Bibɔtiibi Gbɔmpeepeekaaku 8

Bi dū ti-Dindaan Poondi Dakaau ki síiǹ kunimbɔtidiin

(Kpèè 2 Kroo 5.2 - 6.2)

1 Míǹ boonee ní ubɔti Saloomɔn yíiń Isirayeel tindaŋkpilib nì tinaakɔti kpilib kɔkɔ nì Isirayeel dicaŋŋi kpilib u-cee bí yòon̄ ti-Dindaan Poondi Dakaau Daafiidi Tiŋkin, an dàkà yii Siiyɔn jool pu, kí cáá cùnnì kunimbɔtidiin^a. 2 Niinee ní Isirayeel yab kɔkɔ kóoǹ ki kpáfì ubɔti Saloomɔn cee bí jī tibìń jiŋaaliu Eetaniim ŋmaliu, an dàkà yii uŋmaluluúti poon. 3 Ŋyunti ŋun ní Isirayeel kpilib kɔkɔ bāańee ní bisaraaŋaliibi yōoǹ Dipoondi Dakaau ki túǹ. 4 Bisaraaŋaliibi nì Leefii yab nìn yōoǹ ti-Dindaan Poondi Dakaau nì circir kɔŋkooŋŋu nì tiwan tin kɔkɔ nìn bí ŋu-poonee ki túǹ. 5 Isirayeel samaau kɔkɔ nìn kóoǹ ki kpáfì ubɔti Saloomɔn cee ní bi kūū Dipoondi Dakaau nimbiin ipii nì inaa ki ŋá saraabi an kaa cáá ŋkaan.

6 Míǹ boonee ní bisaraaŋaliibi nín dū Dipoondi Dakaau ki kɔ́ǹ Circir Páaa laŋki diikun ki síiǹ u-paaŋŋu pu, keerubimbi feeŋyi taapu. 7 Di sá yii keerubimbi nìn kpátì bi-feeŋyi mpaan ŋun bi nìn bɔ́ntì kí síiń Dipoondi Dakaauee yilpu, ní ki nìn bīī Dipoondi Dakaau nì idɔ in bi cáa tūntí-uee pu. 8 Dakaa dɔi gbanti nìn fɔ̀kɔ̀ tiŋan, an puee a yaa nìn bí Circir laŋkee, a nìn wāĺ i-nyɔkɔ ní, ama a yaa nìn bí mmɔŋkee, an kaa nìn wāĺ. Idɔee dáá gbíntìi bí ki dāa sāā díǹ. 9 Tiba kaa nìn bí Dipoondi Dakaau poon an yaa kaa sá ataŋkpee pilinti tili tin Mooyiisi nìn dūu ŋée. Ti-Dindaan nín nìn nyántì Isirayeel yab Eejipiti tiŋkin u nì bi ŋá mpèé Ooreeb jool puee ní Mooyiisi dū ataŋkpee pilinti gbanti ki ŋá dakaayee poon^b.

10 Ŋyunti ŋun ní bisaraaŋaliibi nyánní Circir laŋkee ní ditagbandi diba dɔ́miń ki bīiǹ ti-Dindaan Diiku pu. 11 Ditagbandee puee, bisaraaŋaliibi kaa nìn gíti ŋūǹ kí sīĺ poon kí tɔ̄ bi-tundi, di sá yii ti-Dindaan nyooti nìn gbí u-diiku poon^c. 12 Niinee ní Saloomɔn bí yii:

«Ti-Dindaan, a nìn lēē yii a làá nīn kóò ditagbambɔndin ní.

13 Ama m máń-si kudinyaaŋŋu nee,

kudii kun poon ní a làá nīn kóò talkuee!»

Saloomɔn mēē ki dū kudii ki sú Unimbɔti

(2 Kroo 6.3-11)

14 Isirayeel yab kɔkɔ nìn sí ní ubɔti fātì u-nimbiin ki túĺ-bi ní ki mēē ki bīiǹ bi-pu. 15 U nìn bí yii: «Tí jāam̀maan ti-Dindaan, Isirayeel Nimbɔtiu! Úǹ u-ba ŋá kii u nín nìn pōoǹ m-baa Daafiidi puee. U nìn bí-u yii: 16 <Man di nyántì m-nibul Isirayeel Eejipiti tiŋkin. Kí yòon̄ ŋwiin gbantee, maa lēē Isirayeel timmu kɔkɔ kansikin kiba kin poon ní bi làá mā-mi kudii ḿ nīn lèekī m-ba ki dàkèe. Ama m lēē sii Daafiidi á nīn sá m-nibul Isirayeel bɔtiu.> 17 M-baa Daafiidi nìn cáá nlandɔkɔ kí mā kudii kí dū-ku kí sú ti-Dindaan, Isirayeel Nimbɔtiu. 18 Ama ti-Dindaan nìn bí-u yii: <A nín ká nlandɔkɔ yii a làá mā kudii kí tīī-mee, an ŋān̄ tikpil^d. 19 Tin bée di sá yii an kaa sá sii di làá mā kudii gbanti, ama sii a-ba jipɔɔn un a màl̄ee di làá mā kudii gbanti kí tīī-mi^e.> 20 Kɔŋkɔnnee, ti-Dindaan nín nìn pōoǹ puee u ŋá míǹ. Di sá yii m fōō m-baa Daafiidi yil ki jíń Isirayeel tiŋki pu dibeel, kii ti-Dindaan nín nìn lī puee, ní m máń kudii nee ki dū-ku ki sú ti-Dindaan Isirayeel Nimbɔtiu. 21 M kpáàa bɔ́ntì mpaan ki tīī Dipoondi Dakaau un poon ti-Dindaan Poondi nyɔɔbuŋŋi kēe. Dipoondi gbantee, u nín nìn nyántìń ti-naanjab Eejipiti tiŋkinee ní u nìn pōoǹ.»

Saloomɔn wimmeem

(Kpèè 2 Kroo, 6.12)

22 Míǹ boonee ní Saloomɔn yíkìi síl̀ ti-Dindaan saraafaŋŋu nì Isirayeel yab bin kɔkɔ nìn kóoǹ ki kpáfèe nimbiin, ní ki yōoǹ u-ŋalii ki túĺ kutaa 23 ní ki bí yii: «Ti-Dindaan Isirayeel Nimbɔtiu, Unimbɔti ubɔ kaa bí yilpu àá kitiŋ pu ki bí kii siiyee. A ŋúb̀ a-poondi ki dàkà a-tɔntɔnliibi bin sí nì si nì dipɔbil dibee kulaŋŋaŋfitiiu. 24 A nín nìn pōoǹ a-tɔntɔnliu m-baa Daafiidi yii a làá ŋá pu kí tīī-uee, a ŋá míǹ. Mbaamɔn tin a nìn pōoǹ-uee, sii a-ba ŋá míǹ ki tīī-u díǹ. 25 Kɔŋkɔnnee, ti-Dindaan Isirayeel Nimbɔtiu, ŋá a nín nìn pōoǹ a-tɔntɔnliu m-baa Daafiidi yii a làá ŋá pu kí tīī-uee. A nìn bí-u yii: <A-naantiibi yaa nóó-mi ibaamɔn poon kii sii a-ba nín nóó-mi puee, ibaamɔn ní m tùkù-si, a-kpátam boonee, a-naantiibi kansikin ubɔ làá nīn pée sá ubɔti ní Isirayeel tiŋkin.> 26 Míǹ puee Isirayeel Nimbɔtiu, m gbàam̄-si ní, ŋá kɔŋkɔnnee a nín nìn pōoǹ a-tɔntɔnliu m-baa Daafiidi yii a làá ŋá puee kí tīī-u!

27 «Mimmee Unimbɔti ŋūǹ kí kɔ́ kitiŋ puɔɔɔ? Áli gba kutagbɔŋu nín wāā pu nee kaa bàn̄-si á kɔ́, ki dāa nín kàaǹ kudii kun m máń nee^f! 28 Nì míǹ kɔkɔee, m-Dindaan m-Nimbɔtiu, pīlifì man a-tɔntɔnliu wimmeem nì m-gbaamii! Pīlifì m-kuŋkuuntii nì m-wimmeem min man a-tɔntɔnliu bíi mèé-si díǹ neeyee! 29 A-nimbikpeeŋu ń nīn pée cɔ́ kudii nee pu ŋwiimpu nì kunyeeu, ŋú nīn pée cɔ́ mpaan ŋun pu a nìn sòon̄ yii: <M-yindi làá nīn bí niin> nee pu. Pīlifì ŋwimmeem min m bí doo ki mèé-si nee^g.» 30 Pīlifì man a-tɔntɔnliu nì Isirayeel, a-nibul wimmeem min ti bí doo ki mèé-si nee. Pīlifiǹ-ti doooo yilpu laakin a kóòyee. Pīlifiǹ-ti kí dū ti-kpitii kí pɔ̄-ti.

31 Ubɔ yaa yīntiǹ u-juti, bi ŋūǹ kí lì yii ú pùtī yii u yaa ká mbusu ń lítí u-pu. Udaan yaa lafun dɔ́miń kudii nee poon a-saraafaŋŋu nyɔkɔpu ki pūtèe, 32 á pīlifì doooo yilpu kí kpèè tibɔti gbanti kí sòoǹ a-tɔntɔnliibi bɔti. Á kpɔ̀ dibɔkpil daan bɔti kí dáaĺ u-tafal, ní kí pɔ̀ un bɔti ŋān̄ee báà ŋma ń béé yii u sá maanyiiba.

33 «Isirayeel yab a-nibul yaa yīntiǹ-si ní bi-nannanliibi jáń ki pɔ́ɔkiǹ-bi, ní bi fātìi gítìń a-cee, ki nyɔ́ŋkì-si, ki mēē-si ní ki gbāam̀-si kudii nee poonee, 34 sii ti-Dindaan, á pīlifì a-nibul Isirayeel yab doooo yilpu, kí dū bi-kpitii kí pɔ̄-bi, ní kí fàtīí gíiǹní-bi kitiŋ kin a nìn dūu tīī bi-naanjabee pu.

35 «A-nibul yaa yīntiǹ-si ní a dū kutaa ki pīiǹ utaa kaa ti bíi nì, ní bi fātì bi-ba ki túĺ mpaan nee pú ki mēē ki nyɔ́ŋkì a-yindi, ní ki fātì bi-boon ki tīī bi-kpitii a nín dáaĺ bi-tafal pueeyee, 36 sii ti-Dindaan, á pīlifiǹ a-tɔntɔnliibi Isirayeel yab doooo yilpu. Á dū bi-kpitii kí pɔ̄-bi, kí dàkà-bi nsammɔnti ŋun bi máaǹ kí nóóyee, ní kí yàntī utaa ń nì a-tiŋki nee pu, kitiŋ kin ní a dūu tīī a-nibul án nīn sá bi-fakalee.

37 «Ŋkùm àá bìlbil kúm yaa jéetì kitiŋ nee pu, àá tikpaajin kaa láá bīń ní ki kūń àá ki sūū, àá inaakitoon nì inaaki di ŋmɔ́ ki bíil̀ tikpaajin, àá bi-nannanliibi di māntìi tú bi-timmu kí já nì bi, àá an yaa pée sá tibumbun àá igbaŋween iŋyee, 38 Isirayeel yab kansikin ubɔ àá a-nibul Isirayeel yab kɔkɔ di yaa béè tin bāań-bee, ki yōoǹ bi-ŋalii ki túĺ Kudii nee watil pú ki mēē-si àá ki gbāam̀-see, 39 sii ti-Dindaan, á pīlifiǹ-bi doooo yilpu laakin a kóoǹnée. Á dū bi-kpitii kí pɔ̄-bi, ní kí ŋá kí tīī báà ŋma kii an nín máaǹ puee. Di sá yii a nyí báà ŋma pɔbil poon bɔti. 40 Ŋá míǹ án nín làá ŋá pu ní Isirayeel yab ń fàŋkì-si iwiin in kɔkɔ bi cáá kí kàl̄ kitiŋ kin a tīī bi-naanjabee puee.

41 «Unicaan un kaa sá a-nibul Isirayeel yab kansikin ubɔee yaa nyánní kitindandatii ki dɔ́miń a-yindi pu, 42 di sá yii u gbìl̄ bi sòon̄ a-yiŋkpaandi nì a-pɔŋkpaaŋŋu pu. U yaa dɔ́miń míǹ ki yōoǹ u-ŋalii ki túĺ kudii nee ki mēēyee, 43 sii ti-Dindaan, á pīlifiǹ-u doooo yilpu laakin a kóoǹnée, kí ŋá u nín bālifì-si puee kí tīī-u. A yaa ŋá míǹ, kitiŋ pu nib kɔkɔ làá béé a-yindi, kí fàŋkì-si kii Isirayeel yab nín fàŋkí-si puee. Bi làá béé yii a lafun bí kudii kun m máń nee ni.

44 «A yaa tīī a-nibul Isirayeel yab mara yii bí cù kí já nì bi-nannanliibi, ní bi fātì bi-ba ki túĺ kitiŋ kin a lēē nee nì kudii kun m máń-si nee watil pú ki mēēyee, 45 á pīlifì bi-wimmeem nì bi-gbaamii doooo yilpu, ní kí tīī-bi dijajil.

46 «An ŋūǹ kí ŋá yii Isirayeel yab yīntiǹ-si, di sá yii unil ubɔ kpá kaa yìntī. Bi yaa ŋá míǹ ní a gíí bi-pu diŋuul ki yāntì binannanliibi jáń ki pɔ́ɔkiǹ-bi ki cúú-bi ki cūnnì bi-tiŋki kin dátèe àá kin kaa dátèe ni kuyuŋu, 47 ní bi yaa kíĺ ki bíi dàkafī, ki kpántì bi-bimbim, ki gbāam̀-si kitiŋ gbanti poon ki lī yii: <Ti ŋá ikpiti, ti yīntì, ti jíń dibɔkpil>. 48 Bi-nannanliibi tiŋki gbanti poonee, bi yaa fātìi gítìń a-cee nì bi-pɔbil kɔkɔ nì bi-naŋki kɔkɔ, ní ki fātì bi-ba ki túĺ kitiŋ kin a tīī bi-naanjab nì kitiŋ kin ní a lēē nee nì kudii kun ní m máń-si nee ki mēē-see, 49 sii ti-Dindaan, á pīlifiǹ-bi doooo yilpu laakin a kóoǹnée. Pīlifì bi-wimmeem nì bi-gbaamii kí jòoń-bi. 50 Dū a-nibul kpitii kí pɔ̄-bi. Dū bi nín jáà nì si puee kí pɔ̄-bi, ní kí yàntī bin ŋúb́-bi kuyuŋuee ń sɔ̄ bi-saai kí dàkà-bi kulaŋŋaŋfitiiu. 51 Di sá yii bi sá a-nibul ní. Sii di yì-bi ní ki nyántìń-bi Eejipiti yab paaki ŋmiŋun.

52 «Ŋúbití a-nimbiliŋ, ti-Dindaan Unimbɔti. Pīlifì man a-tɔntɔnliu gbaamii nì a-nibul Isirayeel gbaamii. Pīlifiǹ-ti ŋyunti ŋun kamaa ní ti yaa pée kúuǹ ki yíiń-see. 53 Di sá yii sii di lútì-ti kitiŋ pu nibuliŋ kɔkɔ kansikin tí nīn sá difakal ki tīī-si, kii a nín nìn dī a-tɔntɔnliu Mooyiisi pu ki sòon̄ pu ŋyunti ŋun a nìn nyántì ti-naanjab Eejipiti tiŋkinee.»

Saloomɔn mēē Unimbɔti ń bìin̄ samaa pu

54 Saloomɔn nìn gbāaǹ u-tabiŋyiliŋ pu ti-Dindaan saraafaŋŋu nyɔkɔpu, ki yōoǹ u-ŋalii yilpu, ní ki mēē ki gbāam̀ ti-Dindaan. U nìn mēē míǹ ki dóòyee ní ki yíkì 55 ki síl̀ ki mēē mpɔn ki bīiǹ Isirayeel samaau pu ki lī yii: 56 «Tí nyɔ̄ŋkìmaan ti-Dindaan un di tīī u-nibul Isirayeel ŋgbansɔŋfi kii u nín nìn pōoǹ puee. Di sá yii u nín nìn dī u-tɔntɔnliu Mooyiisi pu ki pōoǹ-ti ipoon iŋyee, báà iba kaa gbíntì waa ŋá^h. 57 Tin m mèé ti-Dindaan Unimbɔtee di sá ú nīn bí ti-cee kii u nín nìn bí ti-naanjab cee puee. Ú taa dū-ti kí fá, kí taa fàtī u-boon kí tīī-ti. 58 Ú gíiǹní ti-pɔbiliŋ u-cee! Niinee ti làá ŋmā kí nīn bí kii u nín là tí nīn bí puee, ní tí nīn ŋúb́ u-marab nì u-bɔkpaaŋi nì u-koobiliŋ ŋin u nìn dūu tīī ti-naanjabee. 59 Ti-Dindaan ti-Nimbɔtiu ń nīn téetí m-gbaamii in m dūu bíl̀ u-nimbiin nee pu ŋwiimpu nì kunyeeu. Ú pɔ̀ man u-tɔntɔnliu nì u-nibul Isirayeel yab. 60 An yaa ŋá mimmee, kitiŋ pu nib kɔkɔ làá béé yii ti-Dindaan baba di sá Unimbɔti, ubɔ kaa ti bí. 61 Nín̄ símaan nì ti-Dindaan ni-Nimbɔtiu deedee, kí nīn ŋúb́ u-bɔkpaaŋi kí nīn tɔ́ u-marab, kii ni nín bíi ŋáań pu díǹ nee.»

Saraabi bin bi ŋá ki tīī ti-Dindaanee

(Kpèè 2 Kroo 7.4-10)

62 Ubɔti saloomɔn nì Isirayeel yab kɔkɔ kpáfì ki ŋá saraabi ki tīī ti-Dindaan. 63 Saloomɔn nìn kūū inaa kutukub mmuŋku nì bili, ní ki kūū ipii nì iŋoobu kutukub dilaataal nì mmuŋku ki ŋá mpèé saraau. Bi nín ŋá pu ki dū kunimbɔtidii ki sú ti-Dindaanee dee. 64 Ŋwiin gbanti mbaanti ní ubɔti dū dicindi din bí kunimbɔtidii nyɔkɔpuee ki sú ti-Dindaan. Di sá yii tasa kúti saraafaŋŋu ŋun nìn bí kunimbɔtidii punyɔkɔki caŋinee kaa nìn náaǹ bí ŋmā kí wà saraabi kɔkɔ. An puee kunimbɔtidii cindin ní u nìn dū saraawɔkaa nì tijin saraabi nì mpèé saraabi kpam ki wùn̄ ki ŋá saraa.

65 Ŋyunti gbanti mbaanti ní Saloomɔn nì Isirayeel yab kɔkɔ kpáfì ki jíń tibìń jiŋaaliu. An nìn sá dinikitikpaandi ní, binib nìn nyánní doooo Leeboo-Amaati kitiŋ yilpu pú ki cáá sāā Eejipiti buŋŋu kitiŋ taapu pú. Bi nìn jíń jiŋaal gbanti iwiin iluli ní ti-Dindaan nimbiin, ní ki gíti kútì iwiin iluli, an kpáfìi ŋá ŋwiin ŋubɔ kpá saalku. 66 Kinyɔnliliitii iwiin inii dalee ní Saloomɔn yāntì Isirayeel yab nín gítí bi-dumpui. Samaa nìn jáam̀ ubɔti ní ki nín kóò bi-tantibin nì mmɔn nì dipɔɔpindi, kun puee ti-Dindaan nìn dàkā u-tɔntɔnliu Daafiidi nì u-nibul Isirayeel kulaŋŋaŋfitiiu.