Bibɔtiibi Gbɔmpeepeekaaku 9

Ti-Dindaan lēē u-ba ki dàkā Saloomɔn nliliitiimin

(2 Kroo 7.11-22)

1 Saloomɔn nìn máń ti-Dindaan Diiku nì úǹ u-ba naakooku nì tin u nìn pée là kí mēe ki dóò. 2 Míǹ boonee ní ti-Dindaan nyántì u-ba nliliitiim ki dàkā-u kii u nín nìn nyántì u-ba ki dàkā-u Gabawɔn puee. 3 Ti-Dindaan nìn bí-u yii: «M gbìl̄ a-wimmeem nì a-gbaamii in a dūu bíl̀ m-nimbiinee. M ŋá kudii kun a máńee circir, ní m kíí bí nīn jáaḿ m-yindi ku-poon kí nīn cá jaanjaan. M-nimbikpeeŋu làá nīn pée cɔ́ ku-pu, ní m làá nīn wúń ku-pu baabadal. 4 Ama siiyee, nín̄ nóó-mi nì dipɔbil diba nì ibaamɔn poon kii a-baa Daafiidee. Nín̄ ŋáań tin m kpáafì-see, ní kí nīn ŋúb́ m-bɔkpaaŋi nì m-koobiliŋ. 5 A yaa ŋá míǹ, m làá tīī a-bɔtiiti Isirayeel nibul pu mpɔn kí nīn cá jaanjaan. M nín nìn pōoǹ a-baa Daafiidi puee dee. M nìn bí-u yii: <A-kpátam boonee, a-naantiibi kansikin ubɔ làá nīn pée sá ubɔti ní Isirayeel tiŋkin.> 6 Ama sii nì a-jipɔmbi yaa kaa ŋúb́ m-marab nì m-koobiliŋ ŋin m tīī-nee, ní ki yaa fātì ni-boon ki tīī-mi ki cūtìi nóó awaa ki gbàantí ŋi-taapuee, 7 m làá jà Isirayeel yab kitiŋ kin m tīī-bee pu. M làá fàtī m-boon kí tīī kudii kun m dūu sú m-ba nee. Anibul kɔkɔ làá nīn kíǹ ki bèel̄ Isirayeel yab ní ki lāā-bi. 8 Kudii nee làá dāá kpántí adigbun ní. Un kamaa yaa láa jītí kudii nee caŋinee làá dāá bàkatī ní kí bàlifì yii: <Ba yì-tì ní ti-Dindaan nín ŋá kitiŋ nee nì kudii nee míǹ?>^a 9 Niinee ní bí dāá kíí-bi yii: <Kun yì-tèe di sá yii Isirayeel yab dū ti-Dindaan bi-Nimbɔtiu un di nyántìń-bi Eejipiti tiŋkinee ki fá. Bi dū bi-ba ki tīī awaa ki gbàantí ŋi-taapu ki jáaḿ-ŋi. An pu ní ti-Dindaan yāntì nnaabu nee bāań-bi.>»

Saloomɔn nín túń atuun ŋiŋyee

(Kpèè 2 Kroo 8.1-18)

10 Abin mmuŋku ní Saloomɔn nìn dūu máń adiin liitil, an dàkà yii ti-Dindaan Diiku nì kubɔtinaakoou. 11 Tiir bɔtiu Yiiram di nìn tīī Saloomɔn seedir dɔi nì siipreesi dɔi nì sindaariya kii u nín nìn là puee. An puee ubɔti Saloomɔn nìn tīī-u Galiilee tiŋkpaaŋkin ntimu mmuŋku. 12 Niinee ní Yiiram nyánní Tiir tiŋkin ki dɔ́miń kí kpèè ntimu mun Saloomɔn tīī-uee, ama ntimuee bɔti kaa nìn fáatì-u. 13 Niinee ní u bí yii: «M-nabiki, ba timmu ní a nín tīī-mi nan dee!» An pu ní nìn díǹ, bi yíì ntimu gbanti yii Kabuul timmu^b. 14 Nì míǹ kɔkɔee Yiiram nìn gíti tīī Saloomɔn sindaariya tɔnnib bita nì dijandi.

15 Diwɔ́bil tundi ní Saloomɔn nìn dūu máń ti-Dindaan Diiku nì úǹ u-ba diiku nì kudii kun bi yíì Miilooyee nì digundi din bi máń ki tú Jeerusaleem tiŋkee nì Asɔɔr nì Meegiidoo nì Geeseer timmu. 16 Eejipiti bɔtiu Faaroo nìn cūtìi jáń ki fōō Geeseer tiŋki. U nìn kūū Kanaan yab bin nìn kóò niinee kɔkɔ ní ki tūū adiin ŋŋmi, ní ki dū kitiŋee ki pàn̄ u-bisal un mɔ́ǹ Saloomɔŋyee cootiiku. 17 An pu ní an nìn bālifì yii Saloomɔn ń fàtīí mā Geeseer tiŋki gbanti. Saloomɔn nìn gíti máń Beeti-Oorɔn-Taapu, 18 nì Balaati timmu nì Tamaar tiŋki kin bí kuteeunee, 19 nì ntimu mun kɔkɔ poon ní bi nìn bīil̀ u-jintee, nì ntimu mun poon ní u-janjatɔrɔkub nìn sīlifée, nì mun poon ní u-taamui nìn bée.

Saloomɔn nìn gíti máń kun ní u nìn lèe Jeerusaleem tiŋkin nì Leebanɔn jool pu nì ntimu mun kɔkɔ nìn pée bí u-taapuee. 20 Amɔɔr yab nì Eeti yab nì Peeriisi yab nì Eefi yab nì Jeebusi yab biba nìn kíǹ ki bí Isirayeel tiŋkin, bíǹ gbanti kaa nìn sá Isirayeel yab. 21 Bi nìn gbíntìi bí kun puee Isirayeel yab kaa nìn ŋúń ki kūū ki céetì-bi. Saloomɔn nìn dū bi-naantiibi ki ŋá diwɔ́bil tundin ki dāa sāā díǹ. 22 Ama Saloomɔn kaa nìn dū Isirayeel yab ki ŋá diwɔ́bil tundi gbantin. Bíǹ di nìn sá u-janjaliibi nì u-janjakpilib nì u-janjakpootiliibi nì bin ŋàal̀ janjatɔrɔkubee nì bitanjakaliibi. 23 Kɔmandambi nìn lēē bikàliŋkpilib alaataa aŋmoo nì imuŋku ili nì saalaa bí nīn kpèé bin bí ki tūǹ Saloomɔn tuuŋŋee.

24 Faaroo bisal nín jɔ́m̀ Daafiidi Tiŋkin ki kɔ́ kudii kun Saloomɔn nìn máń ki tīī-uee, boonee ní u nín máń Miiloo diiku.

25 Saloomɔn nìn ŋáań bisaraawɔkaabi nì mpèé saraabi nsaraafan ŋun u nìn máń ti-Dindaanee dibindi poonee mita pu^c ní. U nìn gíti tùutī talaalub nsaraafan pu ki tìì ti-Dindaan. Míǹ ní u nìn ŋáań ki dàkà kun pu kunimbɔtidii bée.

26 Ubɔti Saloomɔn nìn kpáá meelab Eesiiyɔn-Geebeer tiŋkin Eelaati tiŋki caŋin. Eelaati tiŋki gbanti bí Tikati Mɔɔl gbandi, Eedoom tiŋkin ní. 27 Yiiram nìn dū u-tɔntɔnliibi bimeelaŋaaliliibi bin nyí tiŋku bɔti tiŋanee ki tú bí tūtuǹ Saloomɔn tɔntɔnliibi. 28 Bimeelaŋaaliliibi gbanti nìn cūtì Oofiiri tiŋkin ki nyàab̄ sindaariya tɔnnib saalaa nì bili ki cáa cūnnì ki tīī ubɔti Saloomɔn.