Bibɔtiibi Gbɔmpeepeekaaku 11

Saloomɔn fātì u-boon ki tīī Unimbɔti

(Kpèè 2 Kroo 11.18-12.1)

1 Ubɔti Saloomɔn nìn cáá binicannimpoobi tikpil. U nín cáá Faaroo bisal boonee, u nìn gíti cáá Moowaab yab nì Amɔn yab nì Eedoom yab nì Siidɔn yab nì Eeti yab nimpoobi ki kútì^a. 2 Ti-Dindaan nìn kpáafì Isirayeel yab atimbun gbanti nib pu ki lī yii: «Ní taa tīī-bi ni-bisalib ticati kí taa yòon̄ bi mun bisalib kí cáá, an yaa kaa sá míǹ bi làá yàntī ní nīn kíǹ ki tòotī bi-waaŋi^b.» Ama bíǹ ní Saloomɔn nìn néeń ki dū u-ba ki yá ki nákáǹ-bi. 3 Saloomɔn nìn cáá binimpoobi alaataa aluli ní ki cáá bibɔntiibi alaataa ata. U-nimpoobi gbanti nìn yāntì u-pɔbil gáatì. 4 Di sá yii ŋyunti ŋun Saloomɔn púĺee ní u-nimpoobee yāntì u cūtìi bíi tòotī awaa. Waa nìn gíti sí nì ti-Dindaan u-Nimbɔtiu deedee kii u-baa Daafiidee. 5 Saloomɔn nìn kíǹ ki tòotī Siidɔn yab waal Asitaartee, nì Amɔn yab timbiiliwaal Miilkɔm. 6 Saloomɔn nìn ŋá tin kaa nìn kítì ti-Dindaan nimbiinee, di sá yii waa nìn nóó ti-Dindaan nì dipɔbil diba kii u-baa Daafiidee. 7 Áli gba Saloomɔn máń kuwaadii dijool din bí ki bíitiǹ Jeerusaleemee ki tīī Moowaab yab timbiiliwaal Keemoosi nì Amɔn yab timbiiliwaal Mooleeki. 8 U nìn pée ŋá míǹ ní ki tīī u-nicannimpoobi kɔkɔ. Bi nìn tùutī talaalub ki kù tiwaŋkuti ki ŋáań saraabi ki tìì bi-waaŋi.

9 Ti-Dindaan nìn gíí Saloomɔn pu diŋuul, kun puee u nìn fātì u-boon ki tīī úǹ Isirayeel Nimbɔtiu un nìn nyántì u-ba ki dàkā-u mili pu kɔkɔee. 10 U nìn kpáafì-u ú taa nóó awaayee, ama Saloomɔn kaa nìn ŋá kii Unimbɔti nín nìn kpáafì-u puee. 11 Niinee ní ti-Dindaan bí Saloomɔn yii: «A nín ŋá pu ní ki ŋá míǹ kaa ŋúb́ m-poondi nì m-marab bin m tīī-see, m làá fōō dibeel a-ŋaan, ní kí dū-dì kí tīī a-tɔntɔnliibi kansikin ubɔ. 12 Ama a-baa Daafiidi puee, maa làá ŋá m nín bí yii m làá ŋá puee a-maŋfal wiiŋyi poon. M làá dāá fōō dibeel a-jipɔɔn ŋaan ní. 13 Ama maa làá fōō dibeel kɔkɔ, Daafiidi m-tɔntɔnliu pu nì Jeerusaleem tiŋki kin m lēēyee puee, m làá kíń kunaakoou kubɔ kí tīī a-jipɔɔn.»

Saloomɔn pulincɔntiibi

14 Ti-Dindaan nìn yāntì ueedoomja Adaadi, u sá Eedoom yab beecindin ubɔee yíkì ki bíi jáà nì Saloomɔn. 15 Daafiidi yuntiŋuee, u nìn cūtìi jáń nì Eedoom yab. U-janjakpiliu Joowaab nìn cūtì kí síb́ Isirayeel yab bin bi nìn kūū kujaaunee ní ki kpáàa kūū Eedoom ninjab nì bi-bininjabiyaamu kɔkɔ. 16 Di sá yii Joowaab nì Isirayeel yab bin nìn táá-uee nìn kāl̀ Eedoom tiŋkin iŋmal iluu ní áli ki dāa kūū ki céetì bi-ninjab nì bi-bininjabiyaamu kɔkɔ. 17 Ama Adaadi un nìn dáá sá kinaacimpɔmbikee nì u-baa tɔntɔnliibi biba nìn ŋúń ki sáǹ ki cūtìi kāl̀ Eejipiti tiŋkin. 18 U nìn yíkì Madiyan tiŋkin ní ki dūu dī Paraan teekun. Niinee ní u kpáaǹ Paraan yab biba ní bi nín cá ki tin bàn̄ Eejipiti bɔtiu Faaroo cee. Faaroo nìn tīī Adaadi kudii nì tikpaatan ní ki pōoǹ-u kí nīn kpīintí-u. 19 Adaadi bɔti nìn fáatiǹ Faaroo ní úǹ dū u-nimpuu Tapaneesi naal ki tīī-u u cáá. 20 Tapaneesi naal màl̄ Adaadi kibininjabiki ní ki pú-kì diyindi yii Geenubaati. Tapaneesi nìn yāntì kì bí dibeecindi ubɔti biyaamu kansikin ní u kpēē-kì.

21 Adaadi bí Eejipiti mimmee ní ki gbìl̄ yii Daafiidi kpíì, ní ujanjakpil Joowaab mun kpíì. Niinee ní u bí Faaroo yii: «Yàntī ḿ nīn gítí m-tiŋkin.» 22 Ní Faaroo bālifì-u yii: «Ba di lóò-si m-cee doo ní a nyàab̀ kí nīn gítí a-tiŋkin?» Ní u kíí yii: «Tiba kaa lóò-mi, sii dee yàntī ḿ nín cá.»

23 Unimbɔti nìn gíti yāntì Eeliyadaa jipɔɔn Reesɔn jáń nì Saloomɔn. Reesɔn gbanti nìn sáǹ u-kpiliu Adadeeseer, Sooba bɔtiu ní. 24 U nìn kóoǹ bininjab biba ki kpáfì u-cee ní ki kpántì bi-kpiliu. Daafiidi nín nìn kūū ki céetì Adadeeseer janjaliibi puee ní bíǹ sáǹ ki cūtìi kāl̀ Damaasi tiŋkin, ní ki dāa dūu kpántì Damaasi bɔtiu. 25 Saloomɔn maŋfal wiiŋyi kɔkɔ poonee, Reesɔn nìn pée sá Isirayeel nannanliu ní, ní kí nín kūtì inikpiti in Adaadi nìn ŋá Isirayeel yabee. U nìn jíń dibeel Aram tiŋkin ní u-nimbil kaa nìn pée là kí wāl̀ Isirayeel yab.

Jeerooboowaam yíkìi jáń nì Saloomɔn

(2 Kroo 9.29-31)

26 Neebaati jipɔɔn Jeerooboowaam nìn sá Eefiraayiim naakookun ní ki kóò Seereeda. U-na nìn sá ukpiipu ní bi yíì-u yii Seeruya. U nìn sá Saloomɔn tɔntɔnliu ní ki yíkìi bíi jáà nì ubɔti. 27 Kun pu u nìn yíkì ki bíi jáà nì ubɔtee sɔ̀. Saloomɔn nìn bíi māā Miiloo diiku ní ki yāntì bi ŋéeb́ mbùń ŋun nìn bí u-baa Daafiidi Tiŋki gundi puee. 28 Jeerooboowaam gbanti nìn dáá sá kinaacimpɔmbiki ki cáá difaŋgiil ki ŋūǹ ditundi tiŋan. Saloomɔn nìn ká yii u tūǹ ditundi tiŋan ní u lēē-u ú nīn kpèé Eefiraayiim nì Manasee naakɔti tɔntɔnliibi. 29 Dalbee Jeerooboowaam nyáń Jeerusaleem kí nīn cée ní Unimbɔti bɔnaatiliu Ayiiya, usiilooja kíntì-u nsanni. Bi-liitil di nìn pée bí tisatin ní Ayiiya pēē dibɔkutikpaandi dipɔndi. 30 Ayiiya cúú dibɔkutikpaandi dipɔndi din u nìn pēēyee ní ki cátì saalaa nì mili pu. 31 Niinee ní u bí Jeerooboowaam yii: «Yòon̄ m nín cátì dibɔkutilee puee ajan saalaa, di sá yii ti-Dindaan Isirayeel Nimbɔtiu nín sòon̄ puee sèé: <Kpèè m làá fōō Saloomɔn ŋaan dibeel ní kí dū tinaakɔti saalaa kí tīī-si. 32 M-tɔntɔnliu Daafiidi nì Jeerusaleem tiŋki kin m lēē Isirayeel naakɔti kɔkɔ kansikinee puee, m làá pée kíń-u kunaakɔbambaantiiu ní. 33 M làá ŋá míǹ kun puee Isirayeel yab dū-mi ki fá, ní ki cūtìi bíi jáaḿ Siidɔn yab waal Asitaartee nì Moowaab yab waal Keemoosi nì Amɔn yab waal Miilkɔm. Baa nóó m-saŋŋu kí nīn ŋáań tin kítì m-nimbiinee, kaa tí ŋúb́ m-bɔkpaaŋi nì m-koobiliŋ kii u-baa Daafiidee. 34 Nì míǹ kɔkɔee maa làá fōō dibeel Saloomɔn ŋaan, di sá yii m-tɔntɔnliu Daafiidi un m lēē ní u nìn ŋúb́ m-marab nì m-bɔkpaaŋee puee, m dū-u ki kāaǹ ú nīn sá ubɔti u-maŋfal wiiŋyi kɔkɔ poon ní. 35 Ama m làá fōō dibeel u-jipɔɔn ŋaan ní kí dū tinaakɔti saalaa kí tīī-si. 36 M làá kíń u-jipɔɔn kunaakoou kubɔ. Mimmee m-tɔntɔnliu Daafiidi làá nīn pée cáá naantiiu ubɔ kā dibeel pu Jeerusaleem tiŋkin. Di sá yii kitiŋ kin ní m lēē kí nīn lèekī m-ba ki dàkèe dee. 37 Siiyee, m làá tīī-si dibeel kii a nín là puee. A làá jī Isirayeel tiŋki pu dibeel. 38 A yaa pílifì tin ní m làá tùkù-see, ki yaa nóó m-saŋŋu, ki yaa ŋáań tin kítèe m-nimbiin, ki ŋúb́ m-bɔkpaaŋi nì m-marab kii m-tɔntɔnliu Daafiidi nín nìn ŋúb́ puee, m làá nīn bí a-cee, ní kí yàntī a-kpátam boonee, a-naantiibi ń nīn pée kā dibeel kii Daafiidi yab nín bí puee. M làá dū Isirayeel tiŋki kí ŋá a-ŋaan. 39 M làá dáaĺ Daafiidi naantiibi tafal, ama maa làá dáaĺ bi-tafal kí nīn cá jaanjaan.>»

40 Saloomɔn béè mimmee ní ki nyàab̄ kí kpɔ̀ Jeerooboowaam. Úǹ béè mimmee ní ki sáǹ ki nín cá Eejipiti ki tin kɔ́ Eejipiti bɔtiu Siisaaki pu, ki dāa sāā ŋyunti ŋun ní Saloomɔn kpíìyee.

Saloomɔn kúm

41 Bi ŋmàn̄ Saloomɔn maam, tin kɔkɔ u ŋée nì u-ciiŋyi bɔti kɔkɔ ki ŋá Saloomɔn Tuuŋŋi Gbɔŋku poon. 42 Saloomɔn nìn kāl̀ Jeerusaleem ki jíń Isirayeel tiŋki kɔkɔ pu dibeel abin imuŋku ili ní. 43 Saloomɔn kpíì ki cūtìi ŋàl̄ u-naanjab ní bi síb́-u u-baa Daafiidi Tiŋkin. U-jipɔɔn Rooboowaam di fōō u-yil ki kpántì ubɔti.