Bibɔtiibi Gbɔmpeepeekaaku 3

Saloomɔn cáá Faaroo bisal ubɔ

1 Saloomɔn nìn kpántì Eejipiti bɔtiu Faaroo coo. U nìn cáá Faaroo bisal ní ki cáań-u ki kāaǹ Daafiidi Tiŋkin ki cáá sāā ŋyunti ŋun u dāa máń úǹ u-ba diiku nì ti-Dindaan diiku nì digundi ki māntìi tú Jeerusaleem tiŋki ki dóòyee.

2 Ama kí cáá sāā ŋyunti gbantee, binib nìn dáá gbíntìi ŋáań saraabi ŋgbantamu pu awaa saraafaŋyi pu ní, di sá yii baa nìn dá láá máń ti-Dindaan kudii. 3 Saloomɔn nìn néeń ti-Dindaan ní ki nìn ŋáań min u-baa Daafiidi nìn kpáafì-uee. Ama ŋgbantamu pu awaa saraafaŋyi pu ní u mun nìn kù tiwaŋkuti ki ŋáań saraabi ní ki tùutī talaalub.

Saloomɔn mēē Unimbɔti ú tīī-u iciin

(Kpèè 2 Kroo 1.2-13)

4 Dalbee ubɔti nìn cūtì Gabawɔn kí ŋá saraabi niin, di sá yii niin ní nsaraafan ŋkpaan nìn bí. Saloomɔn nìn kūū tiwaŋkuti kutuku ní ki ŋá saraawɔkaa nsaraafan gbanti pu. 5 U bí Gabawɔn niin kunyeeuee ní ti-Dindaan lēē u-ba ki dàkā-u ní ki bí-u yii: «Bàlifì kun ní a là ḿ tīī-see.» 6 Ní Saloomɔn kíí yii: «A dàkā a-tɔntɔnliu m-baa Daafiidi kulaŋŋaŋfitiiu tikpil, kun puee u nìn nóó-si nì ibaamɔn nì deedee ní u-pɔbil nìn bí diba nì si. A gíti dàkā-u a-laŋŋaŋfitiiku ki tīī-u jipɔɔn u kpántì díǹ pu nee ubɔti. 7 Too kɔŋkɔnnee, ti-Dindaan m-Nimbɔtiu, sii di yāntì man a-tɔntɔnliu fōō m-baa Daafiidi yil ki kpántì ubɔti. Ma mun di dá láá sá campɔnti kaa nyí dibeel bɔti tibee. 8 Man a-tɔntɔnliu bí a-nibul din a lēēyee nib kansikin kí nīn kpòotī-bi. Dinibul gbanti nib wīikí tikpil áli baa kpáàa ŋūǹ kí kàaǹ-bi. 9 Míǹ puee tīī man a-tɔntɔnliu dinyil ḿ dūú kpòotī a-nibul, kí ŋmā kí béé kí gàntī tin ŋān̄ee nì tin kaa ŋān̄ee. Di sá yii ŋma di ŋūǹ kí gāā u-bindi kí lì yii u ŋūǹ kí kpòotī a-nibul dikpaandi nee?»

10 Tin Saloomɔn nìn mēē gbantee nìn fáatiǹ ti-Dindaan. 11 Niinee ní Unimbɔti bí-u yii: «Aa mēē yii ḿ tīī-si mmaŋfafɔkɔn, àá tigaajati, àá ḿ nàan̄ a-nannanliibi. Ama ní ki mēē yii ḿ tīī-si dinyil á ŋmā kí dūú kpòotī m-nibul nì ibaamɔn. A nín mēē mimmee puee, 12 kpèè m làá ŋá míǹ kí tīī-si. Dinyil nì iciin in m làá tīī-see, ubɔ kitiŋ nee pu kaa láá pée ká míǹ ki ká, ní ubɔ mun kitiŋ nee pu gíti kpá kí ká míǹ. 13 M làá tīī-si gba tin ní aa mēēyee, m làá tīī-si tigaajati nì tinyool a-maŋfal wiiŋyi kɔkɔ poon. Báà ubɔti ubɔ juti kaa làá nīn sá-si. 14 A yaa ŋáań min m lèe, ki yaa tɔ́ m-bɔkpaaŋi nì m-marab kii a-baa Daafiidee, m làá gbéeǹ a-maŋfal wiiŋyi pu.»

15 Saloomɔn fīntèe ní ká yii an sá kudamintiiu. Míǹ boonee ní u nín kùǹ u-dumpu Jeerusaleem ní ki cūtìi yúl̀ ti-Dindaan Dakaau nimbiin. U nìn ŋá bisaraawɔkaabi nì mpèé saraabi, ní ki ŋá jiŋaal ki yíiń u-tɔntɔnliibi kɔkɔ bi jíń.

Saloomɔn sòon̄ tibɔti nì iciin

16 Dalbee nnimpulaakpaamu muli mubɔ dɔ́miń ubɔti Saloomɔn cee. 17 Bi-kansikin ubɔ bí yii: «Ti-baa, m gbàam̄-si ní. Man nì unimpu nee di kóò kudibaantiiun. M màl̄ kibiki kudii gbantinee, u mun nìn bí niin. 18 M màl̄ míǹ iwiin ita boonee ní unimpu nee mun dūu màl̄. Ti nìn bí dicilpu ní kudii gbantin. Báà ubɔ kaa nìn dɔ́miń ki kútì ti-pu, ti-liitil ŋmaniŋma di pée bí kudiiyee poon. 19 Kunyeeuee ní unimpu nee biki kpíì, kun puee u nyīkiǹ ki-pu. 20 Ní u yíkì kunyataasiiu ki yōoǹ m-biki m-cee ŋyunti ŋun man a-tɔntɔnliu dɔ̄ ki gèeǹee. U yōoǹ m-bikee ní ki dū-kì kí bíl̀ ki kɔ́ĺ u-ba, ní ki dū u-yaka kin kpíìyee ki bíl̀ ki kɔ́ĺ-mi. 21 M fīntì kutaafaau kí tīī m-biki dibiilee, m ká yii kì kpíì. Kutaa wúntì ki dóò m kpēē-kì tiŋanee ní ki ká yii an kaa sá m-biki.»

22 Unimpuliliitee nìn bí yii: «An kaa sá mbaamɔn! Man biki di bí dimaŋfalin, kin kpíìyee, a-yaka dee.» Ama ní unimpupeepeekaayee bí yii: «Aayee! Sii biki di kpíì, man yaka di bí dimaŋfalin.» Bi nín nìn sí ubɔti nimbiin ki sòoǹ puee dee. 23 Niinee ní ubɔti bí yii: «Unee ń bí yii: <Kibiki kin bí dimaŋfalinee, man biki dee, sii yaka di kpíì>, ní un kíǹee ń bí yii: <Aayee! Sii biki di kpíì, man yaka di bí dimaŋfalin!> 24 An yaa sée, ní cáaḿmaan-mi kitàataajiki.» Ní bi cūtìi cáań-u kitàataajiki. 25 Ní ubɔti bí yii: «Pùtīmaan kibiki kin bí dimaŋfalinee mili, kí dū dijandi kí tīī ubɔ kí dū dijandi din kíǹee kí tīī un kíǹee.»

26 Ama unimpu un biki bí dimaŋfalinee bí ubɔti yii: «Ti-baa, m gbàam̄-si, dū kibiki kin bí dimaŋfalinee kí tīī unimpu nee, ní taa kpɔ̀-kì!» Di sá yii dineendi din unimpuee nìn cáá u-biki puee nìn fòol̄ u-ni lìblib kii ŋŋmee ní. Ama ní unimpu un kíǹee bí yii: «Ní taa dū-kì kí tīī ti-kansikin báà ubɔ. Ní pùtī-kì mili!» 27 Niinee ní ubɔti bí yii: «Ní taa kpɔ̀ kibikee. Dūmaan-kì kí tīī unimpupeekaayee, di sá yii úǹ di sá kibikee na!»

28 Isirayeel yab kɔkɔ nìn gbìl̄ ubɔti nín sòon̄ tibɔti gbanti puee, ní bi kíǹ ki tɔ́-u tikpil. Bi nìn ká yii Unimbɔti ciiŋyi bí u-ni ú nīn cáa sòoǹ tibɔti.