Bibɔtiibi Gbɔmpeepeekaaku 2

Daafiidi bɔjoolkaati tin u dūu kpáafì Saloomɔŋyee

1 Daafiidi nín tóob́ ŋkúmee ní u kpáafì u-jipɔɔn Saloomɔn tibɔti nee yii: 2 «M làá dòon̄ m-ŋaliŋu pu dee, á pɔ́ɔǹ a-ba kí ká kunyannyaau. 3 Nín̄ ŋúb́ tin ti-Dindaan a-Nimbɔtiu yāntì bi ŋmàn̄ ki yóoǹee. Nín̄ pée ŋáań min u lèe, kí nīn ŋúb́ u-bɔkpaaŋi nì u-marab nì u-koobiliŋ nì u-dàkatam, kii an nín ŋmàn̄ ki kā Mooyiisi Marau poon puee. A yaa ŋá míǹ, án làá bútí-si a-tuuŋŋi kɔkɔ nì tin kɔkɔ a bɔ́ntì kí ŋée poon. 4 Niinee, ti-Dindaan làá ŋá kii u nín nìn pōoǹ-mi ki lī puee yii: <A-naantiibi yaa ŋáań min m lèe, ki yaa nóó-mi ibaamɔn poon nì bi-pɔbiliŋ kɔkɔ nì bi-naŋki kɔkɔee, a-kpátam boonee, a-naantiibi kansikin ubɔ làá nīn pée sá ubɔti ní Isirayeel tiŋkin.> 5 Tiba mun gíti sɔ̀. A téetí Seeruya jipɔɔn Joowaab nín nìn ŋá-mi tikpitil tiŋyee kɔkɔɔ! Úǹ di nìn kūū Neer jipɔɔn Abineer nì Yeeteer jipɔɔn Amasaa, Isirayeel janjakpilib bilee. U nìn kūū-bi ŋgbansɔŋfi yuntiŋu, a lì kii kujaau poonee, ní ki làá túń bi-kúm kpuulool^a. 6 Míǹ puee, dàkà iciin kí taa yàntī ú púĺ kí nīn sìntī ditaŋkpiilin nì ŋgbansɔŋfi. 7 Ama á dàkà ugiilaadija Baarsilaayi jipɔmbi kulaŋŋaŋfitiiu bí nīn bí a nì bin kpáfí ki jīǹ disambibaantiilee kansikin. Di sá yii bi nìn ŋá-mi tiŋan ŋyunti ŋun ní a-maan Abisaloom nìn jì-mi m bíi sáń-uee^b. 8 Kí kúntée, á taa súntí Geera jipɔɔn Simeeyii un sá Beenjameen naantiu ubɔ ki kóò Bawuriim tiŋkinee pu. Ŋwiin ŋun m nìn sáń ki cá Mayanayiim tiŋkinee, u nìn tɔ́-mi mbusu an kaa cáá bí lì. Ama m nín gítińee, u nìn sīntì Jɔɔdan buŋgbandi ki túŋkìń-mi, ní m nìn pūtì ti-Dindaan ki pōoǹ-u yii maa làá kpɔ̀-u^c. 9 Ama kɔŋkɔnnee á taa yàntī ú nīn bí kii u sá maanyiibee. Di sá yii a sá uciŋfiti, míǹ puee a nyí a nín làá ŋá-u puee. Á kpɔ̀-u ú kpáaǹ u-yikpipinti kí sìntī ditaŋkpiilin.»

Daafiidi kpíì, Saloomɔn fōō u-yil

(Kpèè 1 Kroo 29.26-28)

10 Daafiidi dáaĺ u-ba ki sīntèe ní bi síb́-u Daafiidi Tiŋkin, Jeerusaleem. 11 U nìn kāl̀ dibeel Isirayeel tiŋki pu abin imuŋku ili ní. U nìn kāl̀ abin aluli Eebrɔn tiŋkin, ní ki kāl̀ abin mmuŋku nì saalaa nì ata Jeerusaleem^d. 12 Niinee ní Saloomɔn kāl̀ u-baa Daafiidi beejal pu, ní u-beel báaǹ inyaan tiŋan.

Saloomɔn yāntì bi kūū Adooniyasi

13 Dalbee ní Agiiti jipɔɔn Adooniyasi cūtìi ká Saloomɔn na Baatiseeba. Baatiseeba ká u dòońee ní u bālifì-u yii: «An mɔ̄ deeee?» Ní úǹ kíí-u yii: «Iiin, an mɔ̄!» 14 Ní ki gíti kútì yii: «M cáá tiba kí tùkù-si ní.» Ní Baatiseeba bí-u yii: «Sòoǹ tin a cááyee!» 15 Ní u kíĺ ki bíi sòoǹ yii: «Kii a nín nyí puee, man di bàà baasii yì dibeel, ní Isirayeel yab kɔkɔ nìn kíǹ ki kā ki cí yii man nín kpántí ubɔti. Ama ní dibeel ŋmábitì m-ŋalin ní m-naal fōō, di sá yii ti-Dindaan di là yii úǹ ní kpántí ubɔti. 16 Kɔŋkɔnnee, m cáá kuwambambaantiiu ní kí mèè-si. M gbàam̄-si, á taa yííyee.» Ní Baatiseeba bí-u yii: «Nín̄ sòoǹ!» 17 Ní Adooniyasi nìkī ki bí yii: «M gbàam̄-si, tùkù ubɔti Saloomɔn ú dū kisuneembiki Abiisaagi kí tīī-mi ḿ cáá. Kéè waa làá yííyeeee!» 18 Ní Baatiseeba kíí-u yii: «An ŋān̄, m làá cùú sòoǹ nì ubɔti an bɔti kí tīī-si.»

19 Niinee ní Baatiseeba nín cá ubɔti Saloomɔn cee kí sòoǹ nì u tin Adooniyasi cáań ki tùkū-uee. Ubɔti nín ká-uee ní u yíkì u-beejal pu ki nín túŋkí-u ní ki gbāaǹ u-nimbiin. U ŋá míǹ ki dóòyee ní ki gítì ki kāl̀ u-beejal pu ní ki nyàab̄ diba mun ki síiǹ u-ŋaŋgiil pú ní u-na mun kāl̀ díǹ pu. 20 Ní Baatiseeba bí-u yii: «M cáá tiba fiii ní ki là kí mèè-si, á taa yííyeeee.» Ní ubɔti kíí-u yii: «M-na, mèè kun ní a yaa lèe, m làá ŋá kí tīī-si.» 21 Ní Baatiseeba bí yii: «Mimmee baa ŋūǹ kí dū kisuneembiki Abiisaagi kí tīī a-maan Adooniyasi ú cááaaa?» 22 Ní ubɔti Saloomɔn kíí u-na yii: «Ba pu ní a bàlifī bí dū kisuneembiki Abiisaagi ŋmaniŋma kí tīī Adooniyasi? Bàlifì bí dū dibeel mun kí tīī-uaa, kun puee u sá m-maan ní! Bàlifì bí dū-dì kí tīī u nì u-naacimbi usaraaŋakpil Abiyataar nì ujanjakpil Joowaab, Seeruya jipɔɔn^e!»

23 Ní ubɔti Saloomɔn pūtì ti-Dindaan ki lī yii: «Unimbɔti ń dáaĺ m-tafal kí gíti kūtì m yaa kaa yāntì Adooniyasi dū u-maŋfal ki pàn̄ tin u sòon̄ee pɔndi! 24 Nì ti-Dindaan un bí dimaŋfalin ki yāntì m kāl̀ m-baa Daafiidi beejal pu, ní ki pōoǹ-mi yii dibeel làá nīn sá ki tīī man nì m-naantiibee yindi puee, m pūtì yii díǹ díǹ ní Adooniyasi làá kpú.» 25 Niinee ní ubɔti Saloomɔn tú Yeewooyadaa jipɔɔn Beenayawuu, ní úǹ cūtìi kūū Adooniyasi.

Saloomɔn jìn̄ Abiyataar Jeerusaleem tiŋkin

26 Ní ubɔti bí usaraaŋakpil Abiyataar yii: «Nín̄ cá Anatooti tiŋkin, a-kpaatantin, di sá yii a máaǹ ŋkúm. Ama maa làá kpɔ̀-si díǹ, kun puee a túǹ ti-Dindaan Unimbɔti dakaau m-baa Daafiidi yuntiŋu, ní a nì m-baa kpáfì ki jíń falaa^f.» 27 Saloomɔn lēē Abiyataar ú taa ti nín̄ sá ti-Dindaan saraaŋakpiliu. Mimmee u ŋá kii ti-Dindaan nín nìn sòon̄ tin usaraaŋakpil Eelii dicaŋku pu Siilooyee dee^g.

Saloomɔn yāntì bi kūū Joowaab

28 Ŋyunti ŋun ní Joowaab gbìl̄ tin jítèe ní u sáǹ ki cūtìi kɔ́ ti-Dindaan tantiun ki cúú nsaraafan yiŋyi. Di sá yii Joowaab nìn kíí ki kútì Adooniyasi pu, ama waa nìn páaǹ Abisaloom boon. 29 Ní bi dɔ́miń ki tùkū ubɔti Saloomɔn yii: «Joowaab sáǹ ki cūtìi kɔ́ ti-Dindaan tantiun ki bí nsaraafan caŋin.» Niinee ní Saloomɔn tú Yeewooyadaa jipɔɔn Beenayawuu ú cùú kpɔ̀-u. 30 Beenayawuu kɔ́ ti-Dindaan tantiu poonee ní ki bí Joowaab yii: «Ubɔti bí yii á nyānní niin.» Ama ní Joowaab kíí yii: «Kpáb, doo ní m làá kpú.»

Ní Beenayawuu nín gítí ubɔti cee ki dū Joowaab nín kíí-u puee ki tùkū-u. 31 Ní ubɔti bí-u yii: «An yaa sée kpɔ̀-u niin, kí síb́-u. An yaa ŋá mimmee man nì m-baa dicaŋku nyáń maanyiibab bili bin Joowaab nìn kūūyee kpuuloolin dee. 32 Tiŋman, Isirayeel janjakpiliu, Neer jipɔɔn Abineer nì Juuda janjakpiliu, Yeeteer jipɔɔn Amasaa nìn sá deedeedambi ki jítiǹ Joowaab. Ama u nìn kūū-bi m-baa kaa kpáàa nyí. Ti-Dindaan ń yàntī u-nikpaakooŋu gbanti kpuulool ń gítí u-pu. 33 Bi-fatikuu ń gítí Joowaab nì u-naantiibi pu kí nīn cá jaanjaan. Ama ti-Dindaan ń yàntī Daafiidi nì u-naantiibi nì u-dicaŋku nì u-beel ń nīn bí mmɔnni kí nīn cá jaanjaan.» 34 Niinee ní Yeewooyadaa jipɔɔn Beenayawuu nín gítí Joowaab cee ki kūū-u. Bi nìn síb́ Joowaab u-dumpu kuteeun ní. 35 Ubɔti nìn dū Yeewooyadaa jipɔɔn Beenayawuu ki téeǹ u-yil u kpántì ujanjakpil, ní ki yāntì usaraaŋakpil Sadooki fōō Abiyataar yil.

36 Ubɔti nìn yāntì bi yíiń Simeeyii ní u bí-u yii: «Mā a-diiku Jeerusaleem tiŋkin doo kí nīn kóò. Aa cáá nsan kí nyā kí cù laaba. 37 Di sá yii ŋwiin ŋun ní a yaa nyáń ní a-taal lákatì Seedrɔn bùmbiki puee, á béé yii a làá pée kpú ní, ní a-fatikuu kpuulool ń gítí a-pu.» 38 Ní Simeeyii bí ubɔti yii: «Ti-baa ubɔti, a nín lī puee ŋān̄ tikpil. A nín bí yii man a-tɔntɔnliu ń ŋá puee, míǹ ní m làá ŋá.»

Simeeyii nìn kāl̀ Jeerusaleem ki yúntì. 39 Ama abin ata boonee ní Simeeyii yumbui ili sáǹ ki nín cá Gaati bɔtiu, Maaka jipɔɔn Akiisi cee, ní bi dɔ́miń ki tùkū Simeeyii yii: «A-yumbui bí Gaati tiŋkin^h.» 40 Ní Simeeyii yíkì ki kpàl̄ u-maŋki ki nín cá Akiisi cee Gaati tiŋkin kí nyàabìń u-yumbui. Simeeyii nìn pée cūtì Gaati tiŋkin ki gíiǹní u-yumbui ní. 41 Ní bi tùkū Saloomɔn yii Simeeyii nyáń Jeerusaleem ki cūtì Gaati tiŋkin ki fātìi gítìń. 42 Niinee ní ubɔti yāntì bi yíiń Simeeyii ní u bí-u yii: «M nìn yāntì a pūtì ti-Dindaan nimbiin yii aa làá nyā kitiŋee ni ní man m-ba kpáafì-si yii: <Ŋwiin ŋun a yaa nyáń kitiŋ nee ni ki cūtì laabee, a làá kpɔ́ɔ>! Kéè a nìn kíí-mi yii tin m sòon̄ee ŋān̄aa! 43 Kin ba pu ní aa tɔ́ dipoondi din a nìn pōoǹ ti-Dindaan nimbiinee nì mara un m nìn tīī-see?» 44 Ní ubɔti gíti bí Simeeyii yii: «Sii a-ba nyí tiŋan tikpitil tin ní a ŋá m-baa Daafiidee. Too, ti-Dindaan làá yàntī a-toonam ń gítí a-pu. 45 Ama man ubɔti Saloomɔn, ti-Dindaan làá bìin̄ m-pu, ní kí tīī Daafiidi beel mpɔn kí nīn cá jaanjaanⁱ.» 46 Niinee ní ubɔti pú Yeewooyadaa jipɔɔn Beenayawuu kinyɔkɔ ú nyāntí Simeeyii ní úǹ nyántì-u ki kūū-u.

Min ní Saloomɔn nìn ŋá ki mɔ̄tìi ká mpɔn u-beel báaǹ inyaanee dee.