yab landɔkɔŋu. Ní nīn sá bipeekaabi kí gíiǹní ubɔti u-dumpu. 13 Nimbi di sá ubɔti nabiyaamu kiŋkiŋ ki sá fatikubaanti. Ní nīn sá bipeekaabi kí gíiǹní ubɔti u-dumpu.> 14 Ní tùkù Amasaa yii: <Sii di kaa sá man nabiki kiŋkiŋaaa? Unimbɔti ń dáaĺ m-tafal kí gíti dáaĺ m-tafal m yaa kaa yāntì a kpántì ujanjakpil ki fōō Joowaab yil.» 15 Daafiidi nìn ŋúń ki fātìi gíiǹní Juuda yab kɔkɔ landɔkɔŋu u-pu. Bi nìn ŋá kinyɔɔbaantii kí cùú tùkù ubɔti yii: «Gítiń ti-cee, sii nì a-yab kɔkɔ.» 16 Niinee ubɔti yíkìi kíĺ nsan ki nín gítí, ki tin bàn̄ Jɔɔdan buŋgbandi.

Daafiidi dū Simeeyii bɔkpil ki pú-u

Juuda yab kɔkɔ cūtì Giilgaal kí tūŋkì ubɔti kí cáá-u kí dùtī Jɔɔdan buŋŋu. 17 Geeraar un sá Beenjameen naakookun ki kóò Bawuriim tiŋkinee jipɔɔn Simeeyii mun nìn ŋá malaa u nì Juuda yab sīntì kí cùú tūŋkì ubɔti Daafiidi. 18 U nì Beenjameen naakookun yab binib kutuku di nìn nóó. Siiba un sá Saayuul tɔntɔnliuee nì u-jipɔmbi saalku, nì u-tɔntɔnliibi mmuŋku nìn kútì bi-pu. Bi nìn bíi ŋáań malaa malaa kí bà Jɔɔdan buŋŋu kí tūŋkì ubɔti. Bi máaǹ kí nīn bí niin 19 kí ká buŋalimbu bun làá yòon̄ ubɔti nì u-dicaŋku kí dùtēe, ní kí ŋá min u lèe.

Simeeyii nìn dɔ́miń ki lítì ubɔti nimbiin ŋyunti ŋun u nìn bíi bɔ́ntí kí dùtēe. 20 U nìn bí-u yii: «Ti-baa ubɔti, taa dū m-yìntitam kí ŋá tibɔti! Á taa téetí ikpiti in man a-tɔntɔnliu nìn ŋá-si ŋwiin ŋun a nìn nyēē Jeerusaleemee pu! Ubɔti, á taa pée díkí m-pu. 21 Ti-baa, man m-ba béè yii m ŋá-si ikpiti. Ama díǹ nee, sii a-ba ká yii m sá unipeekaa Jooseefi naakookun ki dɔ́miń ki túŋkì-si.»

22 Abisayi un na bi yíì Seeruyee fōō dinyɔɔbundi ki lī yii: «Simeeyii tɔ́ un ti-Dindaan lēē ki kāaǹ dibeelee mbusu. Tibɔti tin u ŋá nee kaa máaǹ bí kpɔ̀-uaaa?» 23 Ama ní Daafiidi bí yii: «Seeruya jipɔmbi, ni nyàab̀-mi nì tilati ní? Ba pu ní ni ŋáań díǹ kii man nì ni kpákà tiba puee? Díǹ wiiŋŋu nee, ti máaǹ kí kpɔ̀ unil Isirayeel tiŋkinaaa? M cáá dimákal díǹ wiiŋŋu nee yii man di sá Isirayeel bɔtiu.» 24 Ní ubɔti bí Simeeyii yii: «M pūtì yii aa làá kpú.»

Meefiibooseeti nì ubɔti Daafiidi gbìlīǹ tɔb

25 Saayuul naantiiu Meefiibooseeti mun nìn cūtìi túŋkì ubɔti Daafiidi. Kí yòon̄ daliŋkin ubɔti nyáń Jeerusaleem ki dāa sāā ŋwiin ŋun u fātìi gítìń nì ŋgbansɔŋfee, Meefiibooseeti kaa fíntì u-taaŋi, kaa kōol̀ u-nyimpul, kaa fíntì u-wampeeŋkaati mun. 26 U nín bàn̄ ubɔti nimbiinee ní ubɔti bālifì-u yii: «Ba ŋá ní aa nìn nóó-mi ti yíkì ní?» 27 Ní u kíí ubɔti yii: «Ti-baa ubɔti, m-tɔntɔnliu di kíil̀-mi. Di sá m nìn lī m-neen yii: <M nín kaa ŋūǹ kí còom̀ee, m làá dū digakal kí páań m-mansaliiki pu kí kàl̄ kí nīn nóó ubɔti.> 28 Ama ní m-tɔntɔnliu cūtì a-cee ki kúŋfì m-boon. Nì míǹ kɔkɔee, ti-baa ubɔti sá kii Unimbɔti tuuŋŋuee ní. Ŋá min ŋān̄ a-ceeyee. 29 Di sá yii m-naanja Saayuul dicaŋkun yab di bàà kā ki cí kun sii ti-baa ubɔti ceeyee di sá ŋkúm. Ama nì míǹ kɔkɔee a fōō-mi m bí bin jīǹ a-sambilinee kansikin. M gíti cáá nsan kí mèè-si tibaaa? Aayee, maa ti ŋūǹ kí mèè-si tiba.» 30 Ní ubɔti bí-u yii: «A sòon̄ tikpil! M lēē yii sii nì Siiba ń yàkatī Saayuul kpaatanti.» 31 Ní Meefiibooseeti bí yii: «Siiba ŋūǹ kí yòon̄ tikpaatan kɔkɔ! Tin páb́ee di sá ubɔti nín fātìi gítìń u-dumpu nì ŋgbansɔŋfee.»

Daafiidi pàn̄ Barsilayii tipaal

32 Barsilayii ugalaadija mun nìn yíkìń Roogeeliim tiŋki ki dɔ́miń Jɔɔdan buŋgbandi. U nìn céeǹ ubɔti bi dūtì mbun ki dóò ní u kāaǹ-u. 33 Barsilayii nìn sá unil un púĺ tikpilee. U nìn cáá abin imuŋku inaa. Úǹ di nìn ŋúb́ ubɔti Daafiidi ŋyunti ŋun u nìn bí Maanayiim tiŋkinee, di sá yii u nìn sá ugaaja. 34 Ubɔti bí-u yii: «Barsilayii, nóó-mi tí cù Jeerusaleem m-cee, m làá kpèè-si.» 35 Ní u bí ubɔti yii: «M-wiiŋyi gíti kíǹ iŋa ní ḿ nóó sii ubɔti tí cù Jeerusaleem? 36 M cáá abin imuŋku inaa dee. Maa ti ŋūǹ kí gàntī tin ŋān̄ee nì tin kaa ŋān̄ee. Man a-tɔntɔnliu limbil tīlifì maa ti gbìl̀ tin m jīǹee nì tin m nyùee mɔŋŋu, kaa tí gbìl̀ bilaŋgaaliibi bininjab nì binimpoobi neeŋyi pu. Ba pu ní ḿ cù kí tin kpántí digìńdi kí tīī sii ti-baa ubɔti? 37 Tin m ŋūǹ kí ŋée di sá ḿ pée céeǹ-si tí dùtī Jɔɔdan buŋŋu. Ba ní m ŋá gba ní sii ubɔti làá pà-mi tipaal ní? 38 Yàntī man a-tɔntɔnliu ń gítí m-tiŋkin. Niin ní m làá kpú kí nīn pìlīǹ m-baa nì m-na kaakul. Ama kpèè m-jipɔɔn Kimaam sèé. Úǹ ŋūǹ kí céeǹ-si. A ŋūǹ kí ŋá min fáatì a-pɔbilee kí tīī-u.» 39 Ní ubɔti bí-u yii: «An ŋān̄, Kimaam ń céeǹ-mi. Min a lèe, míǹ ní m làá ŋá kí tīī-u. Tin kɔkɔ a yaa là ní ki mēē-mee, m làá tīī-si kudɔŋu.»

40 Binib kɔkɔ nìn dūtì Jɔɔdan, ní ubɔti u-ba mun dūtì. Ubɔti nìn cūtìi kpàl̄ Barsilayii, ní ki mēē ki bīiǹ u-pu, ní u fātìi nín gítí u-dumpu. 41 Ní ubɔti nìkī u-saŋŋu ki nín cá Giilgaal ní Kimaam nóó-u.

Juuda yab nì Isirayeel yab jaaku

Juuda yab kɔkɔ nì Isirayeel yab dijandi nìn céeǹ ubɔti ki cáá-u ki dūtì mbun. 42 Niinee Isirayeel yab dɔ́miń ki ká ubɔti ki bālifì-u yii: «Ba pu ní ti-nabiyaamu Juuda yab dɔ́miń ki yōoǹ si nì a-dicaŋku yab ki cáa dūtì Jɔɔdan buŋŋu, ama ní a-janjaliibi bí a-cee?» 43 Ní Juuda yab kɔkɔ kíí-bi yii: «Kun pu ti ŋá mimmee di sá yii timbi nì ubɔti di pēē. Ba pu ní an bɔti kɔ́ǹ-ni diŋuul ní? Ba ní ubɔti tīī-ti ti jíń ní? Ba ní u pú-ti?» 44 Niinee ní Isirayeel yab kíí Juuda yab yii: «Timbi yì ubɔti saalaa pu ki jítiǹ-ni! Tiŋman, ti yì Daafiidi ki jítiǹ-ni! Ba pu ní ni kpēē-ti fám míǹ? Timbi di sá bipeekaabi ki sòon̄ yii tí fàtīí gíiǹní ti-bɔtiu!» Ama Juuda yab bíǹ nìn gíti sòon̄ an pɔ̄ɔ̄ ki jítiǹ Isirayeel yab.