Bibɔtiibi Gbɔmpeepeekaaku 10

Sabaa nimpubɔtiu māntì Saloomɔn pu

(Kpèè 2 Kroo 9.1-12)

1 Sabaa nimpubɔtiu nìn gbìl̄ ti-Dindaan nín yāntì Saloomɔn nyáń diyindi puee, ní u dɔ́miń kí màntì u-pu, kí pɔ́ɔǹ-u ipɔɔn kí màkan̄-u kí kpèè. 2 U nìn bāań Jeerusaleem nì dinikitikpaandi nì igutaamu i tú talaalub nì sindaariya tikpil nì ataŋkpamɔnti. U bāań Saloomɔn ceeyee ní ki bālifì-u tibɔti tin kɔkɔ pée kā u-pɔbilinee. 3 Saloomɔn nìn pée kíí-u tin kɔkɔ u nìn bālifì-uee ní. Tiba kaa nìn bí ki pɔ̄ɔ̄ ki tīī ubɔti waa ŋúń ki kíí. 4 Sabaa tiŋki nimpubɔtiu nín ká Saloomɔn ciiŋyi nì kudii kun u máńee 5 nì tijin tin tɔ́kɔ́ u-teebiliu puee nì u-tɔntɔnliibi kɔŋkooŋyi nì u-tɔntɔnliibi bin tìì-u tijin u jīǹ nì nnyim u nyùee wampeeŋkaati nì saraabi bin u nìn ŋáań kunimbɔtidiinee ní an ŋá-u bitii waa ti nyí tin poon u bée. 6 Niinee ní u bí ubɔti yii: «Tin m gbìl̄ m-tiŋkin a-tuuŋŋi pu nì a-ciiŋyi puee lafun sá mbaamɔn ní. 7 Ama maa nìn fōō ki kíí, see m nín dɔ́miń m-ba ki ká nì m-nimbilee. Tin bi máafì-mee kaa bàn̄ tin m ká nee dijandi gba. A-ciiŋyi nì a-gaajati jítiǹ tin m gbìl̄ee pu kpataaa. 8 A-nib nì a-tɔntɔnliibi bin bí a-nimbiin baabadal ki pílifí a-ciiŋyi nyɔɔbuŋŋee bí mmɔnneeee! 9 Tí nyɔ̄ŋkì ti-Dindaan a-Nimbɔtiu un di lēē-si á kàl̄ Isirayeel tiŋki pu dibeelee! Kun puee u néeń Isirayeel kí nīn cá jaanjaan, an pu ní u dū-si ki kāaǹ dibeel á yàntī tin bí deedeeyee nì ibaamɔn ń nīn bí^a.»

10 Míǹ boonee ní Sabaa tiŋki nimpubɔtiu tīī ubɔti Saloomɔn sindaariya tɔnnib bita nì dijandi nì talaalub tikpil nì ataŋkpamɔnti. Sabaa nimpubɔtiu nín nìn tīī ubɔti Saloomɔn talaalub puee, baa ti pée ká an talaalub bulifi kɔ́ Isirayeel tiŋkin dalba dalba.

11 Yiiram meelab bin nìn túǹní sindaariya Oofiiri tiŋkin ki cáańee nìn cáań santaal dɔi tikpil tikpil nì ataŋkpamɔnti mun. 12 Ubɔti nìn dū idɔ gbanti ki ŋá jaantalkub ki tíkiǹ ti-Dindaan Diiku nì kubɔtinaakoou, ní ki nìn lēē ki kpítì tibati ki tīī u-laŋgaaliibi. Santaal dɔi kaa ti pée kɔ́ Isirayeel tiŋkin míǹ ki dāa sāā díǹ.

13 Ubɔti Saloomɔn mun nìn tīī Sabaa nimpubɔtiu tin kɔkɔ u nìn là ki bālifèe, ní kí nín kūtì tin úǹ ubɔti nìn pú-u mbɔtiyaaminee. Míǹ boonee ní u nì u-tɔntɔnliibi nín gítí bi-tiŋkin.

Ubɔti Saloomɔn gaajati

(Kpèè 2 Kroo 1.14-17, 9.13-28)

14 Dibimbaantiil poonee, sindaariya un bi cáań ki tīī ubɔti Saloomɔŋyee nìn nyáń tɔnnib mmuŋku ní, 15 ní kí nín kūtì bibantiliibi nì binyampoobi nín nìn cāabìń sindaariya un ki pà patantibee, nì ŋwìiń jeetilaŋki pú bɔtiibi nì Isirayeel tiŋgbammu nín lèekī pu ki cāabìń ki pà lampoobee.

16 Ubɔti Saloomɔn nìn yāntì bi dū sindaariya ki mɔ́ɔ́ agbampɔɔ alaataa ali. Bi nìn dū sindaariya kiiloobi biluu ní ki mɔ́ɔ́ digbampɔɔl kamaa. 17 U nìn gíti dū sindaariya ki mɔ́ɔ́ agbampɔɔ ŋwaamu alaataa ata. Bi nìn dū sindaariya kiiloo ubɔ nì dijandi ní ki mɔ́ɔ́ digbampɔɔl kamaa. Ubɔti nìn dū agbampɔɔyee ki síiǹ kudii kun bi yíì yii <Leebanɔn Pɔɔkuee> poon ní.

18 Ubɔti nìn gíti kpítì dibeejal dikpaandi diba ní ki dū sindaariyamɔnti ki nyūntì ní ki dū kunti nyiŋŋi ki nákáǹ nákáǹ. 19 Dibeejalee nìn cáá akɔl aluu, ní di-yilpu pú bí dikuŋkundi, ní ki cáá laakin bi pāantí iŋalee. Bi nìn kpítì gbikintib bili ki síiǹ laakin bi pāantí iŋalee. 20 Gbikintib nìn bí saalaa nì bili ní ki bí akɔl aluuyee nín kúntí puee. Baa nìn pée kpítì dibeejal diba míǹ dibeel diba poon ki ká.

21 Ubɔti Saloomɔn kɔŋkɔnnyɔkaabi kɔkɔ nìn sá sindaariya ŋma ní, ní asambil ŋin bí <Leebanɔn Pɔɔku> diikunee nìn sá sindaariyamɔnti ŋma. Baa nìn dù animbil kúti kí ŋá tiba, di sá yii Saloomɔn yuntiŋuee, animbil kúti kaa nìn cáá kunyampoou. 22 Di sá yii ubɔti nìn cáá meelab Taarsiisi tiŋkin bin tūntí binyampoobee bi cá ki gítiń bi nì Yiiram meelab. Abin ata poon diba puee, meelab gbanti nìn cāabìń sindaariya nì animbil kúti nì kunti nyiŋŋi nì ilantan nì ikooŋaan.

23 Ubɔti Saloomɔn nìn jítiǹ kitiŋ pu bɔtiibi kɔkɔ tigaajati poon nì iciin poon. 24 Kitiŋ pu nib kɔkɔ nìn nyàab̀ kí ká Saloomɔn kí ŋmā kí pīlifì iciin in Unimbɔti nìn tīī-uee. 25 Bi yaa nìn dòońee, báà ŋma nìn cāabìń animbil kúti wanti nì sindaariya wanti nì tiwampeeŋkaal nì tijanjawan nì talaalub nì itaamu nì imamboon ki pūǹ-u. Dibindi kamaayee, binib nìn pée ŋáań míǹ ní.

26 Saloomɔn nìn kóoǹ janjatɔrɔkub nì itaamu ki kpáfì. U nìn cáá janjatɔrɔkub kutuku ubɔ nì alaataa anaa, ní ki cáá itaamu kutukub saalaa nì bili. Tijanjawan gbanti tiba nìn bí ntimu mun poon ní ajanjanaapaa nìn bée, ní tiba mun bí u-cee Jeerusaleem. 27 Ubɔti nìn yāntì animbil gbí Jeerusaleem kii ataŋkpeeyee ní, ní seedir dɔi wīikí kii Seefeelaa tiŋkin sufii in bi yíì siikoomɔɔree. 28 Saloomɔn taamui nìn nyēeń Eejipiti nì Siisilii timmun ní. Niin ní ubɔti nyampoobi nìn dāań-i^b. 29 Bi yaa nìn cáań janjatɔrɔku Eejipiti tiŋkinee, u-nyampooku nìn sá animbil kúti jitɔmbi alaataa aluu ní, ní utaamu nyampooku sá animbil kúti jitɔmbi dilaataal nì imuŋku ili nì saalaa. Binyampoobi gbanti nìn cāabìń janjatɔrɔkub nì itaamu gbanti ki nyáfíǹ Eeti yab nì Siirii yab bɔtiibi kɔkɔ mun.