Bibɔtiibi Gbɔmpeepeekaaku 12

Siikeem kooŋyi

(Kpèè 2 Kroo 10.1-15)

1 Rooboowaam nìn cūtì Siikeem, di sá yii niin ní Isirayeel yab kɔkɔ nìn kóoǹ ki kpáfì kí kàan̄-u dibeel. 2 Neebaati jipɔɔn Jeerooboowaam nìn dáá gbíntìi bíń Eejipiti tiŋkin, laakin u nìn sáǹ ubɔti Saloomɔn ki cūtìi kāl̀ee. U nín gbìl̄ Siikeem kooŋyi gbanti puee ní u gbíntì Eejipiti niin. 3 Ama ní bi tú binib bi cūtìi yíiń-u. U bāańee ní u nì Isirayeel beel samaau kɔkɔ bí Rooboowaam yii: 4 «A-baa nìn túǹ-ti ditúndi din nyìm̀ee. Siiyee, ti là yii á bàtī-ti ditumpɔɔl din a-baa nìn yāntì ti túńee nì diwaŋgul din u nìn dūu nyīkiǹ ti-puee. A yaa ŋá míǹ ti kíí kí nīn sá a-tɔntɔnliibi.» 5 Ní u kíí-bi yii: «Nín̄ cámaan, iwiin ita dalee ní fàtīí gítiń.»

U lī mimmee ní samaa nín cá. 6 Niinee ní Rooboowaam bālifì bitindaŋkpilib bin nìn bí u-baa Saloomɔn tundin ŋyunti ŋun u nìn dáá bí dimaŋfalinee yii: «Ni sáŋkí-mi ḿ kíí binib nee yii ba?» 7 Ní bikpilibee bí-u yii: «Díǹ nee, a yaa kíí kí nīn sá binib nee tɔntɔnliu ní ki kíí-bi kinyɔɔmɔɔyee, bi làá nīn sá a-tɔntɔnliibi kí nīn cá jaanjaan.» 8 Ama ní Rooboowaam kaa dū bikpilibee saŋkii ki túń ditundi, ní ki yíiń binipɔmbi u nì bin jíń tinaacimpɔn dicilpu bi bí u-tundinee. 9 U nìn bí bíǹ yii: «Nimbi fáà, ni sáŋkí-mi yii ba? Ḿ kíí binib bin bíi bàlifī-mi ḿ bàtī diwaŋgul din m-baa nìn dūu túǹ-bee nyiŋfiŋu pu yii ba?» 10 Ní binipɔmbi u nì bin kpáfìi jíń tinaacimpɔnee kíí-u yii: «Kpèè a nín làá kíí binib bin dɔ́miń ki bí-si yii: <A-baa nìn túǹ-ti diwaŋgul din nyìm̀ee, siiyee bàtī di-nyiŋfiŋu pu kí tīī-ti> puee sɔ̀: <M-ŋambikpakpalii gbìfiǹ m-baa ŋal. 11 M-baa yaa nìn túǹ-ni diwaŋgul din nyìm̀ee, man làá gíti kūtì diwaŋgul gbanti nyiŋfiŋu pu. M-baa nìn dū anaalab ní ki dáaĺ ni-tafal, mamee, m làá dū anaalab ŋin cáá agatee ní kí dáaĺ ni-tafal.>»

12 Ŋwintataati dalee Jeerooboowaam nì samaa dɔ́miń ki ká Rooboowaam kii úǹ u-ba nín nìn lī puee yii: «Fàtīí gítiḿmaan ŋwintataati dal kí ká-mee.» 13 Bikpilib nín nìn sáŋkì u-bɔti puee, waa dūu túń ditundi, ní ki sòon̄ nì samaa an pɔ̄ɔ̄. 14 Binipɔmbee nín nìn sáŋkì-u puee, míǹ ní u dūu sòon̄ nì binibee. U bí-bi yii: «M-baa yaa nìn túǹ-ni diwaŋgul din nyìm̀ee, man làá gíti kūtì diwaŋgul gbanti nyiŋfiŋu pu. M-baa nìn dū anaalab ní ki dáaĺ ni-tafal, mamee, m làá dū anaalab ŋin cáá agatee ní kí dáaĺ ni-tafal.» 15 Ubɔti kaa nìn pílifiǹ binibee, kun puee ti-Dindaan di nìn bɔ́ntì míǹ kí ŋmā kí ŋá kii u nín nìn dī u-bɔnaatiliu usiilooja Ayiiya pu ki pōoǹ Neebaati jipɔɔn Jeerooboowaam puee ní^a.

Isirayeel beel cúu yākatì

(Kpèè 2 Kroo 10.16-11.4)

16 Isirayeel yab nín ká yii ubɔti kaa bíi pílifiíǹ-bee ní bi bí-u yii:

«Ti nì Daafiidi cáá tilati?

Ti nì Jeesee jipɔɔn kaa cáá mpèé ŋubɔ!

Isirayeel yab, tí nīn gítímaan ti-tantibin!

Kɔŋkɔnnee sii Daafiidi, nín̄ jīǹ a-dicaŋku pu dibeel^b!»

Bi lī mimmee ní báà ŋma nín gítí u-tantiun. 17 Ama Isirayeel yab bin nìn kóò Juuda tiŋkinee baba pu ní Rooboowaam nìn nìkī ki jíń dibeel. 18 Nì míǹ kɔkɔee ubɔti Rooboowaam nìn dū Adooram un kpèé diwɔ́bil tuuŋŋee ki tú Isirayeel yab cee, ama ní bíǹ yáŋkì-u ataŋkpee ki kūū. Niinee ní ubɔti Rooboowaam ŋá malaa ki jɔ́m̀ u-tɔrɔkuu poon ki sáǹ ki nín cá Jeerusaleem. 19 Kí yòon̄ ŋwiin gbanti ní Isirayeel yab bin kóò ŋgan pú beelinee kíĺ ki jáà nì Daafiidi dicaŋku bɔtiibi. Kujaau gbanti bí ki dāa sāā díǹ.

20 Ŋyunti ŋun Isirayeel yab bin kɔkɔ kóò ŋgan pú beelinee gbìl̄ yii Jeerooboowaam fātìi gítìńee, ní bi kóoǹ samaa kɔkɔ ki kpáfì ní ki tú ki yíiń-u ní ki dū-u ki kāaǹ bi-pu ubɔti. Juuda naakooku baba yab di nìn pée síl̀ nì Daafiidi dicaŋku deedee.

21 Ŋyunti ŋun Rooboowaam bàn̄ Jeerusaleemee ní u kóoǹ Juuda nì Beenjameen naakɔti janjaliibi bimɔmmɔntiibi kutukub imuŋku ili nì saalaa ki kpáfì kí cùú já nì Isirayeel yab, án nín làá ŋá pu úǹ Saloomɔn jipɔɔn ń fàtīí fōō dibeelee. 22 Ama ní Unimbɔti bí u-bɔnaatiliu Seemaya yii: 23 «Tùkù Juuda bɔtiu Rooboowaam, Saloomɔn jipɔɔn nì Juuda nì Beenjameen naakɔtin yab nì samaa un kɔkɔ pée kíǹee yii, 24 ti-Dindaan nín sòon̄ puee sèé: <Naa máaǹ kí cùú já nì ni-nabiyaamu Isirayeel yab. Báà ŋma ń nīn gítí u-dumpu, di sá yii man di yāntì tin bíi jītí nee bāań.>» Niinee ní bi gbìl̄ ki tīī nì ti-Dindaan nyɔɔbundi ní ki nín gítí bi-dumpui.

25 Jeerooboowaam nìn máń digundi ki tú Siikeem tiŋki kin bí Eefiraayiim jooŋŋi puee, ki kíǹ ki kóò niin. Boonee ní u dāa yíkì niin ki cūtìi máń digundi ki tú Peenuyeel tiŋki.

Jeerooboowaam kpitii

26 Jeerooboowaam nìn lī u-neen yii: «An nín bíi jītí pu nee, Daafiidi dicaŋku dāa ŋūǹ kí fàtīí fōō dibeel. 27 Di sá yii binib nee yaa gbíntìi cáà Jeerusaleem ki ŋáań saraabi ti-Dindaan Diikunee, bi-pɔbiliŋ làá fàtīí gítí bi-kpiliu Juuda bɔtiu Rooboowaam cee. Bi làá dāá kpɔ̀-mi ní kí fàtīí gítí Juuda bɔtiu Rooboowaam cee.» 28 Niinee ní ubɔti Jeerooboowaam ká nlandɔkɔ ní ki yāntì bi dū sindaariya ki mɔ́ɔ́-u anabil ali, ní u bí samaa yii: «Ni jɔ́m̀ Jeerusaleem tiŋkin ki gīī Isirayeel yab, kpèèmaan ni-Nimbɔtiu un nyántìń-ni Eejipiti tiŋkinee^c.» 29 U ŋá mimmee ní ki dū dinabil diba ki síiǹ Beeteel tiŋkin ní ki dū din kíǹee ki síiǹ Daani tiŋkin. 30 U nín ŋá pu ki yāntì samaa ŋá ikpitee dee. Di sá yii binib tikpil nìn pá dinabililiitiil boon ki tin bàn̄ Daani tiŋkin.

31 Jeerooboowaam nìn gíti yāntì bi máń awaadiin ŋgbantamu pu, ní ki nìn lēē bin kaa sá Leefii yabee bí nīn sá bisaraaŋaliibi. 32 Dibindi poon ŋmaniniitiu iwiin saalku dalee ní Jeerooboowaam yāntì bi jíń jiŋaal kii un bi jīǹ Juuda tiŋkinee, ní úǹ u-ba ŋá saraabi nsaraafan pu. U nìn ŋá míǹ mbaantiim Beeteel ki ŋá saraabi ki tīī anabil ŋin u nìn mɔ́ɔ́yee. U nìn kāaǹ bisaraaŋaliibi ŋgbantamu mun bí Beeteel u bɔ́ntì mu-pu bí nīn ŋáań saraabee. 33 Dibindi poon ŋmaniniitiu, iwiin saalku dalee ní u yíiń samaa kɔkɔ bí jī jiŋaal Beeteel. Ŋwiin gbantee, úǹ di gāā u-bindi ki lēē-ŋu. Jiŋaal gbanti yuntiŋuee, úǹ u-ba di nìn pée ŋá saraa nsaraafan ŋun u nìn yāntì bi máńee pu.